Li ta 1 Korintios 15:8, li Pabloe xi laj yale: «Ta slajebale, laj yakʼ sba ta ilel ta jtojolal ek, ta skoj taje, xikoʼolaj kʼuchaʼal li buchʼu muʼyuk staoj yual vokʼe». Li Pabloe jaʼ laj yalbe skʼoplal kʼalal laj yilbe slekilal yutsilal Jesus ta vinajele. Ta voʼnee, chkaltik toʼox ti xkoʼolaj ti akʼbat smoton sventa xvokʼ ta achʼe o ti xichʼ chaʼkuxesel ta jun kuxlejal ti mu xvinaj ta kʼelel kʼalal mu toʼox sta yoraile, yuʼun li chaʼkuxesel ta vinajele jal toʼox skʼan xkʼot ta pasel. Pe kʼalal la jkʼelbekutik lek skʼoplal li versikulo liʼe, laj kakʼkutik venta ti skʼan jelel ti kʼu yelan chichʼ toʼox aʼibel smelolale.

Li ta versikulo liʼe, li jtakbol Pabloe jaʼ laj yalbe skʼoplal li kʼusi kʼot ta pasel kʼalal lik yichʼ ta mukʼ Jeovae. Pe ¿kʼusi la skʼan laj yal kʼalal muʼyuk staoj yual vokʼ xie? Xuʼ van oy jaytosuk kʼuxi ta aʼibel smelolal.

Toj anil xchiʼuk toj labal sba ti kʼu yelan lik yichʼ ta mukʼ Jeova li Pabloe. Kʼalal maʼuk to yuilal chvokʼ li jun olole, chʼayal chtavan, yuʼun ta anil chvokʼ. Oy jun velta li Saulo ti laj yichʼ ojtikinel kʼuchaʼal Pablo ta mas tsʼakale, bat ta Damasko sventa xbat skontrain li yajtsʼaklomtak Kristo li ta lum taje. Kʼalal ta be xa ox xbate, mu snaʼ mi te chakʼ sba ta ilel Jesus ti chaʼkuxiem xa oxe. Ti kʼu yelan lik yichʼ ta mukʼ Jeova li Pabloe maʼuk noʼox stuk ti chʼayal to kʼot yoʼontone, yuʼun jech laj yaʼiik ek li yajtsʼaklomtak Kristo ta Damasko ti chbat ox kontrainatikuk yuʼun li Pabloe. Jech xtok, toj labal sba li kʼusi kʼot ta pasele, yuʼun mak-o sat jayibuk kʼakʼal li Pabloe (Ech. 9:1-9, 17-19).

«Maʼuk ta yorail» kʼalal oy kʼusi akʼbat yil li Pabloe. Kʼalal xi toʼox chal li ta griego kʼope: «Li buchʼu muʼyuk staoj yual vokʼe», xuʼ van xi chichʼ jelubtasel xtoke: «Maʼuk ta yorail vokʼ». Li Traducción Kadosh Israelita Mesiánica de estudio xi tsjelubtase: «Jelel skʼakʼalil livokʼ». Kʼalal lik yichʼ ta mukʼ Jeova li Pabloe, li Jesuse sutem xa ox batel ta vinajel. Li Pabloe laj yalbe skʼoplal ta yan versikuloetik ti oy buchʼutik laj yilik ti chaʼkuxiem xa ox Jesus kʼalal jutuk xa ox skʼan xbat ta vinajele. Pe muʼyuk toʼox yiloj ti chaʼkuxiem Jesus li Pabloe (1 Kor. 15:4-8). Ti kʼu yelan ta anil laj yakʼ sba ta ilel Jesus ta stojolal li Pabloe jaʼ to te laj yakʼ venta ti chaʼkuxiem ta melele akʼo mi maʼuk ta yorail yilel.

Bikʼit laj yakʼ sba kʼalal jech laj yalbe sba skʼoplale. Li buchʼutik xchanojbeik skʼoplale chalik ti kʼalal jech laj yal Pablo li ta versikulo taje, yakal la chakʼ ta aʼiel ti oy kʼusi staoj ti mu sta-o chaʼie. Mi jech la skʼan laj yal li Pabloe, yakal chakʼ ta aʼiel ti mu sta-o chaʼi ti kʼot ta jtakbole. Jaʼ yuʼun, xi laj yale: «Voʼon li buchʼu mas bikʼit ta skotol li jtakboletike xchiʼuk mu jta-o ti jtakbol chkichʼ albele, yuʼun la jkontrainbe li stsobobbail Diose. Ti kʼusi jtaoje jaʼ koliyal li slekil yutsil yoʼonton Diose» (1 Kor. 15:9, 10).

Li kʼusi la skʼan laj yal li Pablo yaʼeluke jaʼ ti ta anil xchiʼuk ti labal sba laj yakʼ sba ta ilel Jesus ta stojolale, ti lik noʼox yichʼ ta mukʼ li Jeovae o ti mu sta-o chaʼi ti kʼu yelan laj yakʼ sba ta ilel Jesus ta stojolale. Kʼuk xiuk noʼox, li kʼusi jnaʼojtike jaʼ ti ep tajek sbalil laj yaʼie. Jaʼ te la xchʼun-o ti chaʼkuxiem xa li Jesuse. Jaʼ yuʼun, jaʼ chalilanbe-o skʼoplal kʼalal chchol mantale (Ech. 22:6-11; 26:13-18).