Kʼelo li kʼusi yichʼoje

Batan ta saʼobil

Li kʼusitik xchʼunojike

Li kʼusitik xchʼunojike

Srelijion j-induetik

Li j-induetike xchʼunojik ti chkil jvokoltik ta skoj ti oy kʼusi yakal ta jpastike o ti oy kʼusi jpasojtik li ta yan jkuxlejaltike. Jaʼ to muʼyuk xa chil svokol li krixchanoetik mi la staik li moksha, jaʼ xkaltik, ti muʼyuk xa chchaʼvokʼike. Sventa staik taje, skʼan ti mu xa snopbeik skʼoplal li kʼusi chopol chkʼotanuk ta pasel liʼ ta balumile.

Islam

Li jmusulmanetike xchʼunojik ti chkil jvokoltik ta skoj li jmultike xchiʼuk jaʼ la sventa chichʼ akʼel ta preva mi tsots li xchʼunel koʼontontike. Li Sayyid Syeed ti jaʼ presidente li ta Sociedad Islámica de América del Norte, chal ti kʼalal chkil jvokoltike tsvules ta joltik ti «skʼan jtojbetik ta vokol Dios li bendisionetik chakʼbutike xchiʼuk ti skʼan jkoltatik li buchʼutik chtun yuʼunik koltaele».

Srelijion judaetik

Jech kʼuchaʼal chal li judaetike, jaʼ la chkil-o jvokoltik yuʼun li kʼusi ta jpastike. Jlom judaetike chalik ti oy chaʼkuxesele xchiʼuk ti chichʼ pakbel skʼoplalik li buchʼutik laj yil svokolik ta jech noʼoxe. Pe jaʼuk li judaísmo místico o cabalístico chchanubtasvanik ti ta la xijvokʼ ta yan bekʼtalil jayibuk veltae, taje jaʼ la sventa sakuk xkom li buchʼu oy toʼox kʼusi chopol spasoje.

Budismo

Li jbudaetike xchʼunojik ti jech-o chijchaʼvokʼe xchiʼuk ti jech-o chkil jvokoltik mi jech-o chopol kʼusi tskʼan koʼontontik, mi chopol kʼusi ta jpastik xchiʼuk mi chopol kʼusitik ta jnoptike. Pe mi laj yakʼ ta ilel spʼijil li jun krixchanoe, mi lek li kʼusi tspase xchiʼuk mi snaʼ spajes li kʼusi tsnope, xuʼ sta li nirvanae, jaʼ xkaltik, ti muʼyuk xa chil-o svokole.

Confucionismo

Jech kʼuchaʼal chal li Diccionario de religiones comparadas, li buchʼutik stsʼakliojik batel li Confucioe xchʼunojik ti chkil jvokoltik «ta skoj noʼox li kʼusitik muʼyuk lek tspasik li krixchanoetike». Akʼo mi chalik ti muʼyuk mas chkil jvokoltik mi lek noʼox li kʼusi ta jpas ta jkuxlejaltike, xchʼunojik xtok ti xuʼ xakʼ jvokoltik li kuxlejaletik ti mu xvinajik ta kʼelel ti mas tsots yipike. Jech oxal, li jun krixchanoe jaʼ xa noʼox skʼan xchʼam li kʼusi chkʼot ta stojolal o li yora akʼbile.

Li kʼusi nopem xaʼiik spasele

Li buchʼutik ta kostumbre oyike xchʼunojik ti chkil jvokoltik ta skoj li j-akʼ chameletike. Junantik krixchanoetike xchʼunojik ti xuʼ xakʼ ti oyuk lek jsuertetik li j-akʼ chameletike o ti oyuk kʼusi chopol jnuptantik yuʼune, pe ti oy la kʼusi stakʼ pasel sventa xijkol lokʼel ta sventa li kʼusi tspasbutike. Pe kʼalal ch-ipajike chbatik ta stojolal jun j-ilol sventa xpoxtaatik, taje jaʼ sventa mu masuk x-akʼbat svokolik yuʼun li j-akʼchameletike.

Relijionetik ti xchʼunojik Kristoe

Li buchʼutik xchʼunojik Kristoe chalik ti chkil jvokoltik ta skoj ti la saʼ smulik li baʼyel vinik xchiʼuk antse, ti jaʼ jech chal ta Vivlia ta slivroal Jenesise. Akʼo mi jech, epal relijionetike jaʼ xa chakʼik ta chanel li kʼusi tsnop stukike. Junantik jkatolikoetike, chlokʼ ta yoʼonton stukik ti chil svokolik sventa xakʼbe bendision Dios li xchʼulnaike o sventa skolta junuk krixchano.

SVENTA XANABE MAS SKʼOPLALE

Kʼelo ta jw.org li video ¿Mi lek chil skotol relijionetik li Diose?