Ti jech muʼyuk te oyik li 70 ta voʼ yajchankʼoptak Jesus kʼalal la slikes li Veʼlil ta bat kʼakʼale, muʼyuk srasonal sventa xkaltik ti yolbaj tenvanik komel o ti muʼyuk xa lek ch-ilatik yuʼun li Jesuse. Yuʼun li Jesuse jaʼ noʼox oy ta yoʼonton ti teuk xchiʼuk yajtakboltak li vaʼ orae.

Li 12 ta voʼ xchiʼuk li 70 ta voʼe, jaʼik onoʼox yajchankʼoptak Jesus ti lek ilbilike. Li Jesuse te la stʼuj lokʼel 12 ta voʼ viniketik ti jtakboletik laj yakʼbe sbie (Luk. 6:​12-16). Jaʼo te oy ta Galilea li Jesus kʼalal «la stak ta ikʼel li 12 ta voʼ jtakboletike» xchiʼuk ti «la stakan batel sventa xbat xcholbeik skʼoplal li Ajvalilal yuʼun Diose xchiʼuk sventa chpoxtavanik» (Luk. 9:​1-6). Ta mas tsʼakale, li ta sural Galilea ti te xkom ta Judeae, te la stʼuj li «70 ta voʼ li Kajvaltike, ta chaʼchaʼvoʼ la stak jelavel» (Luk. 9:51; 10:1). Jaʼ yuʼun, ti butik chichʼ cholel mantale oy yajchankʼoptak tey li Jesuse.

Li judaetik ti ch-ochik ta yajtsʼaklom Jesuse, jech-o la spasik li Kʼin Koltael jujun jabile, xuʼ van jmoj la spas xchiʼuk yutsʼ yalalik (Eks. 12:​6-11, 17-20). Kʼalal jutuk xa ox skʼan xcham li Jesuse, bat ta Jerusalen xchiʼuk li yajtakboltake. Pe muʼyuk la stak ta ikʼel skotol li yajchankʼoptak ti te oyik ta Judea, ta Galilea xchiʼuk ta Perea sventa jmojuk spasik li Kʼin Koltaele. Yaʼeluke, oy ta yoʼonton ti jaʼuk noʼox te xchiʼuk li yajtakboltak li vaʼ orae. Jech oxal, xi laj yale: «Oy tajek ta koʼonton ti jmoj jlajestik li veʼlil sventa Kʼin Koltael liʼe, ti kʼalal mu to chkil jvokole» (Luk. 22:15).

¿Kʼu yuʼun ti jaʼ noʼox tskʼan ti te xchiʼuk li 12 ta voʼ yajtakboltake? Oy lek srasonal yuʼun ti jech la spase. Yuʼun jutuk xa ox skʼan xcham kʼuchaʼal li «Xchʼiom Chij Dios ti chchʼay mulil ta balumile» (Juan 1:29). Te chcham ta Jerusalen, yuʼun li ta voʼnee te xa onoʼox chichʼ akʼel matanal ta stojolal li Diose. Li chʼiom chij ti la stiʼik li ta Kʼin Koltaele jaʼ chvulesbat ta sjol li j-israeletik ti koltaatik lokʼel yuʼun Jeova li ta Ejiptoe. Pe ti chakʼ ta matanal xkuxlejal li Jesuse mas to ep sbalil, yuʼun chkolik lokʼel ta mulil xchiʼuk ta lajelal skotol li krixchanoetike (1 Kor. 5:​7, 8). Koliyal ti laj yakʼ ta matanal xkuxlejal li Jesuse, li 12 ta voʼ jtakboletike kʼotik ta snakleb li stsobobbail yajtsʼaklom Kristoe (Efes. 2:​20-22). Toj labal sba li kʼusi chichʼ alel ta sventa li chʼul jteklum Jerusalene, yuʼun te «oy 12 ta pʼej stanal sventa snakleb yok li smuroal jteklume» xchiʼuk ti te tsʼibabil «sbiik li 12 ta voʼ yajtakboltak Chʼiom Chije» (Apok. 21:​10-14). Kʼuchaʼal chkakʼtik ventae, li jtakboletike oy kʼusi toj tsots skʼoplal sbainojik sventa xkʼot ta pasel li kʼusi oy ta yoʼonton Diose. Jaʼ yuʼun, mu labaluk sba chkaʼitik ti oy ta yoʼonton Jesus ti teuk xchiʼuk li yajtakboltak kʼalal la spas li slajeb Kʼin Koltaele xchiʼuk sventa slikes li Veʼlil ta bat kʼakʼal yuʼune.

Li 70 ta voʼ xchiʼuk li yan yajchankʼoptake, muʼyuk te xchiʼukik Jesus kʼalal la slikes li Veʼlil ta bat kʼakʼale. Pe skotol li yajchankʼoptak ti tukʼ yakʼoj sbaike, tstabeik sbalil li Veʼlil ta bat kʼakʼal yuʼun Kajvaltike. ¿Kʼu yuʼun? Yuʼun skotol li yajtsʼaklomtak Kristo ti chichʼik tʼujel sventa xbatik ta vinajele, te ch-och skʼoplalik ek li ta trato sventa ajvalilale. Taje jaʼ li kʼusi laj yalbe skʼoplal Jesus kʼalal te xchiʼuk yajtakboltak li vaʼ akʼobale (Luk. 22:​29, 30).