1. ¿Kʼusi poʼot xa spas li Jesuse?

 LI AVIE oy kʼusitik toj labalik sba chkʼot ta pasel, yuʼun li Jesuse jutuk xa skʼan xchapan skotol li krixchanoetike. ¿Kʼuxi jnaʼojtik ti poʼot xa tajek xkʼot ta pasel taje? Yuʼun li Jesuse laj yalbe yajchankʼoptak jun albil kʼop ti jaʼ «senyail» ti liʼ xa oye manchuk mi mu xkiltik xchiʼuk ti jaʼ senyail ti «poʼot xa xlaj skotol li kʼusitik oy ta balumile» (Mat. 24:3). Li albil kʼop taje te ta jtatik li ta kapitulo 24 xchiʼuk 25 ta Mateo, ta kapitulo 13 ta Markos xchiʼuk ta kapitulo 21 ta Lukas.

2. ¿Kʼusi ta jchantik li ta xchanobil liʼe, xchiʼuk kʼu yuʼun?

² Li Jesuse laj yalbe skʼoplal oxib lokʼol kʼopetik ti chtun kuʼuntik sventa spʼijubtasutike: li lokʼol kʼop ta sventa li chijetik xchiʼuk li tentsunetike, li lajunvoʼ tojol tsebetike xchiʼuk li talentoetike. Li ta jujuntal skʼelobile, te chkakʼtik venta ti kʼalal chchapanvan li Jesuse tstsak ta venta kʼu yelan stalelal ta jujuntal li krixchanoetike. Jaʼ ta jkʼelbetik skʼoplal li ta xchanobil liʼe xchiʼuk ta jkʼeltik kʼusi chakʼ jchantik. Jaʼ baʼyel kalbetik skʼoplal li lokʼol kʼop ta sventa li chijetik xchiʼuk li tentsunetike.

LI CHIJETIK XCHIʼUK LI TENTSUNETIKE

3. ¿Kʼusi ora chchapan krixchanoetik li Jesuse?

³ Li Jesuse laj yal ti kʼalal chchapan ta jujuntal li krixchanoetike jaʼ tstsak ta venta mi la xchʼamik li lekil aʼyejetike xchiʼuk mi la skoltaik li yermanotak Jesus ti chbatik ta vinajele (Mat. 25:​31-46). ¿Kʼusi ora chal Jesus ti xkoʼolaj ta chij o ta tentsun li jun krixchanoe? Jaʼo kʼalal yakal li «mukʼta tsatsal [vokolile]», kʼalal jutuk xa skʼan xlik li Armagedone (Mat. 24:21). Jech kʼuchaʼal jun jchabichij ti parte chakʼ li chijetik xchiʼuk li tentsunetike, li Jesus eke jaʼ jech parte chakʼ li buchʼutik la skoltaik li buchʼutik chbatik ta vinajele  xchiʼuk parte chakʼ li buchʼutik muʼyuk xkoltavanike.

4. Jech kʼuchaʼal chal Isaias 11:3 xchiʼuk 4, ¿kʼu yuʼun xuʼ jpat koʼontontik ti tukʼ chchapanvan li Jesuse? (Kʼelo xtok li lokʼoletik ta pajina 1).

⁴ Li Vivliae chal ti laj yichʼ vaʼanel ta jchapanvanej li Jesuse xchiʼuk ti tukʼ chchapanvane (kʼelo Isaias 11:​3, 4). Li stuke tstsak ta venta li kʼusi tspasik ta jujuntal li krixchanoetike, li kʼusi tsnopike xchiʼuk li kʼusi chalike. Te me smakojbe skʼoplal xtok ti kʼu yelan tskoltaik li yermanotak Kristoe (Mat. 12:​36, 37; 25:40). Li stuke snaʼoj li buchʼutik la skoltaik li buchʼutik chbatik ta vinajele xchiʼuk li kʼusitik la spasike. a Jtos ti kʼu yelan toj tsots skʼoplal tskolta sbaike, jaʼ li ta cholmantale. Li buchʼutik chkoltavanike chichʼ alel ti tukʼ skʼoplalike xchiʼuk ti xuʼ xkuxiik ta sbatel osil liʼ ta balumile (Mat. 25:46; Apok. 7:​16, 17). ¡Toj kʼupil sba li smoton tstaik ta skoj ti tukʼ chakʼ sbaike! Mi jech-o tukʼ chakʼ sbaik kʼalal jaʼo li mukʼta tsatsal vokolil xchiʼuk kʼalal mi echʼ xa oxe, muʼyuk xa me chichʼ tupʼbel li sbiik ti te tsʼibabil li ta slivroal kuxlejale (Apok. 20:15).

