TI LA-AYUK li ta lum joyol ta nab li ta Sangir Besar (Indonesia) leʼ xa ta jayibuk jabile, yikʼaluk van te la ata oxib ermanaetik li ta tiʼ nabe. Akʼo mi ojtikinbilik ti lek snaʼik skoltael krixchanoetik ta yaʼibel smelolal li Vivliae, maʼuk cholmantal tspasik. ¿Kʼusi tspasik un chaʼa?

Baʼyele, ch-ochik ta nab sventa saʼik mukʼtik tonetik ti jech van smukʼul kʼuchaʼal jpʼej pelotae, vaʼun chkuchik lokʼel kʼalal to ta stiʼ nab. Mi laje chchotiik ta uni siyaetik, vaʼun bikʼitik xa chvochʼilanik ta martiyo. Mi laje, chkuchik batel ta snaik ta jun valte xchiʼuk ta eskalera chmuyik batel. Tstikʼik ta mukʼtik koxtaletik. Laje te chkʼot xkuch li mukʼtik karoetike. Li tonetik taje chichʼ tunesel sventa smeltsanik beetik.

Jun li ermana taje jaʼ Hulda sbi. Li stuke jal xkuch yuʼun abtel li ta tiʼ nabe. Ti kʼu yepal chichʼ tojel ta stsobel li tonetike jaʼ sventa skolta-o yutsʼ yalal sventa smanik li kʼusi chtun yuʼunike. Pe avie oy ta yoʼonton tsman stavlet sventa stunes li aplikasion JW Library^®. Yuʼun snaʼoj ti xuʼ xkoltaat-o sventa xtojob lek ta cholmantal xchiʼuk sventa xaʼibe lek smelolal Vivlia, videoetik xchiʼuk li mantaletik te yichʼoj tal li ta aplikasione.

Li Huldae chib ora abtej jujun sob, jun u xchiʼuk oʼlol jech la spas. Ti kʼu yepal la sta ta tsobel li tone la snojes j-oʼlol karo. Vaʼun, ti kʼu yepal la spas kanale, la sman-o stavlet.

Xi laj yal li Huldae: «Ta skoj ti la jvochʼilan li tonetike, lilub tajek xchiʼuk kʼuxik tajek li jbekʼtale. Pe kʼalal la jman li jtavlete la jtunes ta cholmantal xchiʼuk la jchapan-o jba ta sventa li tsobajeletike. Vaʼun, chʼay xkaʼi li xkʼuxul jbekʼtale». Laj yal xtok ti koltaat-o kʼalal lik coronaviruse, yuʼun ta videoconferencia chjelav li tsobajeletik xchiʼuk li cholmantale. ¡Xijmuyubaj ti la sta Hulda li kʼusi oy ta yoʼontone!