1, 2. ¿Kʼuxi tskoltautik li kʼusi chal Isaias 65:16 xchiʼuk 17 sventa xkuch-o batel kuʼuntike?

«¡MU XALUBTSAJ!». Jaʼ jech sbi li asamblea rejional echʼ ta 2017. Li ta asambleae, te laj yalbutik kʼusi xuʼ jpastik yoʼ xkuch batel kuʼuntik li jvokoltike. Akʼo mi echʼem xa chanib jabil, jech-o yakal chkuch batel kuʼuntik li jvokoltike.

² ¿Kʼusitik vokoliletik ti jaʼtik to jnuptanojtike? Xuʼ van jaʼtik to chamem junuk kutsʼ kalaltik o junuk kamigotik, stsakojutik tsatsal chamel, yantik xa ch-epaj batel jabilaltik, kiloj jvokoltik ta nikel, nojelal ta voʼ o yan kʼusitik, kichʼojtik majel, kontrainel o chkil jvokoltik ta skoj li tsatsal chamel COVID-19. ¿Mi mu jechuk ti ta jkʼantik ti xkʼot yorail ti xlaj skʼoplal skotol taje? Muʼyuk xa chvul ta joltik li kʼusitik taje xchiʼuk chlaj-o skʼoplal ta j-echʼel (kʼelo Isaias 65:16, 17).

3. ¿Kʼusi skʼan jpastik li avie, xchiʼuk kʼu yuʼun?

³ Li jkuxlejaltik avie toj tsots, pe xuʼ van mas to tsots kʼusi jnuptantik li ta jelavele (Mat. 24:21). Jaʼ yuʼun, skʼan xkuchuk-o batel kuʼuntik. ¿Kʼu yuʼun skʼan ti jechuk-o jpastike? Xi laj yal li Jesuse: «Ta sventa ti chkuch avuʼunike, chakuxiik-o» (Luk. 21:19). Li kʼusi tskoltautike jaʼ mi ta jnopbetik skʼoplal kʼuxi kuchem yuʼun yantik li kʼusi tsnuptanike.

4. ¿Kʼu yuʼun xuʼ xkaltik ti kuchem yuʼun skotol li Jeovae?

⁴ ¿Buchʼu ti kuchem yuʼun skotole? Jaʼ li Jeovae. Mi labal sba chkaʼitik taje, jnopbetik skʼoplal liʼe. Ta skoj ti jaʼ ventainbil yuʼun Satanas li balumile, noj ta choplejal. Li Jeovae xuʼ slajesbe skʼoplal ta ora li chopol balumile, pe smalaojbe to lek yorail (Rom. 9:22). Jaʼ yuʼun, oy kʼusitik yakal chkuch batel yuʼun li avie. Jkʼeltik batel baluntos.

5. ¿Kʼuxi chopol kʼoptabil li sbi Diose, xchiʼuk kʼu yelan chavaʼi aba ti jech yichʼoj pasbele?

⁵ Yichʼoj chopol kʼoptabel li sbie. Li Jeovae skʼanoj li sbie xchiʼuk tskʼan ti xichʼuk ichʼbel ta mukʼe (Is. 42:8). Pe leʼ xa ta vakmil jabile, chopol kʼoptabil tal li sbie (Sal. 74:10, 18, 23). Li buchʼu baʼyel jech la spase jaʼ li Diablo ti jaʼ skʼan xal «jchopolkʼoptavanej». Li ta nichimaltik Edene, laj yalbe Adan xchiʼuk Eva ti oy la kʼusi mu x-akʼbat skʼupinik yuʼun li Diose (Jen. 3:1-5). Jech-o yichʼoj alel tal ti oy la kʼusi mu xakʼ jkʼupintik spasel li Jeovae. Ta skoj ti mu skʼan ti masuk to xichʼ chopol kʼoptabel sbi Stot li Jesuse, laj yalbe yajchankʼoptak ti xiuk skʼanik ta orasione: «Jtotik ta vinajel, akʼo yichʼ chʼultajesel li abie» (Mat. 6:9).

