1, 2. 1) Mi oy junuk yajtsʼaklom Kristo ti oy ta yoʼonton chnupune, ¿kʼusi baʼyel skʼan spas? 2) ¿Kʼusi smakojbe skʼoplal kʼalal tsnovioin sbaike? (Kʼelo ti bu chal «Liʼe tsots skʼoplal»).

 ¿MI OY ta avoʼonton chanupun? Sventa xijmuyubaje, mu persauk nupunemutik. Pe oy epal ermanoetik xchiʼuk ermanaetik ti jeltos sjabilalike oy ta yoʼonton chnupunik. Li buchʼu oy ta yoʼonton jeche, skʼan skʼel mi xmakʼlij yuʼun li buchʼu chkʼot ta snup xchiʼile, ti lekuk oy ta mantale xchiʼuk ti xtojobuk xa lek snopele (1 Kor. 7:36). a Vaʼun, xuʼ me xmuyubaj ta snupunel.

² Mu onoʼox kʼunuk ti xata li buchʼu chkʼot ta anup achiʼile (Prov. 31:10). Akʼo mi la ata xa li buchʼu chakʼan chavojtikine, xuʼ van mu kʼunuk chavaʼi ti xlik anovioin abaike. b Li ta xchanobil liʼe, ta jkʼelbetik batel skʼoplal kʼusi xuʼ xkoltaat-o jun tojol kerem o jun tojol tseb sventa sta li buchʼu lek chile xchiʼuk ti xlik snovioin sbaike. Jech xtok, ta jkʼelbetik batel skʼoplal li kʼusi xuʼ spasik li ermanoetik ta tsobobbail sventa skoltaik li buchʼutik oy ta yoʼonton chnupunike.

¿KʼUXI XUʼ XATA LI BUCHʼU CHKʼOT TA ANUP ACHIʼILE?

3. ¿Kʼusi baʼyel skʼan snopbe skʼoplal jun yajtsʼaklom Kristo kʼalal muʼyuk to tsaʼ li buchʼu chkʼot ta snup xchiʼile?

³ Kʼalal skʼan toʼox oy buchʼu xlik alekomine, tsots skʼoplal ti baʼyuk xanopbe skʼoplal kʼu yelan stalelal chakʼan li  buchʼu chkʼot ta anup achiʼile. Yuʼun mi mu jechuk la apase, xuʼ van mu xavakʼ venta li buchʼu xuʼ lek xkʼot ta anup achiʼile o xuʼ van xlik anovioin abaik xchiʼuk li buchʼu mu masuk lek stalelale. Jtos ti kʼusi skʼan xatsak ta ventae jaʼ ti yichʼojuk voʼe (1 Kor. 7:39). Pe taje maʼuk skʼan xal ti buchʼuuk xa noʼox chanupun xchiʼuk ta skoj ti yichʼoj voʼe. Jaʼ yuʼun, lek ti xiuk xanopbe skʼoplale: «¿Kʼusitik oy ta koʼonton ta jkʼan ta jpas? ¿Kʼu yelan stalelal ta jkʼan li buchʼu chkʼot ta jnup jchiʼile? ¿Mi ta rason chibat ti kʼu yelan ta jnope?».

4. ¿Kʼusi tskʼan ta s-orasionik junantik tojol kerem tsebetik?

