1. ¿Kʼuxi tskoltautik li kʼusi chal Salmo 15:1 kʼalal ta 5?

 LI TA xchanobil echʼe, te la jchantik ti buchʼutik chakʼ xkuxlejalik ta stojolal Jeova xchiʼuk ti lek chil sbaike xuʼ me te oyik-o li ta skarpanae. Pe ¿kʼusi xuʼ jpastik sventa lekuk xkil jbatik xchiʼuke? Taje te chal ta Salmo 15, yuʼun te chalbutik kʼusi skʼan jpastik sventa masuk to xijnopaj ta stojolal li Diose (kʼelo Salmo 15:​1-5).

2. Kʼalal laj yalbe skʼoplal skarpana Jeova li Davide, ¿kʼusi toʼox van yakal tsnopbe skʼoplal?

² Li ta Salmo 15 xi chlik yale: «Kajval Jeova, ¿buchʼu van xuʼ xnaki li ta akarpanae? ¿Buchʼu van xuʼ xnaki li ta chʼul vits avuʼune?» (Sal. 15:1). Kʼalal laj yalbe skʼoplal skarpana Jeova li Davide, xuʼ van jaʼ yakal tsnopbe skʼoplal li axibalna ti te toʼox oy kʼuk sjaliluk ta Gabaone. Li David xtoke laj yalbe skʼoplal «chʼul vits» yuʼun Dios, taje jaʼ van laj yalbe skʼoplal li Sion ta Jerusalene. Te la svaʼan David jun karpana sventa te xichʼ akʼel li Xkaxa Jeova jaʼ to ti kʼuxi laj yichʼ pasel junuk temploe. Taje te van jayibuk kilometro xil li ta sural Gabaone (2 Sam. 6:17).

3. ¿K’u yuʼun skʼan xkaʼibetik smelolal li kʼusi chal ta Salmo 15? (Kʼelo xtok li lokʼole).

³ Melel onoʼox ti jutuk mu skotoluk li j-israeletike muʼyuk onoʼox te tunik li ta axibalnae xchiʼuk muʼyuk onoʼox bu ochik li ta karpana ti bu kʼejbil li xkaxail strato Jeovae. Pe skotol li yajtuneltak Jeovae xuʼ te oyik li ta skarpana xkaltik mi lek xil sbaik xchiʼuk li Jeovae. Taje jaʼ li kʼusi oy ta koʼontontik jkotoltike. Li ta Salmo 15, te chal junantik talelaletik ti skʼan oyuk kuʼuntik sventa jechuk-o xkamigointik li Jeovae.

 CHʼABALUK JPALTAILTIK XCHIʼUK JAʼUK JPASTIK LI KʼUSI TUKʼE

4. ¿Kʼuxi jnaʼojtik ti maʼuk noʼox skʼan kichʼojtik voʼ sventa lekuk xilutik li Jeovae? (Isaias 48:1).

⁴ Li ta Salmo 15:2 te chalbe skʼoplal ti yamigo Diose «jaʼ li buchʼu chʼabal spaltail kuxule» xchiʼuk «ti jaʼ tspas li kʼusi tukʼe». Li jpʼel kʼop «tspas» xie, jaʼ skʼan xal ti jech chichʼ pasolanel-oe. Jaʼ yuʼun, ¿mi xuʼ van chʼabal jpaltailtik xijkuxi? Xuʼ. Akʼo mi jpasmulilutik jkotoltik. Pe mi chkakʼtik persa xchʼunbel smantal li Jeovae, xuʼ me chʼabal jpaltail chilutik. Kʼalal chkakʼbe jkuxlejaltik li Diose xchiʼuk chkichʼtik voʼe, jaʼ to noʼox me yuni likebal. Jvules ta joltik ti voʼnee maʼuk noʼox xuʼ x-ochik ta skarpana Jeova ta skoj noʼox ti jaʼik j-israeletike. Junantike tstaik ta kʼoponel li Diose akʼo mi «mu meleluk» xchiʼuk mu tukʼuk ti kʼu yelan tspasike (kʼelo Isaias 48:1). Li buchʼutik oy tajek ta yoʼontonik ti te oyikuk ta skarpana li Jeovae skʼan xchanik li smantaltake xchiʼuk ti spasike. Jaʼ jech li avi kʼakʼal eke. Sventa lekuk xilutik li Diose, maʼuk noʼox skʼan ti kichʼojtik voʼe xchiʼuk ti stestigoutik xa Jeovae. Yuʼun skʼan jech-o jpastik li kʼusitik tukʼe. ¿Kʼusi smakoj taje?

