1. ¿Kʼu yelan laj yil siervo ministerialetik li jtakbol Pabloe?

 LI SIERVO ministerialetike ep sbalil li yabtel tspasik ta tsobobbailetike. Li jtakbol Pabloe skʼanojan tajek li viniketik taje. Jaʼ yuʼun, kʼalal la stsʼibabe batel li yajtsʼaklomtak Kristo ta Filipose, te la sta ta alel li siervo ministerialetike xchiʼuk li moletike (Filip. 1:1).

2. ¿Kʼu yelan chaʼi sba Luis ti chtun kʼuchaʼal siervo ministeriale?

² Ep ermanoetik ti yichʼojik xa voʼe xmuyubaj tspas li yabtelik kʼuchaʼal siervo ministerialetike. Xuʼ van keremik to o oy xa van sjabilalik. Jech kʼuchaʼal li Devane 18 toʼox sjabilal kʼalal laj yichʼ biiltasel kʼuchaʼal siervo ministeriale. Yan li Luise mas xa ox ta 50 sjabilal. Xi chal kaʼitik Luis ti kʼu yelan chaʼi sbae: «Jaʼ jun mukʼta matanal chkaʼi ti chitun ta siervo ministeriale, mas to kʼalaluk chkil ti kʼu yelan chakʼbikun ta ilel kʼanelal li ermanoetike». Taje ep buchʼutik ti jaʼ jech chaʼi sbaik eke.

3. ¿Kʼusi ta jtakʼtik batel li ta xchanobil liʼe?

³ Mi jaʼot jun ermano ti avichʼoj xa voʼe, pe ti maʼukot to siervo ministeriale, ¿kʼu yuʼun mu xavakʼ ta avoʼonton ti jech xlik tunane? ¿Kʼusi skʼan stij avoʼonton sventa jech xapase? ¿Kʼusitik chal Vivlia ti skʼan xapas sventa xatae? Jaʼ ta jkʼelbetik batel skʼoplal li ta xchanobil liʼe. Pe baʼyel ta jkʼeltik kʼusitik abtelal tspasik li siervo ministerialetike.

 ¿KʼUSITIK ABTELAL TSPASIK LI SIERVO MINISTERIALETIKE?

4. ¿Kʼusi abtelal tspas li siervo ministeriale? (Kʼelo xtok li lokʼole).

⁴ Li ermanoetik ti chtunik ta siervo ministeriale yichʼojik xa voʼ xchiʼuk biiltasbilik yuʼun li chʼul espiritu sventa skoltaik li moletik ta spasel jeltos abtelaletik ta tsobobbaile. Junantik abtelaletik tspasike jaʼ ti tskʼelik ti oyuk sterritorioik li jcholmantaletike xchiʼuk ti oyuk yuʼunik li vunetike. Ep buchʼutik tskolta sbaik ta skʼelel xchiʼuk ta xchʼubael li Salon sventa Tsobobbaile. Junantik xtoke chtunik ta akomodador, tskʼelik li audio xchiʼuk video kʼalal chjelav li tsobajele. Akʼo mi jaʼ tsbainik spasel li kʼusitik taje, pe li kʼusi mas tsots skʼoplale jaʼ ti tsotsik lek ta mantale. Skʼanojik Jeova xchiʼuk chakʼ ta xkuxlejalik li kʼusi chal li smantaltake. Jech xtok, skʼanojik tajek li yermanotakike (Mat. 22:​37-39). ¿Kʼusi skʼan spasik li ermanoetik sventa xkʼotik ta siervo ministeriale?

5. ¿Kʼusi xuʼ xapas sventa xlik tunan ta siervo ministerial?

⁵ Li ta Vivliae te chal kʼusi skʼan spasik li buchʼutik tskʼan chtunik ta siervo ministeriale (1 Tim. 3:​8-10, 12, 13). ¿Kʼuxi xuʼ spas avuʼun taje? Jaʼ ti xakʼelbe skʼoplal kʼusitik skʼan xapas ti te chal ta Vivliae xchiʼuk ti xavakʼ persa yakʼel ta akuxlejale. Pe jkʼeltik batel kʼu yuʼun ti chakʼan chakʼot ta siervo ministeriale.

