XCHANOBIL 39
Kʼalal chikta komel Jeova junuk kutsʼ kalaltike
«Solel ep ta velta [...] la syayijesbeik yoʼonton» (SAL. 78:40).
KʼEJOJ 102 ‹Jkoltatik li buchʼutik kʼunike›
LI KʼUSI TA JCHANTIKE *
1. Kʼalal oy buchʼu chlokʼ ta tsobobbaile, ¿kʼu van yelan chaʼi sba li yutsʼ yalale?
KʼALAL oy buchʼu chichʼ lokʼesel ta tsobobbaile, solel lajem van tajek chkom yoʼontonik li yutsʼ yalale. Xi chal jun ermana ti Hilda * sbie: «Li jmalale cham kʼalal 41 xa ox jabil jnupunelkutike xchiʼuk tukʼ tun ta stojolal Jeova. Kʼux tajek laj kaʼi li kʼusi la jnuptane. Pe kʼalal lokʼ ta tsobobbail li jkereme xchiʼuk ti laj yikta komel li yutsʼ yalale, mas to kʼux laj kaʼi».
Li Jeovae xaʼibe smelolal ti toj kʼux kʼalal chikta mantal junuk kutsʼ kalaltike. (Kʼelo parafo 2, 3). *
2, 3. Jech kʼuchaʼal chal Salmo 78:40 xchiʼuk 41, ¿kʼu yelan chaʼi sba Jeova kʼalal tstoy sba li yajtuneltake?
2 Kʼux van tajek laj yaʼi Jeova kʼalal la stoy sbaik epal anjeletik ti jaʼik toʼox yutsʼ yalale (Jud. 6). Jech xtok, yayijem van tajek kom yoʼonton kʼalal ep ta velta la stoy sbaik ta stojolal li j-israeletik ti skʼanojan toʼox tajeke (kʼelo Salmo 78:40, 41). Jaʼ yuʼun, mi chikta Jeova li buchʼu akʼanoj tajeke, kʼux me chaʼi ek li jkʼanvanej Totil kuʼuntike. Xaʼibe smelolal ti kʼu yelan chavaʼi abae, tspat avoʼonton xchiʼuk tskoltaot.
3 Li ta xchanobil liʼe, ta jkʼeltik kʼusi xuʼ jpastik sventa skoltautik Jeova kʼalal chlokʼ ta tsobobbail junuk kutsʼ kalaltike. Ta jkʼeltik xtok kʼuxi xuʼ jkoltatik li ermanoetik ti jaʼ jech yakal tsnuptanike. Pe baʼyel ta jkʼeltik kʼusi skʼan mu jnoptik.
MU XANOP TI JAʼ TA AMULE
4. ¿Kʼu yelan chaʼi sbaik epal totil meʼiletik kʼalal chiktaik Jeova li yalab xnichʼnabike?
4 Kʼalal chikta Jeova li jun alab nichʼnabile, epal totil meʼil tsnopik kʼusi yan xuʼ ox la spasik sventa mu xiktaik mantale. Kʼalal laj yichʼ lokʼesel ta tsobobbail skerem li jun ermano ti Luk sbie, xi laj yale: «La jnop ti jaʼ ta jmule. Chopol kʼusi lik jvaychinta xtok. Bakʼintike, ta jvul tajek koʼonton xchiʼuk chi-okʼ». Jaʼ jech kʼot ta stojolal jun ermana ti Elizabeth sbie xchiʼuk xi toʼox tsnopilane: «¿Kʼusi muʼyuk lek bat ta pasel kuʼun? La jnop toʼox ti muʼyuk lek la jchanubtas ta mantal li jkereme».
5. ¿Buchʼu ta smul kʼalal oy buchʼu chikta Jeovae?
5 Skʼan teuk ta joltik ti yakʼoj jnop jtuktik Jeova li kʼusi ta jpastike. Jaʼ yuʼun, ta jujuntal ta jnoptik mi ta jchʼunbetik smantal o mi muʼyuk. Junantik kerem tsebetike muʼyuk lek chanubtasatik tal yuʼun li stot smeʼike, pe jaʼ la snop chtunik ta stojolal Jeova xchiʼuk tukʼ yakʼoj sbaik ta stojolal. Yantike lek laj yichʼik chanubtasel tal ta mantal yuʼun li stot smeʼike, pe laj yiktaik Jeova kʼalal chʼiike. Jamal xvinaj ti ta jujuntal skʼan jnoptik mi chijtun ta stojolal Jeova o mi muʼyuk (Jos. 24:15). Jaʼ yuʼun, totil meʼiletik, mu xanopik ti jaʼ ta amulik mi chiktaik Jeova li avalab anichʼnabike.
