1, 2. ¿Kʼusi sbalil tstabeik li buchʼutik chichʼik voʼe?

 KʼALAL oy buchʼu chichʼ voʼe, chkʼot ta yutsʼ yalal li Jeovae. ¡Toj kʼupil sba maʼ taje! Li buchʼutik lek xil sbaik xchiʼuk Jeovae jech van chaʼi sbaik kʼuchaʼal David ti xi laj yale: «Xmuyubaj noʼox li buchʼu atʼujoje [Jeova] xchiʼuk ti chanopajes tal ta atojolal sventa te chnaki li ta avamakʼe» (Sal. 65:4).

² Li Jeovae mu buchʼuuk noʼox xakʼ ochuk li ta yamakʼe. Jech kʼuchaʼal la jchantik li ta xchanobil echʼe, li Jeovae chnopaj ta stojolal li buchʼutik oy ta yoʼonton chamigoinike (Sant. 4:8). Kʼalal chakʼ xkuxlejalik ta stojolal Jeova xchiʼuk chichʼik voʼe, mas to lek xil sbaik xchiʼuk. Li Jeovae xi chalanbee: «Te xavilik mi muʼyuk ta jmal tal epal bendision ta atojolalik jaʼ to ti kʼuxi oy xa avuʼunik skotole» (Mal. 3:10; Jer. 17:​7, 8).

3. ¿Kʼusi jbainoj jkotoltik ti kakʼojbe xa jkuxlejaltik Jeova xchiʼuk ti kichʼojtik xa voʼe? (Eklesiastes 5:​4, 5).

³ Li ichʼvoʼe jaʼ noʼox slikeb. Skotol li yajtunelutik Jeova ti kakʼojbe xa jkuxlejaltike, skʼan jpastik li kʼusi laj kakʼ ketik spasele akʼo mi xkichʼtik akʼel ta preva (kʼelo Eklesiastes 5:​4, 5). Jech xtok, skʼan jtsʼaklitik Jesus xchiʼuk jchʼunbetik li smantaltake (Mat. 28:​19, 20; 1 Ped. 2:21). Li ta xchanobil liʼe, tskoltautik sventa spas kuʼuntik.

JECHUK-O ME XATSʼAKLI JESUS AKʼO MI XAVIL AVOKOL XCHIʼUK PREVAETIK

4. ¿Kʼusi skʼan xal ti chkuchik «jtel teʼ sventa vokolil» li yajchankʼoptak Jesuse? (Lukas 9:23).

⁴ Mu me xanop ti muʼyuk xa chavil avokol mi laj avichʼ voʼe. Li Jesuse laj yal ti chkuch «jtel teʼ sventa vokolil jujun  [kʼakʼal]» li yajchankʼoptake (kʼelo Lukas 9:23). ¿Mi jaʼ van la skʼan laj yal Jesus ti naka vokolil tsnuptanike? Moʼoj. Yuʼun akʼo mi ta onoʼox xichʼik bendision, ta onoʼox xil svokolik. Bakʼintike tsots tajek li kʼusi tsnuptanike (2 Tim. 3:12).

5. ¿Kʼusitik bendision tstaik li buchʼutik oy kʼusitik tspasik ta sventa li Ajvalilal yuʼun Diose?

⁵ Xuʼ van la skontrainot avutsʼ avalal o xuʼ van oy kʼusitik la apas ta sventa li Ajvalilal yuʼun Diose (Mat. 6:33). Mi jech apasoje, li Jeovae snaʼoj me skotol li kʼusi apasoj ta stojolale (Ebr. 6:10). Xuʼ van aviloj ti melel li kʼusi laj yal Jesus liʼe: «Chkalboxuk avaʼiik ta melel ti skotol li buchʼu yiktaoj sna, mi sbankil o yitsʼin, mi xvix o yixlel, mi smeʼ o stot, mi yalab o xnichʼnab o mi yosil ta jkoj xchiʼuk ta skoj li lekil aʼyejetike ta me snuptan kontrainel, akʼo mi jech, sien to me mas tsta li avi kʼakʼale, mi sna, mi sbankil o yitsʼin, mi xvix o yixlel, mi smeʼ, mi yalab o xnichʼnab o mi yosil; jech xtok, ta me sta xkuxlejal sbatel osil ta tsʼakal» (Mar. 10:​29, 30). Ep tajek li bendisionetik ataoje, jaʼ mu sta li kʼusitik apasoj ta sventa li Ajvalilal yuʼun Diose (Sal. 37:4).