5. ¿Kʼusi chakʼ jchantik li lokʼol kʼop ta sventa li chijetik xchiʼuk li tentsunetike, xchiʼuk buchʼutik ti skʼan xaʼibeik smelolale?

⁵ Skʼan tukʼ xavakʼ aba. Li lokʼol kʼop ta sventa li chijetik xchiʼuk li tentsunetike jaʼ mas chalbe skʼoplal li buchʼutik chkuxiik ta sbatel osil liʼ ta balumile. Li stukike chakʼik ta ilel ti tukʼ yakʼoj sbaik kʼalal tskoltaik li yermanotak ta cholmantale xchiʼuk ti ta sjunul yoʼonton chchʼunbeik smantal li tukʼil xchiʼuk li pʼijil mosoile (Mat. 24:45). Pe li buchʼutik spatoj yoʼonton chbatik ta vinajele, skʼan xaʼibeik lek smelolal ek li pʼijubtasel chal ta lokʼol kʼope. ¿Kʼu yuʼun? Yuʼun li Jesuse toj tsots skʼoplal chil li kʼusitik tspasik, li kʼusitik tsnopik xchiʼuk li kʼusitik chalike. Jaʼ yuʼun, skʼan xakʼik ta ilel ti tukʼ chakʼ sbaik eke. Avie, jaʼ xa chkalbetik batel skʼoplal li yan chib lokʼol kʼopetik ti te ta jtatik ek li ta kapitulo 25 ta Mateoe. Li ta lokʼol kʼop taje, jaʼ te chichʼik pʼijubtasel li buchʼutik chbatik ta vinajele. Kalbetik batel skʼoplal li lokʼol kʼop ta sventa li lajunvoʼ tojol tsebetike.

LI LAJUNVOʼ TOJOL TSEBETIKE

6. ¿Kʼuxi laj yakʼik ta ilel ti pʼijik li voʼob tojol tsebetike? (Mateo 25:​6-10).

⁶ Li ta lokʼol kʼop laj yal Jesuse, te laj yalbe skʼoplal lajunvoʼ tojol tsebetik ti bat snupik ta be li jnupunel kereme (Mat. 25:​1-4). Skʼan jmoj x-ochik li ta skʼinal nupunele. Li Jesuse laj yal ti oy voʼob tsebetik ti pʼijike xchiʼuk ti oy voʼob ti bolike. Li buchʼutik pʼijike lek chapalik xchiʼuk vikʼil satik; jpʼel ta yoʼonton tsmalaik mu ventauk mi xjalij, manchuk mi akʼobal xa xvul. Jech oxal, laj yichʼ batel skantilik sventa skʼel li sbeike. Pe maʼuk noʼox taje, yuʼun laj to xchʼolik batel mas aseite jaʼ ti mi jalij li jnupunel kereme. Ti jech la spasike, jaʼ sventa mu xtupʼ li skantilike (kʼelo Mateo 25:​6-10). Kʼalal vul li jnupunel kereme, li pʼijil tsebetike jmoj ochik li ta skʼinal nupunele. Jaʼtik jech chkʼot ta stojolalik ek li buchʼutik chbatik ta vinajele. Li buchʼutik tukʼ chakʼ sbaik xchiʼuk ti vikʼil lek satike smalaojik chvul li jnupunel kereme, jaʼ xkaltik, li Jesuse. Vaʼun, xuʼ me koʼol x-ochik li ta Ajvalilal yuʼun Diose (Apok. 7:​1-3). b Pe ¿kʼusi kʼot ta stojolalik li yan voʼob tojol tsebetik ti bolike?