⁴ Yikʼaluk van avalojbe xa Jeova ti oy ta avoʼonton chakʼan chanupune (Filip. 4:6). Melel onoʼox, li Jeovae muʼyuk buchʼu yalojbe ti tsabe snup xchiʼile, pe oy ta yoʼonton ti kʼu yelan chavaʼi abae, li kʼusitik chtun avuʼune xchiʼuk xuʼ skoltaot sventa xata li buchʼu chkʼot ta anup achiʼile. Jaʼ yuʼun, jechuk-o xavalbe li kʼusi oy ta avoʼontone xchiʼuk ti kʼu yelan chavaʼi abae (Sal. 62:8). Albo ti oyuk smalael avuʼun xchiʼuk ti akʼo xakʼ apʼijile (Sant. 1:5). Jun tojol kerem ta Estados Unidos ti Juan sbie c xi tskʼan ta s-orasione: «Chkalbe Jeova ti kʼu yelan stalelal ta jkʼan ta stojolal junuk ermanae. Ta jkʼanbe ti oyuk buchʼu xkojtikine xchiʼuk ti skoltaun sventa x-ayan jlekil talelal yoʼ xikʼot ta lekil malalile». Xi chal jun tojol tseb ta Sri Lanka ti Tania sbie: «Ta jkʼanbe Jeova ti akʼo skoltaun sventa tukʼuk xkakʼ jbae, ti lekuk li kʼusitik ta jnope xchiʼuk ti ximuyubajuk yoʼ to ta jsaʼ buchʼu chkʼot ta jnup jchiʼile». Pe ¿mi jal xa amalaoj xchiʼuk mi chʼabal  ataoj-o li buchʼu lek chavile? Teuk ta ajol ti chakʼbot onoʼox Jeova skotol li kʼusitik chtun avuʼune xchiʼuk sventa junuk avoʼontone (Sal. 55:22).

5. ¿Kʼusi chkoltaatik-o li kerem tsebetik sventa xojtikinik li buchʼutik skʼanojik Jeovae? (1 Korintios 15:58; kʼelo xtok li lokʼole).

⁵ Xi tstij koʼontontik li Vivliae: «Oyuk-o me ep kʼusi chapasik ta sventa li yabtel Kajvaltike» (kʼelo 1 Korintios 15:58). Mi chachʼun li tojobtasel liʼe, oy me yorail avuʼun sventa jmojuk kʼusi xapasik xchiʼuk li ermanoetik xchiʼuk ermanaetike. Maʼuk noʼox chata alekil amigotak, yuʼun xuʼ xavojtikin yan tojol kerem tsebetik ti jaʼ yakʼoj ta yoʼontonik spasbel li yabtel Jeova eke. Jech xtok, ta skoj ti jaʼ batem ta avoʼonton spasel li kʼusi lek chil Jeovae, xamuyubaj noʼox me.

6. ¿Kʼusi skʼan teuk ta sjolik li tojol kerem tsebetik ti tskʼan chnupunike?

⁶ Mu me jaʼuk mas xa tsots skʼoplal xavil ti chasaʼ anup achiʼile (Filip. 1:10). Yuʼun li kʼusi chakʼ muyubajele jaʼ ti lekuk xkil jbatik xchiʼuk li Jeovae maʼuk ti nupunemutik o mi muʼyuke (Mat. 5:3). Jech xtok, yoʼ to atuke mas me oy yorail avuʼun sventa xatun mas ta stojolal Jeova (1 Kor. 7:​32, 33). Jaʼ yuʼun, paso me ti bu k’alal xuʼ avuʼun yoʼ to atuke. Li Yesika ti te nakal ta Estados Unidos xchiʼuk ti malij kʼalal tetik xa ox 40 sjabilale xi chale: «Akʼo mi ta jkʼan chinupun, li kʼusi la skoltaun sventa oyuk smalael kuʼune jaʼ ti laj kakʼ ta koʼonton li cholmantale».

KʼELO LEK KʼU YELAN STALELAL

7. ¿Kʼu yuʼun mas lek ti baʼyel xakʼel kʼu yelan stalelal yoʼ to mu xavalbe li kʼusi oy ta avoʼontone? (Proverbios 13:16).

⁷ Ti mi la ata xa li buchʼu xuʼ xkʼot ta anup achiʼile, ¿mi skʼan van xavalbe ta anil li kʼusi oy ta avoʼontone? Li Vivliae chal ti buchʼu pʼije baʼyel tsabe skʼoplal li kʼusi tspase (kʼelo Proverbios 13:16). Jaʼ yuʼun, li kʼusi mas lek xuʼ xapase jaʼ ti baʼyuk xakʼel kʼu yelan stalelal kʼalal muʼyuk to avalojbe li kʼusi oy ta avoʼontone. Xi chal jun ermano ta Paises Bajos ti Alberto sbie: «Xuʼ me anil kʼusi x-ayan ta avoʼonton, pe xuʼ anil xchʼay batel xtok. Jaʼ yuʼun, mas lek ti baʼyel xakʼel kʼu yelan stalelale maʼuk ti xanovioin abaik ta anile». Kʼalal jech chapase, xuʼ te xavakʼ venta xtok ti maʼuk li snup achʼulele.

