XCHANOBIL 31
Epuk sbalil xavil ti xuʼ xakʼopon li Jeovae
«Jechuk kʼuchaʼal pom ti lek chapanbil ta aventa li j-orasione» (SAL. 141:2).
KʼEJOJ 47 Pasbo orasion Jeova jujun kʼakʼal
LI KʼUSI TA JCHANTIKE *
1. ¿Kʼu yelan skʼan xkiltik li orasione?
LI Jpasvanej yuʼun vinajel xchiʼuk balumile yakʼojbutik jun mukʼta matanal: jaʼ ti xuʼ jkʼopontik ta orasione. Taje te smakojbe skʼoplal ti xuʼ kʼusiuk noʼox ora xkalbetik li kʼusi oy ta koʼontontike xchiʼuk ta kʼusiuk kʼopal xuʼ jkʼopontik. Xuʼ jpʼel ta koʼontontik ti chchikinta j-orasiontik akʼo mi ta ospital ta jkʼopontik o ta chukinab. ¿Mi mu jechuk ti ep tajek sbalil chkiltik li matanal taje?
2. ¿Kʼuxi laj yakʼ ta ilel li ajvalil David ti ep sbalil laj yil li orasione?
2 Li ajvalil Davide jaʼ jun matanal laj yil li orasione. Jun veltae, xi laj yalbe ta jun kʼejoj li Jeovae: «Jechuk kʼuchaʼal pom ti lek chapanbil ta aventa li j-orasione» (Sal. 141:1, 2). Li ta skʼakʼalil Davide, tstunesik toʼox chikʼbil pom sventa xichʼik ta mukʼ li Jeovae, ti jaʼ tsmeltsanik lek li paleetike (Eks. 30:34, 35). Yileluke, kʼalal laj yalbe skʼoplal chikʼbil pom li Davide, jaʼ la skʼan laj yal ti tsnop lek li kʼusi chalbe Jeova li ta s-orasione. Li voʼotik eke ta jkʼan ti lekuk xaʼi Jeova li j-orasiontike, jaʼ yuʼun skʼan jnoptik lek li kʼusi chkalbetike.
3. ¿Kʼu yelan skʼan xkakʼ ta ilel jtalelaltik kʼalal ta jkʼopontik li Jeovae, xchiʼuk kʼu yuʼun?
3 Skʼan ta smeloluk noʼox ti kʼu yelan ta jkʼopontik li Jeovae. Jnopbetik skʼoplal li kʼusitik labal sba akʼbat yilik li Isaias, Esekiel, Daniel xchiʼuk Juane. Akʼo mi jeltos kʼusitik laj yilik, xchanvoʼalik laj yalik ti tsots sjuʼel li Jeovae. Li Isaiase laj yil ti te chotol Jeova «ta jun chotlebal sventa ajvalil ti lek toyole» (Is. 6:1-3). Li Esekiele laj yil ti te chotol ta skareta ta vinajel li Jeovae xchiʼuk ti «oy kʼusi xojobinaj ta spat xokon ti xkoʼolaj kʼuchaʼal [vaknakʼobale]» (Esek. 1:26-28). Li Daniele laj yil ti slapoj sakil kʼuʼil «li Buchʼu mu snaʼ xlaj yoraile» xchiʼuk ti te chotol ta chotlebal sventa ajvalil ti oy skʼakʼale (Dan. 7:9, 10). Li Juane laj yil ti Jeovae te chotol ta jun chotlebal sventa ajvalil xchiʼuk li ta spat xokone «oy jun vaknakʼobal ti xkoʼolaj kʼuchaʼal esmeralda tone» (Apok. 4:2-4). Kʼalal ta jnopbetik skʼoplal li smukʼulal Jeovae, tstij koʼontontik sventa jtojbetik ta vokol ti xuʼ jkʼopontik xchiʼuk ti skʼan xkakʼtik ta ilel ti kichʼojtik ta mukʼ kʼalal ta jkʼopontike. Pe ¿kʼusi xuʼ xkalbetik li ta j-orasiontike?
