1, 2. ¿Kʼu yuʼun xijmuyubaj noʼox li yajtunelutik Jeovae? (Santiago 1:​22-25).

 LI Jeova xchiʼuk li skʼanbil Nichʼone tskʼanik ti xijmuyubajuk noʼoxe. Xi laj yal li buchʼu la stsʼiba Salmo 119:2: «Xmuyubajik noʼox li buchʼutik tstsakik ta venta li tojobtasel yuʼune, li buchʼutik ta sjunul yoʼonton tsaʼike». Xi laj yal li Jesus eke: «¡Xmuyubajik li buchʼutik chaʼiik li skʼop Diose xchiʼuk ti tspasik li kʼusi chale!» (Luk. 11:28).

² Xijmuyubaj noʼox li yajtunelutik Jeovae. ¿Kʼu yuʼun? Oy jayibuk srasonal ti kʼu yuʼun jech chkaʼi jbatike. Li srasonal ti mas tsots skʼoplale jaʼ ti ta jkʼeltik skotol kʼakʼal li Skʼop Diose xchiʼuk ti chkakʼ kipaltik ta yakʼel ta jkuxlejaltike (kʼelo Santiago 1:​22-25).

3. ¿Kʼusi sbalil ta jtatik mi laj kakʼ ta jkuxlejaltik li Skʼop Diose?

³ Ep ta jtabetik sbalil kʼalal ta jpastik «li kʼusi chal skʼop Diose». June jaʼ ti xmuyubaj noʼox kuʼuntik li Jeovae, vaʼun xijmuyubaj me tajek ek (Ekl. 12:13). Yan xtoke, kʼalal ta jchʼuntik li kʼusi chal li Skʼop Diose, jaʼ me tskoltautik sventa lekuk xkil jbatik xchiʼuk li kutsʼ kalaltike xchiʼuk ti lekuk xkil jbatik xchiʼuk li kermanotaktike. Yikʼaluk van avakʼoj xa venta atuk ti jaʼ jech chkʼot ta pasele. Jech xtok, muʼyuk me ta jtikʼ jbatik ta vokoliletik jech kʼuchaʼal tsnuptanik yantik ta skoj ti muʼyuk chchʼunbeik smantaltak Jeovae. Yuʼun li ajvalil Davide xi laj yal kʼalal laj yalbe skʼoplal smantal Jeova, li kʼusitik chale xchiʼuk ta sventa li kʼusitik tsnope: «Mukʼ me smoton tstaik mi la xchʼunike» (Sal. 19:​7-11).

4. ¿Kʼu yuʼun oy bakʼintik ti vokol chkaʼitik yakʼel ta jkuxlejaltik li Skʼop Diose?

 ⁴ Akʼo mi ep sbalil ta jtatik kʼalal ta jchantik li Skʼop Diose, oy onoʼox vokol chkaʼitik ta yakʼel ta jkuxlejaltik. Melel onoʼox ti solel mu xijxokobe, pe skʼan me jchʼakbetik yorail sventa jchan li Jvivliatike, yuʼun jaʼ te chkakʼtik venta kʼusi tskʼan Jeova ti akʼo jpastike. Jaʼ yuʼun, li ta xchanobil liʼe oy kʼusitik ta jkʼeltik ti jaʼ tskoltautik sventa jchantik skotol kʼakʼal li Vivliae. Jech xtok, ta jkʼeltik kʼusi xuʼ skoltautik sventa jnopbetik skʼoplal li kʼusi ta jchantike xchiʼuk ti jkʼeltik kʼuxi xuʼ xkakʼ ta jkuxlejaltike.

CHʼAKBO YORAIL SVENTA XAKʼEL LI SKʼOP DIOSE

5. ¿Kʼu yuʼun ti mu noʼox xijxokobe?

⁵ Jutuk mu jkotoltikuk li yajtunelutik Jeovae mu noʼox xijxokob. Ep kʼusitik tsots skʼoplal jbainojtik. Skʼan xij-abtej sventa jmakʼlin jbatik xchiʼuk sventa jmakʼlin li kutsʼ kalaltike (1 Tim. 5:8). Ep ermanoetike chchabi yutsʼ yalalik ti ipike o ti oy xa sjabilalike. Jkotoltik skʼan jchʼakbetik yorail xtok sventa jchabi jbatik yoʼ mu xij-ipaj. Jech xtok, oy kʼusitik jbainojtik ta tsobobbail. Jtos ti kʼusi toj tsots skʼoplale, jaʼ li cholmantale. Ta skoj ti toj ep kʼusitik jbainojtike, xuʼ van xi chanope: «¿Kʼusi xuʼ jpas sventa jchʼakbe yorail yoʼ jchan skotol kʼakʼal li Vivliae, ti jnopbe skʼoplale xchiʼuk ti xkakʼ ta jkuxlejale?».

