1. ¿Kʼusi spasojik tal li Jeova xchiʼuk li yajtuneltake?

LI Jesuse jaʼ li buchʼu baʼyel pasat yuʼun Jeovae. Jaʼ yuʼun li Jesuse «te [oy-o] ta stsʼel Dios scotol cʼacʼal» sventa jmoj x-abtejik (Prov. 8:30). Jaʼ jech spasojik tal li yajtuneltak Dios eke, yuʼun jmoj abtejemik tal kʼalal tspasik li kʼusitik ch-albatik yuʼun Diose. Jech la spas li Noe xchiʼuk yutsʼ yalal kʼalal la spasik li arkae. Te van jayibuk jabil ta mas tsʼakal xtoke, jaʼ jech jmoj abtejik li j-israeletik kʼalal la spasik li chʼulna pasbil ta nukule xchiʼuk kʼalal tstukiik sventa xkuchik batel mi tsjel yavilik li ta takixokol balumile. Jech xtok, kʼalal laj xa ox svaʼanik li temploe, jmoj kʼejinik xchiʼuk la stijik kʼupil sba sonetik sventa tsmuyubtaik li Jeovae. Jaʼ jech spasojik tal li yajtuneltak Dios ta skoj ti jmoj ch-abtejike xchiʼuk ti jun noʼox yoʼontonike (Gén. 6:14-16, 22; Núm. 4:4-32; 1 Crón. 25:1-8).

2. 1) ¿Kʼusi la spasik li baʼyel yajtsʼaklomtak Kristoe? 2) ¿Kʼusi ta jkʼelbetik skʼoplal li ta xchanobil liʼe?

² Jaʼ jech jmoj abtejik ek li baʼyel yajtsʼaklomtak Kristoe. Akʼo mi jelajtik li kʼusitik xtojobik spasele xchiʼuk li kʼusitik akʼbil sbainike jmoj oyik, yuʼun jaʼ la stsʼakliik batel li Jesukristoe. Li Pabloe la skoʼoltas kʼuchaʼal sjunul sbekʼtal jun krixchano  li tsobobbaile, yuʼun jelajtik ta jujuntal pe jmoj ch-abtejik (kʼelo 1 Korintios 12:4-6, 12). Li voʼotik une, ¿kʼusi skʼan jpastik sventa jmojuk oyutik xchiʼuk ti junuk koʼonton jcholtik mantale, ti jmojuk xij-abtej ta tsobobbaile xchiʼuk ti jmojuk oyutik xchiʼuk li kutsʼ kalaltike? Jaʼ ta jkʼelbetik skʼoplal li ta xchanobil liʼe.

3. ¿Kʼusi akʼbat yil yuʼun Jeova li jtakbol Juane?

³ Jun veltae, akʼbat yil yuʼun Jeova vukvoʼ anjeletik li jtakbol Juane. Li anjeletik taje yakal tsjupan yokʼesik. Kʼalal la sjupan yokʼes li svoʼobal anjele, li Juane «laj [yil] jpʼej kʼanal ti pʼaj yalel ta balumil ti ta vinajel lik tale». Vaʼun li kʼanal taje akʼbat jun yave sventa tsjam jun mukʼta poso ti toj nate xchiʼuk ti ikʼpulan yute, taje xab sbi. Te xtomet lokʼel tal xchʼailal. Laje te lik lokʼuk tal kʼulubetik li ta chʼaile. Pe maʼuk bat slilinik jtosuk teʼ o tsʼiʼleletik, jaʼ bat «yilbajinik li krixchanoetik ti muʼyuk bu yichʼoj ta stibaik li seyo Diose» (Apok. 9:1-4). Li Juane snaʼoj ti toj chopol li kʼulubetike, yuʼun toj echʼ noʼox kʼusitik la slilinik ta Ejipto li ta skʼakʼalil Moisese (Éx. 10:12-15). Li kʼulubetik laj yil Juane jaʼ skʼoplal li buchʼutik tʼujbil chbatik ta vinajel ti yakal chalbeik tsatsal mantal li jecheʼ relijionetike. Pe mu stukikuk, yuʼun ta smiyonal xa noʼox krixchanoetik ti spatoj yoʼonton chkuxiik sbatel osil ta Balumile jmoj chcholik mantal xchiʼukik. Jmoj chcholik mantal sventa xkolik lokʼel ta jecheʼ relijion xchiʼuk ti xkolik lokʼel ta yok skʼob Satanas li epal krixchanoetike.