¿KʼU YUʼUN CHAKʼAN CHAKʼOT TA SIERVO MINISTERIAL?

6. ¿Kʼusi skʼan stij avoʼonton sventa xatun ta stojolal li avermanotake? (Mateo 20:28; kʼelo xtok li lokʼol ta pajina 1).

⁶ Li buchʼu lek xuʼ jchanbetike jaʼ li Jesukristoe. Li stuke jaʼ tijbat yoʼonton li kʼanelale, yuʼun skʼanoj li Stote xchiʼuk skʼanoj li krixchanoetike. Taje jaʼ tijbat yoʼonton sventa skolta li yantike xchiʼuk spas abtelaletik ti mu toj masuk tsots skʼoplale (kʼelo Mateo 20:28; Juan 13:​5, 14, 15). Mi jaʼ tstij avoʼonton li kʼanelal eke, li Jeovae ta me xakʼbot sbendision xchiʼuk ta me skoltaot sventa xakʼot ta siervo ministerial (1 Kor. 16:14; 1 Ped. 5:5).

7. ¿Kʼu yuʼun chopol mi jaʼ noʼox chakʼan chakʼot ta siervo ministerial ta skoj ti chakʼan ichʼel ta mukʼe?

⁷ Li ta balumile lek chichʼ ilel li buchʼu tstoybe sba skʼoplal stuke. Pe mu jechuk li ta s-organisasion Jeovae. Li ermano ti snaʼ xkʼanvan jech kʼuchaʼal la spas li Jesuse muʼyuk oy ta yoʼonton ti spas ta mantal li yantike o ti tsotsuk  xa skʼoplal x-ilate. Mi oy junuk ermano ti jaʼ noʼox tskʼan ichʼel ta mukʼ kʼalal chichʼ biiltasel ta siervo ministeriale, muʼyuk tspas li abtelaletik ti mu masuk tsots skʼoplale o yan kʼusitik ti skʼan pasel sventa xichʼ chabibel li xchijtak Jeovae. Yuʼun xuʼ van pekʼel xa skʼoplal chaʼi sba mi jech la spase (Juan 10:12). Li Jeovae muʼyuk me chakʼbe bendision li buchʼu tsots skʼoplal chaʼi sbaik o ti jtoybaetike (1 Kor. 10:​24, 33; 13:​4, 5).

8. ¿Kʼusi laj yalbe yajtakboltak li Jesuse?

⁸ Bakʼintike, kʼalal ta yamigotak Jesus laj yakʼik persa stael junuk abtelal ta skoj ti tskʼan tsots skʼoplal x-ilatike. Taje jaʼ jech kʼot ta stojolal Santiago xchiʼuk Juan. Yuʼun la skʼanbeik Jesus ti tsots x-akʼbat yabtelik li ta Ajvalilal yuʼun Diose. Pe li Jesuse muʼyuk lek laj yil, jaʼ yuʼun xi laj yalbe li 12 ta voʼ yajtakboltake: «Li buchʼu tskʼan mukʼ skʼoplal avuʼunike skʼan baʼyel xkʼot ta avajtunelik xchiʼuk li buchʼu baʼyel tskʼan chkʼot avuʼunike skʼan xkʼot ta mosoil avuʼun akotolik» (Mar. 10:​35-37, 43, 44). Li ermanoetik ti oy ta yoʼonton chtunik ta stojolal li yantike ep ta tos kʼu yelan xuʼ xkoltavanik li ta tsobobbaile (1 Tes. 2:8).

¿KʼUSI XUʼ XAPAS SVENTA X-AYAN TA AVOʼONTON XATUN TA STOJOLAL LI YANTIKE?