5. ¿Kʼusi skʼan xal ti chʼabal jpaltailtik ta stojolal Dios xchiʼuk ti jaʼ ta jpastik li kʼusi tukʼe?

⁵ Li buchʼu chbat skotol xemana ta tsobajele maʼuk me skʼan xal ti chʼabal xa spaltail ch-ilat yuʼun Diose xchiʼuk ti jaʼ xa «tspas li kʼusi tukʼe» (1 Sam. 15:22). Li yajtsʼaklomutik Kristoe skʼan xkakʼtik persa xchʼunbel smantaltak Dios ta skotol ora akʼo mi jtuk oyutik (Prov. 3:6; Ekl. 12:​13, 14). Tsots skʼoplal ti xkakʼ kipaltik xchʼunbel smantaltak Jeova akʼo mi muʼyuk tsots skʼoplal chkiltik li voʼotike. Kʼalal jech ta jpastike, chkakʼtik ta ilel ti jkʼanojtike, vaʼun ta me skʼanutik ek (Juan 14:23; 1 Juan 5:3).

6. Jech kʼuchaʼal chal Ebreos 6:10 kʼalal ta 12, ¿kʼu yuʼun mu baluk noʼox ti tukʼ toʼox laj kakʼ jbatike?

 ⁶ Li Jeovae ep sbalil chil li kʼusitik jpasojtik talel ta stojolale. Pe mu me baluk noʼox ti tukʼ toʼox lijtun talel ta stojolal sventa teuk oyutik-o li ta skarpana Jeova jech kʼuchaʼal chal ta Ebreos 6:​10-12 (kʼelo). Akʼo mi muʼyuk ta xchʼay ta yoʼonton Jeova skotol li kʼusitik lekik jpasojtik talele, li stuke oy ta yoʼonton ti jechuk-o xijtun ta stojolal kʼalal to ta slajebe. «Mi muʼyuk lijlubtsaje», lek-o me chkil jbatik xchiʼuk ta sbatel osil (Gal. 6:9).

MELELUK LI KʼUSI OY TA KOʼONTONTIKE

7. ¿Kʼusi skʼan xal ti meleluk li kʼusi oy ta koʼontontike?

⁷ Li ta Salmo 15:2 chal ti buchʼu te oy ta skarpana li Jeovae «melel kʼusi chal ta [yoʼonton]», maʼuk noʼox ti mu snaʼ sjut kʼope. Li Jeovae tskʼan ti meleluk xijkʼopoj xchiʼuk ti jechuk xvinaj ta jtalelaltik ta skotol orae (Ebr. 13:18). Taje toj tsots skʼoplal, yuʼun li Jeovae chopol chil «li buchʼu muʼyuk stukʼil kʼusi tspase, yan li buchʼu tukʼe lek tajek xil sba xchiʼuk» (Prov. 3:32).

8. ¿Kʼusi talelal ti skʼan jpʼajtike?

⁸ Li buchʼu «melel kʼusi chal ta yoʼontone» maʼuk noʼox me ta xchʼunbe smantaltak Jeova kʼalal te oy xchiʼuk li yantike, pe ti muʼyuk xa chchʼun kʼalal stuk te oye (Is. 29:13). Taje muʼyuk lek, jaʼ yuʼun mu jkʼan jech jpastik. ¿Kʼuxi xuʼ jech xkʼot ta stojolal junuk krixchano taje? Xuʼ van jaʼo kʼalal ta snop ti mu masuk lek li smantaltak Jeovae (Sant. 1:​5-8). Xuʼ van muʼyuk ta xchʼun li kʼusitik chichʼ albel ti mu toj tsotsuk skʼoplal chile. Mi laj yakʼ venta ti muʼyuk kʼusi chopol la snuptan ta skoj ti muʼyuk la xchʼun li mantale, xuʼ van mas to chopol kʼusitik chlik spas. Akʼo mi tsnop ti chichʼ ta mukʼ li Diose, li Jeovae muʼyuk ta xchʼam (Ekl. 8:11). Li voʼotike skʼan me xvinaj ta jkʼopojeltik xchiʼuk ta jtalelaltik ti melel jnaʼ xijkʼopoj ta skotol orae.

