1. ¿Kʼu yelan xuʼ xkil jbatik xchiʼuk Jeova mi tukʼ chkakʼ jbatike?

LI Jeovae oy jun yutsʼ yalal ti ch-ichʼat ta mukʼe. Te kapal skʼoplal li Jesus ti «jaʼ baʼyel laj yichʼ pasel ta skotol li kʼusitike» xchiʼuk li epal anjeletike (Kol. 1:15; Sal. 103:20). Kʼalal ay ta balumil li Jesuse, laj yakʼ kiltik ti xuʼ jaʼ jech xkiltik kʼuchaʼal Jtotik li Jeovae. Jun velta kʼalal jaʼo yakal chchiʼin ta loʼil li yajtakboltake, li Jesuse xi laj yal ta stojolal li Jeovae: «Jtot xchiʼuk Atotik ek» (Juan 20:17). Jech xtok, kʼalal chkakʼ jkuxlejaltik ta stojolal Jeova xchiʼuk chkichʼtik voʼe, te xa kapal jkʼoplaltik ta jun utsʼ alalil ti bu skʼanoj sbaike (Mar. 10:29, 30).

2. ¿Kʼusi ta jkʼeltik li ta xchanobil liʼe?

² Jlom yajtuneltak Diose vokol chaʼiik ti xilik kʼuchaʼal jkʼanvanej Totil yuʼunik li Jeovae. Yantik xtoke mu snaʼik kʼuxi chakʼik ta ilel ti skʼanoj li yermanotakike. Li ta xchanobil liʼe, ta jkʼeltik kʼuxi tskoltautik Jesus sventa xkiltik kʼuchaʼal jkʼanvanej Totil kuʼuntik li Jeovae xchiʼuk ti xuʼ xijnopaj ta stojolale. Ta jkʼeltik xtok kʼuxi xuʼ jechuk xkiltik kermanotaktik kʼuchaʼal ch-ilatik yuʼun Jeovae.

3. ¿Kʼu yuʼun tsnopajesutik-o mas ta stojolal Jeova li orasion padrenuestroe?

³ Li Jeovae jaʼ jun jkʼanvanej Totil. Li Jesuse tskʼan ti jkʼanvanej Totiluk xkiltik kʼuchaʼal chil stuke xchiʼuk ti kʼusiuk noʼox ora xuʼ jkʼopontike, maʼuk ti mu snaʼ xkʼanvan ti jaʼ noʼox tspasutik ta mantale. Li Jesuse jaʼ jech jamal laj yakʼ ta ilel kʼalal la xchanubtas yajtakboltak sventa spasik orasione, yuʼun xi la slikese: «Jtotik ta vinajel» (Mat. 6:9). Li Jesuse xuʼ ox van laj yal ti xi xkalbetik li Jeovae: «li Buchʼu skotol xuʼ yuʼune», «Jpasvanej» o «Ajvalil sbatel osil», ti jaʼ biiletik ti lek xkʼot-o ti te ta jtatik li ta Vivliae (Jen. 49: 25; Is. 40:28; 1 Tim. 1:17). Pe li Jesuse chalbutik ti xiuk xkalbetik li Jeovae: «Jtot».

4. ¿Kʼuxi jnaʼojtik ti tskʼan chijnopaj ta stojolal li Jeovae?

⁴ ¿Mi vokol chkaʼitik ti jechuk xkiltik kʼuchaʼal jkʼanvanej Totil kuʼuntik li Jeovae? Junantike vokol van chkaʼitik ta skoj ti muʼyuk la xkʼuxubinutik jtotik kʼalal bikʼitutik toʼoxe. Tspat tajek koʼontontik ti xaʼibe smelolal ti kʼu yelan chkaʼi jbatik li Jeovae xchiʼuk tskʼan nopol oy ta jtojolaltik. Jaʼ yuʼun, xi chalbutik li ta Skʼope: «Nopajanik ta stojolal Dios, jech chnopaj tal ta atojolalik ek» (Sant. 4:8). Skʼanojutik tajek li Jeovae xchiʼuk chalbutik ti jaʼ jun lekil Totile.

