XCHANOBIL 43
KʼEJOJ 90 Jpatbe jba koʼntontik ta jujuntal
¿Kʼusi xuʼ jpastik mi oy kʼusi xijnaʼet yuʼune?
«Kʼelik me skotol li kʼusi chapasike» (1 TES. 5:21).
LI K’USI CHALBE SKʼOPLALE
Ta jchantik batel kʼusi xuʼ jpastik mi oy kʼusi xijnaʼet yuʼun ti xuʼ van jaʼ chchibajesutik ta spasbel yabtel li Jeovae.
1, 2. 1) ¿Kʼusitik van xuʼ xlik jnopbetik skʼoplal? 2) ¿Kʼusi ta jkʼeltik batel li ta xchanobil liʼe?
JKOTOLTIK oy onoʼox chijnaʼetaj a bateltik. Jnopbetik skʼoplal jun kerem ti mu snaʼ mi lek ch-ilat yuʼun li Jeovae. Jaʼ yuʼun, mu xkʼot ta nopel yuʼun mi chichʼ voʼ. Jnopbetik skʼoplal xtok ta stojolal jun ermano ti ta skeremal onoʼox kʼot ta nopel yuʼun ti chtun ta stojolal Jeovae, ti maʼuk bat ta yoʼonton saʼel takʼine. Pe li avie oy xa yutsʼ yalal xchiʼuk jutuk tspas kanal, vaʼun mu xman-o yuʼun li kʼusi chtun yuʼunike. Jaʼ yuʼun, yikʼaluk van snop mi lek li kʼusi kʼot ta nopel yuʼun ta skeremale. Jnopbetik skʼoplal liʼ xtoke, jun ermana ti oy xa sjabilale yikʼaluk van chʼabal xa yipal chaʼi, jaʼ yuʼun chchibaj-o ta skoj ti mu xa spas yuʼun kʼuchaʼal toʼoxe. Yikʼaluk van oy xi anopojbe skʼoplal eke: «¿Mi oyun van ta yoʼonton li Jeovae? ¿Mi oy sbalil li kʼusitik la jpas sventa xitun ta stojolale? ¿Mi jtunel-o van chilun?».
2 Mi oy jech ta jnoptik taje, xuʼ me xkʼunib li xchʼunel koʼontontike xchiʼuk ti xijchibaj-o ta mantale. Jaʼ yuʼun, li ta xchanobil liʼe, ta jkʼeltik batel kʼuxi tskoltautik Vivlia mi oy ta jnoptik ti muʼyuk lek chilutik li Jeovae, ti muʼyuk lek li kʼusi kʼot ta nopel kuʼuntike o mi ta jnoptik ti muʼyuk xa jbalil chilutik li Jeovae.
KʼUSI XUʼ JPASTIK MI XIJNAʼETE
3. ¿Kʼusi tskoltautik sventa mu teuk noʼox xijnaʼete?
3 Mi oy kʼusi xijnaʼet yuʼune, li Skʼop Diose xuʼ me skoltautik. Yuʼun mi ta jchantike, mas me tstsatsub li xchʼunel koʼontontike xchiʼuk mas me lek chkil jbatik xchiʼuk Jeova, vaʼun tsots-o me li xchʼunel koʼontontike (1 Kor. 16:13).
4. ¿Kʼuxi xuʼ jkʼeltik skotol li kʼusitik ta jpastik jech kʼuchaʼal chal ta 1 Tesalonisenses 5:21?
4 (Kʼelo 1 Tesalonisenses 5:21). Li Vivliae xi tstojobtasutike: «Kʼelik me skotol li kʼusi chapasike». ¿Kʼuxi ta pasel taje? Jaʼ ti jkʼeltik ta Vivlia mi lek li kʼusi ta jnoptike. Kalbetik skʼoplal jun kerem ti mu snaʼ mi lek ch-ilat yuʼun li Jeovae. ¿Mi lek van ti te xnaʼet chkom-oe? Moʼoj, li kʼusi mas lek xuʼ spase jaʼ ti skʼel ta Vivlia ti kʼu yelan ch-ilat ta melel yuʼun li Jeovae.
5. ¿Kʼuxi xuʼ jnaʼtik ti kʼu yelan chil Jeova li kʼusi xijnaʼet yuʼune?
