1. ¿Kʼusi ti jnaʼojtik ta sventa li cholmantale, xchiʼuk kʼusi jpʼel ta koʼontontik?

 STALEL onoʼox ti oy krixchanoetik ti mu skʼanik ti jcholtik mantale. Pe xuʼ van mas to stsatsaj batel li ta jelavele (Dan. 11:44; 2 Tim. 3:12; Apok. 16:21). Pe jpʼel ta koʼontontik ti tskoltautik li Jeovae. ¿Kʼu yuʼun ti jech chkaltike? Yuʼun jech onoʼox skoltaoj tal yajtuneltak sventa spas yuʼunik li yabtel laj yakʼanbee akʼo mi vokol tajek yileluk. Jkʼeltik batel junantik kʼusi kʼot ta stojolal li j-alkʼop Esekiel ti la xcholbe mantal li judaetik ti chukbilik batel ta Babiloniae.

2. 1) Li judaetik ti chbat chcholbe mantal Esekiele, ¿kʼu yelan stalelalik laj yal Jeova? (Esekiel 2:3-6). 2) ¿Kʼusi chkalbetik skʼoplal li ta xchanobil liʼe?

² Li krixchanoetik ti chbat chcholbe mantal Esekiele, ¿kʼu yelan stalelalik? Li Jeovae laj yal ti jpʼajmantaletik, jtoybaetik xchiʼuk yijubem yoʼontonik li judaetike. Chopolik tajek ti xkoʼolaj kʼuchaʼal chʼixetik xchiʼuk xibal sbaik tajek kʼuchaʼal tseketik. Jaʼ yuʼun, li Jeovae ep ta velta xi laj yalbe li Esekiele: «Mu xaxiʼ» (kʼelo Esekiel 2:3-6). Li Esekiele pas yuʼun li kʼusi akʼbat sbaine, yuʼun 1) jaʼ takbil batel yuʼun li Jeovae, 2) akʼbat yip yuʼun li chʼul espiritue xchiʼuk 3) laj yakʼ ta yoʼonton li kʼusi laj yal Diose. ¿Kʼuxi koltaat-o li oxtos taje, xchiʼuk kʼuxi tskoltautik li avie?

3. ¿Kʼusi patbat-o yoʼonton li Esekiele, xchiʼuk kʼuxi akʼbat iluk yuʼun Jeova ti chkoltaate?

³ Li Jeovae xi laj yalbe li Esekiele: «Ta jtakot batel» (Esek. 2:3, 4). Patbat van tajek yoʼonton taje. Vul van ta sjol ti jaʼ jech laj yal Jeova kʼalal la stʼuj li Moises xchiʼuk Isaias sventa xkʼotik ta yaj-alkʼope (Eks. 3:10; Is. 6:8). Li Esekiele snaʼoj xtok ti laj onoʼox skolta Jeova li yaj-alkʼoptak  taje sventa spasik li abtelaletik ti tsotsik ta pasele. Kʼalal chib to velta «ta jtakot batel» x-utat yuʼun li Diose, te laj yakʼ venta ti chkoltaat onoʼoxe. Li ta slivroal Esekiel xtoke ep ta velta xi chale: «La skʼoponun tal li Jeovae» (Esek. 3:16). Xchiʼuk oy jaykoj ti xi chale: «La skʼoponun tal yan velta li Jeovae» (Esek. 6:1). Jaʼ yuʼun, li j-alkʼope jpʼel ta yoʼonton ti jaʼ akʼbat yabtel yuʼun li Jeovae. Jech xtok, ta skoj ti tun ta paleal li stote, chanubtasat van ti jech-o tskolta yaj-alkʼoptak li Jeovae. Yuʼun li Jeovae laj onoʼox yalbe Isaak, Jakob xchiʼuk Jeremias ti te chchiʼinane (Jen. 26:24; 28:15; Jer. 1:8).

4. ¿Kʼusi van patbat-o yoʼonton li Esekiele?

