1. ¿Kʼu yuʼun xijmuyubajutik ti jaʼutik stestigotak Jeovae?

 ¡XIJMUYUBAJ tajek ti jaʼutik stestigotak Jeovae! Kichʼojbetik li sbi Diose xchiʼuk chkakʼtik ta ilel ti jaʼutik stestigotak kʼalal ta jcholbetik mantal li krixchanoetike xchiʼuk ti ta jchanubtastik yoʼ xojtikinike. Xijmuyubaj tajek kʼalal ta jkoltatik sventa xkʼotik ta yajtunel Jeova «li buchʼutik oy lek ta yoʼontonik stael li kuxlejal sbatel osile» (Ech. 13:48). Jech chkaʼi jbatik kʼuchaʼal li Jesus ti «xkuxet tajek yoʼonton ta sventa chʼul espiritu» kʼalal sutik talel ta cholmantal li yajchankʼoptake xchiʼuk ti laj yalbeik li kʼusitik lek kʼot ta pasel yuʼunike (Luk. 10:1, 17, 21).

2. ¿Kʼuxi chkakʼtik ta ilel ti toj tsots skʼoplal chkiltik li cholmantale?

² Toj tsots skʼoplal chkiltik li cholmantale. Li jtakbol Pabloe xi la stojobtas li Timoteoe: «Jechuk-o me xakʼel aba atuk xchiʼuk kʼelo me lek li kʼusi chavakʼ ta chanele». Xi to laj yalbee: «Mi jech chapase, ta me xakol xchiʼuk ta me xkolik ek li buchʼutik chchikintabote» (1 Tim. 4:16). Taje chakʼ kiltik ti xuʼ xkolik-o yantik kʼalal ta jcholtik mantale. Jech-o ta jkʼel jtalelaltik, yuʼun kakʼoj jbatik ta ventainel yuʼun li Ajvalilal yuʼun Diose. Ta jkʼantik ti xichʼuk ichʼel-o ta mukʼ Jeova ti kʼu yelan ta jpas jtalelaltike xchiʼuk ti xkakʼtik ta ilel ti jchʼunojtik li lekil aʼyejetik ta xkaltik batele (Filip. 1:27). Jech xtok, ta jkʼeltik lek li kʼusi chkakʼtik ta chanel kʼalal ta jchapan jbatik lek ta sventa li cholmantale xchiʼuk kʼalal ta jkʼanbetik Jeova ti akʼo skoltautik ta yalbel skʼoplale.

3. ¿Mi lek van chaʼiik mantal skotol li krixchanoetike? Albo junuk skʼelobil.

³ Akʼo mi chkakʼ tajek kipaltik li ta cholmantale, xuʼ van mu masuk xchikintaik mantal li ta jterritoriotike o mi jsetʼuk skʼanik. Jkʼeltik kʼusi la spas li ermano Georg Lindal ti stuk la xchol mantal ta Islandia ta sjabilal 1929 kʼalal ta 1947. Ta smilal xa noʼox vunetik la spuk, pe muʼyuk buchʼu kʼot ta stestigo Jeova. Xi laj yale: «Junantike skontrainojik li mantale, pe jaʼ mas ep ti mu skʼan xchikintaike». Ta mas tsʼakale, kʼot misioneroetik ti ayemik ta Galaad sventa xkoltavanik li  ta cholmantale. Akʼo mi jech, muʼyuk la xchikintaik. Pe kʼalal echʼ baluneb jabile, jlom krixchanoetik li ta lum taje laj yakʼ xkuxlejalik ta stojolal Jeova xchiʼuk laj yichʼik voʼ. b

4. ¿Kʼu van yelan chkaʼi jbatik kʼalal mu skʼan xchikintaik mantal li krixchanoetike?

⁴ Kʼalal mu skʼan xchikintaik mantal li krixchanoetike, ta jvul-o koʼontontik. Xuʼ van jech chkaʼi jbatik kʼuchaʼal li Pablo ti laj yal ti chat tajek yoʼonton xchiʼuk ti mu xpaj li xkʼuxul yoʼonton ta skoj ti jutuk mu skotoluk judaetik mu skʼan xchʼamik ti jaʼ Mesias li Jesuse (Rom. 9:1-3). Xuʼ van oy buchʼu skʼan xkiktabetik yakʼbel estudio ta skoj ti mu xchʼi ta mantale akʼo mi chkakʼtik tajek persa o ta jpastik orasion. O xuʼ van muʼyuk buchʼu jkoltaojtik-o sventa xichʼ voʼ. ¿Mi skʼan van chopol xkaʼi jbatik xchiʼuk ti ta jnoptik ti muʼyuk yakal chakʼbe bendision Jeova li kabteltike? Li ta xchanobil liʼe, ta jtakʼtik batel li chib sjakʼobil liʼe: ¿kʼuxi jnaʼojtik ti lek yakal ta jpas li kabteltike? xchiʼuk ¿kʼusi skʼan teuk ta joltik kʼalal ta jcholtik mantale?