5 Kʼalal ta jkʼeltik li Vivliae, xkoʼolaj ti chchiʼinutik ta loʼil li Jeovae. Pe sventa jnaʼtik lek kʼusi tsnop Jeova ta sventa li kʼusi xijnaʼete, mu baluk noʼox ti naka ta jkʼeltik li Vivliae. Yuʼun skʼan jsaʼtik tekstoetik ta Vivlia ti jaʼ chalbe skʼoplal li kʼusi ta jvul-o koʼontontike xchiʼuk ti jsabetik skʼoplal ta jvuntike (Prov. 2:3-6). Toj tsots me skʼoplal ti jkʼanbetik Jeova ti sbeiltasutik kʼalal oy kʼusi ta jsabetik smelolale xchiʼuk ti skoltautik ta stabel stakʼobil li kʼusitik ta jakʼbe jbatike. Mi laj xa ox jchantike, jsaʼtik beiltaseletik ta Vivlia xchiʼuk yan mantaletik ti jaʼ tskoltautike. Jech xtok, jtunel me mi la jsaʼtik loʼiletik ta Vivlia ti jaʼtik jech la snuptanik eke.
6. ¿Kʼuxi xuʼ skoltautik li tsobajeletik mi oy kʼusitik xijnaʼet-oe?
6 Kʼalal ta jchan Jvivliatik li ta tsobajeletike, xkoʼolaj ti te chchiʼinutik ta loʼil li Jeovae. Jaʼ yuʼun, mi chijbatutik ta tsobajel skotol veltae, xuʼ me te xkaʼitik junuk mantal o sloʼil junuk ermano ti jaʼ tsjambe smelolal li kʼusi ta jakʼbe jbatike (Prov. 27:17). Avie, jaʼ xa kalbetik batel skʼoplal li kʼusitik van xuʼ xijnaʼet-oe xchiʼuk ti kʼusi xuʼ skoltautik sventa mu jechuk jnoptike.
«¿MI OYUN VAN TA YOʼONTON LI JEOVAE?»
7. ¿Kʼusi van xuʼ jakʼbe jbatik?
7 Yikʼaluk van oy xi ajakʼojbe abae: «¿Mi ta melel oyun ta yoʼonton li Jeovae?». Mi muʼyuk mas tsots akʼoplal chavaʼi abae, yikʼaluk van chanop ti mi jsetʼuk onoʼox chkʼot ta avamigo li buchʼu la spas skotol li kʼusitik x-ayane. Taje jaʼ van jech laj yaʼi sba li ajvalil David eke. Labal sba laj yil ti tstsak ta venta krixchanoetik li Jeovae, jaʼ yuʼun xi la sjakʼe: «Kajval Jeova, ¿mi yuʼun tsots skʼoplal li vinik ti chatsak ta ventae? ¿Mi yuʼun tsots skʼoplal li xnichʼon krixchano ti chavakʼ tal asat ta stojolale?» (Sal. 144:3). Jkʼelbetik batel skʼoplal kʼuxi xuʼ jtabetik stakʼobil taje.
8. Jech kʼuchaʼal chal 1 Samuel 16:6 xchiʼuk 7, 10 kʼalal ta 12, ¿kʼusi tstsak ta venta Jeova ta stojolal li jun krixchanoe?
8 Li ta Vivliae, chakʼ ta ilel ti Jeovae tstsak ta venta li buchʼutik muʼyuk mas tsots skʼoplalik yilele. Taje jaʼ jech kʼot ta stojolal li xnichʼnabtak Jesee. Yuʼun li Jeovae la stak batel Samuel ta sna Jese sventa stʼujbe junuk xnichʼon sventa xkʼot ta ajvalil ta Israele. Pe kʼajomal noʼox la stak ta ikʼel li vukvoʼ xnichʼnabtake, jaʼ muʼyuk laj yikʼ talel li Davide ti jaʼ li mas kʼoxe. b Akʼo mi jech, li Jeovae jaʼ xa ox stʼujoj li kʼox kereme (kʼelo 1 Samuel 16:6, 7, 10-12). ¿Kʼu yuʼun? Yuʼun laj yakʼ venta li kʼusi oy ta yoʼontone xchiʼuk laj yil ti oy ta yoʼonton li kʼusitik sventa mantale, akʼo mi kerem to.
9. ¿Kʼu yuʼun xuʼ xachʼun ta melel ti oyot ta yoʼonton li Jeovae? (Kʼelo xtok li lokʼole).
