1. ¿Kʼuxi jnaʼojtik ti tskʼan Jeova ti xijnopaj ta stojolale?

 LI Jeovae tskʼan ti xijnopaj ta stojolale (Sant. 4:8). Tskʼan ti xkʼotuk ta Jdiostik, ta Jtotik xchiʼuk ta kamigotik. Tstakʼ li j-orasiontike xchiʼuk tskoltautik kʼalal oy kʼusi ta jnuptantike. Jech xtok, tstunes s-organisasion sventa xchanubtasutik xchiʼuk xchabiutik. Pe ¿kʼusi skʼan jpastik sventa nopol oyutik ta stojolale?

2. ¿Kʼuxi xuʼ xijnopajutik ta stojolal li Jeovae?

² Xuʼ xijnopaj ta stojolal Jeova kʼalal ta jkʼopontike, ta jchanbetik li Skʼope xchiʼuk ti jnopbetik skʼoplale. Mi jech ta jpastike, tskoltautik sventa mas to jkʼantik xchiʼuk ti jtojbetik ta vokol li kʼusi tspas ta jtojolaltike. Oy ta koʼontontik xchʼunbel smantal xchiʼuk ti jkʼupil kʼoptatik jech kʼuchaʼal sta-oe (Apok. 4:11). Kʼalal mas to chkojtikintik li Jeovae, mas to ta jpat koʼontontik ta stojolal xchiʼuk ta stojolal s-organisasion ti yakʼoj sventa xchabiutike.

3. 1) ¿Kʼusi tspas Diablo yoʼ snamajesutik ta stojolal Jeova? 2) ¿Kʼusi tskoltautik yoʼ mu xijnamaj ta stojolal Jeova xchiʼuk s-organisasion? (Salmo 31:13, 14).

³ Li Satanase tskʼan tsnamajesutik ta stojolal Jeova, mas to kʼalal chkil jvokoltike. ¿Kʼuxi tspas? Oy kʼusi tspas sventa mu xa jpat lek koʼontontik ta stojolal Jeova xchiʼuk s-organisasion. Pe xuʼ stsal kuʼuntik. Mi tsots xchʼunel koʼontontik xchiʼuk mi jpatoj lek koʼontontik ta stojolal Jeovae, muʼyuk chijnamajutik ta stojolal mi jaʼuk ta stojolal li s-organisasione (kʼelo Salmo 31:13, 14).

4. ¿Kʼusi chkalbetik batel skʼoplal li ta xchanobil liʼe?

⁴ Li ta xchanobil liʼe chkalbetik batel skʼoplal oxtos  kʼusitik xuʼ spasbutik li yan krixchanoetik ti xuʼ van mu xa jpat-o lek koʼontontik ta stojolal Jeova xchiʼuk ta stojolal li s-organisasione. ¿Kʼuxi van xuʼ snamajesutik ta stojolal Jeova taje? Xchiʼuk ¿kʼusi xuʼ jpastik sventa jtsaltik li Satanase?

5. Ta skoj li kʼusitik ta jnuptantike, ¿kʼuxi xuʼ mu xa lekuk jpat koʼontontik ta stojolal Jeova xchiʼuk li s-organisasione?

⁵ Bakʼintike, xuʼ van xkil jvokoltik ta skoj ti tskontrainutik li kutsʼ kalaltike o ti muʼyuk xa kabteltik chijkome. Kʼalal jech ta jnuptantike, ¿mi xuʼ van snamajesutik ta stojolal Jeova xchiʼuk ti mu xa jpat lek koʼontontik ta stojolal li s-organisasione? Kʼalal chjalij li jvokoltike, yikʼaluk van jnoptik ti mu xa kʼusi stakʼ pasele xchiʼuk chijchibaj-o yuʼun. Li Satanase lek xa tajek chaʼi taje, yuʼun tskʼan ti xlik jnoptik mi skʼanojutik ta melel li Jeovae. Tskʼan ti xlik jnoptik ti jaʼ van ta smul Jeova o s-organisasion li kʼusi yakal ta jnuptantike. Jaʼtik jech kʼot ta stojolal li j-israeletik kʼalal teyik toʼox ta Ejiptoe. Ta slikebale, la snopik ti jaʼ takatik batel yuʼun Jeova li Moises xchiʼuk Aaron sventa xpojatik lokʼel ta mosoile (Eks. 4:29-31). Pe kʼalal mas to akʼbat svokolik yuʼun li faraone, lik yakʼbeik smulin Moises xchiʼuk Aaron. Xi laj yalbeike: «Voʼoxuk ta akojik ti pʼajbilutik yuʼun faraon xchiʼuk li yajtuneltake, jech xtok, voʼoxuk laj avakʼbeik espada ta skʼobik sventa tsmilutik» (Eks. 5:19-21). Muʼyuk lek ti jaʼ laj yakʼbeik smulin li yajtuneltak Diose. Mi jal xa atsʼikoj tal avokole, ¿kʼusi xuʼ xapas sventa jechuk-o xapat avoʼonton ta stojolal Jeova xchiʼuk ta stojolal li s-organisasione?

