1. ¿Kʼusi spasoj ta jtojolaltik li Jeovae?

¿MI XVUL ta joltik kʼuxi lijkʼot ta stestigo Jeova? Baʼyel, xuʼ van oy buchʼu laj yalbutik «li lekil aʼyejetike», xuʼ van jaʼ jtot jmeʼtik, junuk jchiʼiltik ta abtel o ta chanun o junuk testigo ti jaʼo te echʼ xchol mantal ta jnatike (Mar. 13:10). Ta tsʼakal une, oy buchʼu la xchʼak skʼakʼal sventa xakʼbutik estudio xchiʼuk lek la xchapan sba. Vaʼun, lik jkʼantik li Jeovae xchiʼuk la jchantik ti skʼanojutik eke. Jaʼ laj yikʼutik tal ta steklumal li Jeovae. Ta skoj ti jaʼutik xa yajtsʼaklom Kristoe, jpatoj koʼontontik ti xuʼ xijkuxi sbatel osile (Juan 6:44). Ta jtojbetik tajek ta vokol Jeova ti oy buchʼu la xchanubtasutike xchiʼuk ti xuʼ xijtun ta stojolale.

2. ¿Kʼusi ta jkʼeltik batel li ta xchanobil liʼe?

² Ta skoj ti ochemutik xa ta mantale, xuʼ jkoltatik yantik sventa xojtikinik li mantal eke. Junantik ermanoetike mu vokoluk chaʼiik ti xcholik mantal ta naetike, pe jaʼ vokol chaʼiik yakʼel estudio. ¿Mi jaʼ jech vokol chkaʼitik ek? Mi jeche, ta me skoltautik li kʼusitik ta jchantik li ta xchanobil liʼe. Ta jkʼeltik batel kʼusi tstij koʼontontik sventa jpastik ta yajtsʼaklom Kristo li krixchanoetike xchiʼuk kʼuxi xuʼ stsal kuʼuntik li kʼusitik xuʼ smakutik ta yakʼel estudioe. Pe baʼyel chlik jkʼeltik kʼu yuʼun skʼan xijchanubtasvan ti maʼuk noʼox ti ta jcholtik mantale.

3. ¿Kʼu yuʼun ta jcholtik mantal?

³ Kʼalal ay ta balumil li Jesuse, oy chaʼtos kʼusi laj yalbe yajchankʼoptak ti akʼo spasike. Baʼyel, laj yalbe ti akʼo  xcholik li lekil aʼyejetik ta sventa li Ajvalilal yuʼun Diose xchiʼuk laj yakʼbe yilik kʼuxi tspasik (Mat. 10:7; Luk. 8:1). Jtos ti kʼusi laj yalanbee jaʼ li kʼusi xuʼ spasik kʼalal mi la xchʼamik mantal li krixchanoetike o kʼalal mu skʼan xchʼamike (Luk. 9:2-5). Jech xtok, laj yalanbe ti chcholbeik mantal «skotol li jteklumetike» (Mat. 24:14; Ech. 1:8). Mu ventauk ti kʼu yelan chaʼiik li krixchanoetike skʼan xalbeik ta sventa li Ajvalilal yuʼun Diose xchiʼuk li kʼusi tspase.

4. Jech kʼuchaʼal chal Mateo 28:18 kʼalal ta 20, ¿kʼusi yan skʼan jpastik ti maʼuk noʼox ti jcholtik mantale?

⁴ ¿Kʼusi jaʼ li xchaʼtosal ti laj yal komel Jesus ti skʼan spas li yajchankʼoptake? Laj yalanbe ti xchanubtasik yantik ta xchʼunel skotol li kʼusitik laj yale. Pe ¿mi jaʼ noʼox jech laj yalanbe komel li ermanoetik ta baʼyel siglo jech kʼuchaʼal chal junantike? Moʼoj, yuʼun li Jesuse laj yal ti jech-o skʼan jpastik li avie. Jaʼ to tstsuts «mi poʼot xa ox xlaj skotol li kʼusitik oy ta balumile» (kʼelo Mateo 28:18-20). Yileluke, jaʼo jech laj yal Jesus kʼalal laj yakʼ sba ta ilel ta stojolal li mas ta voʼob sien yajchankʼoptake (1 Kor. 15:6). Kʼalal oy kʼusi laj yakʼbe yil Juan xtoke, laj yal ta jamal ti tskʼan ti jkotoltik jkoltatik yantik sventa xojtikinik li Jeovae (Apok. 22:17).