5. ¿Kʼu yuʼun mu skotoluk velta jech chkʼot ta pasel kʼuchaʼal ta jkʼantik li kʼusitik ta jpastik ta stojolal Jeovae?

⁵ Li Vivliae xi chal ta sventa li buchʼu tspas li kʼusi oy ta yoʼonton Diose: «Lek chkʼot ta pasel yuʼun skotol li kʼusi tspase» (Sal. 1:3). Pe taje maʼuk skʼan xal ti naka lek chbat ta pasel li kʼusi ta jpastik ta stojolal Jeova jech kʼuchaʼal ta jkʼantike. Ta skoj ti jpasmulilutike, ta onoʼox xkil jvokoltik (Job 14:1). Jech xtok, xuʼ van mu xakʼik jcholtik mantal kʼuk sjaliluk li kajkontratike (1 Kor. 16:9; 1 Tes. 2:18). Vaʼun chaʼa, ¿kʼusi tstsak ta venta Jeova sventa xal ti lek li kabteltike? Jkʼeltik junantik beiltasel ta Vivlia ti tskoltautik ta stakʼel taje.

6. ¿Kʼusi tstsak ta venta Jeova sventa xal ti lek li kabteltike?

⁶ Li Jeovae jaʼ tskʼel ti chkakʼtik persae xchiʼuk ti chkuch kuʼuntike. Li Jeovae lek chil li kabteltik kʼalal ta sjunul koʼontontik ta jpastik ta skoj ti jkʼanojtike, mu ventauk ti kʼu yelan chchʼamik li krixchanoetike. Xi laj yal li Pabloe: «Tukʼ li Diose, jaʼ yuʼun mu xchʼay ta sjol li avabtelike xchiʼuk li kʼanelal laj avakʼik ta ilel ta sventa li sbie xchiʼuk ti chatunik ta stojolal li buchʼutik chʼulike xchiʼuk ti jech-o chatunik batel ta stojolalike» (Ebr. 6:10). Li Jeovae mu xchʼay ta sjol ti chkakʼtik persa spasbel yabtel ta skoj ti jkʼanojtike akʼo mi muʼyuk to lek kʼusi kʼotem ta pasel kuʼuntik. Jech oxal, skʼan teuk ta joltik ti xi laj yalbe ermanoetik ta Korinto li Pabloe: «Mu jecheʼuk li avabtelik ta stojolal Kajvaltike» (1 Kor. 15:58). Jaʼ jech ta melel, akʼo mi mu jechuk chkʼot ta pasel ti kʼu yelan ta jkʼantike.

7. ¿Kʼusi chchanubtasutik li kʼusi laj yal jtakbol Pablo ta sventa li yabtele?

⁷ Toj lek la spas yabtel Pablo kʼalal tun  ta misioneroale xchiʼuk ep butik la slikes tsobobbailetik. Pe junantik ermanoetike la xchopol kʼoptaik ta skoj ti mas tsots skʼoplal chaʼi sbaike xchiʼuk laj yalik ti maʼuk la jun lekil jchanubtasvaneje. Akʼo mi jech laj yalbeik, muʼyuk laj yal jayvoʼ krixchanoetik la skoltaan sventa xichʼik voʼ, jaʼ noʼox xi laj yale: «Mas abtejemun» (2 Kor. 11:23). Jchanbetik li kʼusi la spas Pabloe xchiʼuk teuk ta joltik ti jaʼ mas tsots skʼoplal chil Jeova mi chkakʼtik persae xchiʼuk mi chkuch kuʼuntike.

8. ¿Kʼusi skʼan teuk ta joltik ta sventa li cholmantal ta jpastike?