6. ¿Kʼu van yelan chaʼi sba jun alab nichʼnabil kʼalal chikta Jeova li stot o smeʼe?
6 Bateltike, jaʼ chiktaik mantal li totil meʼile xchiʼuk xuʼ van xiktaik komel li yutsʼ yalalik xtoke (Sal. 27:10). Kʼalal jech chkʼot ta pasele, xuʼ van kʼux tajek chaʼiik li alab nichʼnabiletik ti lek toʼox ta chanbel stalelalik chil li stot smeʼike. Xi chal Esther ti lokʼ ta tsobobbail li stote: «Nopoltik noʼox chi-okʼ, yuʼun laj kakʼ venta ti kʼot ta nopel yuʼun ti chikta li Jeovae, maʼuk ti ta kʼunkʼun lubtsaj ta mantale. Jkʼanoj tajek li jtote. Jaʼ yuʼun, kʼalal laj yichʼ lokʼesel ta tsobobbaile, ta jnopilan mi lek van oy xchiʼuk chixiʼ tajek mi oy kʼusi chopol xkʼot ta stojolal».
7. ¿Kʼu yelan chil Jeova li kerem tsebetik ti lokʼem ta tsobobbail li stot smeʼike?
7 Kerem tsebetik, kʼux chkaʼikutik ek mi yichʼoj lokʼesel ta tsobobbail li atot o ameʼike. Li Jeovae xaʼibe smelolal ti kʼu yelan chavaʼi abaike, skʼanojoxuk xchiʼuk xmuyubaj ti tukʼ-o avakʼoj abaik ta stojolale. Jaʼ jech chkaʼikutik ta atojolalik ek. Teuk ta ajolik xtok ti maʼuk ta amulik li kʼusi tsnop tspas li atot ameʼike. Jech kʼuchaʼal laj xa jchantike, li Jeovae yakʼoj ti akʼo jnop jtuktik mi chijtun ta stojolal. Skotol li yajtuneltak ti yakʼoj xa xkuxlejalik ta stojolal xchiʼuk ti yichʼojik xa voʼe ta jujuntal tsbainik li kʼusi tspasike (Gal. 6:5).
8. ¿Kʼusi xuʼ spasik li jun utsʼ alalil yoʼ to tsmalaik tsut tal ta stojolal Jeova li yutsʼ yalalike? (Kʼelo xtok li rekuadro « Sutan ta stojolal Jeova»).
8 Kʼalal chikta mantal li buchʼu akʼanoje, stalel onoʼox ti chakʼan ti sut talel ta steklumal Jeovae. ¿Kʼusi xuʼ xapas yoʼ to chamalae? Jaʼ ti lekukot-o ta mantale. Vaʼun, lek me ta chanel atalelal chilik li avutsʼ avalale xchiʼuk jech van chil ek li buchʼu yichʼoj lokʼesel ta tsobobbaile. Jech xtok, jaʼ tskoltaot sventa mu xavat tajek avoʼonton. Jkʼeltik junantik kʼusitik xuʼ xapas sventa tsotsukot-o ta mantal.
¿KʼUXI XUʼ TSOTSUKOT-O TA MANTAL?
9. ¿Kʼusi xuʼ skoltaot sventa lekukot-o ta mantale? (Kʼelo xtok li rekuadro « Tekstoetik ti tspat avoʼonton mi yiktaoj Jeova junuk avutsʼ avalale»).
9 Oyuk kʼusitik xapas ta mantal. Toj tsots skʼoplal ti masuk to lek xavil aba xchiʼuk Jeova xchiʼuk ti jechuk spas li avutsʼ avalale. ¿Kʼuxi tspas avuʼun? Jaʼ mi nopolik noʼox chachan li Vivliae, ti chanopbe skʼoplale xchiʼuk ti chabatilan ta tsobajeletike. Kalbetik skʼoplal Yoanna ti laj yikta mantal li stot xchiʼuk xvixe. Xi chale: «Jun koʼonton chkaʼi jba kʼalal ta jchanbe skʼoplalik li Abigail, Ester, Job, Jose, Jesus o yan yajtuneltak Dios ta voʼnee. Li kʼusi la spasike tspatbun koʼonton xchiʼuk tskoltaun sventa masuk ximuyubaj. Tspatbun koʼonton xtok li kansionetik ta JW Broadcasting».
