¿Kʼu yuʼun laj yal ti xuʼ sok-o skʼoplal xrexto osil mi nupun xchiʼuk Rut li jun vinik ti «amigo» xi skʼoplal ta Vivliae? (Rut 4:1, 6).

Li ta voʼnee, mi cham jun vinik ti muʼyuk xnichʼone, oy kʼusitik skʼan skʼelbeik skʼoplal, jech kʼuchaʼal liʼe: ¿Buchʼu van chichʼ komel li yosiltake? ¿Mi te van chchʼay-o skʼoplal li snitilulale? Taje te chchapbe smelolal li Smantal Moisese.

Mi cham jun vinik o ta xchon yosil ta skoj ti pas ta povree, li sbankil, yitsʼin o yutsʼ yalale xuʼ xchaʼmanbe li yosile. Vaʼun, jaʼ jech ta yutsʼ yalal noʼox ta xkom li osile (Lev. 25:23-28; Num. 27:8-11).

¿Kʼusi chichʼ pasel sventa mu xchʼay snitilulal yutsʼ yalal li buchʼu chame? Li sbankil o yitsʼine jaʼ ta xikʼbe yajnil sventa xil xnichʼon. Vaʼun, li nichʼonile jaʼ chichʼ komel li rexto osil sventa mu xchʼay skʼoplal li snitilulal yutsʼ yalale. Taje jaʼ skʼan xal ti chikʼbe yajnil anima li muʼil o kunyadoile. Ti jech chichʼ pasele jaʼ sventa lekuk noʼox oy li ants ti cham smalale (Deut. 25:5-7; Mat. 22:23-28). Taje jaʼ jech kʼot ta stojolal li Rute.

Kalbetik skʼoplal kʼusi la snuptan Noemi ti jaʼ toʼox smalal li Elimeleke. Kʼalal cham li smalal xchiʼuk li chaʼvoʼ skeremtake, muʼyuk xa buchʼu xmakʼlinat (Rut 1:1-5). Kʼalal sut batel ta Juda li Noemie, laj yalbe Rut ti akʼo xalbe Boas ti jaʼ akʼo xchaʼman li osile. Li vinik taje jaʼ yutsʼ yalal li Elimeleke (Rut 2:1, 19, 20; 3:1-4). Pe li Boase snaʼoj ti oy to yan yutsʼ yalal ti jaʼ oy sderecho sventa xchaʼman li osile (Rut 3:9, 12, 13). Li vinik taje «amigo» xi skʼoplal li ta Vivliae.

Ta slikebale, li amigoile jpʼel ox ta yoʼonton chchaʼman li osile (Rut 4:1-4). Snaʼoj ti ep chlaj stakʼine, ti meʼel xa li Noemie xchiʼuk ti mu xa xuʼ xil junuk skerem sventa xichʼbe komel xrexto li Elimeleke. Ta skoj taje, li amigoile jaʼ chichʼ komel skotol li rexto osile. Xakʼel noʼox yilele, xlokʼ venta ti xchaʼman li osile.

Pe kʼalal laj yaʼibe smelolal ti skʼan xikʼ xtok li Rute, kʼot ta nopel yuʼun ti muʼyuk chchaʼman li osile. Xi laj yale: «Mu xuʼ jman, yuʼun xuʼ sok skʼoplal kuʼun li jrexto osile» (Rut 4:5, 6). ¿Kʼu yuʼun ti chibaje?

Mi laj yikʼ Rut li amigoil taje o yan yutsʼ yalale xchiʼuk mi ayan junuk skeremike, jaʼ ta xichʼbe komel xrexto osil li Elimeleke. Jaʼ yuʼun, ¿kʼuxi van xuʼ sok-o skʼoplal xrexto osil li amigoile? Li Vivliae muʼyuk jamal chal, pe jkʼeltik junchibuk srasonal.

• Baʼyel, li amigoile laj van snop ti jecheʼ noʼox chchʼay stakʼine, yuʼun li yosil Elimeleke jaʼ chichʼ li skerem Rute.

• Xchibal, jaʼ skʼan smakʼlin li Noemi xchiʼuk Rute.

• Yoxibal, mi ayan yalab xnichʼnabik li amigoil xchiʼuk li Rute, jmoj chchʼakbe sbaik li osil xchiʼuk li yan skeremtak li amigoile.

• Xchanibal, mi chʼabal yan skeremtak li amigoile, pe mi laj yil skeremik xchiʼuk li Rute, li olol taje jaʼ chuʼuninbe yosil li Elimeleke xchiʼuk li yosil eke. Vaʼun, muʼyuk chchʼay skʼoplal li snitilulal Elimeleke, pe jaʼ chchʼay skʼoplal li snitilulal amigoile. Li amigoile muʼyuk la skolta Noemi ta skoj ti xuʼ xchʼay li yosile. Jaʼ laj yakʼbe ta sba Boas ti oy sderecho ek sventa xuʼ xchaʼman li osile. ¿Kʼusi la spas li Boas une? Chaʼmanvan «sventa teuk-o ta stojolal yutsʼ yalal li xrexto osil animae» (Rut 4:10).

Kʼuchaʼal chkakʼtik ventae, li kʼusi mas tsots skʼoplal laj yil li amigoile jaʼ li sbie xchiʼuk li yosile. ¡Mi jsetʼuk skʼan xkoltavan! Muʼyuk sbalil li kʼusi la spase, yuʼun chʼay onoʼox ta be li sbie. Jech xtok, muʼyuk la sta li jun mukʼta matanal ti jaʼ la sta li Boase: ti te lik talel ta snitilulal Boas li Mesiase, ti jaʼ li Jesukristoe. Muʼyuk lek kʼusi kʼot ta stojolal li amigoil ta skoj ti jaʼ noʼox tsaʼ li kʼusi tskʼan stuke xchiʼuk ti muʼyuk lokʼ ta yoʼonton skoltael li yantike (Mat. 1:5; Luk. 3:23, 32).