1, 2. Mi muʼyuk to chapalot sventa xavichʼ voʼe, ¿kʼu yuʼun skʼan mu xachibaj? (Kʼelo li lokʼoletik ta pajina 1).

 LEK tajek ti anopoj xa chavichʼ voʼe. ¿Pe mi chapalot xa? Mi chapal xa chavaʼi abae xchiʼuk ti mi lek xi li moletike, skʼan xa noʼox me xavichʼ voʼ un bi. Vaʼun, xamuyubaj noʼox me chatun ta stojolal Jeova.

² ¿Pe mi laj yalboxuk ti muʼyuk to chapalot sventa xavichʼ voʼe? ¿O mi muʼyuk to chapal chavaʼi abae? Mu xachibaj. Xuʼ me xachʼi-o batel ta mantal sventa xavichʼ voʼ, mu ventauk mi kerem tsebot o mi oy xa ajabilal.

3. ¿Kʼusi jakʼbat yuʼun jun j-etiopia vinik li Felipee xchiʼuk kʼusi chakʼ jnoptik? (Echos 8:36, 38).

³ (Kʼelo Echos 8:36, 38). Jun vinik ti tsots yabtel yichʼoj ta Etiopiae xi laj sjakʼbe li Felipee: «¿Kʼusi tsmakun sventa xkichʼ voʼ?». Jamal xvinaj ti oy ta yoʼonton chichʼ voʼe. ¿Pe mi chapal xa sventa xichʼ voʼ?

4. ¿Kʼuxi laj yakʼ ta ilel li j-etiopia vinik ti oy ta yoʼonton tskʼan chaʼibe batel mas smelolale?

⁴ Li j-etiopia vinike «ay yichʼ ta mukʼ Dios ta Jerusalen» (Ech. 8:27). Li vinik taje jaʼ jun jyanlum ti koʼol xa kʼusi xchʼunoj xchiʼuk li judaetike. Xojtikin li kʼusi chal li Tsʼibetik  ta Ebreo Kʼope xchiʼuk jaʼ te laj yaʼibe skʼoplal li Jeovae. Pe oy ta yoʼonton tskʼan chaʼibe batel mas smelolal, ¿kʼusi yakal tspas kʼalal taat ta be yuʼun li Felipee? Yakal tskʼelbe li svun j-alkʼop Isaiase (Ech. 8:28). Li kʼusi yakal tskʼelbe skʼoplale vokol ta aʼiel. Li j-etiopia vinike oy tajek ta yoʼonton tskʼan chaʼibe batel smelolal, mu baluk noʼox chaʼi li kʼusitik kʼun ta aʼibel smelolale.

5. ¿Kʼusi la spas li j-etiopia vinik ta sventa li kʼusi xchanoje?

⁵ Li vinik taje tsots yabtel ta stojolal Kandase ti jaʼ meʼ ajvalil ta Etiopiae xchiʼuk «jaʼ sbainojbe skotol li skʼulejale» (Ech. 8:27). Ep van kʼusitik sbainoj xchiʼuk mu van masuk xokol, pe la xchʼakbe yorail sventa xichʼ ta mukʼ li Jeovae. Mu baluk noʼox laj yaʼi ti xojtikin li mantale, yuʼun tijbat yoʼonton sventa xbat kʼalal to ta templo ta Jerusalen sventa xbat yichʼ ta mukʼ li Jeovae. Nat van tajek xanav batel xchiʼuk ep van laj stakʼin, pe maʼuk mas tsots skʼoplal laj yaʼi taje, jaʼ mas tsots skʼoplal laj yaʼi ti xichʼ ta mukʼ li Jeovae.

6, 7. ¿Kʼusi la spas li j-etiopia vinik sventa masuk to skʼan li Jeovae?

⁶ Li Felipee oy kʼusi tsots skʼoplal laj yakʼbe xchan li j-etiopia vinike, jech kʼuchaʼal ti jaʼ Mesias li Jesuse (Ech. 8:34, 35). Kʼot van tajek ta yoʼonton kʼalal laj yaʼi ti laj yakʼ sba ta milel li Jesuse. ¿Kʼusi van la spas? Xuʼ van xi la snope: «Koʼol xa kʼusi jchʼunoj xchiʼuk li judaetike xchiʼuk ichʼbilun xa ta mukʼ». Pe mu jechuk la snop, yuʼun ta skoj ti mas xa skʼanoj li Jeova xchiʼuk Jesuse kʼot ta nopel yuʼun ti tskʼan chichʼ voʼe xchiʼuk ti tskʼan tstsʼakli batel li Jesuse. Li Felipee laj yakʼ venta ti chapal xae, jaʼ yuʼun laj yakʼbe yichʼ voʼ.