«XI ME YELAN SKʼAN XAPASIK ORASIONE»
4. ¿Kʼusi chakʼ jchantik ti kʼu yelan chanubtasvan ta spasel orasion li Jesuse? (Mateo 6:9, 10).
4 (Kʼelo Mateo 6:9, 10). Li ta Mantaletik ta Vitse, li Jesuse la xchanubtas yajtsʼaklomtak ti kʼu yelan lek chil Dios ti akʼo skʼoponike. Xi laj yal li Jesuse: «Xi me yelan skʼan xapasik orasione». Te une, jaʼ baʼyel lik yalbe skʼoplal liʼe: ti xichʼ chʼultajesbel li sbi Jeovae, ti xtaluk xa li Ajvalilal ti jaʼ tslajesbe skʼoplal skotol li yajkontratak Diose xchiʼuk ti xkʼotuk ta pasel li kʼusi oy ta yoʼonton ta sventa li krixchanoetike xchiʼuk ta sventa li balumile. Mi jaʼ jech chkal ta j-orasiontike, jaʼ jech chkakʼtik ta ilel ti jaʼ oy ta koʼontontik li kʼusi oy ta yoʼonton Jeovae.
5. ¿Kʼu yuʼun muʼyuk chopol ti ta jkʼan ta j-orasiontik li kʼusi chtun kuʼuntike?
5 Li kʼusi laj yal ta tsʼakal Jesuse chakʼ kiltik ti xuʼ jkʼan ta j-orasiontik li kʼusitik chtun kuʼuntike. Xuʼ jkʼanbetik ti akʼo xakʼ jveʼeltik jujun kʼakʼal li Jeovae, ti xakʼutik ta pertone, ti akʼo mu xakʼ xijyal ta mulile xchiʼuk ti skoltautik sventa mu xij-och ta skʼob li Satanase (Mat. 6:11-13). Kʼalal jech ta jkʼanbetike, chkakʼtik ta ilel ti ta jkʼan akʼo skoltautik xchiʼuk ti lekuk xilutike.
¿Kʼusi xuʼ stʼabbe skʼoplal kʼalal jmoj tspas orasion xchiʼuk yajnil li jun ermanoe? (Kʼelo parafo 6). *
6. ¿Mi jaʼ noʼox skʼan xkal ta j-orasiontik li kʼusi laj yakʼ ta chanel Jesuse?
6 Li Jesuse maʼuk laj yal ti jaʼuk xchaʼalilan yajtsʼaklomtak li kʼusi chanubtasvan ta orasione. Kʼalal la skʼopon Jeova ta yantik veltae, jaʼ laj yalbe li kʼusi tsvul-o yoʼontone (Mat. 26:39, 42; Juan 17:1-26). Li voʼotik eke xuʼ xkal ta j-orasiontik li kʼusi ta jvul-o koʼontontike. Jech kʼuchaʼal liʼe, kʼalal oy kʼusi tsots skʼoplal ta jnop ta jpastike, xuʼ jkʼanbe jpʼijiltik li Jeovae (Sal. 119:33, 34). Kʼalal oy kʼusi ta jbaintik ti yikʼaluk van vokol chkaʼitik spasele, xuʼ jkʼanbetik Jeova ti xakʼ jpʼijiltik xchiʼuk ti xkaʼibetik smelolale (Prov. 2:6). Li totil meʼiletike xuʼ spasik orasion ta stojolal li yalab xnichʼnabike xchiʼuk li alab nichʼnabiletike xuʼ spasik orasion ta stojolal li stot smeʼike. Jech xtok, skʼan jpastik orasion ta stojolal li buchʼu chkakʼbetik chanubtasel ta Vivliae xchiʼuk li krixchanoetik ti ta jcholbetik mantale. Pe teuk ta joltik xtok ti maʼuk noʼox ti oy kʼusitik ta jkʼantik li ta j-orasiontike.