5. Jech kʼuchaʼal chal 1 Korintios 3:6 kʼalal ta 9, ¿kʼusi skoʼoltasobil laj yal Pablo sventa xakʼ ta ilel ti xkoʼolajtik li cholmantal xchiʼuk li chanubtasvaneje?

⁵ Li jtakbol Pabloe la skoʼoltajes ta tsʼunolajel li spasel ta yajtsʼaklom Kristo li krixchanoetike. Jaʼ jech laj yakʼ ta ilel ti mu baluk noʼox ti oy kʼusi ta jtsʼuntike. Xi laj yalbe li jkorintoetike: «Voʼon la jtsʼun, Apolos laj yatʼes [...]. Jaʼoxuk yosil Dios ti yakal chichʼ abtelanele» (kʼelo 1 Korintios 3:6-9). Li buchʼutik chij-abtej ta «yosil Diose» maʼuk noʼox ti oy kʼusi ta jtsʼuntike, yuʼun ta xkatʼestik xchiʼuk ta jkʼeltik sventa lekuk xchʼie (Juan 4:35). Pe jnaʼojtik onoʼox ti jaʼ chakʼ chʼiuk li Diose.

6. ¿Kʼusi skʼan xal ti chijchanubtasvane?

⁶ Yakal jsaʼtik «li buchʼutik oy lek ta yoʼontonik stael li kuxlejal sbatel osile» (Ech. 13:48). Sventa xkʼotik ta yajchankʼop Kristoe, skʼan jkoltatik sventa 1) xaʼibeik smelolal, 2) xchʼunik xchiʼuk 3) xakʼ ta xkuxlejalik li kʼusi yakal chchanik ta Vivliae (Juan 17:3; Kol. 2:6, 7; 1 Tes. 2:13). Jkotoltik xuʼ jkoltatik li buchʼu chichʼ estudio kʼalal chkakʼbetik yil ti jkʼanojtike xchiʼuk ti lek ta jchʼamtik kʼalal chkʼot li ta tsobajeletike (Juan 13:35). Li buchʼu chchanubtasvane skʼan van jal xchʼak yorail xchiʼuk xchapan sba lek yoʼ skolta li yaj-estudio sventa xikta spasel li kʼusitik toʼox nopem xaʼie o ti sjel li kʼusitik xchʼunoje (2 Kor. 10:4, 5). Mu ta aniluk onoʼox van tsjel xkuxlejal li jun krixchano sventa xichʼ voʼe, pe oy me sbalil mi la jkoltatike.

7. ¿Kʼu yuʼun ta jcholtik mantal xchiʼuk ta jpastik ta yajtsʼaklom Kristo li krixchanoetike?

⁷ ¿Kʼu yuʼun ta jcholtik mantal xchiʼuk ta jpastik ta yajtsʼaklom Kristo li krixchanoetike? Jaʼ ta skoj ti jkʼanojtik li Jeovae. Kʼalal chkakʼtik persa ta jcholtik mantal xchiʼuk ti jpastik ta yajtsʼaklom Kristo li krixchanoetike, chkakʼtik ta ilel ti jkʼanojtik li Diose (1 Juan 5:3). Jnoptik ta sventa liʼe: ta skoj ti jkʼanojtik li Jeovae, jaʼ la stij koʼontontik yoʼ xijlokʼ ta cholmantal. ¿Mi kʼun laj kaʼitik? Xuʼ van muʼyuk. Lijxiʼ van tajek kʼalal lijlokʼ ta cholmantal ta sba veltae, pe jech la jpastik ta skoj ti  jnaʼojtik ti jaʼ jech yalojbutik li Jesuse. Mu xa van masuk vokol chkaʼitik xcholel mantal li avie, pe ¿mi yakal xa chkakʼtik estudio? Xuʼ van jaʼ vokol to chkaʼitik. Jkʼanbetik Jeova ti akʼo stsal kuʼuntik li xiʼele sventa oyuk buchʼu jakʼbetik mi tskʼan chichʼ estudio. Vaʼun, xuʼ skoltautik sventa x-ayan ta koʼontontik spasel ta yajchankʼop Kristo li krixchanoetike.