4. 1) ¿Kʼusi kabteltik yakʼojbutik li Jeovae? 2) Mi ta jkʼan ta jpastik li abtelal yakʼojbutik Jeovae, ¿kʼusi skʼan jpastik?

⁴ Li Jeovae yakʼojbutik jun abtelal ti toj tsots skʼoplale: jaʼ ti skʼan jcholbetik mantal krixchanoetik ti bu kʼalal xuʼ kuʼuntik kʼalal mu to chvul slajeb li kʼusitik chopole (Mat. 24:14; 28:19, 20). Jaʼ yuʼun skʼan me xkakʼbetik «yuchʼ [...] voʼ sventa kuxlejal ti buchʼu» takin yoʼontone. Jaʼ xkaltik, skʼan me xkakʼbetik xchanik li kʼusitik melel chakʼ ta chanel Vivlia li buchʼutik oy ta yoʼontone (Apok. 22:17). Mi ta jkʼan ta jpastik lek li kʼusi yakʼoj jbaintik Diose, skʼan me jmojuk oyutik xchiʼuk ti junuk noʼox koʼontontik xij-abtej ta tsobobbaile (Efes. 4:16).

5, 6. ¿Kʼuxi jmoj oyutik yuʼun li cholmantale?

⁵ Pe sventa jcholbetik mantal li krixchanoetik ti bu kʼalal xuʼ kuʼuntike, skʼan me lekuk chapalutik. Jtos ti kʼusi tskoltautike jaʼ li tojobtaseletik chij-akʼbat ta tsobobbaile, jech kʼuchaʼal li ta tsobajel sventa cholmantale. Koliyal ti vaʼ yelan chkichʼtik chanubtasele, jaʼ skoltaojutik sventa jcholtik mantal ta spʼejel Balumil xchiʼuk ti ta smiyonal xa noʼox vunetik ta jpuktik ti lokʼemik ta Vivliae. Jech xtok, chij-albat bakʼintik ti akʼo jkolta jbatik ta junuk kampanya ta sventa cholmantale. Kʼalal ta jcholtik mantale, yakal ta jchiʼintik ta abtel ta smiyonal xa noʼox ermanoetik xchiʼuk jmoj li aʼyej chkaltik ta spʼejel Balumile. Xchiʼuk xtok, jmoj chij-abtej xchiʼuk li anjeletike, yuʼun jaʼ tskoltautik ta cholmantal (Apok. 14:6).

⁶ Ta melel, xijmuyubaj yuʼun kʼalal ta jkʼelbetik skʼoplal jujun jabil ta Anuario li abtelal ta jpastik ta spʼejel Balumile. Yan ti kʼusi jmoj oyutik yuʼun xtoke jaʼ li asamblea rejional jujun jabile. Yuʼun kʼalal muʼyuk to chkʼot skʼakʼalile, jkotoltik ta jpuktik uni vunetik sventa jtaktik ta ikʼel li krixchanoetike. Vaʼun mi kʼot yoraile, chkaʼitik li mantaletike, chkiltik li demostrasionetike xchiʼuk li dramaetike, taje jaʼ tskoltautik sventa masuk to lek xijtun ta  stojolal li Jeovae. Oy to kʼusi tskoltautik xtok sventa jmojuk oyutike, jaʼ li Snaʼobil slajel Kristo jujun jabile (1 Kor. 11:23-26). Kʼalal skʼan to jayibuk xemanae, jkotoltik chbat jtaktik ta ikʼel krixchanoetik xtok sventa xtal yaʼiik li mantal ti toj tsots skʼoplale. Mi kʼot skʼakʼalile, ta 14 yuʼun nisan, jmoj ta jtsob jbatik kʼalal mi chʼayem xa ox batel li Kʼakʼale. Vaʼun jaʼ jech ta jchʼunbetik smantal li Jesuse xchiʼuk jaʼ jech ta jtojbetik ta vokol Jeova li kʼusi toj lek la spas ta jtojolaltike.

7. ¿Kʼusi spas kuʼuntik kʼalal jmoj chij-abtejutike?