6. ¿Kʼu yuʼun skʼan jech-o jtsaltik li kʼusi tskʼan jbekʼtaltik mi laj xa ox kichʼtik voʼe?

⁶ Kʼalal mi laj avichʼ voʼe, skʼan me jech-o xatsal li kʼusi tskʼan abekʼtale (1 Juan 2:16). Yuʼun jpasmulilot-o. Jech van chavaʼi aba kʼuchaʼal li jtakbol Pablo ti xi laj yale: «Lek kʼupil chkaʼi ta koʼonton ta melel li smantal Diose, pe chkakʼ venta ti oy yan mantal ta jbekʼtal ti tskontrain sba xchiʼuk li smantal jnopbene xchiʼuk jaʼ chchukun batel ta stojolal li smantal mulil oy ta jbekʼtale» (Rom. 7:​22, 23). Yikʼaluk van vokol chavaʼi ti jech-o skʼan xatsal li kʼusitik chopol tskʼan avoʼontone. Pe kʼalal chanopbe skʼoplal li kʼusi laj avalbe Jeova kʼalal laj avakʼbe akuxlejale, jaʼ chakʼ avipal sventa stsal avuʼun li prevaetike. Yuʼun li kʼusi laj avalbe Jeova kʼalal laj avakʼbe akuxlejale, jaʼ tskoltaot kʼalal chanuptan junuk prevae. ¿Kʼu yuʼun ti jech chkaltike?

7. Ti laj kakʼbe jkuxlejaltik li Jeovae, ¿kʼuxi tskoltautik sventa tukʼ xkakʼ jbatik?

⁷ Kʼalal oy buchʼu chakʼ xkuxlejal ta stojolal Jeovae, tsjip ta yoʼonton li xkuxlejale. Taje jaʼ skʼan xal ti maʼuk tspas li kʼusi lek chaʼi stuke xchiʼuk li kʼusitik mu lekuk chil Jeovae (Mat. 16:24). Jaʼ yuʼun, kʼalal ta jnuptantik junuk prevae, maʼuk to me te ta jnoptik kʼusi ta jpastik. Yuʼun jtos noʼox li kʼusi ta jpastike: jaʼ ti tukʼ xkakʼ jbatik ta stojolal Jeovae. Kʼalal laj kakʼ jkuxlejaltik ta stojolale, laj kalbetik ti jaʼ noʼox ta jpastik li kʼusi tskʼane. Oy ta koʼontontik ti xmuyubaj kuʼuntik li Jeovae. Yuʼun jaʼ jech ta jkʼan ta jpastik kʼuchaʼal li Jobe akʼo mi tsots kʼusitik la snuptan xi jpʼel ta yoʼonton laj yale: «Muʼyuk ta jkomtsan-o ti tukʼ koʼontone» (Job 27:5).

8. Kʼalal ta jnopbetik skʼoplal ti laj kakʼ jkuxlejaltike, ¿kʼuxi tskoltautik kʼalal ta jnuptantik prevaetike?

⁸ Kʼalal ta jnopbetik skʼoplal ti laj kalbetik Jeova ti ta jpasbetik li kʼusi tskʼan yoʼontone, chakʼ kipaltik sventa jtsaltik li prevaetike. Kalbetik junuk skʼelobil. ¿Mi lek xa van chkaʼitik ti ta jloʼlabetik sjol li buchʼu nupuneme? Muʼyuk, yuʼun kʼalal laj kakʼ jkuxlejaltik ta stojolal Jeovae, laj kaltik ti muʼyuk ta jpastik taje. Ta skoj ti muʼyuk chkakʼtik ti xakʼ yibel ta koʼontontik li kʼusi chopole, muʼyuk  vokol chkaʼitik ta sbulel lokʼel ta koʼontontik. Chijnamaj ta «sbe li buchʼutik toj chopolike» (Prov. 4:​14, 15).

