1. ¿Kʼusi xuʼ skoltautik sventa jechuk-o xijtun ta stojolal Jeova akʼo mi ep kʼusitik ta jnuptantik?

 LI Vivliae chal ti kuxulutik xa ta slajebal kʼakʼal ti toj echʼ noʼox xibal sbae (2 Tim. 3:1). Avie skotol krixchanoetik yakal chil svokolik, pe jaʼuk li yajtunelutik Diose maʼuk noʼox ta jnuptantik taje, yuʼun chkichʼtik kontrainel ta skoj ti chijtun ta stojolal Jeovae. ¿Kʼusi tskoltautik sventa jechuk-o xkichʼtik ta mukʼ Jeova akʼo mi ep kʼusitik ta jnuptantik? Jtos ti kʼusi tsots skʼoplal skʼan teuk ta joltike jaʼ ti chijtunutik ta stojolal jun kuxul Diose (Jer. 10:10; 2 Tim. 1:12).

2. ¿Kʼuxi chakʼ ta ilel Jeova ti jaʼ li kuxul Diose?

² Li Jeovae kuxul ta melel, jaʼ yuʼun tskoltautik kʼalal oy kʼusi ta jnuptantike xchiʼuk tskʼel kʼuxi xuʼ skoltautik (2 Kron. 16:9; Sal. 23:4). Kʼalal kuxul chkiltik li Jeovae, chakʼ kipaltik sventa xkuch kuʼuntik kʼusiuk jnuptantik. Taje jaʼ jech kʼot ta stojolal li ajvalil Davide, jkʼeltik batel.

3. ¿Kʼusi la skʼan laj yal David kʼalal kuxul li Jeova xie?

³ Li Davide xojtikin li Jeovae xchiʼuk spatoj yoʼonton ta stojolal. La skʼanbe koltael kʼalal jaʼo tsnutsat yuʼun li ajvalil Saule xchiʼuk li yantike (Sal. 18:6). Kʼalal laj yakʼ venta ti takʼbat s-orasion yuʼun li Jeovae xchiʼuk ti pojate, xi laj yale: «¡Kuxul li Jeovae!» (Sal. 18:46). Kʼalal jech laj yale, maʼuk noʼox chakʼ ta aʼiel ti oy ta melel li Diose. Jlik livro chal ti kʼalal jech laj yal li Davide, chakʼ ta aʼiel ti «xchʼunoj ti ta onoʼox skolta ep ta velta steklumal li kuxul Diose». Li Davide laj yil ta xkuxlejal stuk ti kʼu yelan koltaat yuʼun li Jeovae. Taje jaʼ koltaat-o sventa xchʼun ti kuxul li Jeovae xchiʼuk jaʼ akʼbat-o yipal sventa jechuk-o xtun ta stojolal xchiʼuk ti skʼupil kʼoptae (Sal. 18:​28, 29, 49).

4. ¿Kʼusi sbalil ta jtatik kʼalal jnaʼojtik ti jaʼ kuxul Dios li Jeovae?

⁴ Kʼalal jnaʼojtik ti jaʼ kuxul Dios li Jeovae, tskoltautik sventa ta sjunuluk koʼontontik xijtun ta stojolal, chakʼ kipaltik  sventa xkuch kuʼuntik kʼusiuk vokolil xchiʼuk tstij koʼontontik sventa tsots xij-abtej ta stojolal. Jech xtok, tskoltautik sventa jechuk-o nopol oyutik ta stojolal.

CHAKʼ AVIPAL LI KUXUL DIOSE

5. ¿Kʼusi tskoltautik sventa junuk koʼontontik jtsal li jvokoltike? (Filipenses 4:13).

⁵ Ti jnaʼojtik ti kuxul li Jeovae xchiʼuk ti ta onoʼox skoltautike xuʼ me xkuch kuʼuntik, mu ventauk kʼusi jnuptantik. Li stuke muʼyuk kʼusi ti tsots tajek chaʼie, yuʼun jaʼ li Buchʼu skotol xuʼ yuʼune xchiʼuk xuʼ xakʼ kipaltik sventa xkuch kuʼuntik kʼusiuk vokolil (kʼelo Filipenses 4:13). Jaʼ yuʼun, ep srasonal kuʼuntik sventa junuk noʼox koʼontontik xkuch kuʼuntik li kʼusi ta jnuptantike. Kʼalal chkiltik kʼu yelan tskoltautik Jeova kʼalal mu masuk tsots li kʼusi ta jnuptantike, mas to ta jchʼuntik ti ta onoʼox skoltautik kʼalal tsots kʼusi ta jnuptantike.