9. ¿Kʼusi xuʼ xapas sventa x-ayan ta avoʼonton xatun ta stojolal li yantike?

⁹ Jnaʼojkutik ti akʼanoj li Jeovae xchiʼuk ti chakʼan chatun ta stojolal avermanotake. Pe xuʼ van muʼyuk ta avoʼonton chabain li kʼusi tspasik li siervo ministerialetike. ¿Kʼusi xuʼ xapas sventa x-ayan ta avoʼonton xatun mas li ta tsobobbaile? Xuʼ van xanopbe skʼoplal ti chamuyubaj tajek mi latun ta stojolal li ermanoetike. Jech kʼuchaʼal laj yal li Jesuse, «jaʼ mas xmuyubaj li buchʼu chakʼe, jaʼ mu sta li buchʼu chichʼe» (Ech. 20:35). Li Jesuse la stsak ta venta li beiltasel taje, jaʼ yuʼun xmuyubaj noʼox tun ta stojolal li yantike. Xuʼ me jech xkʼot ta atojolal ek.

10. ¿Kʼuxi laj yakʼ ta ilel Jesus ti xmuyubaj noʼox tun ta stojolal li yantike? (Markos 6:​31-34).

¹⁰ Kalbetik skʼoplal kʼu yelan laj yakʼ ta ilel Jesus ti xmuyubaj noʼox tun ta stojolal li yantike (kʼelo Markos 6:​31-34). Jun veltae, kʼalal lubemik xa ox tajek xchiʼuk li yajtakboltake, nom bu bat xkuxik ti bu chʼabal krixchanoetike. Pe epal krixchanoetik jelavik xa ox batel, yuʼun tskʼan to chchikintaik li chanubtasel chakʼ Jesuse. Xuʼ van muʼyuk xa xchanubtasvan ti jechuke, yuʼun chʼabal xa ox yorail yuʼunik sventa xveʼik. Jech xtok, xuʼ van junchib noʼox kʼusi laj yakʼanbe xchan xchiʼuk ti stakan batele. Pe ta skoj ti skʼanoj tajek krixchanoetike, ep tajek kʼusitik laj yakʼanbe xchan. Kʼalal laj yakʼ ventae, bat xa ox tajek kʼakʼal (Mar. 6:35). Ti jech la spase maʼuk ta skoj ti sujbile, yuʼun kʼuxubaj ta yoʼonton li krixchanoetike. Tskʼan chakʼbe yil krixchanoetik ti kʼanvanem tajeke. Ta melel, kʼalal chtun ta stojolal yantike, xmuyubaj noʼox.

11. ¿Kʼuxi la skolta Jesus li krixchanoetike? (Kʼelo xtok li lokʼole).

¹¹ Li Jesuse maʼuk noʼox la xchanubtas li krixchanoetike. Yuʼun laj yakʼanbe xtok li kʼusitik chtun yuʼunike. Jun veltae, la spas jun skʼelobil juʼelal, laj yepajes li veʼlile xchiʼuk laj yalbe li yajchankʼoptak ti akʼo spukik batele (Mar. 6:41). Kʼalal jech la spase, jech laj yakʼanbe xchan kʼusi smakoj ti chijtun ta stojolal li yantike. Jech xtok, laj yakʼanbe yil ti kʼalal ta jkoltatik yantik jech kʼuchaʼal tspas li siervo ministerialetike, toj tsots skʼoplal ek. ¡Xmuyubajik van tajek yajtakboltak ti la skolta sbaik ta spukel li veʼlil laj yepajes Jesuse! Yuʼun «veʼ skotolik xchiʼuk noj lek xchʼutik» (Mar. 6:42). Taje maʼuk noʼox jun velta la spas ti jaʼ baʼyel laj yakʼ ta yoʼonton skoltael li krixchanoetike. Yuʼun ti kʼu sjalil ay ta balumile jaʼ laj yakʼ ta  yoʼonton skoltael li yantike (Mat. 4:23; 8:16). Xmuyubaj-o tajek Jesus ti la xchanubtas li yantike xchiʼuk ti laj yakʼbe li kʼusitik chtun yuʼunike. Xuʼ me jech xavaʼi aba ek. Xuʼ me xamuyubaj tajek mi ta sjunul avoʼonton chatun ta stojolal yantike, jaʼ xkaltik, ti xlik tunan ta siervo ministeriale.