9. ¿Kʼusi chakʼ jchantik kʼalal laj yojtikin Natanael li Jesuse? (Kʼelo xtok li lokʼole).

⁹ Tsots me skʼoplal ti meleluk li kʼusi oy  ta koʼontontike jech kʼuchaʼal kʼot ta pasel kʼalal laj yojtikin Natanael li Jesuse. Kʼalal laj yikʼ batel Natanael li Felipe sventa xojtikin li Jesuse, oy kʼusi labal sba kʼot ta pasel. Akʼo mi mu toʼox xojtikin Jesus li Natanaele, xi laj yale: «Kʼelavil, leʼ xtal jun j-israel vinik ti batsʼi mu snaʼ xloʼlavane» (Juan 1:47). Melel onoʼox li Jesuse xojtikin xa onoʼox ti melel kʼusi oy ta yoʼonton li yan yajchankʼoptake, pe jaʼuk li Natanaele toj labal sba laj yilbe li stalelal taje. Akʼo mi jpasmulil li Natanael eke, melel snaʼ xkʼopoj xchiʼuk lek stalelal. Labal sba laj yil Jesus taje, jaʼ yuʼun la skʼupil kʼopta. ¡Toj kʼupil sba ti jechuk xal ta jtojolaltik li Jesus eke!

10. ¿Kʼu yuʼun skʼan jpajes li kokʼtike? (Santiago 1:26).

¹⁰ Jutuk mu skotoluk li kʼusi chal ta Salmo 15 jaʼ chalbe skʼoplal ti kʼu yelan skʼan xkiltik li yantike. Li ta Salmo 15:3 chal ti jaʼ noʼox chchʼam ta skarpana Jeova li buchʼu «muʼyuk tstunes yokʼ sventa tsjut mulile, ti muʼyuk kʼusi chopol tspasbe li xchiʼile xchiʼuk ti muʼyuk tsjutbe smul li yamigotake». Maʼuk noʼox me chkakʼbetik svokol yantik mi mu jnaʼ jpajes li kokʼtike, yuʼun xuʼ me mu xa xchʼamutik ta skarpana li Jeovae (kʼelo Santiago 1:26).

11. ¿Kʼusi smakoj ti chichʼ jutel mulile, xchiʼuk kʼusi chichʼ pasbel li buchʼu jech tspas ti mu sutes yoʼontone?

¹¹ Li jtsʼibajom yuʼun salmoe jaʼ mas laj yalbe skʼoplal li jutmulile. ¿Kʼusi smakoj taje? Jaʼo kʼalal oy kʼusi mu meleluk chichʼ alel ta stojolal junuk krixchano ti tsok-o skʼoplale. Xuʼ me xichʼik lokʼesel ta tsobobbail mi mu sutes yoʼontonik li buchʼutik jech tspasike (Jer. 17:10).

12, 13. ¿Bakʼin van xuʼ chopol xkom skʼoplal kuʼuntik li kamigotaktike? (Kʼelo xtok li lokʼole).

¹² Li ta Salmo 15:3 tsvules ta joltik ti buchʼu te oy ta skarpana Jeovae «muʼyuk kʼusi chopol tspasbe li xchiʼile  xchiʼuk muʼyuk tsjutbe smul li yamigotake». ¿Kʼuxi van xuʼ sok skʼoplal kuʼuntik li kamigotaktike?

¹³ Bakʼintike xuʼ van chopol kʼusi xuʼ xlik kaltik ta stojolal yantik akʼo mi mu jechuk oy ta koʼontontik. Kalbetik junantik skʼelobiltak: 1) jun ermana laj yikta li prekursorale, 2) lokʼ ta Betel li jun nupultsʼakale o 3) chichʼ alel ti maʼuk xa mol ta tsobobbail o siervo ministerial junuk ermanoe. ¿Mi lek van ti xkalbetik yantik ti jaʼ ta skoj ti oy kʼusi chopol la spasike? Xuʼ van mu jnaʼtik li kʼusi kʼot ta pasel ta melele xchiʼuk teyuk ta joltik ti buchʼu te oy ta skarpana Jeovae «muʼyuk kʼusi chopol tspasbe li xchiʼile xchiʼuk ti muʼyuk tsjutbe smul li yamigotake».

