1. Li ta tsobajel echʼ ta 2023 ti chichʼ pasel jujun jabile, ¿kʼusi laj yichʼ albel skʼoplal?

 ¡KʼUPIL tajek sba li tsobajel echʼ ta 2023 ti chichʼ pasel jujun jabile! a Tee oy kʼusitik laj yichʼ jambel smelolal xchiʼuk laj yichʼ alel junantik aʼyejetik ta sventa li cholmantale. Jech kʼuchaʼal liʼe, laj yichʼ albel smelolal ti oy junantik krixchanoetik ti xuʼ xlik yichʼik ta muk’ Jeova kʼalal mi laj xa ox yichʼ lajesel li Mukʼta Babiloniae. Laj kichʼtik albel xtok ti muʼyuk xa chkaltik kʼu sjalil ta jcholtik mantal jujun u ti lik ta noviembre ta 2023. Li kʼusi laj yichʼ jelele, ¿mi jaʼ skʼan xal ti muʼyuk xa mas chkakʼ ta koʼontontik li cholmantale? ¡Moʼoj!

2. ¿Kʼu yuʼun mas to skʼan xkakʼ ta koʼontontik li cholmantale? (Markos 13:10).

² Mas to skʼan xkakʼ ta koʼontontik li cholmantal avie, yuʼun jutuk xa tajek yorail kuʼuntik. Jnopbetik skʼoplal li kʼusi laj yal Jesus ta sventa li cholmantal chichʼ pasel ta slajebal kʼakʼal jech kʼuchaʼal chal ta Markos 13:10 (kʼelo). Li loʼil ti te ta jtatik ta Mateo ti xkoʼolaj kʼuchaʼal chal ta Markos 13:​10, li Jesuse laj yal ti chichʼ pukel ta spʼejel balumil li lekil aʼyej yoʼ to mu xtal «li slajebe» (Mat. 24:14). Taje jaʼ skʼoplal ti chichʼ lajesel li sbalumil Satanase. Li Jeovae yakʼojbe xa «skʼakʼalil xchiʼuk yorail» sventa xakʼbe slajeb (Mat. 24:36; 25:13; Ech. 1:7). Taje poʼot xa xkʼot ta pasel (Rom. 13:11). Yoʼ to mu xtal li slajebe, skʼan jech-o jcholtik mantal.

3. ¿Kʼu yuʼun ta jcholtik mantal?

 ³ Tsots skʼoplal ti xiuk jnopbetik skʼoplal jkotoltike: ¿kʼu yuʼun ta jcholtik li lekil aʼyejetike? Jaʼ ta skoj ti kʼanvanemutike. Kʼalal ta jcholtik mantale, chkakʼtik ta ilel ti jkʼanojtik li lekil aʼyejetike, ti jkʼanojtik li krixchanoetike, ti jkʼanojtik tajek Jeova xchiʼuk li sbie. Kalbetik batel skʼoplal ta jujutos.

TA JCHOLTIK MANTAL TA SKOJ TI JKʼANOJTIK LI LEKIL AʼYEJETIKE

4. ¿Kʼu yelan chkaʼi jbatik kʼalal chkaʼitik junuk lekil aʼyeje?

⁴ Vuleso ta ajol kʼu yelan laj avaʼi aba kʼalal oy buchʼu laj yalbot junuk lekil aʼyeje. Yikʼaluk van laj yalboxuk junuk avutsʼ avalal ti oy xa sneneʼike o ti la ata avabtel ti jal xa tajek chasaʼe. ¿Kʼu yelan laj avaʼi aba? Lamuyubaj van tajek ti oy xa ta avoʼonton chakʼan chavalbe li avamigotake xchiʼuk li avutsʼ avalale. ¿Mi mu jechuk laj avaʼi aba kʼalal laj avaʼi li lekil aʼyejetik ta sventa li Ajvalilal yuʼun Diose?

5. ¿Kʼu yelan laj avaʼi aba kʼalal lik achan li Vivliae? (Kʼelo xtok li lokʼoletike).

⁵ Nopo kʼu yelan laj avaʼi aba kʼalal lik achan li Vivliae. La achan ti skʼanojot li Jeovae, ti oy ta yoʼonton chakʼot ta yutsʼ yalale, ti tslajesbe skʼoplal li vokoliletike xchiʼuk ti oy ta yoʼonton chchaʼkuxes li avutsʼ avalal ta achʼ balumile (Mar. 10:​29, 30; Juan 5:​28, 29; Rom. 8:​38, 39; Apok. 21:​3, 4). Skotol taje kʼot ta avoʼonton (Luk. 24:32). Vaʼun, mas to lik akʼan li kʼusi yakal chachane xchiʼuk chakʼan xa tajek chavalbe li krixchanoetike (koʼoltaso xchiʼuk Jeremias 20:9).

