1. ¿Kʼu yuʼun ep buchʼutik oy kʼusi tsjakʼbe sbaik ta sventa li relijionetike?

 TA SMILAL xa noʼox relijion chalik ti jaʼik yajtsʼaklom Kristoe xchiʼuk ti jech la chichʼik ta mukʼ Dios kʼuchaʼal lek chile. Jaʼ van yuʼun ep buchʼutik xi tsjakʼbe sbaike: «¿Mi jun noʼox melel relijion oy o mi lek chil Dios skotol li relijionetike?». Pe li voʼotike, ¿mi jchʼunojtik lek ti jaʼ chkakʼtik ta chanel kʼusi melel li stestigoutik Jeovae xchiʼuk ti jaʼ noʼox lek chil Dios ti kʼu yelan chkichʼtik ta mukʼe? ¿Mi xuʼ jchʼuntik ta melel ti jaʼ jeche? Jkʼelbetik sprevailtak.

2. ¿Kʼu yuʼun jpʼel ta yoʼonton ti jaʼ melel kʼusi xchʼunoj li jtakbol Pabloe? (1 Tesalonisenses 1:5).

² Li jtakbol Pabloe jpʼel ta yoʼonton ti jaʼ melel li kʼusi xchʼunoje (kʼelo 1 Tesalonisenses 1:5). Ti jech tsnope maʼuk noʼox ta skoj ti xmuyubaj-oe, yuʼun jaʼ ta skoj ti xchanojbe lek skʼoplal li Skʼop Diose. Xchʼunoj ti jaʼ «laj yakʼ ta naʼel Dios skotol li Tsʼibetike» (2 Tim. 3:16). Kʼalal la xchan li Tsʼibetike, laj yilbe lek sprevailtak ti chakʼ ta ilel ti jaʼ Mesias li Jesuse. Pe jaʼuk li jnitvanejetik ta relijion yuʼun judaetike muʼyuk la stsakik ta venta taje. Chalik ti jaʼik yajkʼopojel Diose, pe mu jechuk chakʼik ta ilel ta xkuxlejalik (Tito 1:16). Pe li Pabloe mu tʼujbiluk la xchʼun li kʼusi chal Skʼop Diose. Jpʼel ta yoʼonton ti jaʼ chakʼ ta chanel xchiʼuk ti chakʼ ta xkuxlejal «skotol li tojobtasel yuʼun Diose» (Ech. 20:27).

3. Sventa jpʼeluk ta koʼontontik ti melel li kʼusi jchʼunojtike, ¿mi persa ti jnabetik stakʼobil skotol li kʼusi ta jakʼbe jbatike? (Kʼelo xtok li rekuadro « Mu xlaj ta albel skʼoplal li yabteltak Jeova xchiʼuk li kʼusitik tsnope»).

³ Junantike tsnopik ti skʼan xtakʼ yuʼun skotol li kʼusi ta jakʼbe jbatik li melel relijione akʼo mi muʼyuk jamal chalbe  skʼoplal Vivlia li junantik kʼusi ta jakʼbe jbatike. ¿Mi lek ti jech ta jnoptike? Jkʼeltik kʼusi la spas li Pabloe. Xi onoʼox laj yalbe li ermanoetike: «Kʼelik me skotol li kʼusi chapasike». Te laj yal xtok ti oy onoʼox kʼusitik ti mu xaʼibe smelolal li stuke (1 Tes. 5:21). Laj yal ti «muʼyuk lek tsʼakal li yojtikinobil kuʼuntike» xchiʼuk ti «mu xkiltik lek jech kʼuchaʼal ti mu xkiltik lek li kʼusi ta jkʼeltik ta nen ti pasbil ta takʼine» (1 Kor. 13:9, 12). Maʼuk ti snaʼoj xa skotol li Pabloe xchiʼuk mu jnaʼtik skotol ek. Pe xaʼibe xa ox smelolal li kʼusitik mas tsotsik skʼoplal ta sventa Jeovae. Ta skoj li kʼusitik snaʼoje, jpʼel ta yoʼonton ti jaʼ melel li kʼusi xchʼunoje.

4. ¿Kʼuxi xuʼ jpʼeluk ta koʼontontik ti jaʼ melel li kʼusi jchʼunojtike, xchiʼuk kʼusi ta jkʼeltik li ta xchanobil liʼe?