6. ¿Kʼusi chakʼ jchantik li kʼusi la spas Abakuke? (Abakuk 3:17-19).

⁶ Albo Jeova skotol li kʼusi oy ta avoʼontone xchiʼuk pato avoʼonton ta stojolal. Li j-alkʼop Abakuke ep kʼusitik la snuptan. Yileluke, la snop mi ta melel kʼanbil onoʼox yuʼun li Jeovae. Jaʼ yuʼun, laj yalbe ti kʼu yelan chaʼi sbae. Xi laj yale: «Kajval Jeova, ¿kʼu to sjalil liʼ xi-avet ta skʼanel koltaele? ¿Bakʼin to chatakʼbun? [...] ¿Kʼu yuʼun te noʼox atsʼikoj li utsʼintaele?» (Abak. 1:2, 3). Li Jeovae la stakʼbe s-orasion li yajtunel ti tukʼ yakʼoj sbae (Abak. 2:2, 3). Kʼalal la snopbe skʼoplal kʼu yelan skoltaoj tal steklumal li Jeovae, li Abakuke lik muyubajuk yan velta. Laj yakʼ venta ti kʼanbil yuʼun li Jeovae xchiʼuk ti chkoltaat sventa xkuch yuʼun kʼusiuk preva tsnuptane (kʼelo Abakuk 3:17-19). ¿Kʼusi chakʼ jchantik taje? Kʼalal ta jnuptantik vokolile, jkʼopontik li Jeovae, kalbetik ti kʼu yelan chkaʼi jbatike xchiʼuk jpat koʼontontik ta stojolal. Xuʼ me jpʼel ta koʼontontik ti ta onoʼox xakʼbutik kipaltik sventa xkuch kuʼuntike. Vaʼun, kʼalal chkiltik kʼu yelan tskoltautike, mas me tstsatsub li xchʼunel koʼontontike.

7. ¿Kʼusi akʼbat ox snop yuʼun jun yutsʼ yalal li Xerlie, xchiʼuk kʼusi koltaat-o yoʼ jechuk-o spat yoʼonton ta stojolal Jeova?

⁷ Jechuk-o xapas batel li kʼusitik tsnopajesot ta stojolal Jeovae. Taje jaʼ li kʼusi koltaat-o kʼalal laj yil svokol jun ermana ta Papúa Nueva Guinea ti Xerli b sbie. Abol sba tajek li yutsʼ yalale, bakʼintike vokol tajek tsta sveʼelik. Xi albat yuʼun jun yutsʼ yalal sventa mu xa spat lek yoʼonton ta stojolal Jeovae: «Chaval ti yakal tskoltaot li xchʼul espiritu Diose. Pe ¿mi yakal tskoltaot un? Jech-o  povreoxuk chkile. Jecheʼ noʼox ti chachol mantale». Li Xerlie laj yal ti oy onoʼox la snop ti iktaatik xa komel yuʼun Jeova xchiʼuk li yutsʼ yalale. Xi laj yale: «Ta anil noʼox la jkʼopon li Jeovae xchiʼuk laj kalbe li kʼusi oy ta koʼontone. Muʼyuk laj kikta xchanel li Vivliae, li jvuntike, muʼyuk laj kikta li cholmantale xchiʼuk li tsobajeletike». Li Xerlie laj yakʼ venta ti yakal chchabibat yuʼun Jeova li yutsʼ yalale, yuʼun oy noʼox sveʼelik xchiʼuk xmuyubajik noʼox. Xi chale: «Laj kil kʼu yelan la stakʼ j-orasion li Jeovae» (1 Tim. 6:6-8). Mi jech-o chapas li kʼusitik tsnopajesot ta stojolal Diose, muʼyuk me chanamaj-o ta stojolal akʼo mi oy kʼusitik chanuptan.

8. ¿Kʼusi van xuʼ snuptanik li ermanoetik ti oy kʼusitik sbainojik ta j-organisasiontike?