8. Li jun tojol kerem o jun tojol tsebe, ¿kʼuxi xuʼ skʼelbe stalelal li buchʼu oy ta yoʼonton chojtikine? (Kʼelo xtok li lokʼole).

⁸ Xuʼ van xi chanope: «¿Kʼuxi xuʼ jkʼelbe stalelal li buchʼu ta jkʼan chkojtikin ti muuk xakʼ ventae?». Xuʼ van xavakʼ venta kʼu yelan stalelal ta tsobajel o ta junuk reunion sosial. Jech xtok, xuʼ me te xavakʼ venta kʼu yelan tstsak ta mukʼ li yantike o ti kʼu yelan ta mantale. ¿Buchʼutik jaʼ li yamigotake? ¿Kʼusitik mas tsloʼilta? (Luk. 6:45). ¿Mi koʼol li kʼusi oy ta avoʼonton chataike? Xuʼ van xachiʼin ta loʼil li moletik ta stsobobbaile o yan ermanoetik ti yijik ta mantal ti lek xojtikinike (Prov. 20:18). Xuʼ van xajakʼ kʼu yelan skʼoplal xchiʼuk ti kʼu yelan stalelale (Rut 2:11). Kʼalal jaʼo chakʼelbe kʼu yelan stalelale, ichʼo me apʼijil sventa mu chopoluk xaʼi sba avuʼun. Tsako ta venta ti kʼu yelan chaʼi sbae xchiʼuk mu me teuk xa tajek xatijet.

9. Kʼalal skʼan toʼox xavalbe li kʼusi oy ta avoʼontone, ¿kʼusi skʼan teuk ta ajol?

⁹ ¿Kʼu sjalil skʼan x-echʼ sventa xavalbe li kʼusi oy ta avoʼontone? Mi laj avalbe noʼox ta anile, xuʼ van tsnop ti toj sujom  kʼusi chapase (Prov. 29:20). Mi laj yakʼ venta li kʼusi oy ta avoʼontone, pe mi muʼyuk chavalbe noʼoxe, xuʼ van tsnop ti mu xanaʼ li kʼusi chakʼane (Ekl. 11:4). Sventa xavalbe li kʼusi oy ta avoʼontone, mu me persauk ti anaʼoj xa lek ti jaʼ onoʼox chkʼot ta anup achiʼile. Pe skʼan chapalukot xa onoʼox ta sventa li nupunele xchiʼuk ti xuʼ onoʼox xkʼot ta anup achiʼile.

10. ¿Kʼusi skʼan xapas mi laj avakʼ venta ti oy buchʼu tskʼan chojtikinote, pe ti muʼyuk jech oy ta avoʼonton li voʼote?

¹⁰ ¿Kʼusi xuʼ xapas mi laj avakʼ venta ti oy buchʼu tskʼan chojtikinote, pe ti muʼyuk jech oy ta avoʼontone? Akʼbo iluk ti muʼyuk kʼusi oy ta avoʼonton li voʼote. Muʼyuk me lek mi naka noʼox chaloʼlae, pe ti muʼyuk oy ta avoʼonton chavojtikin ta melele (1 Kor. 10:24; Efes. 4:25).

11. ¿Kʼusi skʼan stsak ta venta li buchʼu sbainoj sabel snup xchiʼil li jun kerem o jun tsebe?