⁴ ¿Kʼuxi xuʼ masuk to jpʼel ta koʼontontik ti jaʼ melel li kʼusi jchʼunojtike? Jtose jaʼ ti jkʼeltik mi jaʼ jech chichʼik ta mukʼ Dios li stestigotak Jeova avi jech kʼuchaʼal chanubtasvan komel li Jesuse. Li ta xchanobil liʼe, ta jkʼeltik ti melel yajtsʼaklomtak Kristoe 1) muʼyuk chichʼik ta mukʼ li jecheʼ diosetike, 2) chichʼbeik ta mukʼ li sbi Jeovae, 3) skʼanojik li kʼusi melele xchiʼuk 4) skʼanoj sbaik tajek ta jujuntal.

5. ¿Kʼu yelan laj yichʼ ta mukʼ Dios li Jesuse, xchiʼuk kʼuxi xuʼ jechuk jpastik ek?

⁵ Ta skoj ti skʼanoj tajek Jeova li Jesuse, jaʼ noʼox stuk Jeova laj yichʼ ta mukʼ kʼalal te oy ta vinajele xchiʼuk kʼalal tal ta balumile (Luk. 4:8). Laj yakʼbe xchan yajchankʼoptak ti jechuk spasik eke. Li Jesus xchiʼuk yajchankʼoptake mi junuk velta la stunesik lokʼoletik sventa xichʼik ta mukʼ li Diose. Ta skoj ti jaʼ jun espiritu li Diose, mi jsetʼuk tstabeik smukʼulal li lokʼoletik tspas krixchanoetike (Is. 46:5). ¿Mi lek  van ti jpasbetik slokʼol li santoetike xchiʼuk ti jkʼopontike? Li ta Lajuneb Mantale, xi laj yal Jeova li ta xchibal mantale: «Mu me oyuk kʼusi xapasbe slokʼol mi jaʼuk kʼusi ti xkoʼolaj kʼuchaʼal li kʼusitik oy ta vinajele, li kʼusitik oy ta balumile o li kʼusitik oy ta voʼe. Mu me xanijan aba ta stojolalik» (Eks. 20:4, 5). Li buchʼutik tskʼanik ti lekuk x-ilatik yuʼun Diose chchʼunik li mantal taje.

6. ¿Buchʼu chchanbeik li stestigotak Jeova avie?

⁶ Li j-al-loʼiletike chalik ti jaʼ noʼox laj yichʼik ta mukʼ Dios li yajtsʼaklomtak Kristo ta baʼyel sigloe. Jech kʼuchaʼal liʼe, jlik livro ti chalbe skʼoplal li relijionetik ti xchʼunojik Kristoe chal ti chopol van tajek laj yilik li baʼyel yajtsʼaklomtak Kristo ti lajuk yichʼ akʼel lokʼoletik ti bu chichʼik ta mukʼ Diose (History of the Christian Church). Li avie, li stestigoutik Jeovae jaʼ jech ta jpastik kʼuchaʼal li yajtsʼaklomtak Kristo ta baʼyel sigloe. Muʼyuk ta jkʼopontik ta orasion li santoetike, li anjeletike mi jaʼuk li Jesuse. Muʼyuk ta jpastik saludar vandera mi jaʼuk kʼusi yan ta jpastik ti jaʼ sventa yichʼobil ta mukʼ jlumaltike. Mu ventauk ti kʼusi xkʼot ta pasele, ta slokʼel koʼontontik ta jchʼuntik li kʼusi laj yal Jesus liʼe: «Jaʼ noʼox skʼan xavichʼ ta mukʼ li Jeova Dios avuʼune» (Mat. 4:10).

7. ¿Kʼusi jelelik-o li stestigotak Jeova xchiʼuk li yan relijionetike?

