Kʼalal mi laj xa ox chanunajane, ¿mi vokol chavaʼi ti xkom ta ajol li kʼusi la achane? Jkotoltik oy jech xkʼot ta jtojolaltik. ¿Kʼusi van xuʼ skoltautik? Jaʼ ti jvules ta joltik li kʼusitik mas tsots skʼoplale.

Kʼalal chachanunaje, pajan jlikeluk xchiʼuk nopbo skʼoplal li kʼusi yakal chachane. Taje jaʼ li kʼusi laj yalbe ermanoetik Pablo kʼalal mi la xchanik li karta la stsʼibae, xi laj yalanbee: «Li kʼusi mas tsots skʼoplal ta sventa li kʼusi yakal chkalbetik skʼoplale jaʼ liʼe» (Ebr. 8:1). Ti jech laj yale jaʼ koltaatik-o sventa snaʼik kʼusi yakal chal li Pabloe xchiʼuk ti xaʼibeikuk smelolal kʼu yelan snitojbe sba skʼoplal li loʼiletike.

Kʼalal chachanunaj jujukoje, chʼakbo yorail jlikeluk sventa xanopbe skʼoplal li kʼusitik mas tsots skʼoplale, akʼo mi kʼajomal noʼox lajuneb minuto. Mi mu xvul lek ta ajole, ¿kʼu yuʼun mu xachaʼkʼel yan velta li subtituloetik o li baʼyel orasion ta jujun parafoe? Kʼalal oy kʼusi achʼ chachane, chapbo smelolal ta akʼop atuk. Kʼalal chakʼelbe skʼoplal yan velta li kʼusitik mas tsots skʼoplale, maʼuk noʼox me tskoltaot sventa xvul ta ajol, yuʼun tskoltaot xtok sventa xanaʼ kʼuxi xuʼ xavakʼ ta akuxlejal.