9 Nopbo skʼoplal li kʼusitik spasoj Jeova ta atojolal sventa xakʼ ta ilel ti oyot ta yoʼontone. Chakʼbot tojobtaseletik ti jaʼ li kʼusi chtun avuʼun chile (Sal. 32:8). Ti jech tstojobtasote jaʼ svinajeb ti xa yojtikin leke (Sal. 139:1). Kʼalal chavakʼ ta akuxlejal li tojobtaseletik taje xchiʼuk ti chavil ti kʼu yelan lek chkʼot ta pasel li kʼusi chapase, mas to chachʼun ti oyot ta yoʼonton li Jeovae (1 Kron. 28:9; Ech. 17:26, 27). Li stuke tstsak ta venta skotol li kʼusi chapas ta stojolale xchiʼuk tstsak ta venta li alekil talelaltake (Jer. 17:10). Oy ta yoʼonton ti xakʼot ta yamigoe xchiʼuk tskʼan ti jechuk xavil eke (1 Juan 4:19).
«Mi chasaʼe, chakʼ sba ta saʼel» (1 Kron. 28:9). (Kʼelo parafo 9). c
«¿MI LEK VAN LI KʼUSI KʼOT TA NOPEL KUʼUNE?»
10. Kʼalal chanopbe skʼoplal li kʼusitik apasoj talele, ¿kʼusitik van xuʼ xlik ajakʼbe aba?
10 Kʼalal oy xa ox jayibuk jabil chatun ta stojolal Jeovae, yikʼaluk van chanopbe skʼoplal mi lek van li kʼusi kʼot ta nopel avuʼune. Xuʼ van laj avikta komel junuk abtel ti lek toʼox chapas kanale o muʼyuk xalikes jtosuk abtel ta skoj ti chakʼan chatun mas ta stojolal Jeovae. Pe avi ti echʼem xa talel jayibuk jabiletike, yikʼaluk van oy buchʼutik xavojtikin ti laj yakʼ ta yoʼontonik saʼel takʼine, lek noʼox yilel li xkuxlejalike. Jaʼ yuʼun, xuʼ van xi chajakʼbe abae: «¿Mi oy sbalil li kʼusitik laj kikta spasel ta skoj ti ta jkʼan chitun ta stojolal Jeovae? ¿O mi jaʼ van mas lek ti yanuk-o kʼusi la jnop la jpase?».
11. ¿Kʼu yuʼun la svul tajek yoʼonton li jtsʼibajom yuʼun Salmo 73?
11 Mi oy jech ajakʼojbe aba kʼuchaʼal taje, nopbo skʼoplal ti kʼu yelan laj yaʼi sba li jtsʼibajom yuʼun Salmo 73. Li stuke laj yil ti muʼyuk ch-ipajik li buchʼutik muʼyuk chtunik ta stojolal Jeovae, jun noʼox yoʼontonik xchiʼuk oy noʼox stakʼinik yilel (Sal. 73:3-5, 12). Ta skoj ti lek noʼox yilel li xkuxlejalike, li jtsʼibajom yuʼun salmoe la snop ti muʼyuk sbalil skotol li kʼusitik tspas ta stojolal Jeovae. Sjunul kʼakʼal te xvulvun-o yoʼonton ta skoj li kʼusitik tsnope (Sal. 73:13, 14). ¿Kʼusi koltaat-o sventa mu xa jechuk snope?
12. Jech kʼuchaʼal chal Salmo 73:16 kʼalal ta 18, ¿kʼusi koltaat-o li jtsʼibajom yuʼun salmo sventa lekuk li kʼusi tsnope?
12 (Kʼelo Salmo 73:16-18). Li jtsʼibajom yuʼun salmoe bat ta xchʼulna Jeova. Tee jun noʼox yoʼonton laj yaʼi sba xchiʼuk te la snopbe lek skʼoplal li kʼusitik tsvul-o yoʼontone. Laj yaʼibe smelolal ti akʼo mi lek noʼox xkuxlejalik li buchʼutik muʼyuk chtunik ta stojolal Jeovae, muʼyuk lek kʼusi chkʼot ta stojolalik ta tsʼakal. Laj yakʼ venta ti lek kʼusi chkʼot ta stojolal mi jaʼ baʼyel laj yakʼ ta xkuxlejal li Jeovae. Ti jech la spase, jun xa yoʼonton kom xchiʼuk akʼbat yip sventa jechuk-o xtun ta stojolal (Sal. 73:23-28).