6. ¿Kʼu yuʼun jal smalaoj Jeova yoʼ xakʼ ta ilel ti stuk noʼox xuʼ x-ajvalilaje?

⁶ Albil ti muʼyuk lek ti kʼu yelan ch-ajvalilaje. Li Jeovae jaʼ noʼox stuk oy sderecho sventa tsventain li vinajel balumile xchiʼuk jaʼ noʼox stuk ti toj lek ch-ajvalilaje (Apok. 4:11). Pe li Diabloe yakʼoj persa sventa xakʼbe snop li anjeletik xchiʼuk li krixchanoetik ti muʼyuk la sderecho ch-ajvalilaj li Diose. Sventa xvinaj ti jaʼ noʼox oy sderecho ch-ajvalilaj li Jeova xchiʼuk ti jaʼ noʼox stuk ti lek xtojobe, skʼan x-echʼ kʼuk sjalil. Li Jeovae yakʼoj ti akʼo sventain sba stuk li krixchanoetik yoʼ xakʼik venta ti muʼyuk kʼusi lek tstaik mi muʼyuk la stsakik ta ventae (Jer. 10:23). Ta skoj ti oy smalaobil yuʼun li Diose, jamal chvinaj ti stuk noʼox lekil ajvalile xchiʼuk ti jaʼ noʼox xuʼ xichʼ talel jun oʼontonal xchiʼuk lekilal ta balumil li Ajvalilal yuʼune.

7. ¿Buchʼutik stoyoj sbaik talel ta stojolal Jeova, xchiʼuk kʼusi tspasbatik?

⁷ Stoyoj sbaik junantik xnichʼnabtak. Li Jeovae la spas tukʼil anjeletik xchiʼuk tukʼil krixchanoetik, pe li jun jtoyba anjel ti Satanas sbi ti jaʼ skʼan xal «jkontrainvaneje» la sloʼla Adan xchiʼuk Eva sventa skontrainik li Jeova eke. Pe maʼuk noʼox, la stoy sbaik yan anjeletik xchiʼuk yan krixchanoetik xtok (Jud. 6). Ta mas tsʼakale, junantik j-israeletik xtoke ti jaʼ toʼox jun jteklum ti tʼujbil yuʼun Diose la spʼajik xchiʼuk lik yichʼik ta mukʼ jecheʼ diosetik (Is. 63:8, 10). Jaʼ yuʼun, kontrainbil laj yaʼi sba li Jeovae. Pe kuchem-o yuʼun xchiʼuk jech-o chkuch batel yuʼun jaʼ to mi la slajesbe skʼoplal li jtoybaetike. Mi kʼot ta pasel taje, xmuyubajik li yajtuneltak Jeova ti kuchem tal yuʼunik ek li kʼusitik chopol chkʼot ta pasel li ta balumile.

8, 9. ¿K’usi jutbil k’opetik chalik ta stojolal Jeova, xchiʼuk kʼuxi xuʼ jpakbetik skʼoplal?

⁸ Li jutbil kʼopetik chal Diabloe. Li Satanase la stikʼbe smul li tukʼil Job xchiʼuk yan yajtuneltak Dios ti jaʼ noʼox la chtunik ta stojolal ta skoj ti oy kʼusi lek ch-akʼbatike (Job 1:8-11; 2:3-5). Li Diabloe jech-o tstikʼ mulil li avie (Apok. 12:10). Pe kʼalal chkuch kuʼuntik li vokoliletik xchiʼuk ti tukʼ chkakʼ jbatik ta stojolal Jeova ta skoj ti jkʼanojtike, jaʼ jech chkakʼtik ta ilel ti jaʼ jun jutkʼop li Satanase. Vaʼun, mi kuch kuʼuntike, ta me xakʼbutik bendision li Jeova jech kʼuchaʼal laj yakʼbe li Jobe (Sant. 5:11).

