¿Kʼusi xuʼ skoltaot sventa jechuk-o xachanunaj jujun xemanae?
¿MI VOKOL chavaʼi ti xachanunaj jujun xemanae? ¿Mi chachʼajub noʼox? Jutuk mu jkotoltikuk jech chkʼot ta jtojolaltik bakʼintik. Ep onoʼox kʼusitik ti vokol chkaʼitik xchʼakbel yoraile, jech kʼuchaʼal ti xij-atinutike. Pe mi lijlokʼ ta atimole, xkuxet xa chkaʼitik. Jaʼ jech li xchanel Vivliae xuʼ xakʼbutik xkuxetel koʼontontik, taje xkoʼolaj ti ta jsakubtas jbatik ta voʼe, jaʼ xkaltik, li «ta skʼop Diose» (Efes. 5:26). Li kʼusitik chichʼ albel skʼoplal liʼe, xuʼ me skoltaot:
Paso junuk aprograma. Li jun yajtsʼaklom Kristoe skʼan jechuk-o xchanunaj, yuʼun jaʼ «li kʼusi mas tsots [skʼoplal]» skʼan spase (Filip. 1:10). ¿Kʼusi xuʼ xapas sventa mu xchʼay ta ajol li aprogramae? Xuʼ xatsʼiba ta jlikuk vun, xapakʼ ta stiʼ arefrigerador o ti bu xata noʼox ta kʼelele. Jech xtok, xuʼ xatikʼ a-alarma ta atelefono sventa xanaʼ ti jutuk xa skʼan xlik chanunajane.
Kʼelo lek kʼu sjalil xuʼ avuʼun xachanunaj. Junantike jaʼ mas lek chaʼiik kʼalal jal chchanunajike, pe li junantike jaʼ mas lek chaʼiik mi julikeltik no’oxe. Li voʼote, ¿kʼu yelan mas lek chavaʼi? Kʼalal chapas li aprogramae, tsako ta venta ti kʼu sjalil xuʼ avuʼune. Mi mu xakʼan xachanunaj chavaʼi kʼalal mi sta xa yoraile, chanunajan akʼo mi 10 minuto noʼox. Xuʼ van jlikel noʼox yilel, pe chatabe sbalil. Yuʼun mi lik chanunajane, yikʼaluk van stij avoʼonton sventa xachan to batel mas (Filip. 2:13).
Kak nopo li kʼusi chakʼan chachane. Mi jaʼ to chanop ta yorail li kʼusi chakʼan chachane, muʼyuk me lek chatunes li jujun kʼakʼal chjelav avuʼune (Efes. 5:16). ¿Kʼu yuʼun mu xapasbe slistail li kʼusitik chakʼan chachane? Kʼalal mi oy kʼusi mu xanabe smelolale, tsʼibao. Jech xtok, kʼalal xyaket chachanunaje, yikʼaluk van oy kʼusi chakʼan chanabe mas skʼoplal, jaʼ yuʼun tsʼibao xtok.
Jelo mi persa chavile. Li kʼusi skʼan xapase jaʼ ti jechuk-o xachanunaj jujun xemanae. Jaʼ yuʼun, mi persa chavile, jelbo skʼakʼalil, yorail, kʼu sjalil xchiʼuk ti kʼusi chachane.
Mi jech-o nopem xavaʼi chachanunaje, chatabe me ep sbalil: mas to chanopaj ta stojolal Jeova, lek kʼusitik chkʼot ta nopel avuʼun xchiʼuk xkuxet noʼox avoʼonton (Jos. 1:8).