⁷ Li kʼusi la spas li j-etiopia vinike tskoltaot yoʼ xachapan aba sventa li ichʼvoʼe. Xuʼ xi xaval ta sjunul avoʼonton eke: «¿Kʼusi tsmakun sventa xkichʼ voʼ?». Jkʼeltik kʼusi xuʼ xachanbe: ti xavojtikin batel li mantale, ti xavakʼ batel ta akuxlejal li kʼusi yakal chachane xchiʼuk ti masuk to xakʼan li Jeovae.

8. Jech kʼuchaʼal chal Juan 17:3, ¿kʼusi skʼan xapas?

⁸ (Kʼelo Juan 17:3 xchiʼuk tsʼib ta yok vun). ¿Mi la stij avoʼonton sventa xachan Vivlia li kʼusi laj yal Jesuse? Ep buchʼutik jaʼ tijbat-o yoʼontonik taje. Li kʼusi laj yal Jesuse tstij koʼontontik sventa jechuk-o jchantik batel, yuʼun muʼyuk onoʼox spajeb ti chkojtikintik «li jun noʼox melel» Diose (Ekl. 3:11). Jech-o ta xkojtikintik ta sbatel osil.  Kʼalal mas to chkojtikintik li Jeovae, mas to chijnopaj ta stojolal (Sal. 73:28).

9. ¿Kʼusi yan skʼan jpastik mi laj xa ox jchantik li kʼusitik kʼunik ta aʼibel smelolal ta Vivliae?

⁹ Jaʼ chlik jchantik li kʼusi kʼun ta aʼibel smelolal kʼalal chlik kojtikintik li Jeovae, xi laj yalbe skʼoplal jtakbol Pablo li ta skarta j-ebreoetike: «Kʼunil chanubtaseletik». Maʼuk laj yal ti muʼyuk tsots skʼoplal «li kʼusitik kʼun ta [chanele]»; yuʼun la skoʼoltas ta yaʼlel chu’il ti jaʼ sveʼel li uni neneʼetike (Ebr. 5:12; 6:1). La stijbe yoʼonton xtok li yajtsʼaklomtak Kristo ti maʼukuk noʼox xchanik li kʼusitik kʼunik ta aʼibel smelolale, yuʼun skʼan xchanik xtok li kʼusi vokol ta aʼibel smelolale. ¿Mi oy ta avoʼonton xchanel taje? ¿Mi oy ta avoʼonton chachʼi-o ta mantal, chavojtikin batel Jeova xchiʼuk li kʼusitik snopoj tspase?

10. ¿Kʼu yuʼun mu jkotoltikuk ta jkʼupintik li chanune?

¹⁰ Junantike mu kʼunuk chaʼiik ti xchanunajike. ¿Mi kʼun chavaʼi li voʼote? ¿Mi lachanunaj ta eskuela? ¿Mi la akʼupin li chanune? ¿O mi laj avakʼ venta ti mu xakʼupine? Mi jeche, mu atukuk. Li Jeovae oy ta yoʼonton tskoltaot. Ta skoj ti tukʼe, jaʼ jun lekil Jchanubtasvanej.

11. ¿Kʼu yuʼun jaʼ «Mukʼul Jchanubtasvanej» li Jeovae?