⁴ ¿Kʼu yelan laj yaʼiik aʼyej jutuk mu skotoluk li j-israeletike? Li Jeovae xi laj yalbe li Esekiele: «Li jteklum Israele muʼyuk ta xchikintabeikot, yuʼun mu skʼan xchikintabeikun» (Esek. 3:7). Kʼalal muʼyuk la xchikintabeik li j-alkʼope, jaʼ muʼyuk yakal xchikintabeik li Jeovae. Taje patbat van yoʼonton li Esekiele. Yuʼun ti muʼyuk la xchikinta li krixchanoetike maʼuk ta skoj ti yuʼun mu xtojob ta j-alkʼope. Jech xtok, li Jeovae laj yal ti mi kʼot ta pasel li kʼusi yaloje, li judaetike «tsnaʼik ti oy echʼ jun j-alkʼop ta stojolalike» (Esek. 2:5; 33:33). Li kʼusi albat taje tsatsubtasbat van yoʼonton sventa spas yuʼun li abtel akʼbile.

5. ¿Kʼu yuʼun tspat koʼontontik li Isaias 44:8?

⁵ Tspat tajek koʼontontik ek ti jaʼ tstakutik batel li Jeovae. ¡Jaʼ jun mukʼta matanal ti jaʼutik stestigotake! (Is. 43:10). Jech kʼuchaʼal xi laj yalbe li Esekiele: «Mu xaxiʼ», li voʼotik eke xi chalbutike: «Mu xanikik ta xiʼel». ¿Kʼu yuʼun muʼyuk  chijxiʼo li buchʼutik tskontrainutike? Yuʼun jech kʼuchaʼal kʼot ta stojolal li Esekiele, jaʼ tstakutik batel li Jeovae xchiʼuk jaʼ tskoltautik (k’elo Isaias 44:8).

6. 1) ¿Kʼusi yaloj Jeova ti jaʼ te chakʼ ta ilel ti tskoltautike? 2) ¿Kʼusi tspat koʼontontik?

⁶ Li Jeovae chal ti tskoltautike. Jech kʼuchaʼal liʼe, kʼalal skʼan toʼox xal «voʼoxuk jtestigooxuk» xie, xi laj yale: «Kʼalal mi echʼ atuchʼ li nabe, te ta jchiʼinot xchiʼuk mi echʼ atuchʼ li ukʼumetike, muʼyuk ta smutʼiot. Kʼalal mi la-echʼ ta sba li kʼokʼe, muʼyuk ta xakʼakʼ xchiʼuk muʼyuk chchikʼot li sleb kʼokʼe» (Is. 43:2). Kʼalal ta jcholtik mantale, oy kʼusi ta jnuptantik bakʼintik ti xkoʼolaj ta ukʼume xchiʼuk ta jnuptantik prevaetik ti xkoʼolaj ta kʼokʼe. Pe ta skoj ti tskoltautik Jeovae, muʼyuk chkiktatik-o li cholmantale (Is. 41:13). Jaʼtik jech ta jnuptantik kʼuchaʼal li Esekiele, yuʼun jutuk mu skotoluk li krixchanoetike mu skʼan xchikintaik li mantale. Jnaʼojtik ti kʼalal mu skʼan xchikintaik mantal li krixchanoetike, maʼuk ta skoj ti mu xijtojob ta cholmantale. Kʼalal te ta joltik ti xmuyubaj-o kuʼuntik Jeova kʼalal jech-o ta jcholtik mantale, tspat koʼontontik. Xi laj yal li jtakbol Pabloe: «Ta jujuntal chichʼ smotonik ta sventa li yabtelike» (1 Kor. 3:8; 4:1, 2). Jun ermana ti jal xa tunem ta prekursorae xi chale: «Ximuyubaj tajek ti jnaʼoj chakʼ jmotontik Jeova kʼalal chkakʼ kipaltike».

7. ¿Kʼu van yelan laj yaʼi sba Esekiel kʼalal tsvules ta sjol li kʼusi labal sba akʼbat yile? (Kʼelo li lokʼol ta pajina 1).

⁷ Li Esekiele laj yil ti toj echʼ noʼox tsots li xchʼul espiritu Diose. Kʼalal oy kʼusi akʼbat yile, laj yil kʼu yelan chbeiltasatik yuʼun chʼul espiritu li anjeletik xchiʼuk li set-set stakʼinaltak skareta Jeovae (Esek. 1:20, 21). Xi laj yal ti kʼu yelan laj yaʼi sbae: «Kʼalal laj kile, la jpatan jba ta balumil». Labal sba tajek laj yil ti lom-o ta lume (Esek. 1:28). Kʼalal tsvules ta sjol li kʼusi labal sba tajek laj yile, yikʼaluk van mas to tspat-o yoʼonton ti chkoltaat yuʼun xchʼul espiritu Dios sventa stsutses li yabtel akʼbile.