5. Jech kʼuchaʼal chal Lukas 10:22, ¿kʼu yuʼun xuʼ skoltautik Jesus sventa masuk xijnopaj ta stojolal Jeovae?

⁵ Li Jesuse tskoltautik sventa masuk xijnopaj ta stojolal Jeova. Xojtikin lek xchiʼuk jaʼ jech stalelal kʼuchaʼal li Jeovae. Jaʼ yuʼun, xi laj yale: «Yiloj xa Totil ek li buchʼu yilojune» (Juan 14:9). Li Jesuse xkoʼolaj kʼuchaʼal jbankiltik ti chakʼ kiltik kʼuxi xuʼ jtsaktik ta mukʼ li Jtotike, ti jchʼunbetik smantale xchiʼuk ti lekuk xilutike. Li kʼusi ay spas ta balumil li Jesuse chakʼ kiltik ti toj lek yoʼonton li Jeovae xchiʼuk ti snaʼ xkʼanvane (kʼelo Lukas 10:22). Jkʼelbetik junantik skʼelobiltak.

6. ¿Kʼuxi jnaʼojtik ti chikintabat lek yuʼun Jeova li Jesuse?

⁶Li Jeovae chchikintabe li xnichʼnabtake. Jkʼeltik kʼuxi la xchikintabe li Xnichʼone. Kʼalal ep ta velta kʼopone muyel yuʼun li Jesuse, la xchikintabe (Luk. 5:16). Jaʼ jech la spas kʼalal oy kʼusi tsots skʼoplal la snop tspas li Jesuse, jech kʼuchaʼal kʼalal la stʼuj li 12 ta voʼ yajtakboltake (Luk. 6:12, 13). La xchikintabe xtok kʼalal jaʼo tsots tajek chil svokole. Kʼalal jutuk xa ox skʼan xvalopatinat yuʼun Judase, la skʼanbe vokol Stot ti akʼo xkoltaat sventa xkuch yuʼun li preva tsnuptane. Li Jeovae maʼuk noʼox la xchikintabe li yuni Nichʼone, yuʼun la stakbe tal jun  anjel sventa stsatsubtasbe yoʼonton (Luk. 22:41-44).

7. ¿Kʼu yelan chavaʼi aba ti chchikinta Jeova li a-orasione?

⁷ Li Jeovae jaʼ jech chchikintabutik kʼalal ta jkʼopontike xchiʼuk jaʼo tstakʼbutik kʼalal chtun tajek kuʼuntike (Sal. 116:1, 2). Jaʼ jech laj yakʼ venta jun ermana ti te nakal ta India ti solel ep kʼusi tsvul-o yoʼontone. Jaʼ yuʼun, la skʼanbe vokol Jeova ti akʼo xkoltaate. Xi chale: «Li ta JW Broadcasting^® sventa mayo ta 2019, te laj yichʼ alel kʼuxi xuʼ stsal kuʼuntik li vul oʼontone. Jaʼ li kʼusi chtun tajek kuʼune xchiʼuk jaʼ stakʼobil j-orasion laj kaʼi».

8. ¿Kʼutik yelan laj yakʼ ta ilel Jeova ti skʼanoj li Jesuse?

⁸ Li Jeovae chakʼ ta ilel ti skʼanojutik jech kʼuchaʼal laj yakʼ ta ilel ta stojolal li Xnichʼon ti kʼu sjalil ay ta balumile (Juan 5:20). La skolta sventa tsotsuk-o li xchʼunel yoʼontone, kʼalal laj yil svokole xchiʼuk laj yakʼbe li kʼusitik yan chtun yuʼune. Laj yalbe xtok ti skʼanoje xchiʼuk ti xmuyubaj ta stojolale (Mat. 3:16, 17). Li Jesuse mu stukuk laj yaʼi sba, yuʼun snaʼoj ti chkoltaat onoʼox yuʼun li Stote (Juan 8:16).

9. ¿Kʼusitik sprevailtak oy kuʼuntik ti skʼanojutik li Jeovae?

⁹ Jkotoltik kaʼiojtik ti skʼanojutik Jeova jech kʼuchaʼal laj yaʼi li Jesuse. Jnopbetik skʼoplal liʼe: yikʼojutik tal ta steklumal li Jeovae xchiʼuk yakʼoj kutsʼ kalaltik ta mantal ti skʼanojutike, ti jmoj noʼox tsobolutike xchiʼuk ti tspat koʼontontike (Juan 6:44). Jech xtok, nopolik noʼox chakʼbutik li jveʼeltik ta mantale xchiʼuk tskoltautik saʼel li kʼusitik chtun kuʼuntik jujun kʼakʼale (Mat. 6:31, 32). Kʼalal ta jnopbetik skʼoplal ti skʼanojutik tajek li Jeovae, mas to ta jkʼantik ek.