7. ¿Kʼusi kʼot ta stojolalik li voʼob tojol tsebetik ti bolike, xchiʼuk kʼu yuʼun?

⁷ Li voʼob tojol tsebetik ti bolike mu  xkoʼolaj kʼuchaʼal li yan tsebetike, yuʼun muʼyuk chapalik lek sventa smalaik xvul li jnupunel kereme. Li lokʼol kʼope chal ti kʼalal laj yaʼiik ti nopol xa xtal li jnupunel kereme, laj yakʼik venta ti chtupʼ xa batel li skantilike. Ta skoj ti chʼabal yichʼojik batel mas s-aseiteike, bat smanik talel. Kʼalal vul li jnupunel kereme, muʼyuk bu sutemik-o tal. Vaʼun, li tojol tsebetik ti pʼijike «koʼol och xchiʼukik li ta skʼinal nupunel [ . . . ] ti chapalik xa onoʼoxe; te une laj yichʼ makel li tiʼ nae» (Mat. 25:10). Ta mas tsʼakale, kʼalal sutik talel li tojol tsebetik ti bolike, tskʼan ox ch-ochik li ta kʼine, pe xi albatik yuʼun li jnupunel kereme: «Mu xakojtikinik» (Mat. 25:​11, 12). Muʼyuk xchapanoj sbaik lek sventa smalaik li jnupunel kereme, yuʼun yalojik ti chvul noʼoxe. ¿Kʼusi ch-akʼbat xchanik li buchʼutik chbatik ta vinajel li lokʼol kʼop taje?

8, 9. ¿Kʼusi ch-akʼbat xchanik li buchʼutik chbatik ta vinajel li lokʼol kʼop ta sventa li lajunvoʼ tojol tsebetike? (Kʼelo xtok li lokʼoletike).

⁸ Vinajuk ti chapalot xchiʼuk ti vikʼil asate. Li kʼusi laj yal Jesuse maʼuk skʼan xal ti oy chaʼtsop li buchʼutik chbatik ta vinajele, jaʼ xkaltik, ti oy jtsop ti lek chapalik ta smalael jaʼ to mi laj li kʼusitik oy ta balumile xchiʼuk ti oy jtsop ti muʼyuk chapalike. Taje maʼuk jech skʼan xal, yuʼun li kʼusi laj yalbe skʼoplale jaʼ ti mi muʼyuk chapalik sventa xkuch yuʼunik kʼalal to ta slajeb li buchʼutik chbatik ta vinajele, muʼyuk tsta li smotonike (Juan 14:​3, 4). ¡Taje maʼuk tajimol! Mu ventauk mi chijbat ta vinajel o mi liʼ chijkom ta balumile, jkotoltik skʼan jtsaktik ta venta li pʼijubtasel laj yal Jesus li ta lokʼol kʼop ta sventa li lajunvoʼ tojol tsebetike: skʼan vikʼiluk-o jsatik xchiʼuk chapalukutik sventa xkuch kuʼuntik kʼalal to ta slajeb (Mat. 24:13).

⁹ Jech kʼuchaʼal laj xa jchantik talele, li ta lokʼol kʼop laj yal Jesus ta sventa li lajunvoʼ tojol tsebetike te laj yal ti toj tsots skʼoplal ti vikʼiluk jsatik xchiʼuk ti chapalukutike. Laje, li Jesuse jaʼ xa lik yal li lokʼol kʼop ta sventa li talentoetike, ti bu chal ti skʼan baxbolukutik ta abtele.

 LI TALENTOETIKE

10. ¿Kʼuxi laj yakʼik ta ilel ti tukʼ laj yakʼ sbaik li chaʼvoʼ mosoiletike? (Mateo 25:​19-23).