¹¹ Ta junantik lume, jaʼ sbainojik totil meʼil o junuk yutsʼ yalal ti oy xa sjabilal ta stʼujbel snup xchiʼil li jun kerem o jun tsebe. Ta yan lumetik xtoke jaʼ sbainojik li utsʼ alalil o li amigoiletike, jaʼ tskʼelik kʼuxi xuʼ xojtikin sbaik, vaʼun tskʼelik mi snup-o sbaik. Mi oy jech laj kichʼtik albel ti akʼo jpastike, jtsaktik ta venta ti kʼu yelan chaʼi sbaik ta jujuntale xchiʼuk li kʼusi chtun yuʼunike. Mi laj xa jtatik buchʼu xuʼ xkʼot ta snup xchiʼil li kamigotik o kutsʼ kalaltike, kojtikintik lek, jkʼelbetik lek li stalelale xchiʼuk mi tsots ta mantal. Jaʼ mas tsots skʼoplal ti lekuk xil sba xchiʼuk li Jeovae, maʼuk ti jkʼulej, ti lek chanunajem o ti lek ojtikinbile. Teuk ta joltik ti jaʼ tsnop stuk li tojol kerem xchiʼuk li tojol tseb mi ta onoʼox xnupunike (Gal. 6:5).

KʼUXI XUʼ XLIK ANOVIOIN ABAIK

12. ¿Kʼusi xuʼ xapas mi oy buchʼu chakʼan chanovioin aba xchiʼuke?

¹² ¿Kʼusi xuʼ xapas mi oy buchʼu chakʼan chanovioin aba xchiʼuke? d Xuʼ van xachiʼin ta loʼil ti bu oy krixchanoetike, ta telefono o ta videollamada. Jamal  xavalbe ti oy ta avoʼonton chakʼan chavojtikine (1 Kor. 14:9). Mi chalbot ti  tskʼan to tsnopbe lek skʼoplale, malao me (Prov. 15:28). Yan mi laj yalbot ti muʼyuk ta yoʼonton chojtikinote, tsako me ta venta ti kʼu yelan chaʼi sbae.

13. ¿Kʼusi skʼan xapas mi oy buchʼu chalbot ti tskʼan chojtikinote? (Kolosenses 4:6).

¹³ Mi oy buchʼu chalbot ti tskʼan chojtikinote, tsako ta venta ti mu kʼunuk laj yaʼi xalbot li kʼusi oy ta yoʼontone. Jaʼ yuʼun, akʼo ta ilel slekil avoʼonton xchiʼuk ichʼo ta mukʼ (kʼelo Kolosenses 4:6). Albo mi chakʼan to chanopbe lek skʼoplale, pe mu me xajalij (Prov. 13:12). Mi muʼyuk oy ta avoʼonton chavojtikine, ta slekiluk avoʼonton xavalbe xchiʼuk jamaluk xavalbe. Jun ermano ta Austria ti Jans sbie chal kʼusi la spas kʼalal albat yuʼun jun ermana ti tskʼan ch-ojtikinate, xi chale: «Ta slekil koʼonton laj kalbe ti muʼyuk oy ta koʼontone. Ta anil noʼox laj kalbe sventa mu snop ti lek chkile. Vaʼun, mas xa laj kichʼ jpʼijil ta sventa ti kʼu yelan ta jchiʼin ta loʼile». Pe mi oy ta avoʼonton chakʼan chanovioin abaike, albo li kʼusi oy ta avoʼontone xchiʼuk ti kʼu yelan chakʼan chavojtikin abaike. Ta skoj ti jelel kʼu yelan chʼiemoxuk talele xchiʼuk ti jelel li akuxlejalike, mu van koʼoluk li kʼusi chanopike.

¿KʼUXI XUʼ JKOLTATIK LI TOJOL KEREM TSEBETIKE?

14. ¿Kʼusi skʼan jpastik mi ta jkʼan ta jkoltatik li tojol kerem tsebetike?