9. Kʼalal ta jnopbetik skʼoplal li kʼusi laj kalbetik ta jamal li Jeovae, ¿kʼuxi tskoltautik sventa baʼyuk xkakʼ ta jkuxlejaltik li kʼusitik ta sventa mantale?

⁹ Mi laj kichʼtik albel junuk abtelal ti tsmakutik ta tsobajeletike, ¿kʼusi van ta jpastik? Jnaʼojtik lek li kʼusi skʼan jpastike. Kʼalal skʼan toʼox xij-albat junuk abtele, skʼan jnopojtik xa onoʼox ti muʼyuk ta jchʼamtike. Yuʼun mi jchʼamojtik xa ox li abtelale, maʼuk xa yorail sventa jkʼeltik kʼusi xuʼ jpastik sventa masuk to xijtun ta stojolal Dios. Tskoltautik li kʼusi la spas Jesuse, yuʼun laj yakʼ ta ilel ti jaʼ oy ta yoʼonton tspas li kʼusi tskʼan Stote. Li voʼotik eke skʼan jpʼajtik ta anil xchiʼuk mu jpastik li kʼusi jnaʼojtik ti muʼyuk lek chil Diose (Mat. 4:10; Juan 8:29).

10. ¿Kʼuxi tskoltautik Jeova sventa jechuk-o jtsʼaklitik Jesus mi kichʼojtik xa ox voʼe?

¹⁰ Kʼalal ta jnuptantik vokoliletik xchiʼuk prevaetike, tskoltautik sventa xkakʼtik ta ilel ti jpʼel ta koʼontontik ti jech-o ta jtsʼaklitik li Jesuse. Jech xtok, jnaʼojtik ti ta onoʼox skoltautik li Jeovae, yuʼun xi chal li Vivliae: «Tukʼ li Diose, muʼyuk chakʼ ti akʼo xavichʼik akʼel ta preva mi mu stsʼik avuʼunike, akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xkuch avuʼunik» (1 Kor. 10:13).

¿KʼUSI SKʼAN XAPAS SVENTA JECHUK-O XATSʼAKLI LI JESUSE?

11. ¿Kʼusitik xuʼ jpastik sventa jechuk-o jtsʼaklitik li Jesuse? (Kʼelo xtok li lokʼoletike).

¹¹ Li Jesuse ta sjunul yoʼonton tun ta stojolal Jeova xchiʼuk koliyal li orasione mas to nopaj ta stojolal (Luk. 6:12).  Sventa jechuk-o xatsʼakli batel Jesus kʼalal avichʼoj xa ox voʼe, skʼan xanopes aba ta spasel li kʼusitik xuʼ snopajesot ta stojolal Jeovae. Xi chal li Vivliae: «Ti bu xa kʼalal chʼiemutike jaʼuk me jech lek xchapet jpastik batel li kʼusi jtamojtik xa batele» (Filip. 3:16). Oy van chavaʼi sloʼil ermanoetik ti oy kʼusitik la spasik sventa xtunik mas ta stojolal li Jeovae. Yikʼaluk van batik ta Chanob vun sventa j-al lekil aʼyejetik yuʼun Ajvalilal yuʼun Dios o batik ti bu chtun mas jcholmantaletike. Mi xuʼ avuʼun chavil spasele, paso me. Li yajtuneltak Jeovae tskʼelik kʼusitik xuʼ spasik sventa masuk to xcholik mantal (Ech. 16:9). Pe mi mu to xuʼ avuʼune, mu me xanop ti muʼyuk abalile. Li kʼusi mas tsots skʼoplale jaʼ ti xkuch avuʼune (Mat. 10:22). Mu me xchʼay xavaʼi ti xmuyubaj avuʼun Jeova kʼalal chapas ti bu kʼalal xuʼ avuʼune xchiʼuk ti chatunes li kʼusi xatojob spasele. Mi jech chapase, jech-o me chatsʼakli Jesus kʼalal avichʼoj xa ox voʼe (Sal. 26:1).