⁸ Xmuyubaj-o Jeova kʼalal ta jcholtik mantale. Jun veltae, li Jesuse la stak batel 70 ta voʼ yajtsʼaklomtak sventa xalik batel li lekil aʼyejetike. Li Vivliae chal ti «xkuxet noʼox yoʼonton sutik [tale]». ¿Kʼu yuʼun ti xmuyubajike? Xi laj yalike: «Kʼalal ta pukujetik la xchʼunik jmantalkutik kʼalal la jtuneskutik abie». Pe xi albatik yuʼun li Jesuse: «Mu me jaʼuk xkuxetuk-o avoʼontonik taje, ti la xchʼunik amantalik li pukujetike, jaʼuk kuxetuk-o avoʼontonik ti teuk tsʼibabil ta vinajel li abiike» (Luk. 10:17-20). Li Jesuse snaʼoj lek ti mu skotoluk velta oy kʼusitik labal sba chkʼot ta pasel yuʼunik li ta cholmantale. Kʼalal la xcholik mantale, mu onoʼox jnaʼtik jayvoʼ kʼotik ta jchʼunolajel ta tsʼakal. Li yajtsʼaklomtak Jesuse maʼuk noʼox skʼan xmuyubajik-o ta skoj ti chchikintaik mantal li krixchanoetike, moʼoj, yuʼun jaʼ skʼan mas xmuyubajik-o ti lek chil Jeova ti chakʼik persae.

9. Jech kʼuchaʼal chal Galatas 6:7 kʼalal ta 9, ¿kʼusi sbalil ta jtatik mi muʼyuk chkikta jbatik ta cholmantale?

⁹ Mi muʼyuk chkikta-o jbatik ta cholmantale, ta jtatik kuxlejal sbatel osil. Kʼalal ta sjunul koʼontontik ta jcholtik mantal xchiʼuk ta jchanubtastik li krixchanoetike, jaʼ skʼelobil ti ta jtsʼuntik xtok ta sventa li chʼul espiritue. ¿Kʼu yuʼun ti jech chkaltike? Yuʼun jaʼ jech chkakʼtik ta ilel ti ta jkʼantik akʼo sbeiltasutik li chʼul espiritue. «Mi muʼyuk lijlubtsaje», li Jeovae yaloj chakʼbutik kuxlejal sbatel osil akʼo mi muʼyuk buchʼu ta jkoltatik sventa xichʼ voʼ (kʼelo Galatas 6:7-9).

10. ¿Kʼusi ta skoj ti kʼu yelan chchʼamik mantal li krixchanoetike?

¹⁰ Ti kʼu yelan chchʼam mantal li krixchanoetike jaʼ ta skoj li kʼusi oy ta yoʼontonike. Jaʼ jech laj yalbe smelolal Jesus kʼalal laj yalbe skʼoplal li lokʼolkʼop ta sventa li jtsʼunolajele. Li ta loʼil liʼe, chalbe skʼoplal jun vinik ti la svij ta jeltos balumil li sbekʼ tsʼunobile. Pe jaʼ noʼox laj yakʼ sat ti bu kʼot ta lekil balumile (Luk. 8:5-8). Li Jesuse laj yal ti jeltos balumile jaʼ skʼan xal li yoʼonton krixchanoetik ti jelajtik kʼu yelan chchʼamik «li skʼop Diose» (Luk. 8:11-15). Li jtsʼunolajele mu kʼusi stakʼ spas sventa satin li kʼusi tstsʼune. Li voʼotik eke mu kʼusi stakʼ jpastik sventa xchʼi ta yoʼonton mantal li buchʼutik ta jcholbetik mantale. Li kʼusi oy ta jbatike jaʼ ti jtsʼuntik-o batel li sbekʼ mantale. Jech kʼuchaʼal laj yal li jtakbol Pabloe, «ta jujuntal chichʼ smotonik ta sventa li yabtelike», maʼuk ta sventa li kʼusi chkʼot ta pasel ta skoj li yabtelike (1 Kor. 3:8).

11. ¿Kʼu yuʼun xuʼ xkaltik ti lek tajek la xcholbe skʼoplal tukʼilal li Noee? (Kʼelo li lokʼol ta pajina 1).