¹⁴ Sventa jkoltatik li tojol kerem tsebetike, skʼan xkichʼ jpʼijiltik li kʼusi chkalbetike (Efes. 4:29). Xiuk jakʼbe jbatike: «¿Mi lek chkaʼi chkixtol loʼilta? Kʼalal chkil chloʼilajik jun tojol tseb xchiʼuk jun tojol kereme, ¿mi ta jnop ta anil ti lek chil sbaike?» (1 Tim. 5:13). Jech xtok, mu me oyuk kʼusi xaval o xapas ti xuʼ muʼyuk xa sbalil chaʼi-o sba li jun tojol kerem o tojol tseb ta skoj ti muʼyuk nupuneme. Xi chal Jans ti laj kalbetik skʼoplal ta parafo 13: «Junantik ermanoetike xi chalbeikune: ‹¿Kʼu yuʼun muʼyuk to nupunemot? Maʼuk xa me toj keremot, yakal xa me chamolib›. Kʼalal jech chichʼ albel li tojol kerem o tojol tsebe, muʼyuk me sbalil chaʼi sbaik xchiʼuk mas me sujbil chaʼi sbaik sventa xnupunik». Jaʼ me mas lek ti jkʼeltik kʼuxi xuʼ jpatbetik yoʼontonike (1 Tes. 5:11).

15. 1) Jech kʼuchaʼal chal Romanos 15:​2, ¿kʼusi skʼan jtsaktik ta venta kʼalal oy buchʼu ta jkoltatik ta saʼel snup xchiʼile? (Kʼelo xtok li lokʼole). 2) ¿Kʼusitik tsots skʼoplal laj yakʼ achan li videoe? (Kʼelo li tsʼib ta yok vune).

 ¹⁵ Mi laj kakʼtik venta ti sta-o sbaik jun ermano xchiʼuk jun ermanae, li Vivliae chal ti skʼan jtsaktik ta venta ti kʼu yelan chaʼi sbaike (kʼelo Romanos 15:2). Epal tojol kerem tsebetike mu skʼanik ti oy buchʼu xkoltaatik ta saʼel snup xchiʼilike. Jaʼ yuʼun, skʼan jtsaktik ta venta ti kʼu yelan chaʼi sbaike (2 Tes. 3:11). Junantike tskʼanik ti jkoltatik jutuke, pe jaʼ noʼox me skʼan jech jpastik mi jech la skʼanbutike (Prov. 3:27). e Junantik xtoke mu skʼanik ti jamal xa xvinaj ti yakal ta jkoltatike. Jun tojol tseb ta Alemania ti Lidia sbie xi chale: «Kʼalal jmoj kʼusi chichʼ pasel xchiʼuk ermanoetike, xuʼ xatak ta ikʼel li ermano xchiʼuk li ermana ti tskʼan chojtikin sbaike. Jaʼ noʼox skʼan ti jmoj bu sta sbaike, vaʼun te xa tskʼel kʼuxi chchiʼin sbaik ta loʼil».

16. ¿Kʼusi skʼan mu xchʼay xaʼiik li tojol kerem tsebetike?

¹⁶ Jkotoltik xuʼ jun koʼontontik xchiʼuk xijmuyubaj noʼox mu ventauk mi tojol kerem tsebutik o mi nupunemutik (Sal. 128:1). Jaʼ yuʼun, mi chakʼan chanupun, pe mi muʼyuk to ataoj ti buchʼu lek chavile, jechuk-o me xavakʼ ta avoʼonton xatun ta stojolal Jeova. Jun ermana ta Macao ti Sin Yi sbie, xi chale: «Kʼalal chanopbe skʼoplal kʼu sjalil te achiʼuk anup achiʼil li ta Paraisoe, te chavakʼ venta ti muʼyuk jal li atojol kerem tsebale. Jaʼ yuʼun, tuneso me lek akʼakʼal xchiʼuk kʼupino ti kʼu sjalil atuk oyote». Pe ¿mi laj xa ata li buchʼu lek chavil xchiʼuk mi anovio xa abaik une? Li ta yan xchanobile ta jkʼelbetik batel skʼoplal kʼusitik xuʼ xapas sventa xamuyubajuk noʼox ti kʼu sjalil chanovioin abaike.