⁹ Li Satanase tstunes li jnitvanejetik ta relijion sventa xak’be xch’un li krixchanoetik ti toj chopol li Jeovae xchiʼuk ti jaʼ chakʼ talel li jvokoltike. Jech xtok, k’alal chcham jun uni olole, junantike chalik ti  laj la yik’ batel ta vinajel li Diose, yuʼun la chtun yuʼun jun yuni anjel. ¡Toj echʼ xa no’ox chopol li k’usi chalik ta stojolal Jeovae! Pe li vo’otike jnaʼojtik ti mu meleluke. Ja’ yu’un, ma’uk chkak’betik smulin Dios k’alal tsots chij-ipaje o k’alal oy buchʼu chcham kuʼuntike. Jpatoj ko’ontontik ti tslajesbe sk’oplal li jvokoltike. Xu’ xkalbetik yantik ti jaʼ jun jkʼanvanej Dios li Jeovae. Vaʼun, jaʼ jech tstakʼbe sutel li buchʼu chchopol kʼoptaate (Prov. 27:11).

10. ¿Kʼusi chak’ jchantik ta stojolal Jeova li Salmo 22:23 xchi’uk 24?

¹⁰ K’alal chil ti oy svokoltak li yajtuneltake. Li Jeovae oy xk’uxul yo’onton, ja’ yu’un k’ux cha’i k’alal chil ti chkichʼtik kontrainele, k’alal chij-ipajutike o k’alal chkil jvokoltik ta skoj ti jpasmulilutike (k’elo Salmo 22:23, 24). K’ux cha’i li jvokoltike, ja’ yu’un tslajesbe sk’oplal (ko’oltaso xchi’uk Eksodo 3:7, 8; Isaias 63:9). Chk’ot ta pasel li k’usi xi jamal yaloje: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (Apok. 21:4).

11. ¿Kʼu yelan chaʼi sba Jeova kʼalal tsvules ta sjol li tukʼil yajtuneltak ti chamemike?

¹¹ Kʼalal chcham li yamigotake. ¿K’u yelan cha’i sba Jeova ti chamem li tuk’il yajtuneltake? Oy ta yoʼonton tskʼelbe satik yan velta (Job 14:15). Jnoptik no’ox k’u to yepal tsna’ li Abraan ti ja’ yamigoe (Sant. 2:23). O jnoptik no’ox k’u to yepal tsna’ Moises ti «skʼelojbe sba satik» k’alal chchi’in to’ox sbaik ta lo’ile (Eks. 33:11). Jech xtok, ¡oy ta yo’onton chchikinta yan velta ti k’u yelan chichʼ kʼupil kʼoptael ta kʼejojetik yuʼun li  David xchiʼuk li yan jtsʼibajometik yuʼun salmoe! (Sal. 104:33). Ak’o mi yakal chkux yoʼontonik li yamigotake, muʼyuk xchʼayojan ta sjol (Is. 49:15). Xvul lek ta sjol k’u to’ox yelan li yamigotake, «yuʼun kuxul chil skotolik» (Luk. 20:38). Chk’ot sk’ak’alil ti chcha’kuxesane, chchikintabe li s-orasionike xchiʼuk chmuyubaj ti kʼu yelan ch-ichʼat ta mukʼe. ¿Mi mu jechuk ti tspat koʼontontik mi oy buchʼu chamem kuʼuntike?

12. ¿Kʼusitik tsvul-o tajek yoʼonton Jeova li avie?