⁷ Kʼalal jkot noʼox li kʼulube, mu toj epuk kʼusi spas yuʼun. Jechutik ek, mu xcholbe kuʼuntik mantal skotol krixchanoetik mi jtuktik noʼoxe. Pe jaʼ jech kʼuchaʼal jmoj ch-abtej li kʼulubetike, jaʼ jech jmoj chij-abtej ek. Jaʼ yuʼun ta smiyonal xa noʼox krixchanoetik chkakʼbetik yojtikinik li Jeovae, ti skʼupil kʼoptaike xchiʼuk ti xichʼik ta mukʼe.

8, 9. 1) ¿Kʼusi la skoʼoltas-o Pablo li tsobobbaile? 2) ¿Kʼusi skʼan jpastik sventa junuk yoʼonton li tsobobbaile?

⁸ Albatik yuʼun Pablo li yajtsʼaklomtak Kristo ta Efeso ti lek chapal li kʼusitik chichʼ pasel ta tsobobbaile xchiʼuk xi albatike: «Chʼikutik ta skotol kʼusitik» (kʼelo Efesios 4:15, 16). Li jtakbol Pabloe la skoʼoltas ta sjunul sbekʼtal jun krixchano ti kʼu yelan tsobolik li yajtsʼaklomtak Kristoe, jaʼ xkaltik, ti xuʼ jkolta jbatik ta jujuntal sventa jmojuk oyutike xchiʼuk ti jtsʼaklitik batel li Jesuse, ti jaʼ li Jolil kuʼuntike. Jaʼ yuʼun li jtakbol Pabloe laj yal ti jmoj ch-abtej li jeltos kʼusitik ta jbekʼtaltik ta skoj li stsʼakalul jbakiltike. Jaʼ yuʼun chaʼa, mi kerem tsebutik to o mi oy xa jabilaltik, mi lekutik o ip noʼox chkaʼitik, ¿kʼusi skʼan jpastik ta jujuntal?

⁹ Li Jesuse svaʼanoj moletik sventa jaʼuk sbeiltasik li tsobobbaile. Jaʼ yuʼun li kʼusi oy ta yoʼontone jaʼ ti xkichʼtik ta mukʼ li moletike xchiʼuk ti jchʼuntik li mantaletik chalike (Evr. 13:7, 17). Pe ta skoj ti mu kʼunuk chkaʼitik bakʼintike, kalbetik Jeova ti akʼo skoltautike. Vaʼun chakʼbutik xchʼul espiritu xchiʼuk jaʼ tskoltautik sventa jchʼuntik mantal. Jech oxal mi ta jkʼan ta jkolta jbatik li ta tsobobbaile, skʼan me bikʼit xkakʼ jbatik xchiʼuk ti jchʼunbetik smantal li moletike. Mi jech ta jpastike, jun me koʼontontik xchiʼuk mas to me ta jkʼan jbatik.

10. ¿Kʼuxi chkoltavanik li jtuneletik sventa jmojuk noʼox oyutik li ta tsobobbaile? (Kʼelo li lokʼol ta slikebale).

¹⁰ Li buchʼutik tskolta sbaik xtok sventa jmojuk oyutik li ta tsobobbaile, jaʼ li jtuneletike. Chakʼbeik yipal ta skoltael li moletike xchiʼuk xmuyubaj noʼox tspasik li yabtel ch-akʼbatike. Tskʼelik ti oyuk noʼox jvuntik sventa cholmantale. Jech xtok, jaʼ chchʼamik li krixchanoetik ti chtalik ta tsobajele. Maʼuk noʼox, yuʼun tskʼelik ti lekuk noʼox oy xchiʼuk ti lekuk sak xvinaj li jsalontike. Jaʼ yuʼun kʼalal ta jchʼunbetik smantal li jtuneletike, jaʼ jech ta jkolta jbatik sventa junuk noʼox koʼontontik li ta tsobobbaile xchiʼuk ti lekuk chapal xijtun ta stojolal li Jeovae (koʼoltaso xchiʼuk Echos 6:3-6).

11. ¿Kʼusi xuʼ spasik li keremetik sventa jmojuk oyutik li ta tsobobbaile?