8, 9. 1) Li Jeovae, ¿kʼusi laj yalbe Esekiel ti akʼo spase? 2) ¿Kʼusi yan la spas Jeova sventa stsatsubtas li Esekiele?

⁸ Xi albat yuʼun Jeova li Esekiele: «Xnichʼon krixchano, vaʼano lek aba sventa jchiʼinot ta loʼil». Kʼalal jech albate xchiʼuk ti koltaat yuʼun li chʼul espiritue, jaʼ akʼbat-o stsatsal yoʼonton sventa xtots likele. Xi laj yale: «Vul ta jtojolal li s-espiritu Diose, vaʼun la svaʼanun» (Esek. 2:1, 2). Ti kʼu sjalil la xchol mantale jaʼ beiltasat-o yuʼun «li skʼob Jeovae», jaʼ xkaltik, li xchʼul espiritue (Esek. 3:22; 8:1; 33:22; 37:1; 40:1). Li espiritu taje jaʼ koltaat-o Esekiel sventa xcholbe mantal li judaetik ti «pimubemik ta mantal xchiʼuk yijubem [yoʼontonike]» (Esek. 3:7). Xi albat yuʼun li Jeovae: «Ta jpas ta tsots avoʼonton jech kʼuchaʼal tsots tajek yoʼonton tstoy sbaike. Ta jtsatsubtasot lek kʼuchaʼal jpʼej diamante, mas to ta jtsatsubtasot kʼuchaʼal li tsatsal tone. Mu xaxiʼ ta stojolalik mi jaʼuk xaxiʼo yuʼun li satike» (Esek. 3:8, 9). Xkoʼolaj ti xi albat yuʼun li Jeovae: «Mu xachibaj-o li stoyobbailike, yuʼun voʼon chkakʼ ti tsotsuk avoʼontone».

⁹ Li Esekiele beiltasat-o batel yuʼun  xchʼul espiritu Dios ti bu skʼan xbat xchol mantale. Xi la stsʼibae: «Laj kaʼi ti tsots abtej ta jtojolal li sjuʼel Jeovae». Li j-alkʼope jun xemana la xchanbe skʼoplal xchiʼuk laj yaʼibe smelolal li aʼyej ti skʼan xal batele (Esek. 3:14, 15). Ta tsʼakale, li Jeovae laj yalbe Esekiel ti xbat ti bu stenlejaltike, vaʼun te ventainat yuʼun li espiritue (Esek. 3:23, 24). Li Esekiele chapal xa sventa xlik xchol mantal.

10. ¿Kʼusi tskoltautik sventa jcholtik mantale, xchiʼuk kʼu yuʼun?

¹⁰ ¿Kʼusi xuʼ skoltautik sventa jcholtik mantale? Sventa xkaʼibetik smelolale, jnopbetik skʼoplal li Esekiele. Kʼalal skʼan toʼox xlik xchol mantale, jaʼ akʼbat yipal yuʼun li chʼul espiritue. Jaʼ jech li voʼotik eke, sventa jcholtik mantale, chtun kuʼuntik li chʼul espiritue. ¿Kʼu yuʼun ti jech chkaltike? Yuʼun li Satanase tstsakutik ta kʼop sventa spajtsan li cholmantale (Apok. 12:17). Epal krixchanoetike tsnopik ti mu la stsal kuʼuntik li Satanas ta skoj ti tsots tajeke. Pe yakal ta jtsaltik kʼalal ta jcholtik mantale (Apok. 12:9-11). Kʼalal jech ta jpastike, chkakʼtik ta ilel ti muʼyuk chijxiʼ yuʼun li kʼusitik tspase xchiʼuk ti muʼyuk chkakʼtik spas kanal li Satanase. Jaʼ yuʼun, kʼalal ta jcholtik mantal akʼo mi chkichʼtik kontrainele, te chvinaj ti jaʼ yakal chakʼ kipaltik li chʼul espiritue xchiʼuk ti lek chilutik li Jeovae (Mat. 5:10-12; 1 Ped. 4:14).

11. ¿Kʼuxi tskoltautik li chʼul espiritue, xchiʼuk kʼusi skʼan jpastik sventa jechuk-o xakʼbutik li Jeovae?

