Jaʼ noʼox xuʼ jtatik perton ta skoj ti la smal xchʼichʼel li Jesuse (Efes. 1:7). Akʼo mi jech, li Vivliae chal ti «Diose te toʼox stsʼikoj xchiʼuk tspas toʼox perton li muliletik kʼotem ta pasel ta voʼnee» (Rom. 3:25). Taje jaʼ skʼan xal ti kʼalal skʼan toʼox xakʼ xkuxlejal li Jesuse, ch-akʼvan xa onoʼox ta perton li Diose. Jaʼ yuʼun chaʼa, mi tukʼ li smantaltak Jeovae, ¿kʼuxi ti akʼvan ta perton ti muʼyuk toʼox yakʼoj ta matanal xkuxlejal li Jesuse?

Kʼalal laj yal Jeova ti chtal jun nitilulal sventa spoj li buchʼu chakʼ xchʼunel yoʼonton ta stojolal li nitilulal taje, xkoʼolaj kʼuchaʼal tojbil xa yaʼel li mulile (Jen. 3:15; 22:18). Li Jeovae snaʼoj ti mi kʼot yoraile, li Xnichʼone jpʼel ta yoʼonton chakʼ xkuxlejal (Gal. 4:4; Ebr. 10:​7-10). Kʼalal liʼ toʼox oy ta balumil Jesus kʼuchaʼal yajkʼopojel Diose, jaʼ oy ta sba yakʼel perton. Akʼo mi muʼyuk toʼox yakʼoj ta matanal li xkuxlejale, li buchʼutik chakʼ xchʼunel yoʼontonik ta stojolale tstabeik xa onoʼox sbalil (Mat. 9:​2-6).