¿Kʼusitik xuʼ xkal ta j-orasiontik sventa jkʼupil kʼoptatik Jeova xchiʼuk ti jtojbetik ta vokole? (Kʼelo parafo 7-9). *
7. ¿Kʼu yuʼun skʼan jkʼupil kʼoptatik Jeova li ta j-orasiontike?
7 Kʼalal ta jpastik orasione, skʼan jkʼupil kʼoptatik xtok li Jeovae. Jaʼ noʼox stuk mas sta-o kʼupil kʼoptael. Jun jtsʼibajom yuʼun salmoe xi laj yalbee: «Toj lek avoʼonton xchiʼuk chapalot sventa xachʼay mulil». Xi to laj yalbee: «Jkʼuxubinvanej Diosot xchiʼuk oy slekil avoʼonton, mu ta aniluk chlik skʼakʼal avoʼonton xchiʼuk oy tajek avuʼun tukʼil kʼanelal xchiʼuk tukʼ tajek chavakʼ aba» (Sal. 86:5, 15). Ta skoj ti kʼu yelan stalelal xchiʼuk li kʼusitik tspas li Jeovae, ep tajek srasonal kuʼuntik sventa jkʼupil kʼoptatik.
8. ¿Kʼusitik xuʼ jtojbetik ta vokol li Jeovae? (Salmo 104:12-15, 24).
8 Maʼuk noʼox skʼan jkʼupil kʼoptatik Jeova li ta j-orasiontike, yuʼun skʼan jtojbetik ta vokol xtok li kʼusitik yakʼojbutike. Jech kʼuchaʼal liʼe, ti kʼupil sba skoloraltak li nichimetike, ti ep ta tos kʼusitik xuʼ jlajestik ti lek muike xchiʼuk ti jmoj kʼusitik xuʼ jpastik xchiʼuk li kamigotaktike. Jech chakʼbutik li jkʼanvanej Totil kuʼuntik ta skoj ti tskʼan ti xijmuyubajutike (kʼelo Salmo 104:12-15, 24). Mas to ta jtojbetik ta vokol ti yakʼojbutik epal veʼlil ta mantale xchiʼuk ti yaloj ti lek kʼusitik chakʼbutik ta jelavele.
9. ¿Kʼusi xuʼ jpastik sventa mu xchʼay ta joltik stojbel ta vokol li Jeovae? (1 Tesalonisenses 5:17, 18).
9 Xuʼ van xchʼay ta joltik stojbel ta vokol Jeova skotol li kʼusitik tspas ta jtojolaltike. ¿Kʼusi xuʼ jpastik sventa mu jechuk xkʼot ta jtojolaltike? Xuʼ jtsaktik ta vun li kʼusi jkʼanojbetik Jeova ta orasione xchiʼuk jkʼelilantik li kʼusitik la jtsʼibatik sventa xkiltik kʼu yelan stakʼoj li j-orasiontike. Vaʼun, jtojbetik ta vokol (kʼelo 1 Tesalonisenses 5:17, 18). ¿Mi mu jechuk ti xijmuyubaj tajek kʼalal oy buchʼu tstojbutik ta vokole? Li Jeova eke xmuyubaj tajek ti ta jtojbetik ta vokol kʼalal tstakʼ j-orasiontike (Kol. 3:15). Pe oy to kʼusi ti toj tsots skʼoplal skʼan jtojbetik ta vokol li Jeovae. Jkʼeltik batel kʼusi jaʼ.
JTOJBETIK TA VOKOL JEOVA TI LAJ YAKʼ TA MATANAL LI XNICHʼONE
10. ¿Kʼu yuʼun skʼan jtojbetik ta vokol Jeova ti la stak talel ta balumil li Jesuse? (1 Pedro 2:21).
10 (Kʼelo 1 Pedro 2:21). Skʼan jtojbetik ta vokol Jeova ta skoj ti la stak tal li skʼanbil Nichʼon sventa xchanubtasutike. Kʼalal ta jchanbetik skʼoplal li xkuxlejal Jesuse, ep kʼusi chakʼ jchantik ta stojolal Jeova xchiʼuk li kʼusi skʼan jpastik sventa lek xilutike. Mi laj kakʼ xchʼunel koʼontontik ti laj yakʼ xkuxlejal ta jtojolaltik li Kristoe, xuʼ lek xkil jbatik xchiʼuk jun koʼontontik xchiʼuk li Jeovae (Rom. 5:1).