8. Jech kʼuchaʼal chal Markos 6:34, ¿kʼusi yan srasonal ti ta jchanubtastik li krixchanoetike?

⁸ Chijchanubtasvan xtok ta skoj ti jkʼanojtik li krixchanoetike. Jun veltae, li Jesus xchiʼuk yajchankʼoptake lubemik xa ox tajek ta skoj ti jal la xcholik mantale, jaʼ yuʼun bat saʼik ti bu xuʼ xkux yoʼontonike. Pe te xa malabilik yuʼun epal krixchanoetik. Kʼuxubaj ta yoʼonton li Jesuse, vaʼun «ep kʼusitik lik yakʼbe xchan» (kʼelo Markos 6:34). ¿Kʼu yuʼun ti jech la spas li Jesuse? Yuʼun laj yaʼibe smelolal ti kʼu yelan chaʼi sbaike xchiʼuk ayan ta yoʼonton skoltael. Snaʼoj ti yakal chil svokolike xchiʼuk ti skʼan patbel yoʼontonike. Li avi eke, jaʼ jech skʼan patbel yoʼontonik li krixchanoetike akʼo mi xmuyubajik noʼox yilel. Xkoʼolajik kʼuchaʼal chʼayemal chij ti muʼyuk buchʼu xbeiltasatike. Li jtakbol Pabloe laj yal ti chʼabal sdiosike xchiʼuk ti muʼyuk spatobil yoʼontonike (Efes. 2:12). Jaʼ stamojik batel «li sbelel lajelale» (Mat. 7:13). Kʼalal chkakʼtik venta ti nom oyik ta stojolal Dios li krixchanoetike, li kʼanelal xchiʼuk xkʼuxul koʼontontike jaʼ tstij koʼontontik yoʼ jkoltatik. Jaʼ mas to xuʼ te jkoltatik mi chkakʼbetik estudioe.

9. Jech kʼuchaʼal chal Filipenses 2:13, ¿kʼuxi xuʼ skoltautik li Jeovae?

⁹ Xuʼ van mu jkʼan xkakʼtik estudio ta skoj ti jnaʼojtik ti skʼan jchʼakbetik lek yoraile. Mi jaʼ jeche, kalbetik Jeova ti kʼu yelan chkaʼi jbatike xchiʼuk kalbetik ti akʼo skoltautik yoʼ x-ayan ta koʼontontik stael junuk j-estudiotike (kʼelo Filipenses 2:13). Li jtakbol Juane laj yal ti tstakʼ j-orasiontik Dios mi jaʼ ta jkʼanbetik li kʼusi oy ta yoʼontone (1 Juan 5:14, 15). Jaʼ yuʼun, xuʼ jchʼuntik ti tskoltautik Jeova yoʼ x-ayan ta koʼontontik spasel ta yajchankʼop Kristo li krixchanoetike.

10, 11. ¿Kʼu van yuʼun mu jkʼan xkakʼtik estudio?

¹⁰ Jnaʼojtik ti skʼan jpastik ta yajchankʼop Kristo li krixchanoetike. Pe xuʼ van oy kʼusitik tsmakutik ta spasel jech kʼuchaʼal oy ta koʼontontike. Jkʼeltik batel junantik xchiʼuk jkʼeltik kʼuxi xuʼ stsal kuʼuntik.

¹¹ Mu masuk kʼusi spas kuʼuntik yilel ta skoj ti kʼu yelan jkuxlejaltike. Jech kʼuchaʼal liʼe, junantik jcholmantaletike oy xa sjabilalik o ipik noʼox. Mi jaʼ jech jnuptanojtike, jnoptik li kʼusi laj yakʼ jchantik li tsatsal chamel COVID-19: ti xuʼ xkakʼtik chanubtasel ta Vivlia ta telefono o ta Internet. Xuʼ xa noʼox te ta jnatik xkakʼtik estudio. Jech xtok, junantik krixchanoetik ti tskʼan chchanik Vivliae jaʼo muʼyuk xokolik kʼalal chcholik mantal li ermanoetike. ¿Mi xuʼ van voʼotik chkakʼbetik estudio kʼalal jaʼo lek chaʼiike, xuʼ van ta sob tajek o ta ikʼ xa osil? Li Jesuse ta ikʼ osil la xchanubtas li Nikodemoe, yuʼun jaʼ jech la skʼan li Nikodemoe (Juan 3:1, 2).