¹² Kʼalal ch-ilbajinvanik li chopol krixchanoetike. Kʼalal la stoy sbaik li ta nichimaltik Edene, li Jeovae snaʼoj ti tsok batel li kuxlejale. Li Jeovae muʼyuk lek chil li choplejale, ti muʼyuk tukʼ kʼusi chichʼ pasele xchiʼuk li majbail oy avie. Ta onoʼox svul yoʼonton ta stojolal li buchʼutik mu snaʼ spak skʼoplalike, jech kʼuchaʼal li buchʼutik chamem stot smeʼike xchiʼuk li antsetik ti chamem xa smalalike (Sak. 7:9, 10). Jech xtok, kʼux tajek chaʼi kʼalal chil ti chichʼik ilbajinel xchiʼuk chichʼik bajel ta chukel li tukʼil yajtuneltake. Akotolik ti kuchem tal avuʼunik kʼuchaʼal li Jeovae teuk me ta anopbenik liʼe: li Jeovae skʼanojoxuk tajek.

13. ¿Kʼu yelan chil Jeova ti chmulivaj li krixchanoetike, xchiʼuk kʼusi tspas?

¹³ Sokem xa tajek ti kʼu yelan chchiʼin sbaik ta vayele. Li Diose la smeltsanutik jech kʼuchaʼal slokʼol stuk, pe li Satanase tskʼan tsokesutik. Kʼalal jaʼo kuxi li Noee, «li Jeovae laj yakʼ venta ti epajem li xchoplejal krixchanoetik li ta balumile». Vaʼun, «chopol laj yaʼi sba ti la spas krixchanoetik li ta balumile xchiʼuk kʼux laj yaʼi ta yoʼonton» (Jen. 6:5, 6, tsʼib ta yok vun, 11). ¿Mi mu jechuk ti mas xa sokem talel jkuxlejaltik li avie? Li Diabloe tskʼupin tajek ti lek xa noʼox chichʼ ilel ti sokem tajek li chiʼinejbail ta vayele, mu ventauk mi vinik xchiʼuk ants o xchiʼil noʼox sbaik ta vinikal o ta antsil (Efes. 4:18, 19). Pe mas to xmuyubaj kʼalal jaʼ chmulivaj jun yajtunel Jeovae. Kʼalal mi laj yakʼbe slajeb li buchʼutik mu skʼan sjel stalelalike, te chakʼ ta ilel Jeova ti mu lekuk chil li mulivajele.

14. ¿Kʼusi yakal tspasbe balumil xchiʼuk chonbolometik li krixchanoetike?

¹⁴ Ti yakal tsokesik li balumile. Li krixchanoetike maʼuk noʼox «yakʼojbe sba svokol stukik», yuʼun muʼyuk yakal tspasik li kʼusi oy ox ta yoʼonton Jeovae: ti xchabiik li chonbolometike xchiʼuk li balumile (Ekl. 8:9; Jen. 1:28). Junantik sientifikoetike chalik ti krixchanoetike xuʼ van slajesbeik skʼoplal jun miyon chonbolometik xchiʼuk jeltos teʼetik li ta jabiletik chtale. ¡Jaʼ yuʼun, tsvul tajek yoʼontonik! Ta jtojbetik ta vokol Jeova ti tslajesbe skʼoplal li buchʼutik yakal tsokesik li balumile xchiʼuk ti tskʼatajes ta paraisoe (Is. 35:1; Apok. 11:18).

15, 16. ¿Kʼusi tstij koʼontontik yoʼ xkuch batel kuʼuntik kʼuchaʼal li Jeovae? Albo junuk skʼelobil.

¹⁵ Jnopbetik skʼoplal li kʼusitik kuchem talel yuʼun Jeova ta smilal xa noʼox jabile (kʼelo li rekuadro « Li kʼusitik yakal chkuch yuʼun li Jeovae»). Ti jechuk tskʼane, xuʼ kʼusiuk noʼox ora slajesbe skʼoplal choplejal li Jeovae. Pe ¡jtaojbetik sbalil ti muʼyuk to jech spasoje! Kalbetik junuk skʼelobil. Jnoptik ti ch-albatik jun totil meʼil ti muʼyuk lek chvokʼ li yolike, ti chil svokole xchiʼuk ti muʼyuk jal chkuxie. Akʼo mi snaʼojik ti tsots ta  xaʼiike, xmuyubajik noʼox kʼalal ta xvokʼe. Ta skoj ti skʼanojike, chkuch batel yuʼun li svokolike sventa xakʼbeik kʼusi chtun yuʼun li yolik ti kʼu sjalil kuxule.