JTSAKTIK TA VENTA LI BUCHʼUTIK XIʼTAOJIK JEOVAE

14. Li buchʼu te oy ta skarpana Jeovae, ¿kʼuxi xuʼ snaʼ buchʼutik spʼajoj li Diose xchiʼuk ti skʼan spʼaj eke?

¹⁴ Li ta Salmo 15:4 chal ti buchʼu jaʼ yamigo Jeovae «muʼyuk lek chil li buchʼutik pʼajbilik yuʼun Diose». Pe ¿kʼuxi xuʼ jnaʼtik ti oy buchʼu pʼajbile? Ta skoj ti jmulavilutike, mu jnaʼtik lek ti buchʼutik pʼajbilike. Yuʼun oy junantike mas lek xkil jbatik xchiʼuk, jaʼuk li yantike chkap-o joltik yuʼun. Jaʼ yuʼun, jaʼ noʼox skʼan jpʼajtik li buchʼutik spʼajoj li Jeova eke (1 Kor. 5:11). Taje te skʼoplal li buchʼutik tspasik mulil ti mu sutes yoʼontonike, ti mu lekuk kʼusi chalik ta sventa li kʼusi jchʼunojtike xchiʼuk li buchʼutik tskʼan chchibajesutik ta mantale (Prov. 13:20).

15. ¿Kʼuxi xuʼ xkichʼtik ta mukʼ «li buchʼu xiʼtaojik Jeovae»?

¹⁵ Li ta Salmo 15:4 chalbutik ti skʼan xkichʼtik ta mukʼ «li buchʼu xiʼtaojik Jeovae». Jaʼ yuʼun, skʼan jkʼeltik kʼuxitik xuʼ xkakʼtik ta ilel slekil koʼontontik xchiʼuk ti xkichʼtik ta mukʼ li yamigotak Diose (Rom. 12:10). ¿Kʼuxi xuʼ jpastik taje? Li ta Salmo 15:4 chal ti buchʼu te oy ta skarpana Jeovae «chkʼot ta pasel yuʼun li kʼusi yaloje akʼo mi chopol kʼusi xuʼ snuptan ta skoj». Mi muʼyuk xkʼot ta pasel kuʼuntik li kʼusi chkaltike, xuʼ me jyayijesbetik yoʼonton li yantike (Mat. 5:37). Kalbetik skʼoplal liʼe, li buchʼutik te oyik ta skarpana Jeovae oy ta yoʼonton ti xkʼot pasel yuʼunik li kʼusi laj yakʼ yeik li nupultsʼakaletike. Jech xtok, oy ta yoʼonton Jeova ti xkʼot ta pasel yuʼun li totil meʼiletik li kʼusi chalbe yalab xnichʼnabike. Ta skoj ti jkʼanojtik Dios xchiʼuk li jchiʼiltaktike, ta me xkakʼtik persa sventa xkʼot ta pasel kuʼuntik li kʼusi chkaltike.

16. ¿Kʼuxi yan xuʼ xkichʼtik ta mukʼ li yamigotak Jeovae?

¹⁶ Yan ti kʼuxi xuʼ xkakʼtik ta ilel ti chkichʼtik ta mukʼ li yamigotak Diose, jaʼ ti lekuk xijchʼamvane xchiʼuk ti xkakʼ ta ilel slekil koʼontontike (Rom. 12:13). Kʼalal koʼol ta jchʼay koʼontontik xchiʼuk li kermanotaktike, mas to lek chkamigointik xchiʼuk mas to lek chkil jbatik xchiʼuk li Jeovae. Jech xtok, kʼalal lek jnaʼ xijchʼamvanutike, jaʼ yakal ta jchanbetik li Jeovae.

MU ME XBAT TA KOʼONTONTIK LI TAKʼINE

17. ¿Kʼu yuʼun chalbe skʼoplal takʼin li Salmo 15?