¹¹ Li Jeovae chal ti jaʼ li Mukʼul Jchanubtasvaneje (Is. 30:20, 21). Oy smalael yuʼun, lek yoʼonton, xaʼibe lek smelolal xchiʼuk jaʼ tskʼelbe li slekil talelaltak li yajchanuntake (Sal. 130:3). Muʼyuk onoʼox tskʼanbutik li kʼusi mu spas kuʼuntike. Teuk ta joltik ti jaʼ la smeltsan li jchinabtik ti jaʼ jun kʼupil sba matanale (Sal. 139:14). Jech xtok, ti oy ta koʼontontik ti oy kʼusi ta jkʼan ta jchantike jaʼ ta skoj ti jech la spasutike xchiʼuk tskʼan ti jechuk-o jchantik batel ta sbatel osil xchiʼuk ti jkʼupintike. Jaʼ yuʼun, skʼan xa noʼox me jnopes jbatik sventa oyuk mas ta koʼontontik xchanbel skʼoplal li kʼusi chal Vivliae (1 Ped. 2:2). ¿Kʼusi xuʼ skoltaot? Oyuk kʼusi xavakʼ ta avoʼonton stael, nopolik noʼox xakʼel xchiʼuk xachan li Vivliae (Jos. 1:8). Li Jeovae ta me skoltaot sventa mas xakʼupin xchanel li Vivliae xchiʼuk ti xavojtikinbe mas li stalelale.

12. ¿Kʼu yuʼun skʼan jchanbetik skʼoplal ti kʼu yelan echʼ xkuxlejal li Jesuse xchiʼuk ti kʼu yelan la xchol mantale?

¹² Chʼakbo yorail sventa xanopbe skʼoplal ti kʼu yelan echʼ xkuxlejal li Jesuse xchiʼuk ti kʼu yelan la xchol mantale. Sventa xatun ta stojolal Jeova avi ti mas to ep kʼusitik chanuptane, tsots skʼoplal ti xachanbe stalelal li Jesuse (1 Ped. 2:21). Li Jesuse jamal laj yalbe yajtsʼaklomtak ti ta onoʼox snuptan tsots svokolike (Luk. 14:27, 28). Pe snaʼoj ti xuʼ tukʼ xakʼ sbaik jech kʼuchaʼal la spas eke (Juan 16:33). Chanbo skʼoplal ti kʼu yelan echʼ xkuxlejal li Jesuse xchiʼuk kʼelo kʼu yelan xuʼ xachanbe stalelal jujun kʼakʼal.

13. ¿Kʼusi ti skʼan jechuk-o xakʼanbe li Jeovae, xchiʼuk kʼu yuʼun?

¹³ Li kʼusi oy ta koʼontontik kʼalal chijchanunaje maʼuk noʼox sventa epuk kʼusi jnabetik skʼoplal, moʼoj, yuʼun li kʼusi ta jkʼantike jaʼ ti xkojtikintik li Jeovae, ti jkʼantike xchiʼuk ti xkakʼ xchʼunel koʼontontik ta stojolale (1 Kor. 8:1-3). Avi ti yakal chavojtikin batel mas li Jeovae, jechuk-o me xakʼanbe ti stsatsubtas li xchʼunel avoʼontone (Luk. 17:5). Li stuke ta slekil yoʼonton tskoltaot. Mi tsots xchʼunel avoʼonton xchiʼuk mi lek xavojtikin li Jeovae, tskoltaot sventa xachʼi ta mantal (Sant. 2:26).

14. ¿Kʼuxi laj yalbe skʼoplal Pedro ti tsots skʼoplal ti jpastik li kʼusi yakal ta jchantike? (Kʼelo xtok li lokʼole).

¹⁴ Li jtakbol Pedroe laj yal ti tsots skʼoplal ti xakʼ ta xkuxlejalik li kʼusi yakal chchanik li  yajtsʼaklomtak Kristoe. Sventa xalbe smelolale jaʼ la stunes li kʼusi kʼot ta stojolal li Noee. Li Jeovae laj yalbe Noe ti ta xakʼ talel nojelal ta voʼ sventa slajes skotol li chopol krixchanoetike. Pe li Noe xchiʼuk yutsʼ yalale maʼuk noʼox skʼan snaʼik li kʼusi chkʼot ta pasele, yuʼun skʼan oyuk kʼusi spasik sventa kuxul xkomike. Li Pedroe jaʼ laj yalbe skʼoplal kʼalal skʼan toʼox xtal li nojelal ta voʼe, jaʼ xkaltik, «kʼalal jaʼo yakal chichʼ meltsanel li arkae» (1 Ped. 3:20). Li Noe xchiʼuk yutsʼ yalale jech tajek la spasik kʼuchaʼal albatik yuʼun li Jeovae, la smeltsanik jun mukʼta arka (Ebr. 11:7). Li Pedroe la skoʼoltas li ichʼvoʼ xchiʼuk li kʼusi la spas Noee. Xi laj yale: «Li kʼusi kʼot ta pasele jaʼ noʼox jun senyail li ichʼvoʼ ti jaʼ yakal chakolik-o [avie]» (1 Ped. 3:21). Li kʼusi yakal chapas avi sventa xachapan aba yoʼ xavichʼ voʼe xkoʼolaj li kʼusi la spas li Noe xchiʼuk li yutsʼ yalal kʼalal la smeltsanik li arkae. Jaʼ yuʼun, ¿kʼusi skʼan xapas sventa xachapan aba yoʼ xavichʼ voʼe?

