Sventa lek xilutik li Jeovae, skʼan oyuk lek xchʼunel koʼontontik. Pe li Vivliae chal ti «maʼuk kuʼuntik jkotoltik li xchʼunel oʼontonale» (2 Tes. 3:2). Kʼalal la stsʼiba jtakbol Pablo taje, jaʼ laj yalbe skʼoplal li buchʼu yakal chkontrainate, jaʼ xkaltik, li «chopol viniketik ti chakʼik vokolile». Pe li kʼusi laj yal ta sventa li xchʼunel oʼontonale xuʼ te tsakal skʼoplal li yantik krixchanoetik eke. Oy buchʼutik mu skʼan xakʼik venta ti oy jun Dios ti jaʼ la spas skotol li kʼusitik oye akʼo mi oy sprevailtak (Rom. 1:20). Junantike chalik ti oy kʼusi xchʼunojike o ti xchʼunojik ta stojolal jun vinik ti tsots sjuʼele. Pe taje maʼuk li melel xchʼunel oʼontonale.

Sventa lek xilutik li Diose, skʼan jchʼuntik ti oy ta melele xchiʼuk ti chakʼbe smoton li buchʼutik tsots xchʼunel yoʼontonike (Ebr. 11:6). Li xchʼunel oʼontonale jaʼ jtos talelal ti chakʼ li xchʼul espiritu Jeovae. Mi ta jkʼantik akʼo xakʼbutik xchʼul espiritu li Jeovae, jkʼanbetik ta orasion (Luk. 11:​9, 10, 13). Jech xtok, tsots skʼoplal ti jchantik li Vivlia ti laj yakʼ ta naʼel ta xchʼul espiritu li Diose. Laje, jnopbetik skʼoplal xchiʼuk kakʼ ta jkuxlejaltik. Vaʼun, ch-abtej me ta jtojolaltik li xchʼul espiritue xchiʼuk tskoltautik sventa oyuk xchʼunel koʼontontik jech kʼuchaʼal lek chil Jeovae.