XI CHAL jun ermana ti Lisa a sbie: «Jaʼ kʼot ta koʼonton li slekil yoʼonton ermanoetike». Taje jaʼ li kʼusi labal sba laj yil kʼalal laj yojtikin mantale. Jaʼ jechtik kʼot ta stojolal li Anne. Xi chale: «Kʼalal laj kojtikin li stestigotak Jeovae, jaʼ mas kʼot ta koʼonton li slekil yoʼontonike, jaʼ mu sta li kʼusi chakʼik ta chanele». Manchuk mi tskʼupinik xa xchanel xchiʼuk snopbel skʼoplal Vivlia li ermanaetik taje, li kʼusi mas koltaatik-oe jaʼ li slekil yoʼonton ermanoetike.

¿Kʼuxi xuʼ xkakʼ ta ilel slekil koʼontontik xchiʼuk ti stabeik sbalil li yantike? Jkʼeltik chaʼtos kʼuxi ta pasel: ta jkʼopojeltik xchiʼuk ta jtalelaltik. Mi laje, ta jkʼeltik buchʼutik xuʼ xkakʼbetik ta ilel slekil xchiʼuk yutsil koʼontontik.

Li kapitulo 31 ta Proverbiose chalbe skʼoplal jun ants ti lek xtojobe xchiʼuk ti «te oy ta yokʼ li mantal sventa slekil oʼontonale» (Prov. 31:26, tsʼib ta yok vun). Jech xtok, chakʼ ta xkuxlejal li mantal taje. Vaʼun, chvinaj li ta kʼusi chale xchiʼuk ti kʼu yelan chale. Li totil meʼiletik eke skʼan ta slekil yoʼonton xkʼopojik. Mi muʼyuk chakʼ ta ilel slekil yoʼontonik ta stojolal li yalab xnichʼnabike, xuʼ van chopol xaʼi sba yuʼunik. Pe mi ta slekil yoʼonton xchiʼuk ta kʼanelal tskʼopon li yalab xnichʼnabike, mas me chchikintaik xchiʼuk chchʼunik mantal.

Akʼo mi totil meʼilutik o mi maʼuk, ¿kʼusi skʼan jpastik yoʼ ta slekiluk koʼontontik xijkʼopoje? Li ta slikebal Proverbios 31:26 chal kʼusi xuʼ jpastik. Xi chale: «Oy spʼijil kʼalal chkʼopoje». Taje jaʼ skʼan xal ti ta jnoptik lek li kʼusi chkaltike xchiʼuk ti kʼu yelan yechʼomal ketik chkaltike. Kʼalal oy jutuk kʼope, lek ti xi jakʼbe jbatike: «Li kʼusi chkale, ¿mi tslamajes li kʼope o mi tstsatsaj-o yuʼun?» (Prov. 15:1). Chkakʼ ta ilel jpʼijiltik mi baʼyel ta jnoptik li kʼusi chkaltike.

Xi chal xtok li ta Proverbiose: «Kʼalal muʼyuk nopbil lek li kʼusi chichʼ alele, xkoʼolaj kʼuchaʼal sniʼ espada ti chyayijesvane» (Prov. 12:18). Mi la jnopbetik skʼoplal ti kʼu yelan xuʼ xaʼi sba kuʼuntik yantik ta skoj li kʼusi chkaltik o li yechʼomal ketik ti kʼu yelan chkaltike, xuʼ me skoltautik sventa jnoptik lek ti kʼu yelan chijkʼopoje. Kʼalal ta jchʼuntik «li mantal sventa slekil oʼontonale», muʼyuk me tsotsik xa chijkʼopoj xchiʼuk muʼyuk chyayijesvan li kʼusi chkaltike (Efes. 4:31, 32). Muʼyuk chkaltik li kʼusi xuʼ xchibajesvane. Jaʼ chkaltik li kʼusitik lekike xchiʼuk ta slekil koʼontontik chijkʼopoj. Jaʼ jech stalelal li Jeovae. Kʼalal jaʼo xiʼem tajek li Elias ti jaʼ yajtunele, li anjel ti jaʼ yajkʼopojel Jeovae xlamet noʼox ta aʼiel li yechʼomal ye kʼalal la spatbe yoʼonton li j-alkʼope (1 Rey. 19:12). Pe li slekil koʼontontike maʼuk noʼox naka chkaltik, yuʼun skʼan xkakʼtik ta ilel. Jkʼeltik kutik yelan.