6. ¿Kʼusi chakʼ jchantik li kʼusi la snuptanik Ernest xchiʼuk Rose?

⁶ Kalbetik skʼoplal li kʼusi kʼot ta stojolal li ermano Ernest. b Chal ti kʼalal lajuneb toʼox sjabilale cham li stote. Xi chale:  «¿Mi bat van ta vinajel o mi laj-o van ta j-echʼel? Chkitʼixta li kʼoxetik ti kuxul to stot smeʼike». Jutuk mu skotol kʼakʼal chbat ta mukinal, tskejan sba ta yeloval li smukinal stote xchiʼuk xi tspas orasione: «Avokoluk akʼbun jnaʼ bu oy li jtote». Kʼalal tetik toʼox van 27 sjabilale, albat mi tskʼan chchan Vivlia, lek laj yaʼi. Labal sba laj yaʼi ti mu kʼusi snaʼ li buchʼu chamemike, ti xkoʼolaj kʼuchaʼal vayemik noʼoxe xchiʼuk la xchan ti chal Vivlia ti chchaʼkuxiik ta tsʼakale (Ekl. 9:​5, 10; Ech. 24:15). Laj onoʼox yaʼibe smelolal li kʼusitik vokol toʼox chaʼie. Muyubaj tajek ta skoj ti laj yojtikin li kʼusi chal ta melel li Vivliae. Lik yichʼ estudio ek li yajnil ti Rose sbie, lek laj yaʼi li kʼusi yakal chchane. Ta tsʼakale, li ta 1978, laj yichʼik voʼ. Xmuyubajik tajek, jaʼ yuʼun laj yalbe yutsʼ yalalik, yamigotakik xchiʼuk yan krixchanoetik li kʼusi yakal chchanike. Ti kʼu xa sjalil yojtikinojik tal mantale, li Ernest xchiʼuk Rose skoltaojik tal mas ta 70 krixchanoetik sventa xojtikinik Jeova xchiʼuk ti xichʼik voʼe.

7. ¿Kʼusi tstij koʼontontik spasel kʼalal jkʼanojtik li kʼusi chal Vivliae? (Lukas 6:45).

⁷ Kʼalal jkʼanojtik li kʼusi chal Vivliae, ta jkʼan xa chkaltik batel (kʼelo Lukas 6:45). Jaʼ jech chkaʼi jbatik kʼuchaʼal li yajtsʼaklomtak Kristo ta baʼyel siglo ti xi laj yalike: «Mu xuʼ xkikta jbakutik ta yalel li kʼusi kilojkutik xchiʼuk li kʼusi kaʼiojkutike» (Ech. 4:20). Ta skoj ti ep tajek sbalil chkiltik li mantale, oy ta koʼontontik chkalbetik li yantike.

TA JCHOLTIK MANTAL TA SKOJ TI JKʼANOJTIK LI KRIXCHANOETIKE

8. ¿Kʼusi tstij koʼontontik xcholbel mantal li krixchanoetike? (Kʼelo li rekuadro « Jkʼantik li jchiʼiltaktike: jchanubtastik»; kʼelo xtok li lokʼole).

⁸ Li Jeova xchiʼuk Jesuse skʼanojik tajek li krixchanoetike jaʼ jech jkʼanojtik ek (Prov. 8:31; Juan 3:16). Chkʼuxubaj ta koʼontontik li buchʼu muʼyuk spatobil yoʼontonik xchiʼuk ti mu xojtikinik Diose (Efes. 2:12). Li krixchanoetike chil tajek svokolik, pe xuʼ jkoltatik k’alal chkalbetik lekil aʼyejetik ta sventa li Ajvalilal yuʼun Diose. Jaʼ tstij koʼontontik li kʼanelal xchiʼuk li xkʼuxul oʼontonal sventa jcholbetik mantal li krixchanoetike. Xuʼ x-akʼbat-o spatobil yoʼontonik li lekil aʼyejetike, ti xmuyubajikuk noʼox avie xchiʼuk xuʼ staik-o li batsʼi mero kuxlejal ta achʼ balumile (1 Tim. 6:19).

9. ¿Kʼusi pʼijubtasel chkalbetik li krixchanoetike, xchiʼuk kʼu yuʼun? (Esekiel 33:​7, 8).