12. ¿Kʼusi xuʼ skoltautik mi ta jnoptik ti mu xijtojob ta yakʼel estudioe?

¹² Mu xijtojob ta yakʼel estudio chkaʼitik. Xuʼ van ta jnoptik ti ep to kʼusi skʼan jchantik o ti mu xijtojob lek ta chanubtasvaneje. Mi jaʼ jech chkaʼi jbatike, oy oxtos kʼusi xuʼ skoltautik. Baʼyel, li  Jeovae chapal chilutik sventa jchanubtastik li yantike (2 Kor. 3:5). Xchibal, li Jesus ti jaʼ xa oy ta skʼob «skotol li kʼusitik ta vinajel xchiʼuk ta sba balumile» yalojbutik ti skʼan xijchanubtasvane (Mat. 28:18). Yoxibal, mu jtukuk oyutik. Jech kʼuchaʼal laj yichʼ koltael li Jesuse, xuʼ jpat koʼontontik ti tskoltautik Jeova sventa jnaʼtik li kʼusi xuʼ xkaltike (Juan 8:28; 12:49). Jech xtok, sventa jnaʼtik kʼuxi xuʼ jlikestik xchiʼuk xkakʼtik estudioe, xuʼ jkʼanbetik koltael li jkʼelvanej ta grupo sventa cholmantale, junuk prekursor ti lek chaneme o junuk jcholmantal ti lek xtojobe. Mi chbat jchiʼintik ta yakʼel s-estudioike, mas me chijtojob ta chanubtasvanej.

13. ¿Kʼu yuʼun skʼan xnop xkaʼitik ti kʼu xa yelan chijchanubtasvane?

¹³ Vokol chnop xkaʼitik ti kʼu xa yelan chijchanubtasvane xchiʼuk li kʼusitik ta jtunestike. Ti kʼu yelan chijchanubtasvan ta Vivliae jelem xa. Jaʼ xa chijchanubtasvan-o li ta livro Kʼupino akuxlejale. Skʼan ti jchapan jbatik lek kʼalal chijchanubtasvane xchiʼuk ti mu xa jechuk xkakʼtik estudio kʼuchaʼal nopemutik toʼox spasele. Mas xa jutuk parafoetik ta jchantik sventa jaʼuk mas jchiʼintik ta loʼil li kaj-estudiotike. Mas xa chkakʼtik ta ilel videoetik xchiʼuk ta jtunestik li kʼusitik oy ta jpajinatik xchiʼuk li ta JW Library^®. Mi vokol chkaʼitik stunesel li kʼusitik taje, oyuk buchʼu xkalbetik ti akʼo xchanubtasutike. Mu kʼunuk chkaʼitik kʼalal oy kʼusi ta jeltike, yuʼun jaʼ mas lek chkaʼitik spasel li kʼusitik nopemutik onoʼoxe. Mi la jkʼanbetik koltael li Jeova xchiʼuk li kermanotaktike, ta me xnop xkaʼitik xchiʼuk mas ta jkʼupintik yakʼel estudio. Jech kʼuchaʼal laj yal jun prekursore, ti kʼu xa yelan chijchanubtasvane xuʼ skʼupin li buchʼu chichʼ estudio xchiʼuk li buchʼu chchanubtasvane.

14. 1) ¿Kʼusi skʼan teuk ta joltik mi mu skʼan xchikintaik li kʼusi chkaltike? 2) ¿Kʼuxi tspat koʼontontik li kʼusi chal ta 1 Korintios 3:6 xchiʼuk 7?