Ta me jchanbetik stalelal Jeova mi ta slekil koʼontontik chijkʼopoj xchiʼuk mi ta slekil koʼontontik oy kʼusitik ta jpastike (Efes. 4:32; 5:1, 2). Li Lisa ti laj kalbetik skʼoplal ta baʼyel parafoe laj yil stuk ti oy slekil yoʼonton li stestigotak Jeovae. Xi chale: «Kʼalal ta anil noʼox la jel jnailalkutik xchiʼuk kutsʼ kalale, chaʼchop nupultsʼakal ti jaʼik stestigotak Jeovae la skʼanik permiso ta yabtelik sventa skoltaunkutik. Li vaʼ kʼakʼale, muʼyuk toʼox chkichʼ estudio». Taje jaʼ koltaat-o Lisa sventa x-ayan mas ta yoʼonton li mantale.

 Li Ann ti laj kalbetik skʼoplal ta baʼyel parafo eke laj yakʼ venta ti oy slekil yoʼonton li stestigotak Jeovae. Xi chale: «Ta skoj ti sokem xa tajek li balumile, mu xa jpat koʼonton ta stojolal yantik laj kaʼi». Xi to chale: «Kʼalal laj kojtikin li stestigotak Jeovae, la jakʼbe jba kʼu yuʼun ti toj lek yoʼontonik ta jtojolale xchiʼuk mi ta melel oyikun ta yoʼonton. Pe ta kʼunkʼun la jpat koʼonton ta stojolal li buchʼu chakʼbun estudioe, yuʼun laj kakʼ venta ti oyun ta yoʼonton ta melele». ¿Kʼusi sbalil la stabe? Xi to chal li Anne: «Kʼunkʼun lik kakʼ ta koʼonton li kʼusi yakal ta jchane».

Li chaʼvoʼ ermanaetike labal sba laj yilik ti laj yakʼik ta ilel slekil yoʼontonik li stestigotak Jeovae. Taje jaʼ mas lik ayanuk-o ta yoʼontonik li mantale. Jaʼ tijbat-o yoʼontonik li slekil xchiʼuk yutsil yoʼonton ermanoetike.

Junantike mu vokoluk chaʼiik ti stseʼetik noʼoxe xchiʼuk ti x-ichʼvanik ta mukʼ ta skoj ti jech stalelalik o ti jech nopem xaʼiike. Lek onoʼox un. Pe mi jaʼ noʼox jech ta jpastik ta skoj taje, xuʼ me muʼyuk yakal ta xkakʼtik ta  ilel li slekil yoʼonton Diose (koʼoltaso xchiʼuk Echos 28:2).

Li yutsil oʼontonal xchiʼuk li slekil oʼontonale jaʼ talelaletik chakʼ li chʼul espiritue (Gal. 5:22, 23). Jaʼ yuʼun, sventa jtsʼitestik li talelaletik taje xchiʼuk ti jchanbetik stalelal li Jeova xchiʼuk Jesuse, skʼan xkakʼtik abtejuk ta jnopbentik xchiʼuk ta kʼusi ta jpastik li chʼul espiritue. Jaʼ yuʼun, li yajtsʼaklomutik Kristoe oy ta koʼontontik ta melel li yantik ta skoj ti jkʼanojtik li Diose xchiʼuk li jchiʼiltike. Kʼalal jaʼ tstij koʼontontik li kʼanelale, li yutsil koʼontontik xchiʼuk slekil koʼontontike lek chil li Jeovae.

Bateltike, mu vokoluk chkakʼtik ta ilel slekil koʼontontik ta stojolal li buchʼutik xkojtikintike o li buchʼu lek kʼusi spasojbutike (2 Sam. 2:6). Jtos ti kʼu yelan chkakʼtik ta ilel slekil koʼontontike jaʼ kʼalal jnaʼtik stojel ta vokole (Kol. 3:15). Pe ¿kʼusi ta jpastik mi oy buchʼu mu sta-o ti xkakʼbetik ta ilel slekil koʼontontik chkiltike?