⁹ Li kʼanelale tstij koʼontontik xtok sventa jpʼijubtastik li krixchanoetik ti poʼot xa xtal slajeb li kʼusitik chopol oy ta balumile (kʼelo Esekiel 33:​7, 8). Chopol chkaʼitik ti mu xakʼik venta krixchanoetik  xchiʼuk kutsʼ kalaltik li kʼusi chnopaj xa talele. Li ta Mateo 24:21 chal ti «chtal mukʼta tsatsal vokolil» xchiʼuk ti «muʼyuk bu jech kʼotem-o ta pasel kʼalal lik tal li balumil kʼalal to avie, muʼyuk jech kʼotem-o ta pasel xchiʼuk mi jaʼuk chtal yan velta xtok». Oy ta koʼontontik ti snaʼik kʼusi chkʼot ta pasel li ta skʼakʼalil chapanele. Baʼyele, chichʼ lajesel skotol li relijionetike. Mi laje, li ta Armajedone chichʼ lajesel skotol li kʼusitik chopol oy ta balumile (Apok. 16:​14, 16; 17:​16, 17; 19:​11, 19, 20). Ta jkʼanbetik vokol Jeova ti xchikintaik mantal li krixchanoetike xchiʼuk ti x-ayan ta yoʼontonik ti koʼoluk xijtun ta stojolal Jeovae. Pe ¿kʼusi chkʼot ta stojolal li buchʼutik mu skʼan xchikintaik li pʼijubtasel ti te skʼoplal li kutsʼ kalaltik eke?

10. ¿Kʼu yuʼun tsots skʼoplal ti jechuk-o jpʼijubtastik li krixchanoetike?

¹⁰ Jech kʼuchaʼal laj xa jchantik li ta xchanobil echʼe, xuʼ van kuxul ch-iktaatik yuʼun Jeova li buchʼu tsjel to stalelalik kʼalal mi laj yilik ti chichʼ lajesel li Mukʼta Babiloniae. Taje tskoltautik ta yaʼibel smelolal ti tsots skʼoplal skʼan jech-o jpʼijubtastik batel li krixchanoetike. Teuk ta joltik liʼe: li krixchanoetike xuʼ van xvul ta sjolik ta tsʼakal li kʼusi chkalbetik avie (koʼoltaso xchiʼuk Esekiel 33:33). Li pʼijubtasel chkalbetike xuʼ xvul ta sjolik ta tsʼakal, vaʼun chlokʼ ta yoʼontonik chtunik ta stojolal Jeova yoʼ to oy yorail yuʼunike. Jech kʼuchaʼal li jchabichukinab ta Filipos ti jaʼ to la xchʼam mantal kʼalal echʼ tsatsal nikele, avie oy van krixchanoetik ti mu skʼan xchikintaik mantal eke, pe xuʼ van jaʼ to xchʼamik kʼalal mi laj yilik ti chichʼ lajesel li Mukʼta Babiloniae (Ech. 16:​25-34).

TA JCHOLTIK MANTAL TA SKOJ TI JKʼANOJTIK JEOVA XCHIʼUK LI SBIE

11. ¿Kʼusi smakoj ti sta-o albel smukʼulal, ichʼel ta mukʼ xchiʼuk ti xkakʼbe juʼeltik li Jeovae? (Apokalipsis 4:11; kʼelo xtok li lokʼoletike).

¹¹ Li srasonal mas tsots skʼoplal ti ta jcholtik mantale jaʼ ta skoj ti jkʼanojtik li Jeovae xchiʼuk li xchʼul bie. Li ta cholmantale te chkichʼtik ta mukʼ li Dios ti jkʼanojtike. Jchʼunojtik lek ti jaʼ noʼox Jeova sta-o albel smukʼulal, ichʼel ta mukʼ xchiʼuk ti xkakʼbetik juʼeltike (kʼelo Apokalipsis 4:11). ¿K’uxi xu’ xkalbetik smuk’ulal xchi’uk ti xkich’tik ta muk’e? Ja’ ti xkalbetik krixchanoetik ti ja’ Jeova la spas skotol li k’usitik x-ayane xchi’uk ti ja’ laj yak’ jkuxlejaltike. ¿Kʼuxi ti chkakʼbetik juʼeltik o kipaltik li Jeovae? Ta skoj ti skotol xuʼ yuʼune mu stakʼ xkakʼbetik mas sjuʼel, pe xuʼ xkakʼbetik juʼeltik kʼalal ta jtunes jkʼakʼaltik, kipaltik xchiʼuk li kʼusitik x-ayan kuʼuntik sventa jcholtik mantal ti bu kʼalal xuʼ kuʼuntike (Mat. 6:33; Luk. 13:24; Kol. 3:23). Jaʼ xkaltik ti ta jkʼupintik  yalbel batel skʼoplal li Dios ti jkʼanojtik tajeke. Pe oy ta koʼontontik xtok ti xkalbetik batel skʼoplal li sbie xchiʼuk li kʼusi skʼan xale. ¿Kʼu yuʼun?

12. ¿Kʼuxi ta jchʼultajesbetik sbi Jeova kʼalal ta jcholtik mantale?