¹⁰ Li ta lokʼol kʼop liʼe, li Jesuse laj yalbe skʼoplal chaʼvoʼ mosoiletik ti tukʼ laj yakʼ sbaik ta stojolal li yajvalike xchiʼuk ti oy jun ti mu jechuk la spase (Mat. 25:​14-18). Kʼalal muʼyuk toʼox chbat ta yan lum li yajvalike, akʼbatik komel jayibuk talentoetik, jaʼ xkaltik, epal takʼin. Li chaʼvoʼ mosoiletike laj yakʼik ta ilel ti tukʼ laj yakʼ sbaike, yuʼun tsots abtejik sventa x-epaj skanal li yajvalike. Li kʼusi kʼot ta pasel kʼalal sut xa ox tal li yajvalike, jaʼ ti jolin xa ox yuʼunik ti kʼu yepal iktabatike. Vaʼun, xi kʼupil kʼoptaatik yuʼun li yajvalike: «Kuxetuk noʼox avoʼonton xchiʼuk li avajvale» (kʼelo Mateo 25:​19-23). Pe ¿kʼusi la spas li jun mosoil ti akʼbat komel takʼin eke?

11. ¿Kʼusi kʼot ta stojolal li chʼajil mosoile, xchiʼuk k’u yuʼun?

¹¹ Li yajval abtele laj yakʼbe komel jun talento li yan mosoile sventa xjolin yuʼun ek. Pe li mosoil taje toj chʼaj, jaʼ noʼox la sjokʼ balumil sventa te smuk komel li talentoe. Kʼalal sut talel li yajvale, la sutesbe li stakʼine. Muʼyuk lek stalelal li mosoile, yuʼun muʼyuk chopol xaʼi ti muʼyuk xjolin yuʼun li takʼine. Kʼajomal noʼox laj yalbe yajval ti jaʼ jun vinik ti tsots snaʼ xpasvan ta mantale. Ta skoj taje, ilin li yajvale, vaʼun la spojbe li talentoe xchiʼuk la snuts lokʼel ta sna (Mat. 25:​24, 26-30).

12. ¿Buchʼutik skʼoplal avi li chaʼvoʼ mosoiletik ti tukʼ laj yakʼ sbaike?

¹² Li chaʼvoʼ mosoiletik ti tukʼ laj yakʼ sbaike jaʼ skʼoplal li yajtsʼaklomtak Kristo ti chbatik ta vinajel ti tukʼ chakʼ sbaike. Li yajval abtelal ti jaʼ li Jesukristoe, xi laj yalbe ta jujuntale: «Kuxetuk noʼox avoʼonton xchiʼuk li avajvale». Taje jaʼ skʼan xal ti ch-akʼbat smotonik ta vinajele, jaʼ xkaltik, li baʼyel chaʼkuxesele (Mat. 25:​21, 23; Apok. 20:5 sbavokʼal). Pe li mosoil ti chʼaj noʼoxe jaʼ spʼijubtaselik li buchʼutik chbatik ta vinajel ti mu jechuk tspasike. Jkʼeltik batel ti kʼu yuʼun jech chkaltike.

13, 14. ¿Kʼusi ch-akʼbat xchanik li buchʼutik chbatik ta vinajel li lokʼol kʼop ta sventa li talentoetike? (Kʼelo xtok li lokʼoletike).

¹³ Akʼo ta ilel ti baxbolot ta abtele. Li ta  lokʼol kʼop ta sventa li talentoetike, li Jesuse maʼuk la skʼan laj yal ti chchʼajubik ta abtel li buchʼutik chbatik ta vinajele. Yuʼun jech kʼuchaʼal li lokʼol kʼop ta sventa li lajunvoʼ tojol tsebetik laj kaltike, jaʼ noʼox sventa xichʼik pʼijubtasel. Jech xtok, te albatik kʼusi chkʼot ta pasel mi maʼuk xa ta sjunul yoʼonton tspasbeik li yabtele: muʼyuk chtaatik ta ikʼel xchiʼuk muʼyuk chichʼik tʼujel. Vaʼun, muʼyuk ch-ochik li ta Ajvalilal yuʼun Dios ta vinajele (2 Ped. 1:10).