6. ¿Kʼusi la snuptan David ta skeremal ti jaʼ koltaat-o sventa spat yoʼonton ta stojolal Jeovae?

⁶ Jkʼeltik chaʼtosuk li kʼusi la snuptan li Davide xchiʼuk ti jaʼ koltaat-o sventa masuk to spat yoʼonton ta stojolal Jeovae. Kʼalal jchabichij toʼoxe, tal jkot leon xchiʼuk tsakbat batel li xchij stote, ta yan velta xtoke tal jkot oso ti tsakbat batel li xchije. Li Davide laj yakʼ ta ilel ti tsots yoʼonton kʼalal ay spoj tal li xchijtake. Snaʼoj ti jaʼ akʼbat yip yuʼun Jeova sventa spas yuʼun taje, jaʼ yuʼun maʼuk la skʼan ichʼel ta mukʼ (1 Sam. 17:​34-37). Li Davide muʼyuk la xchʼay ta sjol li kʼusi kʼot ta xkuxlejale. La snopbe skʼoplal, vaʼun mas to la xchʼun ti ta onoʼox x-akʼbat stsatsal yoʼonton ta tsʼakal yuʼun li kuxul Diose.

7. ¿Kʼusi laj yakʼ ta yoʼonton li Davide, xchiʼuk kʼuxi koltaat-o sventa stsal yuʼun li Goliate?

⁷ Kʼalal chex kerem toʼox li Davide, bat ti bu spasoj skarpana li soltaroetik ta Israele. Laj yil ti xiʼem tajek li soltaroetik ta skoj ti xi ch-albatik yuʼun li natil Goliate: «¡Ta jlaban li soltaroetik yuʼun Israel ti te xcholoj sbaike!» (1 Sam. 17:​10, 11). Li soltaroetike chiʼik tajek, yuʼun jaʼ laj yakʼ ta yoʼontonik li snatil xchiʼuk li kʼusi chal li Goliate (1 Sam. 17:​24, 25). Pe li Davide maʼuk la stsak ta venta taje, yuʼun snaʼoj ti maʼuk yakal chchopol kʼopta li soltaroetik ta Israele, yuʼun jaʼ yakal chopol kʼopta li yajsoltarotak kuxul Diose (1 Sam. 17:26). Li Davide jaʼ mas la snopbe skʼoplal li Jeovae. Spatoj yoʼonton ti ta onoʼox xkoltaat jech kʼuchaʼal koltaat kʼalal ay spoj tal li xchijtake. Koliyal ti koltaat yuʼun Jeovae, la stsak ta kʼop li Goliate xchiʼuk laj onoʼox stsal li Filistea vinike (1 Sam. 17:​45-51).

8. ¿Kʼusi tskoltautik sventa masuk to jpat koʼontontik ta stojolal Jeova kʼalal jaʼo chkil tsots jvokoltike? (Kʼelo xtok li lokʼole).

⁸ Jech kʼuchaʼal kʼot ta stojolal li Davide, li voʼotike xuʼ stsal kuʼuntik li prevaetik mi ta jvules ta joltik ti ta onoʼox skoltautik li kuxul Diose (Sal. 118:6). Mi ta jnopbetik skʼoplal ti kʼu yelan skoltaojutik ta voʼnee, mas to me ta jpat koʼontontik ta stojolal. Kʼelo loʼiletik ta Vivlia ti bu tsvules ta ajol ti kʼu yelan skoltaoj yajtuneltak li Jeovae (Is. 37:​17, 33-37). Jech xtok, kʼelo li mantaletik ti lokʼem ta jw.org ti chakʼ ta ilel ti kʼu yelan skoltaoj yajtuneltak Jeova li avie. Vuleso ta ajol ti kʼutik yelan skoltaojot tal li Jeovae, pe mu me xavul avoʼonton mi mu xtal ta ajol ti kʼu yelan labal sba skoltaojot Jeova jech kʼuchaʼal kʼot ta stojolal David ti la stsal jkot oso xchiʼuk jkot leone. Li kʼusi tsots skʼoplale jaʼ ti kʼu yelan skoltaojot talel Jeova ta akuxlejale. Jech kʼuchaʼal ti la staot ta ikʼel sventa xakʼot ta yamigoe (Juan 6:44). Mi teyot-o ta mantale, jaʼ koliyal ti skoltaojote. Albo Jeova ti svules ta ajol ti kʼu yelan stakʼojbot li  a-orasione xchiʼuk ti kʼu yelan la skoltaot kʼalal jaʼo tsots kʼusi la anuptane. Mi chanopbe skʼoplal ti kʼu yelan skoltaojot talel li Jeovae, mas to chapat avoʼonton ti jech-o tskoltaot batele.