¹² Ta skoj ti jkʼanojtik li Jeovae, oy ta koʼontontik ta jchʼultajesbetik li sbie (Mat. 6:9). Jaʼ xkaltik, ta jkʼan ta jsakubtasbetik sbi ta skoj li jutbil kʼopetik yaloj Satanase (Jen. 3:​1-5; Job 2:4; Juan 8:44). Jaʼ yuʼun, kʼalal ta jcholtik mantale, oy ta koʼontontik ta jpakbetik skʼoplal xchiʼuk ti xkalbetik kʼusi melel ta stojolal Jeova li buchʼu oy ta yoʼonton mantale. Oy ta koʼontontik ti snaʼik skotol krixchanoetik ti toj echʼ xa noʼox kʼanvanem li Jeovae, ti jaʼ jun tukʼil ajvalile xchiʼuk ti svaʼanoj jun Ajvalil ti poʼot xa slajes li vokolile xchiʼuk ti chakʼ jun oʼontonale (Sal. 37:​10, 11, 29; 1 Juan 4:8). Kʼalal ta jpastik skotol taje, yakal me ta jchʼultajesbetik sbi li Jeovae. Jech xtok, jun me koʼontontik, yuʼun jnaʼojtik ti yakal ta jpastik li kʼusi jbainojtik kʼuchaʼal stestigoutike. ¿Kʼu yuʼun ti jech chkaltike?

13. ¿Kʼu yuʼun jaʼ jun mukʼta matanal chkaʼitik ti jaʼutik stestigo Jeovae? (Isaias 43:​10-12).

¹³ Li Jeovae stʼujojutik sventa xijkʼot ta stestigotak (kʼelo Isaias 43:​10-12). Leʼ xa jayibuk jabil tale, li Jtsop Jbeiltasvaneje xi laj yal ta jlik kartae: «Jaʼ jun mukʼta matanal ti jaʼutik stestigotak Jeovae». c Kalbetik junuk skʼelobil. Jnoptik noʼox ti te oyutik ta snail chapanobbail ta skoj ti oy buchʼu la stikʼ jmultike, pe ta jkʼantik ti oyuk buchʼu spak jkʼoplaltike. ¿Mi mu jaʼuk chkalbetik li buchʼu  lek xkojtikintik, ti jpatoj koʼontontik ta stojolal xchiʼuk ti lekuk skʼoplal sventa xchʼunbat li kʼusi chale? Li Jeova eke xojtikinutik lek xchiʼuk spatoj yoʼonton ta jtojolaltik, jaʼ yuʼun jaʼ la stʼujutik sventa xkaltik batel ti jaʼ noʼox stuk melel Diose. Jaʼ jun mukʼta matanal chkaʼitik ti jaʼutik stestigoe, yuʼun chkakʼtik batel ta ojtikinel li sbie xchiʼuk chkaltik batel ti mu meleluk li kʼusi albil ta stojolale. Jaʼ me jech chkakʼtik ta ilel ti jaʼutik stestigotak Jeovae (Sal. 83:18; Rom. 10:​13-15).

JECH-O TA JCHOLTIK MANTAL KʼALAL TO TA SLAJEB

14. ¿Kʼusitik labalik sba jmalaojtik chkʼot ta pasel?

¹⁴ ¡Labal sba li kʼusi poʼot chkʼot ta pasele! Oy ta koʼontontik ti skoltautik Jeova sventa oyuk buchʼutik xchʼamik mantal yoʼ to mu xtal li mukʼta tsatsal vokolile. Jech xtok, kʼalal jaʼo li mukʼta tsatsal vokolil ti toj xibal sba tajeke, oy ta koʼontontik ti epuk to buchʼutik xiktaik spasel li kʼusitik chakʼ sbalumil Satanase xchiʼuk ti xlik yichʼik ta mukʼ li Jeovae (Ech. 13:48).

15, 16. ¿Kʼusi skʼan jechuk-o jpastik, xchiʼuk kʼusi ora chkiktatik spasel?

¹⁵ Avie, akʼbilutik jun abtel: jaʼ ti jpuktik batel ta spʼejel balumil li lekil aʼyejetik ta sventa li Ajvalilal yuʼun Diose. Jech xtok, skʼan jechuk-o jpʼijubtastik li krixchanoetik ti chnopaj xa talel slajeb li kʼusitik chopol oy ta balumile. Mi kʼot yorail li chapanele, te chakʼik venta ti te likem talel ta stojolal Jeova li kʼusitik la jpukbetik skʼoplale (Esek. 38:23).

¹⁶ ¿Kʼusi jpʼel ta koʼontontik spasel? Jaʼ ti jechuk-o baxbolukutik xchiʼuk ti masuk to xkakʼ ta koʼontontik li cholmantale, yuʼun jkʼanojtik li lekil aʼyejetike, li krixchanoetike, pe jaʼ mas to jkʼanojtik li Jeova xchiʼuk li sbie. Jaʼ to ta jkechantik mi xi laj yal li Jeovae: «¡Taʼlo xa!».