Li Jesuse chanubtasvan ti mu jsaʼtik kʼope. Pe jun veltae, xi laj yalbe li yajtakboltake: «Mu xanopik ti tal kakʼ jun oʼontonal ta balumile; maʼuk jun oʼontonal tal kakʼ, yuʼun espada tal kakʼ. Yuʼun lital ta chʼakvanej, jech oxal tskontrain stot li vinike, tskontrain smeʼ li tsebe xchiʼuk tskontrain smeʼalib li alibale» (Mat. 10:34, tsʼib ta yok vun, 35). ¿Kʼusi skʼan xal taje?

Li Jesuse muʼyuk oy ta yoʼonton ti xchʼak sba li utsʼ alaliletike. Pe snaʼoj ti mi oy buchʼu chakʼ ta xkuxlejal li kʼusi chakʼ ta chanele, xuʼ xlik kʼop li ta yutsʼ yalale. Li buchʼutik tskʼan chkʼot ta yajchankʼop xchiʼuk ti tskʼan chichʼik voʼe skʼan teuk ta sjolik ti muʼyuk van lek chaʼi yutsʼ yalalik li kʼusi chkʼot ta nopel yuʼunike. Jech xtok, ti mi oy buchʼu tsnuptan kontrainel ta stojolal snup xchiʼil o ta stojolal junuk yutsʼ yalale, xuʼ van vokol chaʼi ti stsʼakli-o batel li yav yok Kristoe.

Li Vivliae xi chalbe skʼoplal li yajtsʼaklomtak Kristoe: «Junuk me avoʼontonik xchiʼuk skotol li krixchanoetike» (Rom. 12:18). Pe junantik utsʼ alalile xkoʼolaj ta «espada» chaʼiik li chanubtaseletik laj yakʼ Jesuse. Yuʼun kʼalal oy buchʼu chlik yakʼ ta xkuxlejal li chanubtaseletik yuʼun Jesuse, mu skʼanik li yantike o ta xkontrainvanik-o. Chlik kontrainatuk yuʼun li yutsʼ yalaltak ta skoj ti chchan li Vivliae (Mat. 10:36).

Jlom yajtsʼaklomtak Kristo ti te jmoj nakal xchiʼuk li yutsʼ yalalik ti yan-o srelijionike, bateltike oy kʼusi tsnuptanik ti skʼan snopbeik lek skʼoplal buchʼu tskʼan tsmuyubtabeik yoʼonton: mi jaʼ li Jeova xchiʼuk Jesuse o mi jaʼ li yutsʼ yalalike. Xuʼ van xichʼik sujel ta spasel junuk kʼin. Kʼalal jech tsujvan li yutsʼ yalalike, skʼan snopik buchʼu tskʼan tsmuyubtabeik yoʼonton. Xi laj yal li Jesuse: «Mu sta-o xkʼot ta kajchankʼop buchʼuuk ti jaʼ mas skʼanoj stot o smeʼe, ti jaʼ mu sta li voʼone» (Mat. 10:37). Pe taje maʼuk la skʼan laj yal Jesus ti mu masuk stsak ta mukʼ o ti mu masuk skʼan stot smeʼ li buchʼu chkʼot ta yajtsʼaklom Kristoe. Li kʼusi laj yakʼ ta chanel Jesuse jaʼ ti jnopbetik skʼoplal ti kʼusi mas tsots skʼoplal chkil ta jkuxlejaltike. Ti mi oy junuk kutsʼ kalaltik ti maʼuk testigo xchiʼuk kontra chil ti chkichʼtik ta mukʼ li Jeovae, jech-o jkʼanojtik, pe jnaʼojtik lek ti jaʼ mas tsots skʼoplal ti masuk to jkʼantik li Diose.

Ta melel, kʼux tajek chkaʼitik kʼalal chkichʼtik kontrainel yuʼun li kutsʼ kalaltike. Pe li yajtsʼaklomutik Kristoe jnaʼojtik lek ti xi laj yal li Jesuse: «Buchʼuuk noʼox ti mu skʼan xchʼam li jtel teʼ sventa vokolile xchiʼuk ti mu skʼan stsʼakliun batele mu sta-o xkʼot ta kajchankʼop» (Mat. 10:38). Jaʼ yuʼun, li yajtsʼaklomutik Kristoe skʼan ta jtsʼik jvokoltik sventa jtsʼaklitik batel li Kristoe, jech kʼuchaʼal ti tskontrainutik li kutsʼ kalaltike. Pe oy ta koʼontontik ti sjel snopbenik xchiʼuk ti xlik xchanik Vivlia ta skoj ti lek jtalelaltike (1 Ped. 3:1, 2).