¹⁶ Ta skoj ti jaʼutik snitilulal Adan xchiʼuk Evae, jmulavilutik ta xijvokʼ. Pe li Jeovae skʼanojutik xchiʼuk chkʼuxubinutik (1 Juan 4:19). Li Jeovae oy kʼusi xuʼ spas ta jtojolaltik, pe li totil meʼil laj xa kalbetik skʼoplale mu kʼusi stakʼ spasik. Yakʼojbe xa yorail ti bakʼin tslajesbe svokol li xnichʼnabtake (Mat. 24:36). Ta skoj ti skʼanojutike, skʼan me stij koʼontontik sventa jechuk xkuch batel kuʼuntik kʼuchaʼal kuchem talel yuʼune.

17. ¿Kʼuxi tskoltautik li kʼusi chal Ebreos 12:2 xchiʼuk 3 sventa xkuch kuʼuntike?

¹⁷ Toj lek ta chanbel ti kʼu yelan kuchem talel yuʼun li Jeovae. Jaʼ jech kuch yuʼun li Jesus eke. Kʼalal ay ta balumil sventa tal spojutike, kuch yuʼun ti chopol kʼoptaate, ti kʼexlaltasate xchiʼuk ti laj yichʼ jokʼanel ta jtel teʼe (kʼelo Ebreos 12:2, 3). Jaʼ van koltaat ti kʼu yelan kuchem talel yuʼun li Stote. Li voʼotik eke xuʼ me jech stsatsubtasutik.

18. ¿Kʼuxi chakʼ kiltik li 2 Pedro 3:9 ti oy sbalil li smalael yuʼun Jeovae?

¹⁸ (Kʼelo 2 Pedro 3:9). Li Jeovae snaʼoj kʼusi ora chakʼbe slajeb li choplejale. Koliyal li smalael yuʼune, li avie ta smiyonal xa noʼox krixchanoetik chtunik ta stojolal xchiʼuk chichʼik ta mukʼ. Tstojbeik ta vokol Jeova ti kuchem talel yuʼune. Ti manchukuke, muʼyuk vokʼik, muʼyuk la skʼanik xchiʼuk muʼyuk laj yakʼ xkuxlejalik ta stojolal. Kʼalal ta smiyonal xa noʼox chkuch kuʼuntik kʼalal to ta slajebale, te chvinaj ti toj lek ti jaʼ jech kuch talel yuʼun li Jeovae.

19. ¿Kʼusi jpʼel ta koʼontontik spasel, xchiʼuk kʼusi matanal ta jtatik?

¹⁹ Ta skoj ti jaʼ jun Dios ti xmuyubaj noʼox li Jeovae, ta muyubajel kuchem talel yuʼun li vokoliletik yakʼoj talel Satanase (1 Tim. 1:11). Li voʼotik eke xuʼ me ta muyubajel noʼox jmalatik ti chchʼultajes sbi li Jeovae, ti tspakbe skʼoplal li mukʼul pasmantal yuʼune, ti tslajesbe skʼoplal li choplejale xchiʼuk li jvokoltike. Jechuk-o me jpʼel ta koʼontontik xkuch batel kuʼuntik xchiʼuk teuk ta joltik ti yakal chkuch batel yuʼun li Jeova eke. Mi jech la jpastike, xuʼ me xi xkichʼtik albele: «Xmuyubaj noʼox li jun krixchano ti jech-o chkuch yuʼun li prevae, yuʼun mi lek ch-ilate ch-akʼbat li korona sventa kuxlejal ti jech onoʼox yaloj Jeova ta sventa li buchʼutik jech-o chkʼanate» (Sant. 1:12).