15. ¿Kʼusi skʼan xal ti ta jsutes koʼontontik ta melele?

¹⁵ Jtos ti kʼusi skʼan jpastike jaʼ ti jsutes koʼontontik ta melele (Ech. 2:37, 38). ¿Kʼusi skʼan xal taje? Jaʼ ti xkiktatik spasel li kʼusitik chopol chil li Jeovae. Jech kʼuchaʼal li mulivajele, li sikʼolajele xchiʼuk li yalel chopol kʼopetike (1 Kor. 6:9, 10; 2 Kor. 7:1; Efes. 4:29). Mi muʼyuk to aviktaoje, akʼo avipal sventa spas avuʼun. Xuʼ xakʼanbe koltael li buchʼu chakʼbot estudio xchiʼuk li moletik ta tsobobbaile. Mi kerem tsebot to xchiʼuk ti te to nakalot xchiʼuk atot ameʼe, xuʼ xavalbe ti skoltaot sventa xavikta li kʼusi nopem xavaʼi yoʼ xuʼ xavichʼ voʼe.

16. ¿Kʼusitik xuʼ xapas sventa jechuk-o xavichʼ ta mukʼ li Jeovae?

¹⁶ Tsots skʼoplal xtok ti oy kʼusitik xapas sventa xavichʼ ta mukʼ li Jeovae. Jech kʼuchaʼal ti xabat ta tsobajeletik xchiʼuk xavakʼ aloʼile (Ebr. 10:24, 25). Kʼalal mi la och ta jcholmantale nopolik noʼox me xachol mantal, mi jech la apase chavakʼ venta ti mas to chakʼupine (2 Tim. 4:5). Mi kerem tsebot to xchiʼuk ti te to nakalot xchiʼuk atot ameʼe, xiuk xanope: «¿Mi persa to skʼan svulesbeikun ta jol ti skʼan xibat ta tsobajeletik o ta cholmantale? ¿O mi chlokʼ ta koʼonton jtuk?». Mi jech chapase, chavakʼ ta ilel ti oy  xchʼunel avoʼonton, ti akʼanoj Jeova xchiʼuk ti chatoj ta vokol li kʼusitik spasoje. Kʼalal chapas li kʼusitik ta mantale, yakal me chavichʼ lek ta mukʼ li Jeovae xchiʼuk xkoʼolaj ti chavakʼbe smotone (2 Ped. 3:11; Ebr. 13:15). Li Jeovae tskʼan ti oyuk kʼusi xlokʼ ta koʼontontik yakʼbele, ti mu ta sujbiluk ta jpastike (koʼoltaso xchiʼuk 2 Korintios 9:7). Li voʼotik eke xijmuyubaj mi jech ta jpastike.

17, 18. ¿Kʼusi talelal tskoltaot sventa xuʼ xavichʼ voʼ, xchiʼuk kʼu yuʼun? (Proverbios 3:3-6).

¹⁷ Oy van kʼusitik tsmakot kʼalal skʼan toʼox xavichʼ voʼe. Yikʼaluk van xavichʼ labanel o kontrainel (2 Tim. 3:12). Yikʼaluk van yakal chavakʼ avipal ta yiktael li kʼusi anaʼoj ti muʼyuk leke, pe bakʼintike mu spas avuʼun. Xuʼ van xanop ti mu xata-o xavichʼ voʼe xchiʼuk ti jecheʼ xa noʼox chavakʼ avipale. ¿Kʼusi tskoltaot sventa mu xalubtsaj? Jaʼ ti akʼanojuk li Jeovae.