11. ¿Kʼu yuʼun ta sbi Jesus ta jpastik orasion?
11 Ta jtojbetik ta vokol Jeova ti xuʼ jkʼopontik ta sbi Xnichʼone. Jaʼ tstunes Xnichʼon sventa xakʼbutik li kʼusi ta jkʼanbetike. Mi ta jpastik orasion ta sbi Jesuse, ta me xchikinta xchiʼuk tstakʼbutik li Jeovae. Xi laj yal li Jesuse: «Chkakʼboxuk skotol li kʼusitik chakʼanik ta jbi sventa jech xichʼ toybel skʼoplal ta stojolal Nichʼonil li Totile» (Juan 14:13, 14).
12. ¿Kʼusi yan la spas Jeova ti sta-o jtojbetik ta vokole?
12 Li Jeovae chchʼay jmultik ta skoj ti ay chamuk ta jtojolaltik li Jesuse. Li Vivliae chal ti «jaʼ mero bankilal pale kuʼuntik» li Jesuse xchiʼuk ti te chotol ta «sbatsʼikʼob Dios te ta vinajel ta xokon li xchotleb sventa ajvalile» (Ebr. 8:1). Jech xtok, chal ti «oy jun jkoltavanej kuʼuntik ti te oy xchiʼuk Totil [ti jaʼ li Jesukristoe]» (1 Juan 2:1). Ta jtojbetik tajek ta vokol Jeova ti svaʼanojbutik jun Mero Bankilal Pale ti kʼuxutik ta yoʼontone, ti xaʼibe smelolal li kʼusi mu spas kuʼuntike xchiʼuk ti «jaʼ tsvaʼan sba ta [jtojolaltike]» (Rom. 8:34; Ebr. 4:15). Ti manchukuk laj yakʼ xkuxlejal li Jesuse, mu xuʼ jkʼopontik jechuk li Jeova ta skoj ti jmulavilutike. Mu xa noʼox xtojbe kuʼuntik ta vokol Jeova ti laj yakʼ ta matanal li Xnichʼone.
JPASTIK ORASION TA STOJOLAL KERMANOTAKTIK
13. Kʼalal jun xa ox akʼobal skʼan xcham li Jesuse, ¿kʼuxi laj yakʼ ta ilel ti skʼanojan li yajchankʼoptake?
13 Kʼalal jun xa ox akʼobal skʼan xcham li Jesuse, jal la spas orasion ta stojolal li yajchankʼoptake xchiʼuk la skʼanbe Stot ti akʼo xchabian ta stojolal li Satanase (Juan 17:15). Te laj yakʼ ta ilel ti skʼanojane. Akʼo mi jutuk xa ox skʼan xil svokol, la svul yoʼonton ta stojolal li yajtakboltake.
¿Kʼusi xuʼ jkʼantik kʼalal ta jpastik orasion ta stojolal li kermanotike? (Kʼelo parafo 14-16). *
14. ¿Kʼuxi chkakʼtik ta ilel ti jkʼanojtik li kermanotaktike?
14 Jech kʼuchaʼal la spas Jesuse, li voʼotik eke maʼuk noʼox oy ta koʼontontik li kʼusitik chtun kuʼuntike. Yuʼun nopem xkaʼitik ta jpastik orasion ta stojolal li kermanotaktike. Kʼalal jech ta jpastike, chkakʼtik ta ilel ti jkʼanoj jbatik ta jujuntal jech kʼuchaʼal laj yal Jesus ti skʼan jpastike xchiʼuk chkakʼbetik yil Jeova ti jkʼanojtik tajek li kermanotaktike (Juan 13:34). Jnaʼojtik xtok ti oy sbalil kʼalal ta jpastik orasion ta stojolal li yan yajtuneltak Jeovae, yuʼun li Vivliae chal ti «oy kʼusi lek tajek chkʼot ta pasel kʼalal xvokolet li tukʼil krixchanoe» (Sant. 5:16).