10. ¿Kʼuxi xuʼ jechuk jkʼan kermanotaktik jech kʼuchaʼal chkʼanvan Jeovae?

¹⁰ Li Jeovae skʼanoj li kermanotaktike. Pe ta skoj ti jelel stalel jkuxlejaltik o ti jelel kʼu yelan lijchʼi talele, xuʼ van vokol chkaʼitik ti xkakʼtik ta ilel ti jkʼanojtik li kermanotaktike. Jkotoltik oy kʼusitik xuʼ jpastik ti xuʼ van chopol chaʼiik li yantike o ti xuʼ jyayijesbetik yoʼontonike. Pe mi ta jkʼan kermanotik kʼuchaʼal skʼanoj Jeovae, xijmuyubaj noʼox xchiʼuk li kutsʼ kalaltik ta mantale (Efes. 5:1, 2; 1 Juan 4:19). Jkʼeltik kʼuxi xuʼ jchanbetik li Jeovae.

11. ¿Kʼuxi laj yakʼ ta ilel Jesus ti «kʼuxutik ta yoʼonton» li Jeovae?

¹¹Li Jeovae «kʼuxutik ta yoʼonton» (Luk. 1:78). Li buchʼu oy xkʼuxul yoʼontone chopol chaʼi kʼalal chil svokol yantike, tskʼel kʼuxi xuʼ skoltaan xchiʼuk tspatbe yoʼonton. Ti kʼu yelan laj yil krixchanoetik li Jesuse jaʼ te laj yakʼ ta ilel ti kʼux ta yoʼonton krixchanoetik li Jeovae (Juan 5:19). Li Vivliae chal ti «kʼalal laj yil li epal krixchanoetike, kʼuxubaj ta yoʼonton, yuʼun yayijem sbekʼtalik laj yil xchiʼuk tanpukik, xkoʼolaj kʼuchaʼal chijetik ti chʼabal jchabivanej yuʼunike» (Mat. 9:36). Maʼuk noʼox kʼuxubaj ta yoʼonton krixchanoetik li Jesuse, yuʼun la xpoxtaan li buchʼutik ipike, la skolta li buchʼutik tsots ch-abtejike xchiʼuk li buchʼutik tsots chil svokolike (Mat. 11:28-30; 14:14).

12. ¿Kʼutik yelan xuʼ xkakʼtik ta ilel xkʼuxul koʼontontik?

¹² Mi ta jkʼan chkakʼtik ta ilel ti oy ta koʼontontik li kermanotaktike xchiʼuk ti kʼux ta koʼontontike, skʼan jnoptik li kʼusitik vokol yakal tsnuptanike. Jech kʼuchaʼal liʼe, xuʼ van oy junuk ermana ti tsots tsakbil ta chamele. Muʼyuk te xvulvun ta  sventa li svokole, pe ta van stoj ta vokol mi laj yichʼ koltaele. ¿Mi xuʼ van xkakʼbetik li kʼusitik chtun yuʼun yutsʼ yalale? ¿Mi xuʼ van jkoltatik ta smeltsanel sveʼel o ta skusel sna? O jnoptik noʼox ti oy jun ermano ti muʼyuk xa yabtele. Sventa xkoltaat-o ti kʼu sjalil chʼabal yabtele, ¿mi xuʼ van jkoltatik jutuk ta takʼin, pe ti mu xkaltik ti voʼotik laj kakʼtike?

13, 14. ¿Kʼuxi xuʼ jchanbetik li slekil yoʼonton Jeovae?

¹³Li Jeovae toj lek snaʼ xtʼolpʼij o toj lek yoʼonton (Mat. 5:45). Mi ta jkʼantik ti oyuk xkʼuxul koʼontontike, mu jaʼuk to xbat jkolta kermanotaktik mi la skʼanbutike. Xuʼ voʼotik xlokʼ ta koʼontontik jech kʼuchaʼal tspas li Jeovae. Jujun kʼakʼale chakʼ lokʼuk kʼakʼal ti mu persauk ta jkʼanbetike. Li xkʼixnal xtoke tstabe sbalil skotol li krixchanoetike, maʼuk noʼox li buchʼutik snaʼ stojik ta vokole. Kʼalal chakʼbutik li kʼusitik chtun kuʼuntik li Jeovae, chakʼbutik ta ilel ti skʼanojutike. Ta melel, ¡jkʼanojtik tajek ta skoj ti lek snaʼ xtʼolpʼije!