12, 13. ¿Kʼusi xuʼ xapas mi chavakʼ venta ti muʼyuk xa mas xamuyubaj ta spasbel yabtel li Jeovae? (1 Korintios 9:​16, 17; kʼelo xtok li rekuadro « ¿Kʼusitik xuʼ xapas sventa jechuk-o xa-anilaje?»).

¹² Mi laj avakʼ venta ti maʼuk xa ta sjunul avoʼonton chlokʼ li kʼusi chaval ta aorasione, mi muʼyuk xa chakʼupin li cholmantal xchiʼuk skʼelel Avivlia mi avichʼoj xa ox voʼe, mu xanop ti muʼyuk xa chakʼbot xchʼul espiritu li Jeovae. Ta skoj ti jpasmulilutike, stalel onoʼox ti chijchibaj bakʼintike. Mi laj avakʼ venta ti muʼyuk xa xamuyubaje, nopbo skʼoplal li jtakbol Pabloe. Yuʼun akʼo mi laj yakʼ yipal xchanbel stalelal li Jesuse, snaʼoj ti ta onoʼox xchibaj bakʼintik ta spasel li kʼusi leke (kʼelo 1 Korintios 9:​16, 17). Xi laj  yale: «Akʼo mi maʼuk ta sjunul koʼonton ta jpas, oy onoʼox kʼusi kʼubanbilun». Li kʼusi skʼan xale, jaʼ ti jpʼel ta yoʼonton tspas li kʼusi akʼbil sbain yuʼun Dios mu ventauk ti kʼu yelan chaʼi sba bakʼintike.

¹³ Kʼalal chibajemote, jpʼeluk me ta avoʼonton jaʼ xapas li kʼusi leke akʼo mi mu jechuk oy ta avoʼonton spasel. Mi chapas li kʼusi leke, xuʼ me xjel li kʼusi oy ta avoʼontone. Mi chachʼakbe lek yorail xchanel Avivlia, spasel orasion, chabat ta tsobajeletik xchiʼuk ta cholmantale, tskoltaot sventa jechuk-o xatsʼakli Jesus kʼalal avichʼoj xa ox voʼe. Jech xtok, kʼalal jech chapase, tstsatsubtasbat yoʼonton li ermanoetik ta atsobobbail kʼalal chilik ti kuchem tal avuʼune (1 Tes. 5:11).

«KʼELO-O ME ABAIK»

14. ¿Kʼusi skʼan jkʼelbetik skʼoplal bakʼintik xchiʼuk kʼu yuʼun? (2 Korintios 13:5).

¹⁴ Kʼalal avichʼoj xa ox voʼe, tsots skʼoplal ti xakʼel bakʼintik ti kʼu yelan li akuxlejale xchiʼuk li kʼusi nopem xavaʼi spasele (kʼelo 2 Korintios 13:5). Kʼelo mi yakal chapas orasion jujun kʼakʼal, mi chachan Avivlia, mi chakʼotilan ta tsobajeletik xchiʼuk mi chachol mantal. Kʼelo kʼuxi xuʼ xakʼupin mas li kʼusitik chapas ta mantale. Xuʼ xi xajakʼbe abae: «¿Mi xchapbe kuʼun smelolal li chanubtaseletik ta Vivlia ti mas tsotsik skʼoplale? ¿Kʼusi to xuʼ jpas sventa masuk to jkʼupin li cholmantale? ¿Mi jamal chkalbe Jeova li kʼusi ta jkʼane xchiʼuk mi chkakʼ ta ilel ti jpatoj koʼonton ta stojolale? ¿Mi chkakʼ kipal sventa mu jchʼay jba li ta tsobajeletike? ¿Kʼusi xuʼ jpas sventa mu kʼusi xchʼay koʼonton li ta tsobajeletike xchiʼuk mi tspat oʼontonal li jkomentarioe?».

15, 16. ¿Kʼusi chakʼ achan li kʼusi kʼot ta stojolal li Roberte?