15. ¿Kʼu yuʼun lek ti jpastik orasion ta stojolal li kermanotaktike?
15 Ta skoj ti ep kʼusitik vokol tsnuptanik li kermanotaktike, lek ti jpastik orasion ta stojolalike. Xuʼ jkʼanbetik vokol Jeova ti akʼo skolta li buchʼutik chil svokolik ta skoj chamel, paskʼop, kontrainel, nikel, nojelal ta voʼ o yan kʼusitik. Jech xtok, xuʼ jpastik orasion ta stojolal li ermanoetik ti ep kʼusitik tspasik yoʼ skoltaik li yan ermanoetik ti chil svokolike. Xuʼ van oy buchʼu xavojtikin ti jaʼ jech yakal tsnuptane. ¿Kʼu yuʼun mu xatʼabbe sbi kʼalal chapas orasione? Kʼalal ta jkʼanbetik Jeova ti akʼo skolta kermanotaktik yoʼ xkuch yuʼun li svokolike, jaʼ jech chkakʼtik ta ilel ti jkʼanojantik ta melele.
16. ¿Kʼu yuʼun skʼan jpastik orasion ta stojolal li ermanoetik ti tskʼelik li tsobobbailetike?
16 Kʼalal ta jpastik orasion ta stojolal li ermanoetik ti tskʼelik li tsobobbailetike, ep tajek sbalil chaʼiik, yuʼun chkoltaatik kʼalal jech ta jpastike. Jaʼ jech laj yaʼi sba li jtakbol Pabloe. Xi la stsʼibae: «Jechuk me xapasik orasion ta jtojolal ek sventa xitojob ta kʼopojel kʼalal ta jam ke sventa tsots koʼonton chkakʼ ta ojtikinel li kʼusi chʼul ti mukul skʼoplal kʼalal ta jchol li lekil aʼyejetike» (Efes. 6:19). Li avi eke, oy ermanoetik ti tsots ch-abtejik sventa skʼelik li tsobobbailetike. Kʼalal chkalbetik Jeova ti akʼo xakʼbe bendision li kʼusi tspasike, chkakʼtik ta ilel ti jkʼanojantike.
KʼALAL TA JPASTIK ORASION TA YELOVAL YANTIKE
17, 18. ¿Bakʼin van xuʼ xkichʼtik albel ti akʼo jpastik orasion ta yeloval yantike, xchiʼuk kʼusi skʼan teuk ta joltik?
17 Bakʼintike, xuʼ van oy buchʼu xalbutik ti akʼo jpastik orasion ta yeloval yantike. Jech kʼuchaʼal liʼe, kʼalal chakʼ estudio jun ermanae, xuʼ van xalbe li buchʼu bat chiʼinatuk ti akʼo spas orasione. Li buchʼu bat chiʼinvanuke mu van xojtikin lek li buchʼu chichʼ estudioe, jech oxal jaʼ van lek chaʼi ti jaʼ to spas orasion mi nel li estudioe, yuʼun mas xa ox snaʼ kʼusi tskʼan ta stojolal estudiante li ta s-orasione.
18 Kʼalal chichʼ albel junuk ermano ti akʼo spas orasion li ta tsobajel sventa cholmantal o li ta tsobajel jujun xemanae, ¿kʼusi skʼan spas? Skʼan me teuk ta sjol kʼusi sventa li tsobajele. Li orasione maʼuk sventa jtojobtastik li ermanoetike o ti xkaltik aʼyejetike. Li ta tsobajeletike, jutuk mu skotoluk velta skʼan xjalij voʼob minuto sventa xijkʼejin xchiʼuk sventa xichʼ pasel li orasione. Jaʼ yuʼun, li ermanoe skʼan mu epuk kʼusi xal li ta s-orasione, mas to mi jaʼ tslikes li tsobajele (Mat. 6:7).