9. ¿Kʼusi skʼan teuk ta joltik kʼalal chkil jvokoltike? (Proverbios 27:11).

⁹ Kʼalal ta jnuptantik prevaetike, jaʼ me skʼan xkakʼ ta koʼontontik li kʼusi mas tsots skʼoplale. Li Diabloe chal ti chkiktatik komel Jeova mi la jnuptantik vokoliletike. Jaʼ yuʼun, li kʼusi ta jpastik kʼalal ta jnuptantik junuk prevae, xuʼ me xmuyubaj-o kuʼuntik o xat-o yoʼonton kuʼuntik li Jeovae (Job 1:​10, 11; kʼelo Proverbios 27:11). Jaʼ yuʼun, mi tukʼ chkakʼ jbatike, chkakʼtik ta ilel ti jkʼanojtik li Jeovae xchiʼuk chkakʼtik ta ilel ti jaʼ jun jutkʼop li Satanase. ¿Mi yakal chavichʼ kontrainel yuʼun ajvalil, mi chavil avokol ta takʼin, mi mu skʼanik mantal li krixchanoetike o mi oy yan kʼusi yakal chanuptan? Mi jaʼ jeche, teuk ta ajol ti mi tukʼ laj avakʼ abae, xuʼ me xmuyubaj avuʼun li Jeovae. Mu xchʼay xavaʼi ti muʼyuk chakʼ akʼo xavichʼ akʼel ta preva mi chil ti mu stsʼik avuʼune (1 Kor. 10:13). Ta me xakʼ avipal sventa xkuch avuʼun.

CHAKʼ AMOTON LI KUXUL DIOSE

10. ¿Kʼusi tspas kuxul Dios ta stojolal li buchʼu ch-ichʼat ta mukʼe?

¹⁰ Li Jeovae chakʼbe smoton li buchʼutik ch-ichʼat ta mukʼe (Ebr. 11:6). Avie chakʼbutik jun oʼontonal xchiʼuk muyubajel. Ta jelavele, chakʼbutik kuxlejal sbatel osil. Jnaʼojtik lek ti oy ta yoʼonton chakʼ jmotontike xchiʼuk ti oy sjuʼel sventa jech spase. Taje tstij koʼontontik venta tsotsuk xij-abtej ta stojolal jech kʼuchaʼal la spas li yajtuneltak Dios ta voʼnee. Jkʼeltik kʼusi kʼot ta stojolal li Timoteoe (Ebr. 6:​10-12).

11. ¿Kʼusi tijbat-o yoʼonton Timoteo sventa tsots x-abtej li ta tsobobbaile? (1 Timoteo 4:10).

¹¹ (Kʼelo 1 Timoteo 4:10). Li Timoteoe la spat yoʼonton ta stojolal li kuxul Diose. Jpʼel ta yoʼonton ti ta onoʼox x-akʼbat smotone. Jaʼ yuʼun, tsots abtej ta stojolal  Jeova xchiʼuk ta stojolal yantik. ¿Kʼusi la spas? Li jtakbol Pabloe la stijbe yoʼonton sventa xkʼot ta lekil jchanubtasvanej, ti xtojobuk ta sjelubtasel mantale xchiʼuk ti oyuk kʼusi xakʼbe xchan li keremetik xchiʼuk li buchʼutik oy xa sjabilalike. Akʼbat sbain abtelaletik ti tsotsik ta pasele. Jech kʼuchaʼal ti tstukʼibtas li buchʼu chtun yuʼune, pe ti ta slekiluk yoʼonton spase (1 Tim. 4:​11-16; 2 Tim. 4:​1-5). Li Timoteoe snaʼoj lek ti ta onoʼox x-akʼbat smoton yuʼun Jeova akʼo mi mu xakʼ venta o mi chʼabal sbalil chilik yantik li abtel tspase (Rom. 2:​6, 7).