¹¹ ¿Kʼusi chakʼ jchantik ti akʼbat stsatsal yoʼonton Esekiel yuʼun Jeova sventa xchol mantale? Jaʼ ti xuʼ skoltautik li chʼul espiritu li ta cholmantale, mu ventauk li kʼusi ta jnuptantike (2 Kor. 4:7-9). ¿Kʼusi skʼan jpastik sventa jechuk-o xakʼbutik xchʼul espiritu li Diose? Skʼan jkʼanilanbetik ta orasion, yuʼun jnaʼojtik ti ta onoʼox xaʼibutik li Jeovae. Li Jesuse laj yalbe yajchankʼoptak ti jechuk-o  skʼanilanik, «saʼilanik» xchiʼuk «[skʼojilanik] li tiʼ nae». ¿Kʼusi van tspas li Jeovae? Chakʼbe chʼul espiritu li buchʼutik tskʼanike (Luk. 11:9, 13; Ech. 1:14; 2:4).

12. Jech kʼuchaʼal chal Esekiel 2:9 kʼalal ta 3:3, ¿bu lik tal li balbalvune, xchiʼuk kʼusi te tsʼibabil?

¹² Maʼuk noʼox koltaat yuʼun chʼul espiritu li Esekiele, yuʼun jaʼ tsatsubtasbat-o xchʼunel yoʼonton li kʼusi laj yal Diose. Kʼalal oy kʼusi akʼbat yile, li Esekiele laj yil jun kʼobil ti stsakoj jlik balbalvune (k’elo Esekiel 2:9–3:3). ¿Bu lik tal li balbalvun taje? ¿Kʼusi te tsʼibabil? ¿Kʼuxi tsatsubtasat-o li Esekiele? Li balbalvune te lik talel ta stojolal Jeova. Sventa xtal akʼbatuk li Esekiele, li Diose jaʼ van la stunes junuk li anjel ti akʼbat yil Esekiele (Esek. 1:8; 10:7, 20). Li ta balbalvune te tsʼibabil li kastigo ch-akʼbatik yuʼun Dios li jtoybaetike. Taje jaʼ li aʼyej skʼan xalbe echʼel skʼoplal li Esekiele (Esek. 2:7). Li aʼyej taje tsʼibabil ta xchaʼjotal li balbalvune.

13. Li Esekiele, ¿kʼusi albat yuʼun Jeova ti spasbe li balbalvune, xchiʼuk kʼu yuʼun chiʼ laj yaʼi?

¹³ Li Jeovae xi laj yalbe li Esekiele: «Lajeso li balbalvun [...] liʼe xchiʼuk nojeso-o achʼut». Li Esekiele jaʼ jech la spas, la slajes sjunul. ¿Kʼusi skʼan xal taje? Jaʼ ti skʼan xaʼibe lek smelolal li aʼyej skʼan xbat yale xchiʼuk ti skʼan xkʼot ta yoʼonton sventa xal batele. Oy kʼusi labal sba laj yakʼ venta Esekiel kʼalal la slajes li balbalvune. Xi laj yale: «Toj lek chiʼ laj kaʼi kʼuchaʼal pom» (Esek. 3:3). ¿Kʼu yuʼun ti jech laj yale? Yuʼun tskʼupin tajek ti jaʼ yajkʼopojel Jeovae (Sal. 19:8-11). Tstojbe tajek ta vokol Jeova ti tʼujat sventa xkʼot ta yaj-alkʼope.

14. ¿Kʼusi koltaat-o Esekiel sventa spas yuʼun li kʼusi akʼbat sbaine?

¹⁴ Ta tsʼakale, li Jeovae xi laj yalbe li Esekiele: «Akʼo ta avoʼonton xchiʼuk chikintao skotol li kʼusi chkalbote» (Esek. 3:10). Jaʼ jech laj yakʼbe ta aʼiel ti skʼan svules ta sjol li kʼusi chal li balbalvune xchiʼuk ti snopbe skʼoplale. Taje jaʼ tstsatsubtasbat-o xchʼunel yoʼonton li Esekiele xchiʼuk chakʼ-o venta ti tsots skʼoplal li aʼyej chbat yale (Esek. 3:11). Kʼalal laj yaʼibe lek smelolal li aʼyej albat yuʼun Dios xchiʼuk ti la xchʼune, chapal xa ox sventa xlik xchol mantal xchiʼuk ti spas li kʼusi akʼbat sbaine (koʼoltaso xchiʼuk Salmo 19:14).

15. ¿Kʼusi skʼan xkʼot ta koʼontontik sventa mu xkiktatik li cholmantale?