¹⁴ Oy ep kermanotaktik ti yakal chchanbeik stalelal li Jtotik ta vinajele xchiʼuk lek snaʼ xakʼik li kʼusitik oy yuʼunike. Li ta 2013 ta Filipinase, echʼ mukʼta tsatsal ikʼaloʼ ti Haiyan sbie. Epal ermanoetike laj li snaike xchiʼuk skotol li kʼusi x-ayan yuʼunike. Pe li yutsʼ yalalik ta mantal ta spʼejel balumile ta anil noʼox koltavanik. Koliyal ti laj yakʼik matanal takʼin xchiʼuk ti ep buchʼutik ay koltavanikuke, laj yichʼ pasel jun mukʼta abtelal, yuʼun laj yichʼ meltsanel o chaʼvaʼanel jutuk mu 750 naetik kʼalal mu toʼox sta jun jabil yechʼele. Kʼalal jaʼo yakal li tsatsal chamel COVID-19, li ermanoetike laj yakʼik persa skoltael li yan ermanoetike. Kʼalal chlokʼ ta koʼontontik skoltaelike, te chkakʼtik ta ilel ti jkʼanojantike.

15, 16. Jech kʼuchaʼal chal Lukas 6:36, ¿kʼuxi xuʼ jchanbetik stalelal li Jeovae?

¹⁵Li Jeovae oy xkʼuxul yoʼonton ta jtojolaltik xchiʼuk chakʼutik ta perton (kʼelo Lukas 6:36). Li Jtotik ta vinajele skotol kʼakʼal chakʼbutik ta ilel xkʼuxul yoʼonton (Sal. 103:10-14). Li Jesus eke laj yakʼbe ta ilel xkʼuxul yoʼonton li yajchankʼoptak xchiʼuk laj yakʼanan ta perton akʼo  mi maʼuk tukʼil krixchanoetik. Pe maʼuk noʼox, yuʼun laj yakʼ xkuxlejal xtok sventa xkichʼtik chʼaybel li jmultike (1 Juan 2:1, 2). ¿Mi mu jechuk ti mas chijnopaj ta stojolal Jeova xchiʼuk Jesus ta skoj ti oy xkʼuxul yoʼontonik xchiʼuk ti snaʼ x-akʼvanik ta pertone?

¹⁶ Kʼalal ta sjunul koʼontontik chkakʼtik pertone, mas to ta jkʼan jbatik xchiʼuk li kermanotaktike (Efes. 4:32). Bateltike, mu kʼunuk chkaʼitik yakʼel perton, pe skʼan xkakʼtik persa ti jechuk jpastike. Jun ermanae chal ti ep koltaat li jun mantal lokʼ li ta revista Li Jkʼel-osil ta toyol ti xi sbie: «Pasbo abaik perton ta jujuntal». * Xi chale: «Li mantal taje la skoltaun sventa xkakʼ venta kʼusitik sbalil ta jtatik kʼalal chkakʼtik pertone. Te chal ti kʼalal chkakʼtik pertone, maʼuk skʼan xal ti lek chkiltik o lek chkaʼitik li kʼusi chopol laj kichʼtik pasbele. Jaʼ skʼan xal ti jchʼay ta joltik li kʼusi chopol laj kichʼtik pasbele xchiʼuk ti junuk noʼox koʼontontike». Kʼalal ta sjunul koʼonton chkakʼtik ta perton li kermanotaktike, chkakʼtik ta ilel ti jkʼanojantike xchiʼuk ti ta jchanbetik stalelal li Jeovae.

17. Jech kʼuchaʼal chal Mateo 5:16, ¿kʼuxi xuʼ xkichʼtik ta mukʼ li Jeovae?

¹⁷ Jaʼ jun mukʼta matanal chkaʼitik ti te tsakal jkʼoplaltik li ta yutsʼ yalal Jeova ta spʼejel balumil xchiʼuk ti jkʼanoj jbatik ta jujuntale. Ta jkʼantik ti jechuk xichʼik ta mukʼ Jeova li yan krixchanoetik eke. Jaʼ yuʼun, muʼyuk kʼusi chopol ta jpastik ti xuʼ sokesbe skʼoplal li Jeova o li steklumale. Lek ta jpas jtalelaltik skotol ora sventa xnopajik tal ta stojolal Jeova li krixchanoetike (kʼelo Mateo 5:16).