TSOTSUK SKʼOPLAL XKILTIK LI ORASIONE
19. ¿Kʼusi tskoltautik sventa chapalutik lek mi tal yakʼbe slajeb choplejal li Jeovae?
19 Ta skoj ti poʼot xa xtal chapanvanuk li Jeovae, skʼan ti masuk to tsots skʼoplal xkiltik li orasione. Xi onoʼox laj yal li Jesuse: «Vikʼiluk-o me asatik ta skʼanel vokol skotol kʼakʼal sventa xakolik lokʼel ta skotol li kʼusitik albil skʼoplal ti persa chkʼot ta pasele» (Luk. 21:36). Mi jech-o ta jpasilantik orasione, tsots-o me li xchʼunel koʼontontike xchiʼuk chapalutik lek mi kʼot yorail chakʼbe slajeb choplejal li Jeovae.
20. ¿Kʼusi xuʼ jpastik sventa xkoʼolajuk ta muil chikʼbil pom li j-orasiontike?
20 ¿Kʼusi la jkʼeltik li ta xchanobil liʼe? Ep tajek sbalil chkiltik ti xuʼ jkʼopontik li Jeovae. Li kʼusi mas tsots skʼoplal skʼan jkʼan ta j-orasiontike jaʼuk li kʼusi te nitil skʼoplal xchiʼuk li kʼusi oy ta yoʼonton Jeovae. Jech xtok, ta jtojbetik ta vokol li Ajvalilal yuʼune xchiʼuk ti laj yakʼ Xnichʼone. Xuʼ jpastik orasion xtok ta stojolal li kermanotike xchiʼuk xuʼ jkʼanbetik Jeova ti akʼo xakʼ li kʼusi chtun kuʼuntik jujun kʼakʼale xchiʼuk li kʼusitik sventa mantale. Kʼalal ta jnoptik lek li kʼusi chkal ta j-orasiontike, chkakʼtik ta ilel ti ep tajek sbalil chkiltik li matanal taje. Li kʼusi chkaltike ta me «xmuyubaj-o yuʼun» li Jeovae, yuʼun jech chaʼi kʼuchaʼal chikʼbil pom ti xmuet yikʼe (Prov. 15:8).
KʼEJOJ 45 Li kʼusi ta jnop ta koʼntone
^ Toj ep sbalil chkaʼitik ti xuʼ jkʼopontik li Jeovae. Jaʼ yuʼun, ta jkʼantik ti lekuk xaʼi li kʼusi chkalbetike, ti jechuk xaʼi kʼuchaʼal chikʼbil pom ti lek xmuet yikʼe. Li ta xchanobil liʼe, ta jkʼeltik kʼusitik skʼan xkaltik li ta j-orasiontike xchiʼuk ta jkʼeltik junantik kʼusitik skʼan jtsaktik ta venta kʼalal ta jpastik orasion ta yeloval yantike.
^ LI KʼUSI XVINAJ TA LOKʼOLETIKE: Jun ermano jmoj tspas orasion xchiʼuk yajnil. Tskʼanbe Jeova ti akʼo xchabibat li stsebik ti te oy ta eskuelae, ti xpoxtaj li stot yajnile xchiʼuk ti xchʼi ta mantal li s-estudiante yajnile.
^ LI KʼUSI XVINAJ TA LOKʼOLETIKE: Jun chex ermano tstojbe ta vokol Jeova ti laj yakʼ ta matanal Xnichʼone, ti toj kʼupil sba li balumil yakʼojbutike xchiʼuk ti oy muil veʼliletike.
^ LI KʼUSI XVINAJ TA LOKʼOLETIKE: Jun ermana tskʼanbe Jeova ti akʼo xakʼbe xchʼul espiritu li Jtsop Jbeiltasvaneje xchiʼuk ti skolta li buchʼutik chichʼik kontrainele o li buchʼutik chil svokolik ta skoj nikel, nojelal ta voʼ o yan kʼusitike.