¹⁵ Sventa jechuk-o jcholtik mantale, skʼan jchanilantik-o li Skʼop Diose. Skʼan xkʼot ta koʼontontik li kʼusi chalbutik Jeovae. Avie, li Jeovae jaʼ te tskʼoponutik li ta Vivliae. ¿Kʼusi xuʼ jpastik sventa jechuk-o sbeiltas jnopbetik xchiʼuk li kʼusi oy ta koʼontontik li Skʼop Diose?

16. ¿Kʼusi skʼan jpastik sventa xkʼot ta koʼontontik li Skʼop Diose?

¹⁶ Kʼalal chijveʼ xchiʼuk ta jxax lek li jveʼeltike, tstsatsub lek li jbekʼtaltike. Jaʼ jech li xchʼunel koʼontontik eke, tstsatsub kʼalal ta jchantik xchiʼuk ta jnopbetik skʼoplal li Skʼop Diose. Taje jaʼ li kʼusi chakʼ jchantik li balbalvun laj yil Esekiele. Li Jeovae oy ta yoʼonton ti jnojes jchʼutik li ta Skʼope, jaʼ xkaltik ti xkaʼibetik lek smelolal li kʼusi chale. ¿Kʼuxi  tspas kuʼuntik? Jaʼo kʼalal ta jpastik orasione, kʼalal ta jkʼeltik li Vivliae xchiʼuk kʼalal ta jnopbetik skʼoplal li kʼusi ta jchantike. Baʼyele, ta jpastik orasion sventa jchapan koʼontontik yoʼ xkakʼtik venta li kʼusi tsnop Jeovae. Mi laje, ta jchantik li Vivliae. Ta tsʼakale, chijpaj sventa jnopbetik lek skʼoplal li kʼusi la jchantike. Mi jech ta jpastike, mas to me chkʼot ta koʼontontik li kʼusi chal Skʼop Diose.

17. ¿Kʼu yuʼun tsots skʼoplal ti jnopbetik skʼoplal li kʼusi ta jchantik ta Vivliae?

¹⁷ ¿Kʼu yuʼun tsots skʼoplal ti jchantik li Vivliae xchiʼuk ti jnopbetik skʼoplale? Yuʼun mi jech la jpastike, tstsatsubtas koʼontontik sventa xkaltik batel li lekil aʼyej sventa li Ajvalilale xchiʼuk tskoltautik ta tsʼakal kʼalal jaʼo van chkaltik batel li aʼyej sventa chapanele. Jech xtok, mas to me lek chkil jbatik xchiʼuk Jeova kʼalal ta jnopbetik skʼoplal li stalelaltak ti kʼupilik sba tajeke. Ta skoj taje, oy kʼusi lek ta jkʼupintik: jaʼ ti xkuxet noʼox koʼontontike xchiʼuk ti xijmuyubaje (Sal. 119:103).

18. ¿Kʼusi chakʼik venta ta tsʼakal li buchʼutik ta jcholbetik mantale, xchiʼuk kʼu yuʼun?

¹⁸ Akʼo mi maʼuk j-alkʼoputik jech kʼuchaʼal li Esekiele, jech-o chkaltik batel li kʼusi yakʼoj ta naʼel Jeova ta Skʼope. Jech-o ta xkaltik batel li lekil aʼyeje jaʼ to mi laj yal Jeova ti muʼyuk xa chichʼ cholel mantale. Mi kʼot yorail chchapanvan li Jeovae, li krixchanoetike mu xuʼ xalik ti muʼyuk laj yichʼik albel o pʼijubtasel yuʼun li Diose (Esek. 3:19; 18:23). Moʼoj, yuʼun jaʼ to te chakʼik venta ti te likem talel ta stojolal Dios li aʼyej laj kalbetik skʼoplale.

19. ¿Bu ta jta kipaltik sventa jcholtik mantal?

¹⁹ ¿Kʼuxi ta jta kipaltik yoʼ jcholtik mantale? Jaʼ tskoltautik li oxtos kʼusi koltaat-o li Esekiele. Jech-o ta jcholtik mantal, yuʼun jaʼ yalojbutik stuk Jeova ti akʼo jech jpastike, yuʼun chakʼ kipaltik li chʼul espiritue xchiʼuk ti ta jtsatsubtas xchʼunel koʼontontik li ta Skʼop Diose. Ta skoj ti jnaʼojtik ti tskoltautik Jeovae, jpʼel ta koʼontontik ti jech-o ta jcholtik mantal xchiʼuk ti chkuch kuʼuntik «kʼalal to ta slajebe» (Mat. 24:13).