13. ¿Kʼusi xuʼ tskoltaot mi chachaʼnaʼ to li kʼusitik aviktaoj komele? (Kʼelo xtok li lokʼoletike).
13 Jech kʼuchaʼal li kʼusi kʼot ta stojolal li jtsʼibajom yuʼun salmoe, li voʼote xuʼ me jun avoʼonton ek. ¿Kʼuxi xuʼ xata taje? Jaʼ ti xanopbe skʼoplal li kʼusitik oy avuʼun avie xchiʼuk li akʼulejal atsoboj ta vinajele. Pe jaʼuk li buchʼutik muʼyuk chtunik ta stojolal Jeovae, kʼajomal oy yuʼunik li kʼusitik chakʼ li balumil liʼe. Yuʼun jaʼ noʼox spatoj yoʼontonik li kʼusi xuʼ staik avie. Chʼabal kʼusi xuʼ staik ta jelavel, pe li Jeovae jamal chal ti ep kʼusi chakʼbot ta jelavele (Sal. 145:16). Ti melel xkaltike, mu stakʼ jnaʼtik kʼu yelan jkuxlejaltik jechuk ti yanuk-o kʼusi kʼot ta nopel kuʼuntike. Pe oy kʼusi ti jnaʼojtik leke: li buchʼutik chkʼot ta nopel yuʼunik ti chtunik ta stojolal Jeova ta skoj ti skʼanojik xchiʼuk ti skʼanojik li krixchanoetike, ch-akʼbatik li kʼusitik chtun yuʼunik sventa masuk to xmuyubajike.
Mu me xchʼay xkaʼitik li kʼusi yaloj tspas Jeova ta jelavele. (Kʼelo parafo 13). d
«¿MI OY TO JBALIL CHILUN LI JEOVAE?»
14. ¿Kʼu yelan chaʼi sbaik junantik yajtuneltak Jeova, xchiʼuk kʼusi van xuʼ xlik sjakʼbe sbaik?
14 Junantik yajtuneltak Jeovae tskʼan mas chtunik ta stojolal Jeova. Pe mu spas yuʼunik ta skoj ti oy xa sjabilalike, ti ipik noʼoxe o ti oy xa kʼusi mu spas yuʼunik ta skoj ti oy kʼusi snuptanojike. Ta skoj taje, xuʼ van tsnopik ti muʼyuk xa tsots skʼoplal ch-ilatik yuʼun li Jeovae. Vaʼun xi chlik snopike: «¿Mi oy to jbalil chilun li Jeovae?».
15. ¿Kʼusi laj yaʼibe lek smelolal li jtsʼibajom yuʼun Salmo 71?
15 Jaʼtik jech laj yaʼi sba ek li jtsʼibajom yuʼun Salmo 71, yuʼun xi laj yalbe li Jeovae: «Mu xajipun komel kʼalal muʼyuk xa kipale» (Sal. 71:9, 18). Pe snaʼoj lek ti mi tukʼ chtun ta stojolal Jeovae, chbeiltasat xchiʼuk chkoltaat. Laj yaʼibe lek smelolal ti chmuyubaj Jeova ta stojolal li buchʼutik ta sjunul yoʼonton chtunik ta stojolal akʼo mi oy kʼusitik mu spas yuʼunike (Sal. 37:23- 25).
16. ¿Kʼu yuʼun chkaltik ti ep sbalil ch-ilatik yuʼun Jeova li buchʼutik oy xa sjabilalike? (Salmo 92:12-15).