12. ¿Kʼusi chtijbat-o yoʼonton moletik ta tsobobbail sventa tsotsuk x-abtejike? (Kʼelo xtok li lokʼole).

¹² Jech kʼuchaʼal la spas li Timoteoe, li moletik ta tsobobbaile skʼan me teuk ta sjolik ti yiloj Jeova li abtel tspasike xchiʼuk ti ep sbalil chile. Maʼuk noʼox ti xchabiik li tsobobbaile, ti chchanubtasvanike xchiʼuk ti xcholik mantale, yuʼun ep moletik ta tsobobbaile chkoltavanik ta svaʼanel salonetik o yan kʼusitik. Jech xtok, tskoltaik li ermanoetik ti chil svokolike. Yantik xtoke chtunik ta Grupo ti Tsvulaʼanik ta Ospital li Ermanoetik ti Ipike o ta Komiteetik ti Tsbeiltasvan batel ta Ospitaletike. Li moletik ta tsobobbaile snaʼojik ti jaʼ yuʼun Jeova li tsobobbaile, maʼuk yuʼun jun krixchano. Jaʼ yuʼun, ta sjunul yoʼonton ch-abtejik xchiʼuk snaʼojik ti ta onoʼox x-akʼbatik smotonik yuʼun Diose (Kol. 3:​23, 24).

13. ¿Kʼu yelan chil Jeova kʼalal chkakʼ kipaltik chijtun ta stojolale?

¹³ Mu onoʼox xuʼ xijtun ta mol ta tsobobbail jkotoltik. Pe xuʼ oy kʼusi xkakʼbetik li Jeovae. Li stuke ep sbalil chil ti chkakʼ kipaltik chijtun ta stojolale. Jech xtok, ep sbalil chil kʼalal chavakʼ matanal takʼin sventa li abtelal ta spʼejel balumile akʼo mi mu masuk ep xavakʼ. Xmuyubaj Jeova kʼalal chil chavakʼ avipal sventa xavakʼ aloʼil li ta tsobajel akʼo mi xatsʼijet noʼoxe.  Jech xtok, xmuyubaj avuʼun kʼalal chavakʼ ta perton li buchʼu chopol kʼusi la spasbote. Akʼo mi mu xa epuk kʼusi xuʼ xapas ta stojolal li Jeovae, teuk me ta ajol ti ep sbalil chil li kʼusi spas avuʼune. Skʼanojot xchiʼuk chakʼbot bendision ta skoj taje (Luk. 21:​1-4).

NOPOLUK ME OYUTIK TA STOJOLAL LI KUXUL DIOSE

14. Mi nopol oyutik ta stojolal Jeovae, ¿kʼuxi tskoltautik sventa tukʼuk xkakʼ jbatik? (Kʼelo xtok li lokʼole).

¹⁴ Mi kuxul chkiltik li Jeovae, mas me kʼun chkaʼitik sventa tukʼuk xkakʼ jbatik ta stojolal. Taje jaʼ jech kʼot ta stojolal li Josee. Mi jsetʼuk oy ta yoʼonton mulivaj, yuʼun kuxul ta melel laj yil li Jeovae xchiʼuk mu skʼan ti chopol xaʼi sba yuʼune (Jen. 39:9). Sventa kuxul xkiltik ta melel li Jeova eke, skʼan jchʼakbetik yorail ta spasel orasion xchiʼuk ta xchanel li Skʼope. Mi jech ta jpastike, mas to chkamigointik Jeova jech kʼuchaʼal la spas li Josee xchiʼuk muʼyuk me ta jpastik li kʼusi xuʼ chopol-o xaʼi sba kuʼuntike (Sant. 4:8).

15. ¿Kʼusi chakʼ jchantik li kʼusi chopol la spas j-israeletik kʼalal te oyik li ta takixokol balumile? (Ebreos 3:12).