¹⁴ Vokol ta tael buchʼu chkakʼbetik estudio yileluk. Junantik krixchanoetike xuʼ van mu skʼan xchikintaik li kʼusi chkaltike o xuʼ van chopol chilik ti ta jcholtik mantale. ¿Kʼusi xuʼ skoltautik sventa xijmuyubajuk-o? Teuk ta joltik ti ta anil noʼox xuʼ xjel xkuxlejal li krixchanoetike. Li buchʼutik muʼyuk toʼox ta yoʼontonik mantale xuʼ van chakʼik venta ta tsʼakal ti chtun yuʼunik ti xbeiltasatik yuʼun Diose (Mat. 5:3). Junantik krixchanoetik ti mu toʼox skʼanik li jvuntike lik yichʼik estudio ta tsʼakal. Jech xtok, jnaʼojtik ti jaʼ Yajval Abtel li Jeovae (Mat. 9:38). Li stuke tskʼan ti oyuk-o kʼusi jtsʼuntik xchiʼuk ti xkatʼestike, pe jaʼ chakʼ chʼiuk (1 Kor. 3:6, 7). Akʼo mi muʼyuk buchʼu chkakʼbetik estudio li avie, tspat koʼontontik ti ep sbalil chil Jeova ti chkakʼtik persa skoltael li krixchanoetike, maʼuk tskʼel kʼu yepal vunetik ta jpuktik o jayib j-estudiotik. *

15. ¿Kʼu yelan chaʼi sba Jeova kʼalal oy buchʼu chlik yakʼ ta xkuxlejal li kʼusi chchane?

¹⁵ Li Jeovae xmuyubaj tajek kʼalal oy buchʼu chchʼun li kʼusi chal Vivliae xchiʼuk ti chlik yalbe li yantike (Prov. 23:15, 16). Ta melel, xmuyubaj tajek kuʼuntik ta skoj li kʼusi yakal chkʼot ta pasel avie. Jech kʼuchaʼal liʼe, li ta septiembre  ta 2019 kʼalal ta agosto ta 2020 laj yichʼ akʼel 7,705,765 estudio akʼo mi jaʼo yakal li tsatsal chamele. Ta skoj taje, laj yichʼik voʼ 241,994 krixchanoetik. Vaʼun, li stukike chakʼik chanubtasel ta Vivlia xchiʼuk tskoltaik yan krixchanoetik yoʼ xkʼotik ta yajchankʼop Kristo (Luk. 6:40). Ta melel, xmuyubaj kuʼuntik Jeova kʼalal ta jpastik ta yajchankʼop Kristo li krixchanoetike.

16. ¿Kʼusi xuʼ xkakʼ ta koʼontontik spasel?

¹⁶ Skʼan onoʼox xkakʼ kipaltik sventa jkoltatik li jun krixchano yoʼ xlik skʼan li Jeovae, pe ta me skoltautik Jeova yoʼ jkolta jbatik ta spasel ta yajtsʼaklom Kristo li krixchanoetike. ¿Mi xuʼ chkakʼ ta koʼontontik slikesel xchiʼuk yakʼel junuk estudio? Xuʼ van labal to sba chkaʼitik li kʼusi xuʼ xkʼot ta pasel mi laj kalbetik ti xuʼ xkakʼbetik estudio li buchʼutik xkojtikintike. Ta melel, ta onoʼox skoltautik li Jeovae.

17. ¿Kʼu yelan chkaʼi jbatik mi oy buchʼu lik kakʼbetik estudioe?

¹⁷ Jaʼ jun mukʼta matanal xchiʼuk xijmuyubaj yuʼun kʼalal ta jcholtik mantal xchiʼuk chijchanubtasvane. Li jtakbol Pablo ti ep buchʼutik la skolta ta Tesalonika sventa xkʼotik ta yajtsʼaklom Kristoe xi laj yal ti kʼu yelan laj yaʼi sbae: «¿Kʼusi jaʼ li spatobil koʼontonkutike, li xkuxetel koʼontonkutike xchiʼuk li jkoronakutik ta muyubajel ta yeloval li Kajvaltik Jesus kʼalal liʼ xa oye? ¿Mi mu jaʼuk li voʼoxuk ta melele? Ta melel, jaʼ kʼotemoxuk ta jmukʼulalkutik xchiʼuk ta xkuxetel koʼontonkutik» (1 Tes. 2:19, 20; Ech. 17:1-4). Li avie, epal yajtsʼaklomtak Kristo jaʼ jech xmuyubajik ek. Li ermana Stéphanie xchiʼuk smalale ep buchʼutik skoltaojik yoʼ xichʼik voʼ. Xi chal li ermanae: «Solel xijmuyubaj tajek kʼalal oy buchʼu ta jkoltatik yoʼ xakʼ sba ta stojolal Jeovae».