SVENTA KEREM TSEBETIK
9. Buchʼuot ta melel
¿KʼUSI SMAKOJ?
Ti kʼuxi chavichʼ˗o ojtikinel leke, maʼuk noʼox ta skoj li abie o ti kʼu yelan xavinaje, te smakojbe skʼoplal xtok li kʼusitik tsots skʼoplal chavile, li kʼusitik achʼunoje xchiʼuk li atalelale.
¿KʼU YUʼUN TSOTS SKʼOPLAL?
Kʼalal anaʼoj lek buchʼuote, tsʼunul lek ta avoʼonton li kʼusi achʼunoje xchiʼuk muʼyuk chavakʼ ti akʼo xalboxuk yan kerem tsebetik li kʼusi skʼan xapase.
«Epal krixchanoetike muʼyuk tsnop stukik li kʼusi tspas ta xkuxlejalike» (Adrian).
«Ta onoʼox jpas li kʼusi leke akʼo mi mu kʼunuk chkaʼi. Ta skoj li stalelal kamigotak xchiʼuk ti kʼu yelan chkakʼ ta ilel jtalelal kʼalal te jchiʼukike, jnaʼoj ti jaʼ kamigotak ta melele» (Courtney).
BEILTASEL TA VIVLIA: «Mu xa me jechuk xapasik kʼuchaʼal tspas skotol li kʼusitik oy ta balumile; jaʼ lek jelo anopbenik sventa xjel atalelalik» (Romanos 12:2).
¿KʼUSI STAKʼ XAPAS?
Sventa xanaʼ kʼu yelan atalelal avie xchiʼuk ti kʼu yelan atalelal chakʼan ta jelavele, skʼan xanopbe skʼoplal li kʼusitik xatojob spasele, li kʼusitik vokol chavaʼie xchiʼuk li kʼusitik achʼunoje. Xiuk xajakʼbe abae:
Li kʼusitik xatojob spasele: «¿Kʼusitik jchanoj lek spasel? ¿Kʼusi ti lek ojtikinbilun˗oe? ¿Mi jnaʼ jpajtsan jba? ¿Mi ta yorail chikʼot? ¿Mi xitojob ta abtel? O ¿mi jnaʼ yakʼel li kʼusitik oy kuʼune? ¿Kʼusi ti lek chbat kuʼun ta spasele?».
LI KʼUSI XUʼ XAPASE: Mi mu xanaʼ kʼu yelan atalelaltake, albo akʼo skoltaot atot ameʼ o junuk avamigo.
BEILTASEL TA VIVLIA: «Ta jujuntal kʼelo abaik ta skoj li kʼusi chapasike, vaʼun oy srasonal sventa xkuxet noʼox avoʼontonik atukik, maʼuk xamuyubajik ta skoj ti chakoʼoltas abaik xchiʼuk li yantike» (Galatas 6:4).
Li kʼusitik vokol chavaʼie: «¿Kʼusi jtalelaltak skʼan jlekubtas? ¿Kʼusi ora mas vokol chkaʼi ta stsalel li kʼusitik chopole? ¿Butik skʼan jpajtsan jba?».
BEILTASEL TA VIVLIA: «Mi chkaltik ti muʼyuk jmultike, yakal ta jloʼla jba jtuktik xchiʼuk muʼyuk te ta jtojolaltik li kʼusi melele» (1 Juan 1:8).
Li kʼusitik achʼunoje: «¿Kʼusitik mantal ta jchʼun xchiʼuk kʼu yuʼun? ¿Mi jchʼunoj ti oy Diose? ¿Kʼusi sprevail jtaojbe ti oy ta melel li Diose? ¿Kʼusitik ti muʼyuk stukʼil tspasik chkile, xchiʼuk kʼu yuʼun? ¿Kʼusi ta jnop ta sventa li kʼusi chkʼot ta pasel ta jelavele?».
BEILTASEL TA VIVLIA: «Jaʼ chchabiot ti xatojob snopele xchiʼuk jaʼ chchabiot ti oy kʼusi lek xanabe skʼoplale» (Proverbios 2:11).
Xuʼ van chakʼupin skʼelel xtok liʼe
LAJUNTOS KʼUSITIK TSJAKʼBE SBAIK LI KEREM TSEBETIKES
¿Buchʼuun van ta melel?
Kʼalal xavojtikin li kʼusitik kʼunot-o xchiʼuk li kʼusitik tsots chavaʼi spasele xchiʼuk ti anaʼoj li kʼusi chakʼan chatae xchiʼuk li mantaletik ta sventa li lekil talelaletike jaʼ me tskoltaot sventa lekuk xkʼot ta nopel avuʼun kʼalal chavichʼ sujele.