6. ¿Kʼusi xuʼ jpastik sventa jechuk-o jkʼeltik jujun kʼakʼal li Vivliae? (Kʼelo xtok li lokʼole).

⁶ «Li kʼusi mas tsots [skʼoplal]» chkiltik li yajtunelutik Jeovae jaʼ ti jchantik li Vivliae, jaʼ yuʼun skʼan jechuk-o jpastik (Filip. 1:10). Ta slikebaltik li slivroal Salmose, xi chalbe skʼoplal li buchʼu chchan Vivliae: «Toj kʼupil sba chaʼi li smantal Jeovae xchiʼuk kʼun yechʼomal ye tskʼel ta kʼakʼal akʼobal li smantale» (Sal. 1:​1, 2). Jamal xvinaj ti skʼan jchʼakbetik yorail sventa jkʼel li Jvivliatike. ¿Kʼusi van ora  ti mas lek xuʼ jchʼakbetik yoraile? Skʼan jnopbetik skʼoplal ta jujuntal. Li kʼusi mas tsots skʼoplale jaʼ ti jchʼakbetik yorail sventa jkʼeltik jujun kʼakʼale. Xi chal jun ermano ti Víctor sbie: «Lek tajek chkaʼi ti ta jchan Jvivlia jujun sobe. Maʼuk ti yuʼun ta jkʼupin ti sob chilike, pe kakʼoj venta ti jaʼ muʼyuk mas kʼusi chchʼay koʼontone, mas julavemun xchiʼuk mas xkaʼibe smelolal». ¿Mi jaʼ jech chavaʼi aba kʼuchaʼal li Víctor eke? Xi xanopbe skʼoplale: «¿Kʼusi van ora ti mas lek xuʼ jchan li Jvivliae?».

NOPBO SKʼOPLAL LI KʼUSI CHAKʼELE

7, 8. ¿Kʼusi mu stakʼ jpastik kʼalal ta jkʼel Jvivliatike? Albo junuk skʼelobil.

⁷ Maʼuk noʼox me skʼan jchʼakbetik yorail ti ta jkʼel Jvivliatike, yuʼun skʼan mu ta aniluk jchantik xtok sventa xkaʼibetik lek smelolal. ¿Mi oy jech kʼotem ta atojolal ti mu xkom tajek ta ajol li kʼusi chal jlikuk vun manchuk mi ep tajek ta velta laj achane? ¡Mu me jkʼantik ti jech xkʼot ta jtojolaltik kʼalal ta jchan li Jvivliatike! Xuʼ van jnopojtik xa ti jayib kapitulo ta jchantik jujun kʼakʼale. Lek ti jech jnopojtike xchiʼuk ti chkakʼ kipaltik sventa spas kuʼuntike (1 Kor. 9:26). Pe maʼuk noʼox me skʼan jkʼel li Jvivliatike, yuʼun mi ta jkʼan ta jtabetik sbalile, oy to me yan kʼusi skʼan jpastik.

⁸ Kalbetik junuk skʼelobil. Sventa lek xchʼi li napux itajetike, toj tsots me skʼoplal ti xakʼ voʼe. Pe mi toj tsots chakʼ li voʼe, muʼyuk xa lek, yuʼun jecheʼ te tstsʼan sba li voʼe. Vaʼun, muʼyuk me sbalil. Pe kʼalal ta yutsil noʼox chakʼe, muʼyuk bu jecheʼ te tstsʼan sba xchiʼuk lek me chchʼi tal li napux itajetike. Jaʼ jech ek, mi toj anil ta jchan li Jvivliatike, muʼyuk me lek chkaʼibetik smelolal, mu xvul ta joltik xchiʼuk mu jnaʼtik kʼu yelan chkakʼ ta jkuxlejaltik (Sant. 1:24).

9. ¿Kʼusi skʼan jpastik mi toj anil ta jkʼel li Jvivliatike?

