Li kʼusitik tsjakʼ jkʼelvunetike
Li ta Salmo 12:7 xi chale: «Voʼot chakʼel». ¿Kʼusi chalbe skʼoplal taje? ¿Mi jaʼ «li buchʼutik oy xa onoʼox svokolike» (versikulo 5) o mi jaʼ «li kʼusitik chal Jeovae» (versikulo 6)?
Li stsʼak loʼil li ta versikulo taje chakʼ ta aʼiel ti jaʼ li krixchanoetike.
Li ta Salmo 12:1 kʼalal ta 4 chal ti «buchʼu tukʼ yakʼoj sbae chʼabal xa liʼ xchiʼuk li krixchanoetike». Avie jkʼeltik batel junantik versikuloetik ti jaʼ chalbe skʼoplal li kʼusi la jakʼtike: Salmo 12:5 k’alal ta 7.
«Xi chal li Jeovae: ‹Ta skoj ti ilbajinbilik li buchʼutik oy xa onoʼox svokolike,
ta skoj ti tsjikʼ yoʼonton li buchʼu abol sbaike,
chitots sventa oyuk kʼusi jpas ta stojolalik›.
‹Ta jkoltaik lokʼel ta skʼob li buchʼutik chpʼajvanike›.
Mi jsetʼuk xchopolil li kʼusitik chal Jeovae;
xkoʼolaj kʼuchaʼal plata ti lekubtasbil ta orno ti pasbil ta lume, vukub velta lekubtasbil.
Voʼot chakʼel, Kajval Jeova;
voʼot chachabi ta jujuntal, jech chlik apas li ta jkʼol kuxlejal liʼe xchiʼuk jech-o chapas sbatel osil».
Li ta versikulo 5 chal ti Diose tspoj lokʼel «li buchʼutik oy xa onoʼox svokolike».
Li ta versikulo 6 xi to chale: «Mi jsetʼuk xchopolil li kʼusitik chal Jeovae; xkoʼolaj kʼuchaʼal plata ti [lekubtasbile]». Li yajtsʼaklomutik Kristo eke jaʼ jech chkiltik li Skʼop Diose (Sal. 18:30; 119:140).
Jaʼ xa kalbetik skʼoplal li yan versikulo li ta Salmo 12:7: «Voʼot chakʼel, Kajval Jeova; voʼot chachabi ta jujuntal, jech chlik apas li ta jkʼol kuxlejal liʼe xchiʼuk jech-o chapas sbatel osil». ¿Buchʼu chalbe skʼoplal liʼe?
Ta skoj ti te to nitil skʼoplal li kʼusitik chal Jeova li ta versikulo 7, oy junantik tsnopik ti jaʼ chalbe skʼoplal li Skʼop Jeovae. Melel onoʼox ti Diose xchabioj talel o skʼeloj talel li Vivliae sventa mu slajesbeik skʼoplal li yajkontratake (Is. 40:8; 1 Ped. 1:25).
Pe jech onoʼox xtok, li Jeovae chchabi onoʼox li krixchanoetik jech kʼuchaʼal chal li ta versikulo 5. Li Jeovae laj onoʼox skolta xchiʼuk la spoj li buchʼutik chil svokolik ta skoj li ilbajinele xchiʼuk jech-o tspas batel (Job 36:15; Sal. 6:4; 31:1, 2; 54:7; 145:20).
Vaʼun chaʼa, ¿kʼu yuʼun xuʼ xkaltik ti jaʼ chalbe skʼoplal krixchanoetik li kʼusi chal ta versikulo 7?
Taje jaʼ jech chakʼ ta aʼiel li ta salmo liʼe.
Li ta Salmo 12:1 xchiʼuk 2 chal ti ep tajek li krixchanoetik ti muʼyuk xa stukʼilike ti chalik jutbil kʼopetik ta stojolal li buchʼutik tukʼike. Laje, chal ti Jeovae tslajesbe skʼoplal li buchʼutik muʼyuk lek tstunes li yeike. Li ta salmoe jamal chal ti Diose tskolta li steklumale, yuʼun mi jsetʼuk xchopolil li kʼusitik chale.
Jaʼ yuʼun chaʼa, kʼalal xi chal li ta versikulo 7: «Voʼot chakʼel» xchiʼuk «voʼot chachabi ta jujuntal» xie, jaʼ chalbe skʼoplal li krixchanoetik ti chichʼik ilbajinel yuʼun li chopol krixchanoetike.
Vaʼun chaʼa, ¿kʼu yuʼun oy junantik krixchanoetik jelel ti kʼu yelan chaʼibeik smelolal li versikulo taje? Yuʼun oy junantik kopiaetik ti lek jelubtasbil li ta Tsʼibetik ta Ebreo Kʼope xuʼ chakʼ ta aʼiel ti jaʼ skʼoplal li krixchanoetike xchiʼuk li Skʼop Diose, pe li Vivlia ta Septuaginta ta griego kʼope xi yelan chale: «Li stuke jaʼ tskʼelutik» xchiʼuk «li stuke jaʼ chchabiutik». Taje jaʼ chalbe skʼoplal li tukʼil krixchanoetik ti tsvul yoʼontonik xchiʼuk ti chichʼik ilbajinele. Li stukike chichʼik chabiel ta stojolal li «jkʼol kuxlejal» ti tstijik oʼontonal ta spasel li kʼusitik toj echʼ xa noʼox chopole (Sal. 12:7, 8). Jlik Vivlia ti laj yichʼ jelubtasel ta arameo kʼop li Tsʼibetik ta Ebreo Kʼope, xi chal li ta versikulo 7: «Li voʼote Kajval, chachabi li buchʼutik tukʼike. Voʼot chakʼel ta stojolal li jkʼol kuxlejal ti toj chopolike xchiʼuk jech-o chapas ta sbatel osil». Skotol li kʼusitik laj xa kalbetik talel skʼoplale chakʼ ta ilel ti maʼuk chalbe skʼoplal li kʼusitik chal Dios li ta Salmo 12:7.
Jaʼ yuʼun chaʼa, li versikulo liʼe chakʼbe spatobil yoʼonton li buchʼutik tukʼ yakʼoj sbaike, yuʼun chkoltaatik yuʼun li Diose.