¹⁸ Kʼupil sba ti akʼanoj li Jeovae (kʼelo Proverbios 3:3-6). Mi akʼanoj ta sjunul avoʼonton li Jeovae, jaʼ tskoltaot sventa jechuk-o xatun ta stojolal akʼo mi oy kʼusitik chanuptan. Li Vivliae ep ta velta chakʼ ta ilel ti skʼanojan yajtuneltak li Jeovae, taje jaʼ skʼan xal ti muʼyuk chiktaane xchiʼuk ti jech-o skʼanojane (Sal. 100:5). Jech xtok, jaʼ jech la spasot kʼuchaʼal slokʼol (Jen. 1:26). Jaʼ yuʼun, ¿kʼuxi xuʼ xavakʼ ta ilel li talelal taje?

19. ¿Kʼusi xuʼ xapas sventa xatojbe ta vokol Jeova li kʼusi tspas ta atojolale? (Galatas 2:20).

¹⁹ Baʼyele, jaʼ ti xanaʼuk xatoj ta vokole (1 Tes. 5:18). Xiuk xanopbe skʼoplal jujun kʼakʼale: «Li avie, ¿kʼu yelan laj yakʼbun ta ilel Jeova ti skʼanojune?». Kʼalal mi la apas orasione, oyuk kʼusi xatojbe ta vokol li Diose jech kʼuchaʼal li kʼusitik lekik chakʼbote. Yuʼun jaʼ te chavakʼ venta ti skʼanojot tajeke, jech kʼuchaʼal laj yakʼ venta li jtakbol Pabloe (kʼelo Galatas 2:20). Xiuk xanopbe skʼoplal xtoke: «¿Mi oy ta koʼonton chkakʼbe ta ilel Jeova ti jkʼanoje?». Mi akʼanoj li Diose tskoltaot sventa stsal avuʼun li prevaetike, li vokoliletike xchiʼuk jech-o chapas batel li kʼusitik ta mantale. Vaʼun, jaʼ me jech chavakʼ ta ilel jujun kʼakʼal ti akʼanoj li Jeovae.

20. ¿Kʼusi skʼan xal ti chavakʼ aba ta stojolal li Jeovae, xchiʼuk kʼu yuʼun tsots skʼoplal ti jech xkʼot ta nopel avuʼune?

²⁰ Kʼalal mas xa ox akʼanoj li Jeovae, tstij avoʼonton sventa xapas jun orasion ti bu chavakʼ akuxlejal ta stojolale. Vaʼun, xuʼ me xavakʼ ti jaʼuk sventain akuxlejal ta sbatel osile. Kʼalal chavakʼ aba ta stojolal Jeovae, jaʼ te chavalbe ti chatun ta stojolal mu ventauk li kʼusitik chanuptane. Taje jun noʼox me velta ta jpastik. Ti chkakʼ jbatik ta stojolal Jeovae maʼuk noʼox me tajimol, pe teuk ta ajol ti lek ti jech kʼot ta nopel avuʼune (Sal. 50:14). Li Satanase tskʼan tsnamajesot ta stojolal Jeova sventa mu xa xatun ta stojolal. Pe mu me xavakʼ ti snamajesote (Job 27:5). Ta skoj ti akʼanoj tajek li Jeovae, tskoltaot sventa xapas li kʼusi laj avalbee xchiʼuk ti xanopaj mas ta stojolale.

21. ¿Kʼu yuʼun jaʼ to noʼox yuni likeb ti chijtun ta stojolal Jeova mi laj kichʼtik voʼe?

²¹ Mi laj xa ox avakʼ aba ta stojolal Jeovae, albo li moletik ta tsobobbail ti chakʼan chavichʼ voʼe. Pe teuk me ta ajol ti mi laj avichʼ voʼe jaʼ to noʼox yuni likeb ti chlik tunan ta stojolal Jeovae, jaʼ yuʼun oyuk kʼusi xavakʼ ta avoʼonton spasel sventa masuk to xakʼan jujun kʼakʼal. Taje jaʼ me tskoltaot sventa xuʼ xavichʼ voʼ. ¡Xamuyubaj me tajek mi kʼot skʼakʼalile! Jechuk-o me xakʼan batel li Jeova xchiʼuk Xnichʼone.