Li buchʼu baxbol ta abtele muʼyuk ta xiʼ yuʼun li abtele. Moʼoj, yuʼun tskʼupin ch˗abtej xchiʼuk tskolta yantik akʼo mi mu toj tsotsuk skʼoplal li yabtele.

Li avie, ep kʼusi jbainojtik spasel akʼo mi mu jkʼupintik. Jech xtok, oy sbalil mi lek baxbolutike, yuʼun ep buchʼutik mu skʼupinik li tsatsal abtele (Eklesiastes 3:13).

«Kʼalal tsots chi˗abteje, jun koʼonton chikom xchiʼuk ximuyubaj. Jaʼ yuʼun, ta jkʼupin ti tsots chi˗abteje. Jech xtok, kʼalal nopem xkaʼitik lek chij˗abteje, lek jkʼoplal chijkom» (Reyon).

BEILTASEL TA VIVLIA: «Kʼusiuk tsatsal abtelal chichʼ tabel sbalil» (Proverbios 14:23).

Li beiltaseletik chtale tskoltaot sventa xakʼupin li abtele.

Tojoban lek ta spasel. Akʼo ta avoʼonton li kʼusi yakal chapase, mi ta ana, ta chanob vun o mi ta avabtel atuk. Mi oy kʼusi xatojob spasele, kʼelo kʼuxi to mas lek xuʼ xbat ta pasel avuʼun o ti masuk to anil xapase. Mi mas to lek bat ta pasel avuʼune, mas to me chakʼupin.

BEILTASEL TA VIVLIA: «¿Mi oy aviloj junuk vinik ti lek xtojob ta yabtele? Chbat abtejuk ta stojolal ajvaliletik; maʼuk ch-abtej ta stojolal li krixchanoetik noʼoxe» (Proverbios 22:29).

Oyuk ta avoʼonton li yantike. Kʼalal chapas li kʼusi abainoje, ta onoʼox stabeik sbalil li yantike. Jech kʼuchaʼal liʼe, mi chapas li kʼusi abainoj ta anae, muʼyuk chavakʼbe mas yabtel li avutsʼ avalale.

BEILTASEL TA VIVLIA: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35).

Mu jaʼuk noʼox xapas li kʼusi kʼun chavaʼi spasele. Maʼuk noʼox me xapas li kʼusi tskʼanboxuke. Mi jech chapase, voʼot me oy ta akʼob li kʼusi chanop chapase. Melel onoʼox ti skʼan mas xa˗abteje, pe jaʼ ta skoj ti jech chakʼane, maʼuk ti sujbilote (Mateo 5:41).

BEILTASEL TA VIVLIA: «Sventa mu ta sujeluk xapas li kʼusi lek chapase, jaʼ lek ti akʼo xlokʼ ta avoʼonton atuke» (Filemon 14).

Ta spʼisoluk noʼox. Ti baxbolutike maʼuk skʼan xal ti jaʼ xa batem ta koʼontontik li abtele, yuʼun skʼan oyuk spʼisol xchiʼuk ti oyuk yorail jkuxtike.

BEILTASEL TA VIVLIA: «Mas lek mi ta jkuxtik jlikeluke, jaʼ altik mi ta jmil jbatik ta abtele, yuʼun xkoʼolaj kʼuchaʼal ta jnutstik ikʼ» (Eklesiastes 4:6).