⁸ Li kajkontratike tstunesik radio, television xchiʼuk redes sociales sventa spukbeik skʼoplal jutbil kʼopetik ta stojolal li kermanotik ti oy kʼusi sbainojik ta s-organisasion Jeovae (Sal. 31:13). Junantik ermanoetike yichʼojik chukel xchiʼuk jutbel smulik ti oy la kʼusi chopol spasojike. Taje jechtik kʼot ta pasel li ta baʼyel sigloe. Li jtakbol Pabloe laj yichʼ jutbel smul xchiʼuk laj yichʼ chukel. ¿Kʼusi la spasik li yajtsʼaklomtak Kristo li vaʼ kʼakʼale?

9. ¿Kʼusi la spasik junantik yajtsʼaklomtak Kristo kʼalal laj yichʼ chukel li Pabloe?

⁹ Li junantik yajtsʼaklomtak Kristoe laj yiktaik stuk Pablo kʼalal jaʼo te chukul ta Romae (2 Tim. 1:8, 15). ¿Mi laj van snopik ti ch-akʼatik ta kʼexlal yuʼun Pablo ta skoj ti oy kʼusi chopol spasoj ta alele? (2 Tim. 2:8, 9). ¿O mi ta xiʼik ti jech xichʼik kontrainel eke? Mu ventauk kʼusi la snopik, chopol van laj yaʼi sba yuʼunik li Pablo ti ep xa kʼusitik kuchem tal yuʼun xchiʼuk ti laj yil tal svokol ta stojolalike (Ech. 20:18-21; 2 Kor. 1:8). Mu me jechuk jpastik kʼuchaʼal li yajtsʼaklomtak Kristo taje, ti laj yiktaik komel Pablo kʼalal jaʼo tskʼan koltaele. ¿Kʼusi skʼan teuk ta joltik kʼalal chichʼik kontrainel li  ermanoetik ti oy kʼusi sbainojik ta j-organisasiontike?

10. ¿Kʼusi skʼan teuk ta joltik kʼalal chichʼik kontrainel li ermanoetik ti oy kʼusi sbainojike, xchiʼuk kʼu yuʼun?

¹⁰ Teuk ta joltik ti kʼu yuʼun chkichʼtik kontrainel xchiʼuk ti bu chlik tale. Xi chal ta 2 Timoteo 3:12: «Skotol li buchʼutik tskʼan chichʼik ta mukʼ Dios ta sjunul yoʼontonik ta xkuxlejalike xchiʼuk ti tskʼan jmoj oyik xchiʼuk li Kristo Jesuse ta onoʼox xichʼik kontrainel ek». Jaʼ yuʼun, mu me labaluk xkiltik ti jaʼ mas tstsakatik ta kʼop yuʼun Satanas li ermanoetik ti oy kʼusi sbainojik ta j-organisasiontike. Li kʼusi oy ta yoʼontone jaʼ ti mu xa tukʼuk xakʼ sbaik ta stojolal Jeovae xchiʼuk ti xlik xiʼkutik eke (1 Ped. 5:8).

11. ¿Kʼusi chakʼ jchantik li kʼusi la spas Onesiforoe? (2 Timoteo 1:16-18).

¹¹ Jechuk-o me xakolta li ermanoetik ti oy kʼusi sbainojike (kʼelo 2 Timoteo 1:16-18). Li ta baʼyel sigloe, oy jun yajtsʼaklom Kristo ti la skolta Pablo kʼalal tikʼil ta chukel ti Onesiforo sbie. Li Pabloe xi laj yal ta stojolale: «Muʼyuk bu xkʼexav ta skoj ti chukulune». Akʼo mi oy kʼusi xuʼ snuptan, li Onesiforoe bat saʼ li Pabloe xchiʼuk la skolta kʼalal la stae. ¿Kʼusi chakʼ jchantik taje? Jaʼ ti jechuk-o jkoltatik li ermanoetik ti yakal chichʼik kontrainele akʼo mi chkichʼtik sibtasel. Jpakbetik skʼoplalik xchiʼuk jkoltaantik (Prov. 17:17). Li buchʼutik chichʼik kontrainele skʼan xkakʼbetik ta ilel ti jkʼanojantike xchiʼuk ti ta jkoltatike.

12. ¿Kʼusi chakʼ jchantik li kermanotaktik ta Rusiae?