¹⁵ Li buchʼutik chchʼay ta sjolik ti jaʼ kuxul Dios li Jeovae, xuʼ me xnamajik ta anil ta stojolal. Jkʼeltik kʼusi kʼot ta stojolal j-israeletik kʼalal te oyik ta takixokol balumile. Snaʼojik ti oy ta melel li Jeovae, pe lik snopik mi ta onoʼox x-akʼbatik li kʼusitik chtun yuʼunike. Jaʼ yuʼun, xi la sjakʼike: «¿Mi liʼ xchiʼukutik li Jeovae o mi muʼyuk?» (Eks. 17:​2, 7). Ta tsʼakale, laj onoʼox stoy sbaik ta stojolal li Diose. Mi jsetʼuk oy ta koʼontontik ti jchanbetik li xchopol talelalike (kʼelo Ebreos 3:12).

16. ¿Kʼusi van xuʼ xakʼ ta preva li xchʼunel koʼontontike?

¹⁶ Avie vokol tajek chkaʼitik ti jechuk-o nopol oyutik ta stojolal li Jeovae, yuʼun epal krixchanoetik chalik ti muʼyuk Diose. Yileluke lek chbat xkuxlejalik li buchʼutik muʼyuk tspasik li kʼusi oy ta yoʼonton  Diose. Taje xuʼ van xakʼ ta preva li xchʼunel koʼontontike. Muʼyuk onoʼox chkaltik ti muʼyuk Diose, pe yikʼaluk van xuʼ xlik naʼetajkutik mi ta melel ta onoʼox skoltautik. Taje jaʼtik jech kʼot ta stojolal li jtsʼibajom yuʼun Salmo 73. Laj yakʼ venta ti jun noʼox yoʼontonik li buchʼutik muʼyuk chchʼunbeik smantaltak Diose. Jaʼ yuʼun, la sjakʼbe sba mi ta melel oy onoʼox sbalil ti chtun ta stojolal Jeovae (Sal. 73:​11-13).

17. ¿Kʼusi tskoltautik sventa jechuk-o nopol oyutik ta stojolal Jeova?

¹⁷ ¿Kʼusi koltaat-o yuʼun li jtsʼibajom yuʼun salmo sventa sjel li kʼusi tsnope? Jaʼ ti la snopbe skʼoplal li kʼusi chkʼot ta stojolal li buchʼutik chchʼay ta sjolik li Jeovae (Sal. 73:​18, 19, 27). Jech xtok, la snopbe skʼoplal li sbaliltak chichʼ tael ti chijtun ta stojolale (Sal. 73:24). Li voʼotik eke lek me ti jnopbetik skʼoplal li epal bendisionetik yakʼojbutik Jeovae xchiʼuk ti kʼu yelan jkuxlejaltik jechuk ti muʼyukuk chijtun ta stojolale. Taje tskoltautik sventa jechuk-o tukʼ xkakʼ jbatik ta stojolal Jeova xchiʼuk ti jechuk xkaltik kʼuchaʼal li jtsʼibajom yuʼun salmoe: «Yan li voʼone lek chkaʼi ti chinopaj ta stojolal Diose» (Sal. 73:28).

18. ¿Kʼu yuʼun muʼyuk chijxiʼo li kʼusi chtal ta tsʼakale?

¹⁸ Ta skoj ti jaʼutik «smoso li jun noʼox kuxul melel Diose», tstsal kuʼuntik kʼusiuk noʼox vokolil ta jnuptantik li ta slajebal kʼakʼale (1 Tes. 1:9). Li kuxul Diose oyutik ta yoʼonton xchiʼuk jech-o tskoltautik. Jaʼ jech la skolta li yajtuneltak ta voʼnee xchiʼuk jaʼ jech tskoltautik li avi eke. Poʼot xa xtal li mukʼta tsatsal vokolil ti muʼyuk jech ilbil-oe. Pe mu jtukuk oyutik (Is. 41:10). «Jaʼ yuʼun, lek tsots koʼontontik xi chkaltike: ‹Jaʼ jkoltavanej kuʼun li Jeovae; muʼyuk chixiʼ›» (Ebr. 13:​5, 6).