¹¹ Ti kʼu sjalil likem talel li kuxlejale, ep yajtuneltak Jeova xcholojbeik mantal li krixchanoetik ti mu skʼan xchikintaike. Jech kʼuchaʼal liʼe, li Noee ta epal jabil van «la xcholbe skʼoplal li tukʼilale» (2 Ped. 2:5). Ta melel, tskʼan ox van ti xchikintaik  mantal li krixchanoetike, pe mu jechuk akʼbat ta aʼiel yuʼun Jeova ti jech chkʼot ta pasele. Moʼoj, yuʼun kʼalaluk lik spas li arkae, xi onoʼox albate: «Skʼan xa-och ta arka xchiʼuk anichʼnab, avajnil xchiʼuk li yajnil akeremtake» (Jen. 6:18). Jech xtok, kʼalal albat ti kʼu smukʼul tspas li arkae, te van laj yakʼ venta ti jutuk buchʼu chchikintabate (Jen. 6:15). Jech onoʼox kʼot ta pasel, yuʼun mi junuk onoʼox buchʼu la xchikinta li kʼusi laj yale (Jen. 7:7). ¿Mi la snop Jeova ti muʼyuk lek la xchol mantal li Noee? Moʼoj, yuʼun muyubaj tajek ta stojolal ta skoj ti jaʼ jech tajek la spas kʼuchaʼal laj yalbee (Jen. 6:22).

12. ¿Kʼusi la spas Jeremias sventa skʼupin li cholmantal akʼo mi mu xchikintaik mantal xchiʼuk laj yichʼ kontrainele?

¹² Li j-alkʼop Jeremias eke ta epal jabil la xchol mantal akʼo mi muʼyuk laj yichʼ chikintabel o laj yichʼ kontrainel. Chibaj-o tajek ta skoj ti laj yichʼ chopol kʼoptael xchiʼuk labanele, yuʼun la snop xa ox chikta li yabtel akʼbile (Jer. 20:8, 9). Pe muʼyuk laj yikta-o sba. ¿Kʼusi koltaat-o sventa mu kʼusi chopol snop xchiʼuk ti skʼupin li cholmantale? Baʼyel, snaʼoj ti jaʼ sventa oyuk kʼusi lek staik ta jelavel xchiʼuk sventa oyuk spatobil yoʼonton krixchanoetik li aʼyej chale (Jer. 29:11). Xchibal, snaʼoj ti jaʼ tʼujat yuʼun Jeova sventa xalbe batel skʼoplal li sbie (Jer. 15:16). Li voʼotik eke chkaltik batel jun aʼyej ti jaʼ tsta-o spatobil yoʼonton li krixchanoetike xchiʼuk chkalbetik batel skʼoplal Jeova ta skoj ti stestigoutike. Kʼalal chkakʼ ta koʼontontik li chaʼtos liʼe, ta jkʼupintik tajek li cholmantale, mu ventauk mi mu xchikinta li krixchanoetike.

13. ¿Kʼusi chchanubtasutik li lokʼolkʼop laj yal Jesus ta Markos 4:26 kʼalal ta 29?

¹³ Mu ta aniluk chijchʼi ta mantal. Jaʼ jech laj yakʼ ta chanel Jesus li ta lokʼolkʼop laj yal ta sventa li jtsʼunolajel ti chvaye (kʼelo Markos 4:26-29). Li jtsʼunolajele ta kʼunkʼun laj yilbe sat li yabtele, muʼyuk kʼusi la spas sventa mas aniluk xchʼi. Jaʼ noʼox jech ek, xuʼ van mu ta aniluk xakʼ ta xkuxlejal kʼusi chchan li jun estudiantee, yuʼun ta kʼunkʼun chchʼi ta mantal. Jech kʼuchaʼal jun jtsʼunolajel ti mu kʼusi stakʼ spas sventa aniluk xchʼi li kʼusi tstsʼune, li voʼotik eke mu stakʼ jsujtik jun estudiante sventa aniluk xchʼi ta mantal kʼuchaʼal ta jkʼantike. Jaʼ yuʼun, mu me xijchibaj-o mi kʼun chchʼi batel ta mantale. Kʼalal ta jpastik ta yajchankʼop Kristo li krixchanoetike, xkoʼolaj ti oy kʼusi ta jtsʼuntik ti skʼan jmalatik xchʼie (Sant. 5:7, 8).

14. Albo junuk skʼelobil ti bu chakʼ ta ilel ti mu ta aniluk chchikintaik mantal li krixchanoetike.

¹⁴ Ta junantik territorioetike, muʼyuk buchʼu chchikinta mantal akʼo mi xjelav ep jabiletik. Jkʼeltik kʼusi kʼot ta stojolalik li Gladys xchiʼuk Ruby Allen ti smuk xvix sbaik ti te nakalik ta Canadae. Li ta 1959, laj yichʼik takel batel kʼuchaʼal prekursora regular ta jun jteklum ta yosilal Quebec. c Li krixchanoetik tee mu skʼan xchikintaik mantal, yuʼun chiʼik-o li kʼusi xuʼ x-albatik yuʼun li paleetik ta relijion katolika xchiʼuk li yantike. Xi chvul ta sjol li Gladise: «Chib jabil jech-o vaxakib ora ta kʼakʼal la jcholkutik mantal. Pe muʼyuk buchʼu la xchikintabunkutik. Li krixchanoetike tsmak ta anil stiʼ snaik kʼalal chilunkutike. Pe muʼyuk xkikta jbakutik». Ta mas tsʼakale, jel stalelal li krixchanoetike xchiʼuk mas xa lik xchikintaik mantal. Li avi kʼakʼale, oy xa oxib tsobobbail li ta lum taje (Is. 60:22).