18. ¿Kʼusi tskoltautik sventa mu xijxiʼ kʼalal ta jcholtik mantale?

¹⁸ Bateltike, xuʼ van xkichʼtik pʼajel o kontrainel ta skoj ti ta jchʼunbetik smantal li Jtotik ta vinajele. ¿Kʼusi van xuʼ jpastik mi chijxiʼ ta yalbel yantik li kʼusi jchʼunojtike? Teuk ta joltik ti tskoltautik li Jeova  xchiʼuk Jesuse. Li Jesuse laj yalbe yajchankʼoptak ti akʼo mu svul yoʼontonik ta sventa li kʼusi chalike o ti kʼu yelan chalike. Xi laj yalanbee: «Li vaʼ orae, te chavichʼ akʼbel anaʼik li kʼusi chavalike. Yuʼun maʼuk noʼox voʼoxuk chakʼopojik, jaʼ chkʼopoj ta atojolalik li xchʼul espiritu Atotike» (Mat. 10:19, 20).

19. ¿Kʼuxi tsots yoʼonton la xchol mantal jun estudiante?

¹⁹ Kalbetik skʼoplal jun ermano ti Robert sbie. Kʼalal jaʼtik toʼox lik yichʼ estudio xchiʼuk ti muʼyuk toʼox ep kʼusi xchanoje, persa bat ta snail chapanobbail ta Sudáfrica sventa xbat yal kʼu yuʼun muʼyuk ch-och ta soltaroal. Jamal laj yal ti muʼyuk jech tspas ta skoj ti skʼanoj li yermanotake. Te laj yakʼ ta ilel ti oy sbalil chil ti te tsakal skʼoplal li ta yutsʼ yalal Jeovae. Xi jakʼbat yuʼun jun jchapanvaneje: «¿Buchʼutik jaʼ li avermanotake?». Muʼyuk toʼox snopoj mi jech chichʼ jakʼbel li Roberte. Pe ta anil noʼox vul ta sjol li teksto laj yichʼ kʼelel li kʼakʼal taje. Jaʼ li Mateo 12:50 ti xi chale: «Li buchʼu tspas li kʼusi tskʼan yoʼonton Jtot ta vinajele jaʼ jbankil kitsʼinabtak, jaʼ jvixobtak xchiʼuk kixleltak xchiʼuk jaʼ jmeʼ». Li Roberte muʼyuk toʼox bu jal yakal chchan Vivlia, pe koltaat yuʼun li s-espiritu Jeova sventa xtakʼ yuʼun li kʼusitik muʼyuk toʼox snopoj ti jech chichʼ jakʼbele. Ta melel, ¡muyubaj tajek yuʼun li Jeovae! Ta me xmuyubaj kuʼuntik mi ta jpat koʼontontik ta stojolal kʼalal muʼyuk chijxiʼ ta xcholel mantal ti butik vokol ta pasele.

20. ¿Kʼusi skʼan jpastik-o batel? (Juan 17:11, 15).

²⁰ Oyuk-o sbalil xkiltik ti te oyutik ta jun utsʼ alalil ti bu skʼanoj sbaike. Toj echʼ xa noʼox lek stalelal li Jtotik Jeovae xchiʼuk oy ep kermanotaktik ti skʼanojutike. Mu me jchʼay ta joltik taje. Li Satanas xchiʼuk sviniktake tskʼanik ti akʼo jnoptik ti muʼyuk skʼanojutik li Jeovae xchiʼuk tskʼanik ti mu jmojuk oyutike. Pe jaʼuk li Jesuse la skʼanbe Jeova ti akʼo xchabiutik sventa jmojuk-o oyutike (kʼelo Juan 17:11, 15). Li Jeovae yakal tstakʼ li orasion taje. Jchanbetik stalelal li Jesuse xchiʼuk mu jnoptik ti muʼyuk skʼanojutik xchiʼuk ti muʼyuk tskʼelutik li Jtotik ta vinajele. Nopajkutik mas ta stojolal li kutsʼ kalaltik ta mantale.