¹⁴ Li ta lokʼol kʼop laj yal Jesus ta sventa li lajunvoʼ tojol tsebetik xchiʼuk ta sventa li talentoetike, jamal laj yalbe li buchʼutik chbatik ta vinajel ti skʼan chapalikuk, vikʼiluk satik xchiʼuk ti baxbolikuk ta abtele. Pe taje maʼuk noʼox junchib li pʼijubtasel albatik komel li buchʼutik chbatik ta vinajele, yuʼun te to ta jtatik yan pʼijubtasel ta Mateo 24:40 xchiʼuk 41. Jkʼeltik batel li versikuloetik taje.

¿BUCHʼU «CH-IKʼAT BATEL»?

15, 16. Jech kʼuchaʼal chal Mateo 24:40 xchiʼuk 41, ¿kʼu yuʼun toj tsots skʼoplal ti vikʼiluk satik li buchʼutik tʼujbil chbatik ta vinajele?

¹⁵ Kʼalal skʼan toʼox xal li oxib lokʼol kʼopetik li Jesuse, laj yalbe skʼoplal ti chkʼot yorail ti chichʼik chapanel li buchʼutik chbatik ta vinajele, vaʼun jaʼ te chvinaj mi lek ch-ilatik. Jaʼ laj yalbe skʼoplal chaʼvoʼ viniketik ti ch-abtejik ta osiltike xchiʼuk chaʼvoʼ antsetik ti yakal chjuchʼunike. Xchaʼvoʼal li viniketike jmoj kʼusi tspasik, jech li antsetik eke jmoj kʼusi tspasik. Pe xi laj yal li Jesuse: «Li june ch-ikʼat batel, li yane te ch-iktaat komel» (kʼelo Mateo 24:​40, 41). Li ta yan versikuloe, xi laj yalbe li yajchankʼoptake: «Vikʼiluk-o me asatik, yuʼun mu xanaʼik kʼusi kʼakʼalil chtal li Avajvalike» (Mat. 24:42). Li Jesuse jaʼtik jech laj yal xtok kʼalal laj xa ox yalbe skʼoplal li lokʼol kʼop ta sventa li lajunvoʼ tojol tsebetike (Mat. 25:13). ¿Mi koʼol van kʼusi chakʼ ta chanel li lokʼol kʼopetik taje? Yaʼeluke jech. Jaʼ noʼox me ch-ikʼat batel li buchʼu yichʼoj tʼujel ta melele xchiʼuk mi tukʼ yakʼoj sbae, vaʼun chchʼamat yuʼun Jesus li ta Ajvalilal ta vinajele (Juan 14:3).

¹⁶ Vikʼiluk asat. Mi muʼyuk lek vikʼil sat ta mantal junuk li buchʼu tʼujbil chbat ta vinajele, muʼyuk me chichʼ ikʼel batel xchiʼuk li buchʼutik tʼujbilike (Mat. 24:31). Jech xtok, skotol li buchʼutik spatoj yoʼonton chkuxiik liʼ ta balumile, skʼan me stsakik lek ta venta ek li pʼijubtasel laj yal Jesuse: ti tukʼ xakʼ sbaike xchiʼuk ti vikʼiluk satike.

17. ¿Kʼu yuʼun muʼyuk srasonal ti jvul koʼontontik mi oy to buchʼu la stʼuj Jeova sventa xbat ta vinajel avie?

¹⁷ Xkojtikintik lek li Jeovae, jaʼ yuʼun jpatoj lek koʼontontik ti lek li kʼusi chkʼot ta nopel yuʼune. Mi oy to buchʼu la stʼuj Jeova avi sventa xbat ta vinajele, muʼyuk srasonal sventa jvul koʼontontik. c Teuk ta joltik li loʼil laj yal Jesus ta sventa li j-abteletik ta stsʼunel uvae, ti bat xa kʼakʼal takatik ta ikʼel ta abtele (Mat. 20:​1-16). Li buchʼutik bat xa kʼakʼal likik ta abtele koʼol laj yichʼ stojolik xchiʼuk li buchʼutik sob likik ta abtele. Jaʼ jech ek, skotol li buchʼutik tʼujbil chbatik ta vinajel ti tukʼ yakʼoj sbaike koʼol chichʼ li smotonike, mu ventauk kʼusi ora laj yichʼik tʼujel.