¹⁵ Kalbetik skʼoplal jun ermano ti Robert sbie. Chakʼbutik ta ilel ti tsots skʼoplal ti skʼan jech jpastike. Xi chale: «Kʼalal te toʼox van 20 jabilale, jun chib kʼakʼal noʼox chi-abtej. Jun velta kʼalal lilokʼ ta kabtele, oy jun tseb ti jaʼ jchiʼil ta abtele laj yalbun ti xibat ta snae. Ta skoj ti muʼyuk la buchʼu teye, xuʼ la jchʼay koʼontonkutik jlikeluk. Ta slikebale muʼyuk tsots skʼoplal li srasonal laj kalbee, pe ta slajebe laj kalbe ti kʼu yuʼun muʼyuk chibate». Lek onoʼox ti muʼyuk tsʼuj ta petsʼ li Roberte. Pe kʼalal la snopbe skʼoplal li kʼusi la snuptane, laj yakʼ venta ti oy kʼusi mas lek la spas jechuke. Xi chale: «Mu jechuk  la jpas kʼuchaʼal Jose ti ta anil xchiʼuk ti jpʼel ta yoʼonton la spʼaj li yajnil Potifare (Jen. 39:​7-9). Jech xtok, muʼyuk toʼox jnopoj ti vokol tajek chkaʼi ti chkalbe ti moʼoje. Li kʼusi kʼot ta jtojolale la skoltaun sventa xkakʼ venta ti skʼan to mas xkamigoin li Jeovae».

¹⁶ Jnoptik noʼox ti chavichʼ akʼel ta prevae xchiʼuk ti tsal avuʼune. Akʼo mi jech, ¿kʼu yuʼun mu jechuk xapas kʼuchaʼal li Roberte? Xiuk xajakʼbe abae: «¿Mi jal te xinopnun sventa xkalbe ti moʼoje?». Mu me xachibaj mi laj avakʼ venta ti oy to kʼusi skʼan xapas chavile. Yuʼun mas onoʼox lek ti laj avakʼ venta ti oy onoʼox kʼusi vokol chavaʼi spasele. Jaʼ yuʼun, albo Jeova xchiʼuk oyuk kʼusi xapas sventa jpʼeluk ta avoʼonton xachʼunbe smantal (Sal. 139:​23, 24).

17. Mi tukʼ laj kakʼ jbatik kʼuchaʼal li Roberte, ¿kʼu yelan chkom skʼoplal li Jeovae?

¹⁷ Kalbetik to skʼoplal li Roberte. Xi to chale: «Kʼalal laj kalbe ti muʼyuk chibat ta sna li tsebe, xi laj yalbune: ‹Tsal avuʼun›. Vaʼun, laj jakʼbe kʼu yuʼun ti jech laj yale. Laj yalbun ti oy jun yamigo ti jaʼ toʼox stestigo Jeovae laj yal ti skotol li kerem tsebetik ti jaʼik stestigo Jeovae ta nakʼal la tspasik li kʼusi chopole. Jaʼ yuʼun, li tsebe laj yalbe yamigo ti chakʼun la ta preva sventa skʼel mi melel li kʼusi laj yale. ¡Limuyubaj tajek ti muʼyuk chopol skʼoplal kom kuʼun li Jeovae!».

18. ¿Kʼusi oy ta avoʼonton spasel mi laj xa ox avichʼ voʼe? (Kʼelo xtok li rekuadro « Chib mantaletik ti chtun avuʼune»).

¹⁸ Mi laj avakʼbe akuxlejal li Jeovae xchiʼuk mi laj avichʼ voʼe, chavakʼbe ta ilel ti chakʼan chachʼultajesbe li sbie mu ventauk li kʼusitik chanuptane. Li Jeovae snaʼoj li vokoliletik yakal chanuptane xchiʼuk li prevaetik yakal chatsale. Li Jeovae chakʼ venta ti chavakʼ avipal sventa tukʼ xavakʼ abae, vaʼun chakʼbot bendision ta skoj taje. Ta onoʼox me xakʼbot xchʼul espiritu sventa jaʼuk xapas li kʼusi leke (Luk. 11:​11-13). Ta skoj ti tskoltaot Jeovae, xuʼ me jech xatsʼakli-o Jesus kʼalal avichʼoj xa ox voʼe.