¹¹ Jlom moletik ta tsobobbaile oy xa ta sjayibal jabil ti tsots abtejemik tal ta tsobobbaile. Pe yikʼaluk van mu xa epuk kʼusitik spas yuʼunik ta skoj ti oy xa sjabilalike. Jaʼ yuʼun, lek me ti xkoltavanik li keremetike. Mi laj yichʼik chanubtasel leke, chkoltavanik me ta spasel li kʼusitik ta tsobobbaile. Ta melel, lek me ti xakʼbeik yipal sventa xtunik ta mol ta mas  tsʼakale (1 Tim. 3:1, 10). Jlom moletik ta tsobobbail ti keremik toe chʼiemik xa lek ta mantal, vaʼun chtunik xa ta jkʼelvanej ta sirkuito xchiʼuk tskoltaik ep tsobobbailetik. Jkotoltik oy ta koʼonton ta jtojbetik ta vokol li ermanoetik taje, yuʼun oy ta yoʼonton chkoltavanik (kʼelo Salmo 110:3; Eclesiastés 12:1).

12, 13. ¿Kʼusi skʼan jpastik sventa jmojuk oyutik xchiʼuk li kutsʼ kalaltike?

¹² ¿Kʼusi skʼan jpastik sventa jmojuk oyutik xchiʼuk li kutsʼ kalaltike? Jtos ti kʼusi toj tsots skʼoplale jaʼ ti jpastik jujun xemana li yichʼel ta mukʼ Jeova ta kutsʼ kalaltike. Yuʼun li totil meʼiletike mas to tskʼan sbaik xchiʼuk yalab xnichʼnabik mi chchʼakbeik yorail sventa jmoj xojtikinik li Jeovae. Xuʼ jaʼo te xchanik li kʼusi chalik ta cholmantale. Vaʼun kʼalal jmoj chalbeik skʼoplal li kʼusi chchanik ta Vivliae mas to jmoj oyik, yuʼun skʼanojik li Jeovae xchiʼuk tspasbeik li kʼusi tskʼan yoʼontone.

¹³ ¿Kʼusi skʼan spasik sventa jmojuk oyik li nupultsʼakaletike? (Mat. 19:6). Mi jmoj skʼanojik li Jeovae xchiʼuk mi jmoj chtunik ta stojolale, mas to me tstsatsub li snupunelike xchiʼuk xkuxet noʼox me yoʼontonik. Toj tsots me skʼoplal ti skʼanojuk sbaike xchiʼuk ti ta slekiluk yoʼonton skʼopon sbaike, jaʼ jech kʼuchaʼal la spasik li Abraan xchiʼuk Sarae, li Isaak xchiʼuk Rebekae, li Elcana xchiʼuk Anae (Gén. 26:8; 1 Sam. 1:5, 8; 1 Ped. 3:5, 6). Mi jech tspasike, jmoj me oyik xchiʼuk mas me nopol chaʼi sbaik ta stojolal li Jeovae (kʼelo Eclesiastés 4:12).

14. Mi muʼyuk chtun ta stojolal Jeova li jnup jchiʼiltike, ¿kʼusi tskoltautik sventa lekuk tsots li jnupuneltike?

¹⁴ Li Vivliae chal ti jaʼ skʼan xijnupun xchiʼuk li buchʼu chtun ta stojolal Jeovae (2 Kor. 6:14). Akʼo mi jech, oy onoʼox buchʼutik ti maʼuk stestigo Jeova li snup xchiʼilike. ¿Kʼu yuʼun? Yuʼun li jlome jaʼ to ochik ta stestigo Jeova kʼalal nupunemik xa oxe, pe ti mu skʼan x-och ta mantal li snup xchiʼilike. O moʼoj xtoke, laj yikta sba ta mantal junukal yuʼunik. Mi jaʼ jech jnuptanojtike, jaʼ me tskoltautik li tojobtaseletik ta Vivliae, akʼo mi tsots chkaʼitik bakʼintik. Jkʼeltik kʼusi la snuptan jun nupultsʼakal ti Mari xchiʼuk David sbie. Jaʼik toʼox stestigotak Jeova xchaʼvoʼalik, pe li vinike laj yikta sba ta mantal. Laj yakʼbe tajek yipal sventa jaʼuk lekil ajnilal li Marie xchiʼuk ti lekuk xakʼ ta ilel stalelale. Laj yakʼbe yojtikin Jeova li vakvoʼ yalabe xchiʼuk muʼyuk laj yikta-o sba ta tsobajel xchiʼuk ta asamblea. Pe kʼalal chʼi xa ox li yalabe bat nakiuk stukik. Akʼo mi vokol chaʼi ti stuk xa chtun ta stojolal Jeova li Marie, tukʼ-o laj yakʼ sba. Jech xtok, te tskajan revistaetik ta yut sna sventa xil li smalale, vaʼun lik skʼel li revistaetike. Ta mas tsʼakale lik batuk ta tsobajeletik. Oy jun yuni momik ti vakib sjabilale, persa onoʼox tsmakbe yavil smukʼtot li ta salone. Pe kʼalal muʼyuk chkʼot ta tsobajel li Davide, xi ch-albat yuʼun li smome: «Kuni mukʼtot, ¿kʼu yuʼun muʼyuk la-ay ta tsobajel? Yuʼun la jnaʼot tajek». Kʼalal echʼem xa ox 25 jabile, jaʼ to lik tunuk ta stojolal Jeova yan velta li ermano taje. Li avi une, jmoj xa chtunik ta stojolal Jeova xchiʼuk li yajnile xchiʼuk xmuyubajik noʼox.