TSAKO ME TA VENTA LI PʼIJUBTASELETIKE

18, 19. ¿Kʼusi la jchantik xchiʼuk kʼusi pʼijubtasel la jkʼeltik li ta xchanobil liʼe?

¹⁸ ¿Kʼusi ti la jchantik xa talele? Li lokʼol kʼop ta sventa li chijetik xchiʼuk li tentsunetike chakʼ ta ilel ti toj tsots skʼoplal ti tukʼ xakʼ sbaik li buchʼutik spatoj yoʼonton  chkuxiik sbatel osil liʼ ta balumile. Taje jaʼ jech skʼan spasik avi xchiʼuk kʼalal mi yakal xa ox li mukʼta tsatsal vokolile. Mi kʼot yoraile, li Jesuse jaʼ noʼox xuʼ xal ti buchʼutik tukʼike, vaʼun chakʼbe xkuxlejalik ta sbatel osile (Mat. 25:46).

¹⁹ Jech xtok, laj xa kalbetik skʼoplal chib lokʼol kʼopetik ti jaʼ sventa spʼijubtaselik li buchʼutik chbatik ta vinajele. Li ta lokʼol kʼop ta sventa li lajunvoʼ tojol tsebetike, te la jchantik ti oy voʼob tsebetik ti lek chapalik xchiʼuk ti vikʼil satike. Laj yakʼ ta ilel spʼijilik, yuʼun la smalaik li jnupunel kereme, akʼo mi muʼyuk xvul ta anil. Yan li voʼob bol tsebetike, muʼyuk chapal xtaatik. Jaʼ yuʼun, muʼyuk x-ochik ti bu oy li jnupunel kereme. ¿Kʼusi chakʼ jchantik taje? Jaʼ ti skʼan chapalukutik sventa jmalatik ti kʼusi ora chtal yakʼbe slajeb kʼusitik chopol ta balumil li Jesuse, manchuk mi xjalij. Li ta lokʼol kʼop ta sventa li talentoetike, te laj kiltik ti oy chaʼvoʼ mosoiletik ti baxbolik ta abtele. Ta skoj ti tukʼ laj yakʼ sbaik xchiʼuk ti laj yakʼik persa xjolin stakʼin li yajvalike, lek ilatik. Pe jaʼuk li chʼajil mosoile, nutsat lokʼel. ¿Kʼusi chakʼ jchantik taje? Jaʼ ti jechuk-o baxbolutik ta spasbel yabtel Jeova kʼalal to ta slajebe. Jech xtok, li Jesuse laj yakʼ ta chanel ti skʼan vikʼiluk-o satik li buchʼutik chbatik ta vinajel sventa x-ochik li ta Ajvalilal ta vinajele. Li stukike oy xa tajek ta yoʼontonik ti xkʼot yorail ti xichʼik ikʼel batel ti bu oy li Jesuse. Kʼalal mi echʼ xa ox li Armajedone, chkʼotik ta slekom li «Chʼiom Chije», vaʼun chnupunik (2 Tes. 2:1; Apok. 19:9).

20. ¿Kʼusi tspas Jeova ta jtojolaltik mi ta jtsaktik ta venta li pʼijubtaseletike?

²⁰ Jutuk xa tajek skʼan xchapanutik li Jesuse, pe muʼyuk srasonal sventa xijxiʼutik. Mi tukʼ kakʼoj jbatik ta stojolal li Jtotik Jeovae, chakʼbutik li juʼelal ti mu kʼusi xkoʼolaj-oe sventa teuk vaʼalutik «ta stojolal li Xnichʼon Krixchanoe» (2 Kor. 4:7; Luk. 21:36). Jaʼ yuʼun, mu ventauk mi jpatoj koʼontontik chijkuxi ta vinajel o mi liʼ chijkuxi ta balumile, jtsaktik ta venta li pʼijubtasel laj yal Jesus li ta lokʼol kʼopetike. Mi jech ta jpastike, lek me chilutik li Jtotik Jeovae xchiʼuk ta skoj ti skʼanojutik tajeke, te me tsakal chkom jbitik li ta slivroal kuxlejale (Dan. 12:1; Apok. 3:5).