Jnopbetik skʼoplal liʼe: li Jeovae chakʼbe ta ilel slekil yoʼonton skotol krixchanoetik akʼo mi oy buchʼutik mu staik-o. Taje muʼyuk buchʼu yan jech tspas. Li Vivliae oy kʼusi tsots skʼoplal chakʼ jchantik ta sventa li talelal taje. Li ta Tsʼibetik ta Griego Kʼope, ep ta velta tstunes li jpʼelantik kʼop slekil yutsil oʼontonal. Li Diose, ¿kʼuxi chakʼ ta ilel li talelal taje?

Kalbetik skʼoplal liʼe: li Jeovae chakʼ ta ilel slekil yoʼonton ta stojolal epal krixchanoetik kʼalal chakʼbe kʼusi chtun yuʼunik jujun kʼakʼale (Mat. 5:45). Jech xtok, yakʼojbutik xa onoʼox ta ilel slekil yoʼonton kʼalal mu toʼox xkojtikintike (Efes. 2:4, 5, 8). Jun skʼelobile jaʼ kʼalal laj yakʼ ta matanal li kʼusi mas ep sbalile: li jun noʼox Xnichʼone. Li jtakbol Pabloe laj yal ti xuʼ jtabetik sbalil li pojelal laj yakʼ Dios koliyal «li skʼulejal slekil yutsil yoʼontone» (Efes. 1:7). Jech xtok, akʼo mi ta jsaʼ jmultik xchiʼuk chat yoʼonton kuʼuntik li Jeovae, jech-o tsbeiltasutik. Li chanubtaseletik yuʼune xchiʼuk li kʼusitik chale ta slekil yoʼonton chalbutik «jech kʼuchaʼal kʼinobal» (Deut. 32:2). Mi jsetʼuk onoʼox xtojbe sutel kuʼuntik Jeova li slekil yoʼonton chakʼ iluk ta jtojolaltike. Jech xtok, koliyal li slekil yoʼontone, oy kʼusi lek xuʼ jtatik li ta jelavele (koʼoltaso xchiʼuk 1 Pedro 1:13).

Li slekil yoʼonton Jeovae chijnopaj-o ta stojolal xchiʼuk tstij koʼontontik sventa jechuk jpastik ek. Jaʼ yuʼun, mu me tʼujbiluk noʼox buchʼu xkakʼbetik ta ilel slekil xchiʼuk yutsil koʼontontik. Jaʼ lek kakʼ kipaltik sventa xkakʼtik ta ilel slekil koʼontontik jech kʼuchaʼal tspas li Jeovae (1 Tes. 5:15). Mi jech-o chkakʼtik ta ilel slekil koʼontontik skotol orae, xijkoʼolaj me kʼuchaʼal li kʼokʼ ti chakʼ xkʼixnal ta yorail siktike. Mas me chnopajik talel xchiʼuk mas jun yoʼonton chaʼi sba kuʼuntik li kutsʼ kalaltike, li ermanoetik ta tsobobbaile, li jchiʼiltik ta abtel, ta chanvun xchiʼuk li jlakʼnatike.

Li ta avutsʼ avalal o li ta atsobobbaile, ¿mi oy van buchʼu skʼan xavakʼbe ta ilel slekil avoʼonton? Yikʼaluk van oy junuk ermano ta atsobobbail ti oy kʼusi skʼan meltsanbel ta snae, ti skʼan kʼelbel xyaxal o xnichimtak o ti oy kʼusi skʼan manbele. ¿Kʼuxi xuʼ xkakʼtik ta ilel slekil koʼontontik li ta cholmantale? Xuʼ jaʼo kʼalal ta jkoltatik li buchʼu chtun yuʼune.

Jechuk-o me jchanbetik stalelal li Jeovae. Kakʼtik ta ilel skotol ora ta jkʼopojeltik xchiʼuk ta jtalelaltik ti ta jchʼuntik «li mantal sventa slekil oʼontonale».