10. Jech kʼuchaʼal chal Salmo 32:6 kʼalal ta 8, ¿kʼusi xuʼ jpastik mi chkat tajek koʼontontike?
10 Jambo avoʼonton li Jeovae. Mu xavikta skʼoponel kʼalal jaʼo chavat tajek avoʼontone. Kʼanbo vokol li Jtotik Jeova ti akʼo skoltaot sventa xavaʼibe smelolal kʼu yuʼun ti jech kʼot ta pasele, ti spʼijubtasote xchiʼuk ti xchanubtasot bu beal skʼan xatam batele (kʼelo Salmo 32:6-8). Stalel onoʼox ti vokol van chavaʼi yalbel ti kʼu yelan chavaʼi sbae, pe li Jeova xaʼibe lek smelolal. Skʼanojot tajek xchiʼuk chalbot ti akʼo xavalbe skotol li kʼusi oy ta avoʼontone (Eks. 34:6; Sal. 62:7, 8).
11. Jech kʼuchaʼal chal Ebreos 12:11, ¿kʼu yuʼun skʼan mu chopoluk xkiltik kʼalal oy buchʼu chichʼ lokʼesel ta tsobobbaile? (Kʼelo xtok li rekuadro « Jaʼ svinajeb ti skʼanojutik Jeova kʼalal oy buchʼu chichʼ lokʼesel ta tsobobbaile»).
11 Mu chopoluk xavaʼi li kʼusi kʼot ta nopel yuʼun li moletike. Kʼalal oy buchʼu chichʼ lokʼesel ta tsobobbaile, jaʼ jech chvinaj ti kʼanvanem li Jeovae, yuʼun ta jtabetik sbalil jkotoltik xchiʼuk tstabe sbalil ek li buchʼu la spas smule (kʼelo Ebreos 12:11). Junantike xuʼ van xi chalike: «Muʼyuk lek ti jech la spas li moletike». Pe teuk ta ajol ti buchʼutik jech chalike muʼyuk chalik skotol li kʼusi chopol la spas li buchʼu laj yichʼ lokʼesele. Mu onoʼox jnaʼtik li kʼusi kʼot ta pasel ta melele. Jaʼ yuʼun, jpat koʼontontik ti la stsakik ta venta beiltaseletik ta Vivlia xchiʼuk ti «jaʼ ta sbi Jeova» chapanvanik li moletik ti te skʼoplalik ta komite sventa chapanvaneje (2 Kron. 19:6).
12. ¿Kʼuxi staojbeik sbalil junantik ermanoetik kʼalal muʼyuk chchiʼinik jsetʼuk li buchʼu chlokʼ ta tsobobbaile?
12 Mi muʼyuk chopol chavaʼi kʼalal chkʼot ta nopel yuʼun moletik ti chichʼ lokʼesel ta tsobobbail junuk avutsʼ avalale, xuʼ me xakolta sventa sut talel ta stojolal Jeova. Xi chal Elizabeth ti laj kalbetik skʼoplal ta parafo 4: «Toj vokol laj kaʼikutik ti muʼyuk xa la jkʼoponkutik jsetʼuk li jkeremkutik ti staoj xa ox svaʼleje. Pe kʼalal sut talel ta stojolal Jeovae, laj yal ti lek ti laj yichʼ lokʼesele. Ta mas tsʼakale, laj yal ti ep kʼusitik la xchane. Ta skoj li kʼusi laj yale, mas to ep sbalil laj kil ti kʼu yelan chtukʼibtasvan li Jeovae». Xi chal ek li smalal ti Mark sbie: «Kʼalal echʼ xa ox jayibuk jabile, li jkeremkutike laj yalbun ti jtos kʼusi koltaat sventa sut tal ta stojolal Jeovae jaʼ ti muʼyuk xa la jchiʼinkutike. Ta jtojbe tajek ta vokol Jeova ti la skoltaunkutik sventa jchʼunkutik mantale».
13. ¿Kʼusi xuʼ skoltaot sventa junuk avoʼonton xavaʼi abae?
13 Chiʼino ta loʼil avamigotak ti xaʼibeik smelolal kʼu yelan chavaʼi abae. Oyuk kʼusitik xapas xchiʼuk yan ermanoetik ti yijik ta mantal ti xuʼ skoltaoxuk sventa junuk noʼox avoʼontone (Prov. 12:25; 17:17). Xi chal Yoanna ti laj kalbetik skʼoplal ta parafo 9: «Jtuk tajek laj kaʼi jba, pe la skoltaun tajek ti la jchiʼin ta loʼil li kamigotak ti jpatoj koʼonton ta stojolalike». Pe ¿kʼusi xuʼ xapas mi oy kʼusi chalbot junuk ermano ti mas to chopol chavaʼi-o aba yuʼune?