12. ¿Kʼu yuʼun muʼyuk lek mi ta jnoptik ti muʼyuk kʼusi xijtojob spasel sventa xijkoltavan li ta tsobobbaile?

¹² ¿Mi oy anopoj ti mu kʼusi xatojob spasele? Mi jeche, mu xachibaj. Teuk ta ajol ti oy onoʼox atalelaltak ti jtunel ta tsobobbaile. Li kʼusi xuʼ skoltaote jaʼ ti xapas orasione, mi laje kʼelo kʼusi chal 1 Korintios 12:12 kʼalal ta 30. Li Pabloe laj yalbe skʼoplal ti ta jujuntal li yajtuneltak Jeovae oy onoʼox kʼusitik tspasik ti toj tsots skʼoplale xchiʼuk ti toj jtunel yuʼun li tsobobbaile. Jaʼ yuʼun, mu me xachibaj mi oy to kʼusitik skʼan xapas chavil sventa xakʼot ta siervo ministeriale. Jaʼ mas lek ti xavakʼ ta avoʼonton spasel li kʼusi spas avuʼun ta stojolal Jeova xchiʼuk ta stojolal li ermanoetike. Li moletik ta tsobobbaile tstsakik ta venta li kʼusi spas avuʼun kʼalal oy kʼusi chakʼik abain spasele (Rom. 12:​4-8).

13. ¿Kʼusi skʼan teuk ta sjolik ta sventa li kʼusi chichʼik kʼanbel li buchʼutik oy kʼusi tskʼan tsbainik ta tsobobbaile?

¹³ Li kʼusi xuʼ stij avoʼonton sventa xavakʼ persa yoʼ xakʼot ta siervo ministeriale jaʼ ti teuk ta ajol ti skotol li ermanoetike skʼan jechuk stalelalik jech kʼuchaʼal chkʼanbat li siervo ministerialetike. Jaʼ yuʼun, skotol li yajtsʼaklomtak Kristoe skʼan xnopajik ta stojolal Jeova, ti xmuyubajikuk noʼox kʼalal tskoltaik li yantike xchiʼuk ti lekuk ta chanbel li stalelalike. Pe ¿kʼusi skʼan xakʼ ta yoʼonton spasel li ermano ti oy kʼusi tskʼan tsbain li ta tsobobbaile?

LI KʼUSITIK SKʼAN XAPASE

14. ¿Kʼusi smakoj ti «skʼan yijuk snopbenike»? (1 Timoteo 3:​8-10, 12).

¹⁴ Avie, kalbetik batel skʼoplal junantik li kʼusitik skʼan spasik li siervo ministerialetike, ti te ta jtatik ta 1 Timoteo 3:8 kʼalal ta 10 xchiʼuk 12 (kʼelo). «Skʼan yijuk snopbenik». Taje jaʼ van smakoj xtok ti ichʼbilik ta mukʼ xchiʼuk ti lekuk skʼoplalike. Pe maʼuk skʼan xal ti mu xa stakʼ stseʼinik o ti mu xa stakʼ x-ixtol loʼilajik jutebuke (Ekl. 3:​1, 4). Pe skʼan xakʼ ta yoʼontonik spasel li abtelal ch-akʼbatike xchiʼuk ti ojtikinbiluk ti xuʼ jpat koʼontontik ta stojolalike. Mi jech tspasike, lek me ichʼbilik ta mukʼ li ta tsobobbaile.

15. ¿Kʼusi skʼan xal ti mu xloʼlavanik ta skʼopojelik xchiʼuk ti «maʼukuk me ti tskʼan tajek tspasik kanal takʼin ta loʼlavaneje»?