⁹ ¿Kʼusi xuʼ xapas mi la avakʼ venta ti solel toj anil chakʼel Avivliae? Kʼun xakʼel  sventa xakʼ yorail xanopbe lek skʼoplal. ¿Mi vokol chavaʼi ti chanopbe skʼoplale? Mu xavul avoʼonton, yuʼun jaʼ noʼox skʼan xanopbe skʼoplal li kʼusi la akʼele. Xuʼ van skʼan mas jal xachʼakbe yorail ti chachanunaje o moʼoje jayibuk noʼox versikulo xakʼel yoʼ xakʼ yorail sventa xanopbe skʼoplal. Xi chal Víctor ti laj kalbetik skʼoplal ta parafo 6: «Muʼyuk mas ep ta jkʼel, bakʼintike jun noʼox kapitulo. Ta skoj ti ta jujun sob ta jkʼele, ta jnopbe skʼoplal sjunul kʼakʼal li kʼusi la jchane». Li kʼusi mas tsots skʼoplale jaʼ ti jtabetik sbalil li kʼusi ta jchantike, maʼuk ti solel ep tajek ta jkʼeltike (Sal. 119:97; kʼelo li rekuadro « Sjakʼobiltak ti tskoltaot sventa xanopbe skʼoplale»).

10. Albo junuk skʼelobil ti kʼuxi xuʼ xavakʼ ta akuxlejal li kʼusi chachan ta Vivliae (1 Tesalonisenses 5: 17, 18).

¹⁰ Mu ventauk ti kʼusi ora chakʼel li Avivliae xchiʼuk ti kʼu sjalile, yuʼun ti kʼusi mas tsots skʼoplale jaʼ ti xavakʼ ta akuxlejal li kʼusi chakʼele. Kʼalal chakʼel batel li Skʼop Diose, xiuk xanopbe: «¿Kʼuxi xuʼ xkakʼ ta jkuxlejal avi o ta tsʼakal li kʼusi la jchane?». Kalbetik junuk skʼelobil: jnoptik noʼox ti laj xa akʼel 1 Tesalonisenses 5:17 xchiʼuk 18 (kʼelo). Laje nopbo skʼoplal jlikeluk xchiʼuk nopbo skʼoplal ti kʼu yelan nopem xavaʼi chapas a-orasione. ¿Mi ta sjunul avoʼonton chapas xchiʼuk mi nopajtik noʼox? ¿Kʼusitik ti oy ta avoʼonton chakʼan chatoj ta vokole? Xuʼ van xtal ta ajol oxtosuk ti kʼusi chakʼan chatojbe ta vokol li Jeovae. Mi chachʼakbe yorail jlikeluk sventa xanopbe skʼoplal taje, maʼuk xa noʼox me yakal chachikinta li Skʼop Diose, yuʼun yakal xa me chavakʼ ta akuxlejal. Mi jaʼ jech chapas jujun kʼakʼal kʼalal chachan li Avivliae, mas me chlekub batel atalelal kʼuchaʼal yajtunelot Jeova. Pe ¿kʼusi van chapas mi la avakʼ venta ti oy kʼusitik skʼan xatukʼibtase?

AKʼO TA AVOʼONTON LI KʼUSI SPAS NOʼOX AVUʼUNE

11. ¿Kʼu yuʼun xuʼ xijchibaj yuʼun bakʼintik kʼalal ta jchan Jvivliatike? Albo junuk skʼelobil.

¹¹ Kʼalal chachan Avivliae, xuʼ van xachibaj kʼalal chavakʼ venta ti oy kʼusitik skʼan xajel ta akuxlejale. Jnoptik noʼox avaʼi liʼe: jun kʼakʼale, kʼalal la achan jayibuk versikuloe, la avakʼ venta ti mu xtun ti «tʼujbil noʼox buchʼu lek [chavile]» (Sant. 2:​1-8). Vaʼun, la achan ti skʼan lekuk xavil skotol krixchanoetike, lek tajek ti jech chapase. Ta yokʼomale, la achan yan teksto ti bu chal ti skʼan  xapajtsan avee (Sant. 3:​1-12). Yuʼun te la avakʼ venta ti oy kʼusitik chopol chavale xchiʼuk ti maʼuk ta slekil avoʼonton chakʼopoje. Jaʼ yuʼun, la avakʼ ta avoʼonton ti ta slekiluk avoʼonton xakʼopoje xchiʼuk ti spatuk oʼontonale. Li ta xchaʼejale, la achan xtok ti mu xtun xkamigointik li buchʼutik maʼuk yajtuneltak Jeovae (Sant. 4:​4-12). Vaʼun, la avakʼ venta ti skʼan oyuk apʼijil ta sventa li kʼusitik chakʼel ta pelikulae xchiʼuk li kʼusitik chavaʼi ta musikae. Li ta xchanibal kʼakʼal une, yikʼaluk van chibajemot xa ta skoj ti ep kʼusitik skʼan xajel ta akuxlejale.

12. ¿Kʼu yuʼun skʼan mu xachibaj kʼalal chakʼel Avivlia mi la avakʼ venta ti oy kʼusi skʼan xajel ta akuxlejale? (Kʼelo xtok li tsʼib ta yok vune).

