LI JABILETIK TALE, EP XA XCHANOJBEIK SKʼOPLAL SVENTA LI ME’INAL CHAKʼ KʼALAL OY BUCHʼU CHCHAME. Akʼo mi jech, kʼuchaʼal laj xa kiltik tale, li kʼusi chal li doktoretike jaʼtik jech kʼuchaʼal chal li pʼijil beiltaseletik ta Vivliae. Taje chakʼ ta ilel ti jech˗o jtunelik li beiltaseletik ta Vivliae. Pe maʼuk noʼox taje, yuʼun chakʼbutik beiltaseletik ti muʼyuk bu ta jtatik ta yan livroe xchiʼuk tspatbe yoʼonton li buchʼu chcham junuk yutsʼ yalal o yamigoe.

• Jamal chal ti muʼyuk yakal chil svokol li buchʼu chameme.

  Xi chalbutik Vivlia ta Eklesiastes 9:5: «Li buchʼutik chamemike mu xa kʼusi snaʼik jsetʼuk». «Chlaj skʼoplal li kʼusitik tsnope» (Salmo 146:4). Jaʼ yuʼun, li Vivliae chal ti kʼalal chijchame xkoʼolaj kʼuchaʼal ochem tajek jvayeltik (Juan 11:11).

• Ti jnaʼojtik ti skʼanojutik li Diose tspat koʼontontik.

  Xi jamal chal li Vivliae: «Te yakʼoj sat Jeova a ta stojolal li buchʼutik tukʼike xchiʼuk chchikintabe kʼalal xvokoletik tskʼanik koltaele» (Salmo 34:15). Kʼalal ta jpastik orasione, maʼuk noʼox sventa junuk noʼox koʼontontik xijkom. Yuʼun jaʼ sventa lekuk xkil jbatik xchiʼuk li Jpasvanej ti xuʼ stunes sjuʼel sventa spat koʼontontike.

• Alakʼ sba spatobil oʼontonal.

  Ep ta velta chal Vivlia ti chchaʼkuxiik li buchʼutik chamemike. Jech kʼuchaʼal liʼe, chal kʼu yelan xkuxlejal li krixchanoetik ta tsʼakale, xi chalbutike: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (Apokalipsis 21:3, 4). ¿Mi xnop xa noʼox avuʼun kʼu yelan li kuxlejal taje?

Epal krixchanoetik ti yakʼoj xchʼunel yoʼontonik ta stojolal Jeova, ti jaʼ yakʼoj ta naʼel li Vivliae, te staoj yipal yoʼontonik ti xuʼ skʼelik yan velta li buchʼu chamem yuʼunike. Xi chal Ann ti cham smalal kʼalal 65 jabil xa ox snupunelike: «Li Vivliae jamal chal ti muʼyuk xa chil svokol li animaetike xchiʼuk ti chchaʼkuxesan ta jelavel li Diose. Li patob oʼontonal taje jaʼ skoltaojun kʼalal oy chvul ta jol li jmalale, vaʼun tskoltaun sventa jtsal li at˗oʼontone».

Xi chal Tina ti laj xa onoʼox kalbetik skʼoplale: «Kʼalal jaʼo cham li Timoe, kiloj ti spatoj tal koʼonton li Diose. Kʼalal jaʼo ta xkil jvokole, kiloj ti kʼu yelan skoltaojun talel li Jeovae. Jchʼunoj ta melel li spatobil oʼontonal chal Vivlia ta sventa li chaʼkuxesele xchiʼuk jaʼ chakʼbun kipal sventa xmalaj kuʼun ti kʼusi ora chchaʼkuxi talel li Timoe».

Taje chakʼ ta ilel ti kʼu yelan chaʼi sbaik ta smiyonal noʼox krixchanoetik ta skoj ti spatoj yoʼontonik ta Vivliae. Mi chanop ti mu meleluk li kʼusi chal Vivliae, ¿kʼu yuʼun mu xakʼelbe sprevailtak ti ta melel yichʼoj tal lekil beiltaseletik xchiʼuk ti chkʼot ta pasel li kʼusitik chale? Te chavakʼ venta ti jaʼ noʼox xuʼ te tsta koltael ta Vivlia li buchʼu chamem junuk yutsʼ yalale.

Li ta jpajinakutik ta Internet ta jw.org, te chata videoetik ti jaʼ chalbe skʼoplale.

 ¿KʼU YELAN OY LI ANIMAETIKE?

¿MI CHAKʼAN CHAVAʼI LEKIL AʼYEJETIK?