15. ¿Kʼusi chakʼ jchantik 1 Korintios 3:6 xchiʼuk 7 ta sventa li spasel ta yajchankʼop Kristo li krixchanoetike?

 ¹⁵ Skʼan jkolta jbatik sventa jpastik ta yajtsʼaklom Kristo li krixchanoetike. Sventa xichʼ voʼ li jun krixchanoe, skʼan skolta sba sjunul li tsobobbaile (kʼelo 1 Korintios 3:6, 7). Jech kʼuchaʼal liʼe, xuʼ van oy jun jcholmantal chiktabe jlik tratado o jlik revista jun krixchano ti oy ta yoʼonton mantale. Pe li ermanoe chakʼ venta ti muʼyuk xokol sventa xbat xchaʼvulaʼane, jaʼ yuʼun tskʼanbe yan jcholmantal ti akʼo xbat skʼele. Li ermano taje chlik yakʼbe estudio, jelajtik buchʼu chikʼ batel xchiʼuk jelajtik kʼu yelan tspatbeik yoʼonton. Kʼalal chojtikin yan jcholmantal li buchʼu chichʼ estudioe, jaʼ chkoltaat sventa xchʼi ta yoʼonton li kʼusi melele. Vaʼun, jech kʼuchaʼal laj yal Jesuse, «jmoj xkuxet yoʼontonik li buchʼu tstsʼunolaje xchiʼuk li buchʼu tstsobbe sat kʼusi [tsʼunbil]» kʼalal tspasik li abtelal ta mantale (Juan 4:35-38).

16. Akʼo mi ipot o muʼyuk xa avipal, ¿kʼu yuʼun xuʼ xamuyubaj-o li kʼusi spas avuʼun ta cholmantale?

¹⁶ ¿Ati mi ipot o mi chʼabal xa avipal sventa xachol mantal xchiʼuk ti xachanubtasvan kʼuchaʼal toʼoxe? Akʼo mi jech, xuʼ xamuyubaj ta sventa li kʼusitik spas avuʼun ta mantale. Jun veltae, li ajvalil David xchiʼuk sviniktake la stsalik li j-amaleketik ti elkʼajike. La spojik sutel li yutsʼ yalalike xchiʼuk skotol li kʼusi elkʼanbatike. Pe chib sien sviniktake muʼyuk xbatik li ta paskʼope xchiʼuk jaʼ kom xchabiik li yikatsik ta skoj ti lubemik tajeke. Kʼalal laj yoʼontonik ta paskʼope, li Davide laj yal ti koʼol yepal chichʼik li kʼusitik la spojik tale (1 Sam. 30:21-25). Li avi eke, jaʼtik jech chkʼot ta pasel kʼalal ta jpastik ta yajchankʼop Kristo li krixchanoetike. Jkotoltik ti chijtun ta stojolal Jeova ti bu kʼalal xuʼ kuʼuntike xijmuyubaj kʼalal chojtikin Jeova li jun krixchanoe xchiʼuk ti ta jkoltatik sventa xichʼ voʼe.

17. ¿Kʼusi ta jtojbetik ta vokol li Jeovae?

¹⁷ Ta jtojbetik ta vokol Jeova ti ep sbalil chil li kʼusitik ta jpastik ta stojolale. Snaʼoj ti mu kʼusi stakʼ jpastik sventa xchikintaik mantal li krixchanoetike o ti xlik yichʼik ta mukʼe, pe skʼeloj ti kakʼojtik persa ta skoj ti jkʼanojtike. Jaʼ yuʼun, chakʼ jmotontik. Jech xtok, chakʼ kiltik ti skʼan xijmuyubaj-o li kʼusitik spas kuʼuntik li ta abtelal ta mantale (Juan 14:12). Jpʼeluk me ta koʼontontik ti lek chilutik Dios mi muʼyuk lijlubtsaje.