¹⁷ Li ta Salmo 15 chal ti buchʼu te oy ta skarpana Jeovae «muʼyuk tskʼanbe sjol stakʼin kʼalal chakʼ ta chʼome, ti muʼyuk chchon sba ta takʼin sventa tskontrain li buchʼu muʼyuk smule» (Sal. 15:5). ¿Kʼu yuʼun chalbe skʼoplal takʼin li ta salmo ti kʼajomal noʼox voʼob versikulo yichʼoje? Yuʼun kʼun tajek ti jaʼ xbat ta koʼontontik  skʼanel li takʼine. Mi jaʼ jech kʼot ta jtojolaltike, xuʼ me xkakʼbetik svokol li yantike xchiʼuk ti mu xa lekuk xkil jbatik xchiʼuk li Diose (1 Tim. 6:10). Li ta voʼnee, junantike lek chaʼiik yilbajinel xchiʼiltakik ti abol sbaik kʼalal tskʼanbeik sjol li kʼusi chakʼbeik ta chʼome. Jech xtok, oy jchapanvanejetik ti tstsakik michʼob kʼabal sventa jaʼ oyuk smul xkom li buchʼu muʼyuk smule. Taje spʼajoj li Jeovae (Esek. 22:12).

18. ¿Kʼusitik xuʼ jakʼbe jbatik? (Ebreos 13:5).

¹⁸ Lek onoʼox ti xi jakʼbe jbatik ta sventa li takʼine: «¿Mi jaʼ mas ta jnopbe skʼoplal li takʼine xchiʼuk li kʼusi ta jkʼan ta jmane? Mi oy buchʼu laj yakʼbun ta chʼom stakʼine, ¿mi muʼyuk ta jsutesbe ta anil ta skoj ti ta jnop ti muʼyuk chtun yuʼune? ¿Mi tsots van jkʼoplal chkaʼi jba ta skoj ti oy jtakʼine? ¿Mi vokol chkaʼi yakʼbel yantik li kʼusi x-ayan kuʼune? ¿Mi ta jnop ti batem ta yoʼontonik takʼin li ermanoetik ti oy lek stakʼinike? ¿Mi jaʼ chkamigoin li buchʼutik jkʼulejike xchiʼuk mi jaʼ muʼyuk ta jchiʼinan li buchʼutik abol sbaike?». Jaʼ jun mukʼta matanal ti te oyutik li ta skarpana Jeovae, jaʼ yuʼun teuk me oyutik-o. ¡Mu me xlik jkʼantik li takʼine! Mi jech ta jpastike, muʼyuk me ta xiktautik li Jeovae (kʼelo Ebreos 13:5).

LI JEOVAE SKʼANOJ LI YAMIGOTAKE

19. ¿Kʼu yuʼun tskʼan Jeova ti xkakʼ ta jkuxlejaltik li kʼusi chal Salmo 15?

¹⁹ Xi tstsuts li Salmo 15: «Buchʼuuk noʼox ti jech tspas kʼuchaʼal taje mi jaʼuk onoʼox bu chichʼ vuyilanel» (Sal. 15:5). Li kʼusi laj yal li jtsʼibajom yuʼun salmoe chakʼ ta ilel ti kʼu yuʼun jech tskʼanbutik li Jeovae, yuʼun tskʼan ti xijmuyubaj noʼoxe. Jaʼ yuʼun, chchanubtasutik sventa jnaʼtik kʼuxi xuʼ jtatik li bendisione xchiʼuk ti xchabiutike (Is. 48:17).

20. ¿Kʼusitik xuʼ skʼupinik ta tsʼakal li buchʼutik te oyik li ta skarpana Jeovae?

²⁰ Li buchʼutik te oyik li ta skarpana Jeova ti tukʼ-o chakʼ sbaike oy kʼusi lek tstaik ta jelavel. Li buchʼutik tʼujbilike chbatik ta vinajel, ti bu xchapanoj Jesus li yavilik ti bu stakʼ xnakiike (Juan 14:2). Li yan yajtsʼaklomtak Kristo ti liʼ chnakiik ta balumile ta skʼupinik li bendisionetik chal ta Apokalipsis 21:3. ¡Jaʼ jun mukʼta matanal ti jaʼutik yamigo Jeovae! ¡Xuʼ te xijnaki-o ta sbatel osil li ta skarpanae!