¹² Jnopbetik skʼoplal ti kʼu yelan chaʼi sbaik li ermanoetik ta Rusia kʼalal chilik ti kʼu yelan chichʼik chukel batel li yan ermanoetike. Kʼalal chichʼ chapanel junuk ermanoe, li yan ermanoetike chbatik li ta snail chapanobbail sventa xbat spatbeik yoʼontone. ¿Kʼusi chakʼ jchantik taje? Jaʼ ti mu xijxiʼ mi laj yichʼ jutbel smulik li ermanoetik ti oy kʼusi sbainojike, mi laj yichʼik chukel o mi chichʼik kontrainele. Jpastik orasion ta stojolalik, jkʼelbetik li yutsʼ yalalike xchiʼuk jkʼeltik kʼuxi xuʼ jkoltaanbetik (Ech. 12:5; 2 Kor. 1:10, 11).

13. ¿Kʼu yuʼun muʼyuk xa lek ta jpat-o koʼontontik ta stojolal Jeova xchiʼuk s-organisasion kʼalal chkichʼtik labanele?

¹³ Xuʼ van oy junantik kutsʼ kalaltik, jchiʼiltik ta abtel o ta chanvun tslabanutik ta skoj ti ta jcholtik mantale o ti ta jchʼunbetik smantaltak Jeova ta sventa talelale (1 Ped. 4:4). Xuʼ van xi xalbutike: «Lek chkil li atalelale, pe li arelijione muʼyuk xa chtun kuʼuntik xchiʼuk toj tsotsik li mantaletik chakʼe». Xuʼ van xi chalbutik junantik ta skoj ti kʼu yelan chkiltik li buchʼutik lokʼesbilik ta mantale: «¿Kʼuxi xa noʼox ti chavalik ti akʼanojik li krixchanoetike?». Kʼalal jech chij-albate, xuʼ van chlik chibetajkutik xchiʼuk xi chlik jnoptike: «¿Mi tskʼan Jeova ti solel lek xa jpas skotole? ¿Mi toj tsots ta chʼunel li mantaletik chal ta s-organisasione?». Mi jaʼ jech yakal chanuptane, ¿kʼusi xuʼ xapas sventa mu xanamaj ta stojolal Jeova xchiʼuk li ta s-organisasione?

14. ¿Kʼusi xuʼ jpastik mi chkichʼtik labanel ta skoj ti ta jchʼunbetik smantal Jeovae? (Salmo 119:50-52).

¹⁴ Ta sjunuluk koʼontontik jpastik li kʼusi lek chil Jeovae. Li Jobe la xchʼunbe smantaltak Jeova akʼo mi laj yichʼ-o labanel. Li jun yamigo ta alele laj yal ti muʼyuk la tsots skʼoplal chil Dios mi chchʼunbe smantal o mi muʼyuke (Job 4:17, 18; 22:3). Pe li Jobe muʼyuk laj ta loʼlael,  yuʼun snaʼoj ti jaʼ melel li kʼusi chal li smantaltak Jeova ta sventa li kʼusi lek xchiʼuk li kʼusi chopole. Jaʼ yuʼun, ta sjunul yoʼonton la spas. Jech-o tukʼ yoʼonton laj yakʼ sba akʼo mi oy kʼusitik laj yal li yantike (Job 27:5, 6). ¿Kʼusi chakʼ jchantik taje? Jaʼ ti jechuk-o jpat koʼontontik ti lekik li smantaltak Jeova akʼo mi xkichʼtik labanele. Jnopbetik skʼoplal li sbaliltak jtaojtik ta skoj ti ta jchʼuntike. ¿Mi mu jechuk ti ep ta velta jech kilojtike? Ta sjunuluk koʼontontik jchʼuntik li kʼusi chal j-organisasiontike, yuʼun jaʼ chalbe skʼoplal li smantaltak Jeovae. Akʼo mi chlabanvan li krixchanoetike, muʼyuk me chanamaj ta stojolal Jeova (kʼelo Salmo 119:50-52).