⁷ Li avi kʼakʼale, epal krixchanoetike ta sjunul yoʼonton tstsʼakliik li jnitvanejetik ta relijion ti lek ojtikinbilike xchiʼuk jaʼtik xa kʼuchaʼal sdios chilik. Ep tajek chkʼotik li ta xchʼulnaike, tsmanbeik li slivroike xchiʼuk chakʼik epal takʼin sventa skoltaik li jnitvanejetik o li s-organisasionike. Junantike chchʼunik skotol li kʼusi ch-albatike. ¡Jaʼ van jutuk xmuyubajik-o ti jaʼuk xilik li Jesuse! Pe jaʼuk li melel yajtunelutik Jeovae muʼyuk ta jtsʼaklitik mi junuk krixchano. Akʼo mi chkichʼtik ta mukʼ li buchʼutik tsbeiltasutike, jaʼ ta jtsaktik ta venta li kʼusi laj yal Jesus liʼe: «Li voʼoxuke avermano aba akotolik» (Mat. 23:8-10). Maʼuk ta jpas ta jdiostik li krixchanoetike akʼo mi jaʼik jnitvanejetik ta relijion o ajvaliletik. Jech xtok, muʼyuk ta jkolta jbatik ta spasel li kʼusi oy ta yoʼontonike, yuʼun muʼyuk ta jkap jbatik ta spasel li kʼusitik sventa balumile. Jech oxal, jelelutik tajek kʼuchaʼal li yan relijionetik ti chalik ti jaʼik yajtsʼaklom Kristoe (Juan 18:36).

8. ¿Kʼuxi jnaʼojtik ti tskʼan Jeova ti jtoybetik skʼoplal li sbie xchiʼuk ti xkakʼtik ta ojtikinele?

⁸ Jun veltae, xi laj yal ta s-orasion li Jesuse: «Tot, akʼo yichʼ toybel skʼoplal li abie». Li Jeovae tsots yechʼomal ye laj yal tal ta vinajel ti tstoybe skʼoplal li sbie (Juan 12:28). Ti kʼu sjalil la xchol mantale, li Jesuse laj yakʼ ta ichʼel ta mukʼ li sbi Stote (Juan 17:26). Jaʼ yuʼun, sta-o ti ta sjunul yoʼonton tstunesbeik sbi Dios li melel yajtsʼaklomtak Kristoe xchiʼuk ti xakʼik ta ojtikinele.

9. Li yajtsʼaklomtak Kristo ta baʼyel sigloe, ¿kʼuxi laj yakʼik ta ilel ti yichʼojbeik ta mukʼ li sbi Diose?

⁹ Kʼalal jaʼtik toʼox lik li stsobobbail yajtsʼaklom Kristo li ta baʼyel sigloe, «laj yakʼ sat Dios ta sba velta ta stojolal jyanlumetik sventa te tslokʼes talel jun jteklum ta sventa li sbie» (Ech. 15:14). Li yajtsʼaklomtak Kristo taje xmuyubajik tajek ti tstunesbeik li sbi Diose xchiʼuk ti xakʼik ta ojtikinele. La stunesbeik li sbi Jeova li ta cholmantale xchiʼuk kʼalal la stsʼibaik li Vivliae. b Jaʼ jech laj yakʼik ta ilel ti jaʼik jun jteklum ta sventa li sbi Diose (Ech. 2:14, 21).

10. ¿Kʼusi sprevailtak chakʼ kiltik ti jaʼik jun jteklum ta sventa sbi Dios li stestigotak Jeovae?

 ¹⁰ ¿Mi jaʼ jun jteklum ta sventa sbi Jeova li stestigotak Jeovae? Jkʼelbetik sprevailtak. Li avi kʼakʼale, ep jnitvanejetik ta relijione yakʼojik persa sventa mu xichʼ ojtikinbel li sbi Diose. Kʼalal sjelubtasojik li Vivlia ta yan kʼopetike, stupʼojbeik li sbi Diose xchiʼuk junantike yalojik ti mu stakʼ xalik kʼalal oy kʼusi tspas ta srelijionike. c Pe jamal xvinaj ti jaʼ noʼox li stestigotak Jeova chichʼbeik ta mukʼ li sbi Diose. Mi junuk relijion jech chakʼ ta ojtikinbel sbi Dios kʼuchaʼal ta jpastike. Chkakʼtik tajek persa sventa xvinaj ti jaʼutik stestigotak Jeovae (Is. 43:10-12). Li Vivlia Skʼop Dios sventa Achʼ Balumile te chalbe sbi Jeova ti butik stupʼojik li yan jelubtasej kʼopetike xchiʼuk jpukojtik mas ta 240 miyon ta lik. Jech xtok, ta jpastik vunetik ta mas ta jmil jeltos kʼopetik ti bu chalbe skʼoplal li sbi Jeovae.

11. ¿Kʼuxi laj yakʼik ta ilel ti skʼanojik kʼusi melel li yajtsʼaklomtak Kristo ta baʼyel sigloe?