14. ¿Kʼu yuʼun skʼan jtsʼikbe jbatik ta jujuntal xchiʼuk ti xkakʼbe jbatik pertone?
14 Mu chopoluk xavaʼi ta anil li kʼusi chal li ermanoetike. Skʼan onoʼox mu jnoptik ti naka lek kʼusitik chkichʼtik albele (Sant. 3:2). Ta skoj ti jpasmulilutike, skʼan mu labaluk sba xkaʼitik mi mu snaʼ kʼusi chalbutik junantike o ti mu yolbajuk kʼusi kʼux chalbutike. Teuk ta joltik ti xi laj yal li jtakbol Pabloe: «Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone akʼo mi oy buchʼu tsaʼ smul ta atojolalik» (Kol. 3:13). Xi chal jun ermana ti lokʼem ta tsobobbail jun yutsʼ yalale: «Li Jeovae skoltaojun sventa xkakʼ ta perton li ermanoetik ti tskʼan ox tskoltaikune, pe ti jaʼ noʼox la syayijesbeikun koʼonton ta skoj ti jpasmulil krixchanoetike». Jaʼ xa jkʼeltik batel kʼusi xuʼ spas sjunul li tsobobbail sventa skoltaik li ermanoetik ti oy lokʼem yutsʼ yalalik ta tsobobbaile.
XUʼ XKOLTAVAN SJUNUL LI TSOBOBBAILE
15. ¿Kʼuxi xuʼ jkoltatik li buchʼutik jaʼtik to lokʼem ta tsobobbail junuk yutsʼ yalalike?
15 Lekuk koʼontontik ta stojolal li buchʼutik chlokʼ ta tsobobbail junuk yutsʼ yalalike. Jun ermana ti Míriam sbie chal ti chiʼ toʼox xbat ta tsobajeletik kʼalal laj yichʼ lokʼesel ta tsobobbail li smuke. Xi chale: «Chixiʼ ta sventa li kʼusi xuʼ xal yantike. Pe li kamigotake tsvul yoʼontonik ek xchiʼuk muʼyuk kʼusi chopol chalik ta stojolal li jmuke. Jaʼ yuʼun, muʼyuk jtuk laj kaʼi jba». Xi chal yan ermanae: «Kʼalal laj yichʼ lokʼesel ta tsobobbail li jkeremkutike, ay spat koʼontonkutik li ermanoetike. Junantike laj yalik ti mu snaʼ kʼusi chalike. Okʼik ek kʼalal laj yilik chi-okʼe xchiʼuk oy kʼusitik la stsʼibabeikun tal. La skoltaun tajek ti jech la spasike».
16. ¿Kʼuxi xuʼ jkoltatik-o li ermanoetik ti lokʼem ta tsobobbail junuk yutsʼ yalalike?
16 Jkoltatik-o li buchʼutik lokʼem ta tsobobbail junuk yutsʼ yalalike. Mas to skʼan xkakʼbetik yilik ti jkʼanojtike xchiʼuk ti jpatbetik yoʼontonike (Ebr. 10:24, 25). Junantik ermanoetik ti lokʼem ta tsobobbail yutsʼ yalalike yakʼojik venta ti mu xa xkʼoponatik yuʼun junantik ermanoetike, ti xkoʼolaj ti lokʼemik ta tsobobbail eke. ¡Mu me jpastik jech! Mas to me skʼan jpatbetik yoʼontonik xchiʼuk jkʼupil kʼoptatik li kerem tsebetik ti lokʼem ta tsobobbail li stot smeʼike. Jun ermana ti María sbi ti laj yichʼ lokʼesel ta tsobobbail li smalal xchiʼuk ti iktaatik komele xi chale: «Ay svulaʼanunkutik junantik kamigotak, la spas jveʼelkutik xchiʼuk la skoltaikun sventa xichanunaj xchiʼuk li kalabe. Laj yaʼibeik smelolal ti kʼu yelan chkaʼi jbae xchiʼuk okʼik kʼalal laj yilik chi-okʼe. La spakbeikun jkʼoplal xtok kʼalal oy kʼusitik jecheʼ lik yalik ta jtojolale. La spatbeikun tajek koʼonton» (Rom. 12:13, 15).