15. Li Brizite ¿kʼu yuʼun laj yichʼ labanel yuʼun li yutsʼ yalale?

¹⁵ Kalbetik skʼoplal jun ermana ta India ti Brizit sbie. Ta skoj ti stestigo Jeovae, laj yichʼ labanel yuʼun yutsʼ yalal. Kʼalal muʼyuk toʼox jal yichʼoj voʼ ta 1997, li smalal ti maʼuk stestigo Jeovae muʼyuk xa yabtel kom. Jaʼ yuʼun, li smalale la snop ti jaʼ lek ti xbatik ta naklej xchiʼuk li stot smeʼ ti te nakalik ta yan jteklume. Pe muʼyuk te laj-o svokoltak li Brizite. Lik abtejuk sventa smakʼlin li yutsʼ yalale, yuʼun muʼyuk la sta yabtel li smalale. Pe maʼuk noʼox, yuʼun li tsobobbail ti mas nopol xile te van 350 kilometrouk snamal. Ta skoj ti jaʼ stestigo Jeovae, lik kontrainatuk yuʼun li yutsʼ yalal smalale. Mas to laj yil svokolik li Brizit xchiʼuk li yutsʼ yalale, jaʼ yuʼun la sjel snailik yan velta. Oy yan kʼusi toj chopol kʼot ta pasel, cham li smalale. Ta tsʼakale, cham jun stseb ta kanser ti 12 toʼox sjabilale. Jech xtok, li yutsʼ yalale laj yakʼbeik smulin Brizit li kʼusitik kʼot ta pasele. Albat ti manchukuk la pas ta stestigo Jeovae, muʼyuk la jech la snuptanik jechuke. Pe li Brizite jech-o la spat yoʼonton ta stojolal Jeova xchiʼuk muʼyuk namaj li ta s-organisasione.

16. ¿Kʼusitik bendision la sta Brizit ta skoj ti muʼyuk namaj ta stojolal Jeova xchiʼuk li s-organisasione?

¹⁶ Ta skoj ti nom tajek xil tsobobbail li Brizite, albat yuʼun li jkʼelvanej ta sirkuito  ti teuk xchol mantal ti bu nakale xchiʼuk ti teuk xetʼes tsobajeletik li ta snae. Ta slikebale, la snop ti mu spas yuʼune. Pe laj onoʼox spas, lik xchol mantal, lik sjelubtas li tsobajeletik ta snae xchiʼuk lik spas li yichʼel ta mukʼ Dios xchiʼuk li stsebetike. Ta skoj taje, li Brizite la sta ep yaj-estudiotak xchiʼuk oy jayvoʼ ti laj yichʼik voʼe. Lik tunuk ta prekursora regular li ta 2005. La stabe sbalil ti la spat yoʼonton ta stojolal Jeova xchiʼuk ti tukʼ laj yakʼ sba ta stojolal li j-organisasiontike. ¿Kʼu yuʼun ti jech chkaltike? Yuʼun jech-o chtunik ta stojolal Jeova li stsebetike xchiʼuk oy xa chib tsobobbail ti bu nakale. Li Brizite snaʼoj ti jaʼ akʼbat yipal yuʼun Jeova sventa xkuch yuʼun li labanele xchiʼuk li svokoltake.

17. ¿Kʼusi skʼan jpʼeluk ta koʼontontik spasel?

¹⁷ Li Satanase tskʼan chakʼ jnoptik ti muʼyuk tskoltautik Jeova kʼalal oy kʼusi ta jnuptantike xchiʼuk ti jaʼ noʼox chakʼ jvokoltik kʼalal ta jchʼuntik li kʼusi chal s-organisasione. Jech xtok, tskʼan tsibtasutik kʼalal chkaʼitik ti chichʼ jutbel smulik li ermanoetik ti oy kʼusi sbainojik li ta s-organisasion Jeovae, ti chichʼik kontrainele o chukele. Tstunes xtok li labanel sventa mu xa jpat lek koʼontontik ta stojolal li s-organisasion Jeova xchiʼuk li ta smantaltak chakʼe. Pe xkojtikintik xa lek li kʼusitik tstunese, jaʼ yuʼun muʼyuk tsloʼlautik (2 Kor. 2:11). Jpʼeluk ta koʼontontik spʼajel li kʼusitik tstunese xchiʼuk tukʼuk-o xkakʼ jbatik ta stojolal Jeova xchiʼuk li s-organisasione. Teuk ta joltik ti muʼyuk onoʼox chiktautik li Jeovae (Sal. 28:7). Jaʼ yuʼun, mu me xkakʼtik ti oyuk kʼusi snamajesutik ta stojolale (Rom. 8:35-39).

18. ¿Kʼusi ta jkʼeltik li ta yan xchanobile?

¹⁸ Li ta xchanobil liʼe la jkʼelbetik skʼoplal li kʼusitik tspas yantik ti chakʼ jvokoltike xchiʼuk ti xuʼ van mu xa jpat-o lek koʼontontik ta stojolal Jeova xchiʼuk li s-organisasione. Pe oy kʼusitik xuʼ jnuptantik xtok li ta tsobobbaile. ¿Kʼusi xuʼ jpastik mi jech kʼot ta jtojolaltike? Jaʼ chkalbetik skʼoplal li ta yan xchanobile.