¹¹ Li Jesuse skʼanoj tajek li kʼusi melele, jaʼ xkaltik, li kʼusi melel ta sventa Dios xchiʼuk li kʼusi oy ta yoʼonton tspase. Laj yakʼ ta xkuxlejal xchiʼuk laj yakʼbe yojtikin li yantike (Juan 18:37). Li melel yajtsʼaklomtak Jesus ta voʼnee la skʼanik tajek ek li kʼusi melele (Juan 4:23, 24). Li jtakbol Pedroe laj yal ti jaʼ sbelel kʼusi melel  li relijion ti xchʼunoj Kristoe (2 Ped. 2:2). Li yajtsʼaklomtak Kristo ta baʼyel sigloe skʼanojik tajek li kʼusi melele. Jaʼ yuʼun, la spʼajik li kʼusitik chchanubtasvan relijionetik, li kʼusitik nopem xaʼiik spasel krixchanoetik xchiʼuk li kʼusi tsnop yantik ti tskontrain li kʼusi melele (Kol. 2:8). Jaʼ noʼox jech ek, li melel yajtsʼaklomtak Kristo avi kʼakʼale chakʼik persa sventa jechuk-o spasik li kʼusi melele (3 Juan 3, 4). ¿Kʼuxi tspasik? Tskʼelik ti lokʼemuk ta Vivlia skotol li kʼusi xchʼunojike xchiʼuk chakʼ ta xkuxlejalik.

12. Li ermanoetik ti jaʼ tsbeiltasik steklumal Diose, ¿kʼusi tspasik kʼalal chakʼik venta ti oy kʼusi skʼan jeltike, xchiʼuk kʼu yuʼun jech tspasik?

¹² Li stestigotak Jeovae muʼyuk chalik ti xaʼibeik smelolal skotol li kʼusi chal Vivliae. Bateltike, mu jechuk yaʼiojbeik smelolal junuk chanubtasel ta Vivlia o ti kʼu yelan chchapanik li tsobobbaile. Pe taje skʼan ti mu labaluk sba xkaʼitike, yuʼun li Tsʼibetike jamal chal ti ta kʼunkʼun chaʼibeik smelolal kʼusi melel li steklumal Diose (Kol. 1:9, 10). Li Jeovae ta kʼunkʼun chakʼ batel ta ojtikinel li kʼusi melele. Jaʼ yuʼun, skʼan jmalatik ti sakub batel li kʼusi melel jaʼ to mi lek xa ox sakjamane (Prov. 4:18). Kʼalal chakʼik venta li ermanoetik ti tsbeiltasik li steklumal Jeova ti skʼan xichʼ jelel li kʼusi kaʼiojbetik smelolal o li kʼusi ta jpastike, tsjelik ta anil. Epal relijionetik ti xchʼunojik Kristoe tsjelik li kʼusitik chakʼik ta chanel sventa xmuyubajikuk li buchʼutik te chkʼot yaʼiik mantale o sventa lekuk x-ilatik yuʼun li yan krixchanoetike. Pe kʼalal oy kʼusi ta jeltik li stestigoutik Jeovae, jaʼ sventa xijnopaj mas ta stojolal Dios xchiʼuk ti jaʼuk jech xkichʼtik ta mukʼ jech kʼuchaʼal laj yakʼ ta chanel Jesuse (Sant. 4:4). Kʼalal oy kʼusi ta jeltike, maʼuk ta skoj ti ta jtsʼaklitik li kʼusi tspas yantike, yuʼun jaʼ ta skoj ti chkaʼibetik lek smelolal li kʼusi chal Vivliae. Jkʼanojtik li kʼusi melele (1 Tes. 2:3, 4).

13. ¿Kʼusi talelalil chichʼik-o ojtikinel li melel yajtsʼaklomtak Kristoe, xchiʼuk kʼuxi yakʼojik ta ilel li stestigotak Jeovae?