16 Mi oy xa ajabilale, teuk ta ajol ti kʼu yelan chilot li Jeovae. Akʼo mi oy kʼusitik mu xa spas avuʼun, li Jeovae xuʼ xa skoltaot sventa jechuk-o tukʼ xatun ta stojolal (kʼelo Salmo 92:12-15). Mu jaʼuk xbat ta avoʼonton li kʼusitik mu spas avuʼune, jaʼ lek akʼo ta avoʼonton li kʼusi spas noʼox avuʼune. Yuʼun xuʼ me xatsatsubtasbe yoʼonton yantik mi lek atalelale xchiʼuk ti xavakʼ ta ilel ti oy ta avoʼonton li yantike. Jech xtok, xuʼ xavalbe yantik ti kʼu yelan skoltaojot Jeova ti kʼu xa sjalil kuxulot talele xchiʼuk ti oy ta avoʼonton chakʼan chakʼel ti xkʼot ta pasel li kʼusitik yaloje. Teuk me ta ajol ti ep sbalil tstabeik yantik kʼalal chapas orasion ta stojolalike (1 Ped. 3:12). Mu ventauk li kʼusi yakal ta jnuptantik avie, jkotoltik xuʼ oy kʼusi jpastik ta stojolal Jeova xchiʼuk ta stojolal li yantike.
17. ¿Kʼu yuʼun skʼan mu jkoʼoltajes jbatik xchiʼuk li yantike?
17 Mi chavul avoʼonton ta skoj ti mu xa masuk kʼusi spas avuʼun ta stojolal Jeovae, teuk ta ajol ti ep sbalil chil skotol li kʼusi chavakʼ avip spasele. Bateltike oy van ta avoʼonton chakʼan chakoʼoltas aba xchiʼuk yantik ta skoj ti mas to ep kʼusi spas yuʼunike. Pe akʼo persa ti mu jechuk xapase, ¿kʼu yuʼun? Yuʼun li Jeovae muʼyuk onoʼox bu tskoʼoltasutik xchiʼuk li yantike (Gal. 6:4). Jech kʼuchaʼal li Mariae la spokbe-o yakan Jesus ta jun muil aseite ti toyol tajek stojole (Juan 12:3-5). Pe jaʼuk li ants ti chamem smalale, kʼajomal uni chaʼsep takʼin laj yakʼ ta templo ti jutuk tajek sbalile (Luk. 21:1-4). Kʼalal laj yil Jesus li kʼusi la spas li chaʼvoʼ antsetike, te laj yakʼ venta ti tsots xchʼunel yoʼontonike. Li Jeova eke ep sbalil chil li kʼusi chapas ta stojolal ta skoj ti akʼanoj xchiʼuk ti chakʼan chavichʼ ta mukʼe, manchuk mi jutuk tajek sbalil chavil li voʼote.
18. ¿Kʼusi xuʼ skoltaot sventa mu teuk noʼox xanaʼet? (Kʼelo xtok li rekuadro « Li Skʼop Diose tskoltaot sventa mu teuk noʼox xanaʼet»).
18 Jkotoltik oy onoʼox xijnaʼet bateltik. Pe jech kʼuchaʼal la jchantik xa talele, li Skʼop Diose xuʼ skoltautik sventa mu jechuk xkaʼi jbatik. Jaʼ yuʼun, akʼo me persa sventa xakʼel yoʼ xatabe stakʼobil li kʼusitik xanaʼet-o yuʼune. Mi jech la apase, mas me jun avoʼonton xchiʼuk muʼyuk me chavul avoʼonton, li Jeovae oyot ta yoʼonton. Ep abalil chilot xchiʼuk li kʼusitik chapas ta stojolale, jech xtok jamal chal ti chakʼbot amotone. Mu me xchʼay xavaʼi liʼe: li Jeovae skʼanoj xchiʼuk chchabi ta jujuntal li yajtuneltak ti tukʼ yakʼoj sbaike.
KʼEJOJ 111 Ti kʼu yuʼun xijmuyubaje
a LIʼE TSOTS SKʼOPLAL: Li ta xchanobil liʼe, kʼalal chkalbetik skʼoplal li kʼusitik xijnaʼet yuʼune, maʼuk chkalbetik skʼoplal ti chʼabal xchʼunel koʼontontik ta stojolal Jeova o li kʼusitik yaloj tspas ta jelavele. Liʼe jaʼ chkalbetik skʼoplal kʼalal oy buchʼutik vokol chaʼiik ta xchʼunel ti ep sbalil ch-ilatik yuʼun li Jeovae o mi xnaʼetik mi lek li kʼusitik kʼotem ta nopel yuʼunike.
b Akʼo mi muʼyuk chal Vivlia jayib sjabilal kʼalal laj yichʼ tʼujel yuʼun Jeova li Davide, xuʼ van jaʼo kʼalal chex kerem toʼoxe (kʼelo Li Jkʼel osil ta toyol ta 2016, numero 5, pajina 9).