15. ¿Kʼusi skʼan spasik li nupultsʼakaletik ti oy xa sjabilalike?

¹⁵ Chilbajin utsʼ alaliletik li Satanase. Jaʼ yuʼun skʼan jmojuk skolta sbaik xchiʼuk junuk yoʼontonik li nupultsʼakaletik ti chtunik ta stojolal Jeovae. Mu ventauk ti kʼu xa sjalil jnupuneltike, skʼan me jnoptik kʼusi skʼan jpastik sventa masuk stsatsub li  jnupuneltike. Li buchʼutik toj lek xuʼ xkoltavanike jaʼ li nupultsʼakaletik ti oy xa sjabilalike. Jaʼ yuʼun xuʼ xikʼ batel ta snaik li buchʼutik achʼ to snupunelik kʼalal tspasik li yichʼel ta mukʼ Jeovae. Yuʼun xuʼ te xakʼik venta ti skʼan jmojuk oyike xchiʼuk ti ta slekiluk-o yoʼonton skʼopon sbaike, mu ventauk ti kʼu xa sjalil snupunelike (Tito 2:3-7).

16, 17. ¿Kʼusi toj lek ta jtatik mi jmoj-o oyutike?

¹⁶ Kʼalal chbatik ta jujun kʼin ta Jerusalen li j-israeletike, jmoj ch-abtejik. Koʼol chchapanik skotol li kʼusitik chtun yuʼunike xchiʼuk jmoj tskolta sbaik batel ta be. Vaʼun kʼalal chkʼotik ta temploe, jmoj chichʼik ta mukʼ li Jeovae xchiʼuk jmoj tskʼupil kʼoptaik (Luk. 2:41-44). Yakal xa me ta jchapan jbatik sventa xijkuxi ta paraiso. Jaʼ yuʼun toj tsots me skʼoplal ti akʼo jmojuk oyutike xchiʼuk ti junuk koʼonton xij-abteje. ¿Mi oy to yan kʼusi xuʼ jpastik sventa jmojuk oyutik?

¹⁷ Jsetʼ-juteb noʼox ti kʼusi chlik-o skʼopik li krixchanoetike xchiʼuk xchʼakchʼak noʼox sbaik. Yan li voʼotike jun koʼontontik koliyal li Jeovae xchiʼuk ti xkaʼibetik smelolal li chanubtaseletik chakʼbutike. ¿Mi mu jechuk ti ta jtojtik tajek ta vokole? Ta spʼejel Balumil jaʼ jech chkichʼtik ta mukʼ Dios kʼuchaʼal tskʼan yoʼontone. Jech xtok, muʼyuk bu jech ilbil-o ti kʼu to yelan jmoj oyutike. Jech kʼuchaʼal laj yal li j-alkʼop Isaias xchiʼuk Miquease, yakal chijmuy batel li «ta vits yuʼun li Mucʼul Diose» (Is. 2:2-4; kʼelo Miqueas 4:2-4). Mi jmoj-o oyutike, ta xkiltik chkʼot skʼakʼalil ti jmoj tsobol chkichʼtik ta mukʼ Jeova ta spʼejel Balumile. ¡Toj echʼ xa noʼox lek li kʼusi ta jtatike!