Li ermanoetike xuʼ skoltaik li buchʼutik chlokʼ ta tsobobbail junuk yutsʼ yalalike. (Kʼelo parafo 17). *
17. Li moletike, ¿kʼuxi xuʼ spatbeik yoʼonton li buchʼu chil svokolike?
17 Moletik ta tsobobbail, koltaik li ermanoetik ti lokʼem ta tsobobbail junuk yutsʼ yalalik ti bu kʼalal xuʼ avuʼunike. Mas to oy ta abaik ti xapatbeik yoʼontonike (1 Tes. 5:14). Lokʼuk ta avoʼontonik ti xapatbeik yoʼonton kʼalal skʼan toʼox xlik li tsobajele o kʼalal tstsutse. Vulaʼanik xchiʼuk pasik orasion ta stojolalik. Cholik mantal xchiʼukik o takik ta ikʼel bakʼintik kʼalal chapasik li yichʼel ta mukʼ Jeova ta avutsʼ avalalike. Li moletike skʼan xkʼuxubinik, skʼanik xchiʼuk skʼelik li yuni chijtak Jeova ti yakal chil svokolike (1 Tes. 2:7, 8).
MALAO TI TSUT TALE XCHIʼUK PATO-O AVOʼONTON TA STOJOLAL JEOVA
18. Jech kʼuchaʼal chal 2 Pedro 3:9, ¿kʼusi tskʼan Jeova ti akʼo spas li buchʼutik namajemik ta stojolale?
18 Li Jeovae «mu skʼan ti oy buchʼu xbat ta lajelal junuke; moʼoj, li kʼusi tskʼane» jaʼ ti jsutes koʼonton jkotoltike (kʼelo 2 Pedro 3:9). Akʼo mi tsots spas smul li jun krixchanoe, oy-o sbalil ch-ilbat xkuxlej yuʼun li Diose. Jvules ta joltik ti laj yakʼ chamuk Xnichʼon sventa spojutike. Li Diose ta slekil yoʼonton tskolta li buchʼutik namajemik ta stojolal sventa sutik tale xchiʼuk oy ta yoʼonton ti jechuk spasike. Taje jaʼ jech vinaj li ta lokʼolkʼop laj yal Jesus ta sventa li jun jtoyba kereme (Luk. 15:11-32). Ep buchʼutik ti yiktaojik toʼox mantale sutemik xa tal ta stojolal li jkʼanvanej Totil kuʼuntike xchiʼuk lek laj yichʼik chʼamel li ta tsobobbaile. Li Elizabeth ti laj xa kalbetik skʼoplale muyubaj tajek kʼalal och yan velta ta stestigo Jeova li skereme. Xi chale: «Ta jtojbe tajek ta vokol li buchʼutik la spat koʼontonkutik yoʼ mu jnopkutik ti muʼyuk xa tsut talel ta mantale».
19. ¿Kʼu yuʼun xuʼ jpat-o koʼontontik ta stojolal Jeova?
19 Xuʼ jpat-o koʼontontik ta stojolal li Jeovae. Muʼyuk onoʼox kʼusi tskʼan ti akʼo jpastik ti xuʼ xkil-o jvokoltike. Toj lek yoʼonton xchiʼuk oy xkʼuxul yoʼonton li Jtotik Jeovae xchiʼuk skʼanoj tajek skotol li yajtuneltake. Li Jeovae muʼyuk chiktautik kʼalal jaʼo tsots chkil jvokoltike (Ebr. 13:5, 6). Li Mark ti laj kalbetik skʼoplal ta parafo 12 xi chale: «Muʼyuk laj yiktaunkutik li Jeovae. Muʼyuk chiktautik jsetʼuk kʼalal jaʼo tsots kʼusitik ta jnuptantike». Jech-o chakʼbutik «li juʼelal ti mu kʼusi xkoʼolaj-oe» (2 Kor. 4:7). Jaʼ yuʼun chaʼa, xuʼ jech-o tsots xchʼunel koʼontontik akʼo mi xikta Jeova junuk kutsʼ kalaltik.
KʼEJOJ 44 S-orasion li buchʼu oy svokole
^ par. 5 ¡Toj kʼux kʼalal chikta Jeova li buchʼu jkʼanojtike! Li ta xchanobil liʼe, ta jkʼeltik kʼu yelan chaʼi sba Dios kʼalal jech chkʼot ta pasele. Ta jkʼeltik xtok kʼusi xuʼ spasik sventa xmuyubajik-o xchiʼuk tsotsikuk-o ta mantal li yutsʼ yalal buchʼu chlokʼ ta mantale. Ta slajeb une, ta jkʼeltik kʼusi xuʼ spas sjunul li tsobobbail sventa spatbeik yoʼonton xchiʼuk ti skoltaik li utsʼ alalil ti jech kʼot ta stojolalike.
^ par. 1 Li ta xchanobil liʼe, jelbil li jlom biiletike.