¹⁵ Kʼalal chal «mu me xloʼlavan ta skʼopojelik»  xie, jaʼ skʼan xal ti melel snaʼ xkʼopojik, ti mu snaʼ xloʼlavanik xchiʼuk ti stakʼuk jpat koʼontontik ta stojolalike. Skʼan ti xkʼot ta pasel li kʼusi chalike xchiʼuk ti mu buchʼuuk sloʼlaike (Prov. 3:32). «Maʼukuk me ti tskʼan tajek tspasik kanal takʼin ta loʼlavaneje». Taje jaʼ skʼan xal ti mu xloʼlavan li ta yabtelike xchiʼuk ti mu stsakik li stakʼin tsobobbaile. Jech xtok, mu stakʼ sloʼlaik li ermanoetik ta tsobobbail ta skoj noʼox ti tskʼan tspasik kanale.

16. 1) ¿Kʼusi skʼan xal ti mu epuk xbat ta uchʼel yuʼunik li vinoe? 2) ¿Kʼusi skʼan xal ti sakuk li sjol yoʼontonike?

¹⁶ Kʼalal chal «mu me epuk xbat ta uchʼel yuʼunik li vinoe», te smakojbe skʼoplal ti mu epuk xbat yuʼunik ta uchʼel poxe o ti ojtikinbilik ti lek snaʼ xuchʼik poxe. Jech xtok, kʼalal chal ti skʼan sakuk sjol yoʼontonike, jaʼ ti chakʼ ta xkuxlejalik li kʼusi chal smantaltak Jeovae. Melel onoʼox ti chʼabal buchʼu tukʼe, pe xuʼ me jun koʼontontik mi lek xkil jbatik xchiʼuk li Diose.

17. ¿Kʼuxi xuʼ xichʼ ilel mi xtojob xa lek ta jtosuk abtel li jun ermanoe? (1 Timoteo 3:10; kʼelo xtok li lokʼole).

¹⁷ Li kʼusi yan skʼan spasik sventa xlik tunikuk ta siervo ministeriale jaʼ ti chichʼ «kʼelel baʼyel mi xtojobik lek ta sventa li abtelale». Taje jaʼ skʼan xal ti yakʼojikuk xa onoʼox ta ilel ti xuʼ jpat koʼontontik ta stojolalike. Jech oxal, kʼalal oy kʼusi ch-akʼbat sbainik yuʼun li moletik ta tsobobbaile, skʼan stsakik lek ta venta li kʼusi ch-albatike xchiʼuk li mantaletik yakʼoj li j-organisasiontike. Skʼan xaʼibeik lek smelolal kʼusi smakoj li abtelal tspasike xchiʼuk ti bakʼin skʼan stsuts yuʼunike. Kʼalal chakʼ yipalik ta spasel lek li yabtelike, li ermanoetik ta tsobobbaile ta xakʼik venta xchiʼuk chilik ti yakal chchʼi ta mantale. Moletik ta tsobobbail, kʼelik buchʼu ermanoal xuʼ xachanubtasik (kʼelo 1 Timoteo 3:10). Nopbeik skʼoplal li sjakʼobiltak liʼe: ¿mi oy keremetik o kʼox keremetik ta atsobobbail ti yichʼojik xa voʼe? ¿Mi nopem xaʼi tskʼel Svivlia stukik? ¿Mi nopem xaʼiik ti chakʼ sloʼilik ta tsobajel xchiʼuk ti nopajtik noʼox chlokʼik ta cholmantale? Mi jaʼ jeche, xuʼ me oy kʼusi xavakʼbeik sbain. Jaʼ noʼoxe, tsakik me ta venta jayib sjabilalik. Kʼalal jech chapasike, jaʼ te chavilik mi xtojobik lek ta sventa li abtelale. Vaʼun, mi mas xa ox chʼiike, xuʼ van spas xa ox yuʼunik li kʼusi chal Vivlia sventa xlik tunikuk ta siervo ministeriale.

