Li nupultsʼakaletik ti jmoj tskolta sbaike koʼol kʼuchaʼal jun jtsʼot avion xchiʼuk yajkoltaobba ti jmoj bu chbatike. Maʼuk noʼox tsnopik ta jujuntal li kʼusi tspasike, yuʼun tsnopik li kʼusi mas lek ta sventa xchaʼvoʼalike akʼo mi tsnuptan svokolik.

BEILTASEL TA VIVLIA: «Mu xa me chaʼvoʼikuk, yuʼun pasik xa ta jun» (Mateo 19:6).

«Sventa lekuk xbat li snupunelike, skʼan koʼoluk skolta sbaik» (Christopher).

Mi mu jmojuk tskolta sbaik li nupultsʼakale, chlik me yut sbaik mi lik kʼope, maʼuk ti chchapanike. Akʼo mi jutuk noʼox li kʼusi chlik˗o skʼopike, ta xmukʼib yuʼunik.

«Toj tsots skʼoplal ti jmojuk jkolta jbakutik li ta jnupunelkutike. Mi mu jmojuk ta jkolta jbakutik xchiʼuk li jmalale, xkoʼolaj kʼuchaʼal jchiʼil noʼox ta naklej. Jaʼ xkaltik, naka noʼox ti jmoj nakalunkutike, pe mu jmojuk ta jnopkutik li kʼusitik tsots skʼoplale» (Alexandra).

NOPBO SKʼOPLAL LIʼE:

• ¿Mi chanop ti jaʼ noʼox avuʼun ti kʼu yepal chapas kanal atakʼine?

• ¿Mi jaʼ to chakux chavaʼi mi muʼyuk te oy li anup achiʼile?

• ¿Mi muʼyuk mas lek xavil aba xchiʼuk li yutsʼ yalal anup achiʼil akʼo mi lek xil sbaik li stukike?

LOʼILTA˗O XCHIʼUK ANUP ACHIʼIL LIʼE:

• Li ta jnupuneltike, ¿kʼusitik ti jmoj ta jpastike?

• ¿Mi oy to van kʼusi skʼan xlekub kuʼuntik?

• ¿Kʼusitik skʼan jtsaktik ta venta sventa masuk to koʼoluk xij˗abteje?

LI KʼUSI XUʼ XAPASE

• Li nupunele xkoʼolaj ta jun partido ta futbol ti jmoj chtajinike. ¿Kʼusi xuʼ xapasik sventa jmojuk xatajinike, ti mu xatsal abaike?

• Mu jaʼuk xanop kʼuxi xuʼ xapas kanal atuk, jaʼ lek nopo kʼuxi xuʼ xapas kanal achaʼvoʼalik.

«Mu ventauk buchʼu oy srason, li kʼusi tsots skʼoplale jaʼ ti junuk koʼontontik xchiʼuk ti jmojuk oyutik li ta jnupuneltike» (Ethan).

BEILTASEL TA VIVLIA: «Oyuk˗o me ta avoʼontonik li yantike, maʼuk noʼox me xanop akʼoplal atukik» (Filipenses 2:3, 4).