¹³ Li yajtsʼaklomtak Kristo ta baʼyel sigloe ojtikinbilik ti toj lek stalelalike. Pe li bu mas ojtikinbilik-oe jaʼ ti lek snaʼ xkʼanvanike. Xi laj yal li Jesuse: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:34, 35). Li avi eke, skʼanoj sbaik ta jujuntal li stestigotak Jeovae xchiʼuk jmoj tsobolik xchiʼuk li yermanotakik ta spʼejel balumile. Mu xijkoʼolaj kʼuchaʼal li yan relijionetike, yuʼun jaʼutik jun utsʼ alalil ti jmoj tsobolutik, mu ventauk ti kʼu yelan jkuxlejaltike, jtsʼunbaltike o jlumaltike. Xvinaj ti jaʼ jech jkʼanoj jbatik li ta tsobajeletik xchiʼuk ta asambleaetike. Taje mas ta jchʼuntik-o ti jtuktik noʼox ti jaʼ jech chkichʼtik ta mukʼ Jeova jech kʼuchaʼal tskʼane.

14. Jech kʼuchaʼal chal Kolosenses 3:12 kʼalal ta 14, ¿kʼuxi chkakʼtik ta ilel ti jkʼanoj jbatik tajek ta jujuntale?

¹⁴ Li Vivliae chal ti jkʼan jbatik tajek ta jujuntale (1 Ped. 4:8). ¿Kʼuxi chkakʼtik ta ilel? Jtose jaʼ kʼalal chkakʼ jbatik ta perton xchiʼuk ti jtsʼikbe jba jpaltailtake. Jech xtok, chkakʼ ta ilel slekil koʼontontik xchiʼuk lek ta jchʼamtik skotol li ermanoetike. Jaʼ jech ta jpastik xtok ta stojolal li buchʼutik oy van kʼusi chopol spasojbutike (kʼelo Kolosenses 3:12-14). Ta melel, ti jech jkʼanoj jbatike jaʼ svinajeb ti jaʼutik melel yajtsʼaklom Kristoe.

15. ¿Kʼusitik yan jchanojbetik li tsobobbail ta baʼyel sigloe?

¹⁵ Oy to kʼusitik yan jchanojbetik li stsobobbail  yajtsʼaklom Kristo ta baʼyel sigloe. Jech kʼuchaʼal liʼe, ti kʼu yelan chapal li j-organisasiontike jaʼ jech kʼuchaʼal la spasik li jtakboletik ta baʼyel sigloe. Taje te smakojbe skʼoplal li jkʼelvanejetik ta sirkuito, li moletik ta tsobobbail xchiʼuk li siervo ministerialetike (Filip. 1:1; Tito 1:5). Li kʼusi ta jnoptik ta sventa li chiʼinejbail ta vayel, li nupunel, ti chʼul chkiltik li chʼichʼe xchiʼuk ti oy ta koʼontontik xchabiel tsobobbail ta stojolal li buchʼutik tsots tspas smulik xchiʼuk ti mu sutes yoʼontonike jaʼ jech ta jpastik kʼuchaʼal li ermanoetik ta baʼyel sigloe (Ech. 15:28, 29; 1 Kor. 5:11-13; 6:9, 10; Ebr. 13:4).

16. ¿Kʼusi chchanubtasutik Efesios 4:4 kʼalal ta 6?

¹⁶ Li Jesuse laj yal ti ep buchʼutik chalik ti jaʼik yajtsʼaklomtake, pe ti mu skotolikuk jaʼik ta melele (Mat. 7:21-23). Jech xtok, li Vivliae yaloj xa onoʼox ti ep buchʼutik «yichʼojik ta mukʼ Dios yilel» li ta slajebal kʼakʼale (2 Tim. 3:1, 5). Pe li Vivliae jamal chal ti «jun noʼox xchʼunel oʼontonal» ti lek chil li Diose (kʼelo Efesios 4:4-6).

17. ¿Buchʼutik chchanik li kʼusi la spas Jesus xchiʼuk ti jaʼik li melel relijion avie?

¹⁷ Vaʼun chaʼa, ¿buchʼutik jaʼik li melel relijion avie? Ta skoj ti laj xa jkʼelbetik sprevailtak xchiʼuk la jkʼeltik li kʼusi la spas Jesus ti jaʼ jech la spasik li yajtsʼaklomtak ta baʼyel sigloe, jamal xvinaj ti jaʼik melel relijion li stestigotak Jeovae. Jaʼ jun mukʼta matanal ti liʼ oyutik ta steklumal Dios xchiʼuk ti jnaʼtik li kʼusi melel ta sventa Jeova xchiʼuk li kʼusitik oy ta yoʼonton tspase. Jech oxal, jpʼeluk ta koʼontontik ti jaʼ melel li kʼusi jchʼunojtike.