¹² Mu me xachibaj mi la avakʼ venta ti oy kʼusitik skʼan xajel ta akuxlejale. Yuʼun mi jech laj avakʼ ventae, jaʼ me svinajeb ti oy ta avoʼonton chajel atalelale xchiʼuk ti bikʼit avakʼoj abae. a Teuk me ta ajol ti ta kʼunkʼun onoʼox ta jlaptik batel «li achʼ talelale» (Kol. 3:10). ¿Kʼusi van tskoltaot sventa jechuk-o xavakʼ batel ta akuxlejal li Skʼop Diose?

13. ¿Kʼusitik xuʼ skoltaot? (Kʼelo xtok li lokʼoletike).

¹³ Teuk ta ajol ti mu onoʼox spas avuʼun skotol ta anil li kʼusi chachan ta Vivliae (Prov. 11:2). Tsako ta venta liʼe: pasbo junuk slistail li kʼusitik oy ta avoʼonton chatukʼibtas ta akuxlejale. Vaʼun, tʼujo junuk o chibuk ti bu chakʼan xa noʼox chavakʼ ta akuxlejale, li yane xuʼ van ta tsʼakal to xapas. ¿Bu junukal ti chakʼan xa noʼox chavakʼ ta akuxlejale?

14. ¿Kʼusitik baʼyel xuʼ xavakʼ ta avoʼonton spasel?

¹⁴ Xuʼ van jaʼ baʼyuk xavakʼ ta avoʼonton  li kʼusi mas kʼune o li kʼusi skʼan xa noʼox xajel ta akuxlejal chavile. Mi la avakʼ xa venta ti bu skʼan xatukʼibtase, saʼo mantaletik ta jvuntik, xuʼ van te xasaʼ li ta VIVLIOTEKA TA INTERNET yuʼun Watchtower™ o li ta Saʼobil sventa xchanik mas li stestigotak Jeovae. Kʼopono li Jeovae, albo ti oyuk ta avoʼonton spasele xchiʼuk ti xuʼuk avuʼun spasel li kʼusitik lek chile (Filip. 2:13). Laje, akʼo ta akuxlejal li kʼusi la achane. Kʼalal chavil ti yantik xjel batel akuxlejale, jaʼ me tstij avoʼonton sventa jechuk-o xapas batel. Yuʼun mi pas avuʼun junchibuke, jaʼ tskoltaot sventa masuk xa kʼun xavaʼi xapas batel li kʼusitik yan te atsʼibaoj ta alistae.

AKʼO SJEL AKUXLEJAL LI SKʼOP DIOSE

15. ¿Kʼusi jelelutik-o li yajtunelutik Jeova xchiʼuk li yan krixchanoetik ti tskʼelik Vivliae? (1 Tesalonisenses 2:13).

¹⁵ Jlom krixchanoetike chalik ti ep ta velta skʼelojik li Vivliae. Pe ¿mi xchʼunojik van ta melel li kʼusi chale? ¿Mi chakʼ van ta xkuxlejalik li kʼusi chchanike? Jutuk mu skotolikuke, muʼyuk. ¡Pe jelelutik tajek li yajtunelutik Jeovae! Yuʼun jech kʼuchaʼal li baʼyel yajtsʼaklomtak Kristoe jaʼ jech chkiltik Vivlia «ti kʼu onoʼox yelan ta melele, ti jaʼ skʼop Diose». Jech oxal, chkakʼ kipaltik ti sjel jkuxlejaltike (kʼelo 1 Tesalonisenses 2:13).

16. ¿Kʼusi tskoltautik sventa xkakʼ ta jkuxlejaltik li Skʼop Diose?

¹⁶ Mu kʼunuk chkaʼitik ti ta jkʼeltik xchiʼuk ti chkakʼ ta jkuxlejaltik li Skʼop Diose. Bakʼintike, mu noʼox xijxokob sventa jkʼeltik o moʼoje toj anil van ta jchantik ti muʼyuk chkom ta joltik jsetʼuke. Xuʼ van xijchibaj-o xtok kʼalal toj ep kʼusitik skʼan jel ta jkuxlejal chkiltike. Pe mu ventauk li kʼusi tsmakutike, jaʼ me tskoltautik Jeova sventa stsal kuʼuntik. Albo ti akʼo skoltaot sventa mu nakauk noʼox xachikintabe li Skʼope xchiʼuk ti xchʼay ta ajole, jaʼ lek kʼanbo ti akʼo skoltaot sventa xavakʼ ta akuxlejale. Vaʼun, kʼalal mas ta jchantik batel li Vivliae xchiʼuk mi chkakʼ ta jkuxlejaltike, mas me xijmuyubaj (Sant. 1:25).