18. ¿Kʼusi smakojbe skʼoplal «ti muʼyuk tikʼbil smulike»?

¹⁸ Li siervo ministerialetik xtoke skʼan ti muʼyukuk tikʼbil smulike, jaʼ xkaltik, ti muʼyukuk tikʼbil smulik ta skoj ti oy la kʼusi chopol la spasike. Melel onoʼox ti oy jech snuptanojik  junantik ermanoetike. Li Jesus eke jaʼ jech la snuptan xchiʼuk laj onoʼox yal ti xuʼ jech snuptanik ek li yajtsʼaklomtake (Juan 15:20). Manchuk mi oy buchʼu jech chichʼ tikʼbel smul, li ermanoetik ti chakʼik persa ti sakuk stalelalik jech kʼuchaʼal la spas li Jesuse, lek me skʼoplalik li ta tsobobbaile (Mat. 11:19).

19. ¿Kʼusi smakoj ti junuk noʼox yajnile?

¹⁹ Li buchʼutik tskʼan chtunik ta siervo ministerial xchiʼuk ti nupunemike skʼan jun noʼox yajnilik. Skʼan stsakik ta venta li mantal yaloj Jeova ta sventa li nupunele: ti jaʼuk noʼox xikʼ sbaik jun vinik xchiʼuk jun antse (Mat. 19:​3-9). Melel onoʼox, li jun yajtsʼaklom Kristoe mu stakʼ xmulivaj xchiʼuk yan antsetik (Ebr. 13:4). Pe li jun malalil ti yichʼoj voʼe oy to kʼusi mas skʼan spas, skʼan ti tukʼ xakʼ sba ta stojolal li yajnile xchiʼuk ti mu sloʼlabe sjol yan antsetike (Job 31:1).

20. ¿Kʼu yelan skʼan skʼel yutsʼ yalal li ermanoe?

²⁰ Jech xtok, li siervo ministerialetike skʼan ti xkʼel lek yuʼun li xnichʼnabe xchiʼuk li yutsʼ yalale. Li buchʼutik jaʼ joliletik ta utsʼ alalile skʼan xakʼ ta yoʼontonik li kʼusi sbainojike, ti spasik li yichʼel ta mukʼ Jeova ta yutsʼ yalalik jujun xemanae, ti xakʼ yipalik sventa xlokʼilanik ta cholmantal xchiʼuk li yutsʼ yalale xchiʼuk ti skolta li xnichʼnabtak sventa lekuk xil sbaik xchiʼuk li Jeovae (Efes. 6:4). Li ermano ti xtojob skʼelel li yutsʼ yalale jaʼ jech chakʼ ta ilel ti xuʼ yuʼun xchabiel li tsobobbaile (koʼoltaso xchiʼuk 1 Timoteo 3:5).

21. Mi muʼyuk to chatun ta siervo ministeriale, ¿kʼusi xuʼ xapas?

²¹ Mi muʼyuk to chatun ta siervo ministeriale, ta jtijkutik avoʼonton ti xavalbe li Jeovae xchiʼuk ti xachan lek li xchanobil liʼe. Kʼelbo skʼoplal kʼusitik skʼan xapas sventa xatun ta siervo ministerial xchiʼuk akʼo persa spasel. Nopbo skʼoplal kʼu to yepal akʼanoj li Jeovae xchiʼuk li ermanoetike. Oyuk kʼusi xapas sventa masuk to xakʼan li ermanoetike xchiʼuk ti masuk x-ayan ta avoʼonton xatun ta stojolalike (1 Ped. 4:​8, 10). Kʼalal jech chapase, xamuyubaj noʼox ti chatun ta stojolal li avutsʼ avalal ta mantale. ¡Akʼo yakʼbot bendision Jeova ti chavakʼ avipal sventa xlik tunan ta siervo ministeriale! (Filip. 2:13).