Kʼalal sujomutik xchiʼuk mu xa noʼox jnaʼ kʼusitik ta jpas ta jkuxlejaltike jaʼ ta skoj ti oy kʼusi tsots chkʼot ta pasel ta jtojolaltike. Li jchinabtike jaʼ chakʼ ti akʼo xnoj ta hormona sjunul li jbekʼtaltike. Vaʼun mas xa anil ch-abtej li koʼontontike, chmuy o chyal li jpresiontike, mas anil o kun chkichʼtik ikʼ xchiʼuk tstsinan sba li jbekʼtaltike. Kʼalal mu to jnaʼtik li kʼusi ta jpastike li jbekʼtaltike chapal xa sventa oy kʼusi spas. Kʼalal mi jelav skotol taje, li jbekʼtaltike chchaʼta yav yan velta.

Stalel onoʼox jech chaʼi jbekʼtaltik kʼalal sujomutik xchiʼuk mu xa noʼox jnaʼ kʼusitik ta jpas ta jkuxlejaltik bakʼintike, yuʼun jaʼ tskoltautik sventa spas kuʼuntik li kʼusi vokolik ta pasele o sventa stsal kuʼuntik jtosuk vokolile. Skotol taje tey chlik talel ta jchinabtik. Kʼalal jutuk noʼoxe jaʼ tskoltautik sventa stsuts noʼox kuʼuntik li kʼusi yakalutik spasele xchiʼuk ti baxbolutike, jech kʼuchaʼal kʼalal ta jpastik junuk eksamene, kʼalal oy kʼusi chkichʼtik jakʼbel sventa jta kabteltike o kʼalal chijtajin ta jtosuk tajimole.

Akʼo mi jech, kʼalal jech-o xa tajek sujomutik xchiʼuk mu xa noʼox jnaʼ kʼusitik ta jpas ta jkuxlejaltike xuʼ me xakʼ jvokoltik. Mi mu sta yav yan velta li jbekʼtaltik ti kʼu yelan toʼox oye, xuʼ me xij-ipajutik yuʼun, chopol chkaʼi jbatik xchiʼuk ch-ipaj li jnopbentike. Yikʼaluk van chijkap ta anil ta stojolal yantik. Jaʼ yuʼun, junantike chlik slajesik kʼusitik ti muʼyuk leke o xuʼ van oy kʼusi chopol chlik spasik ti jaʼ noʼox tsokes li sbekʼtale. Xuʼ van x-ipajik ta vul oʼonton, lubem xa noʼox tajek chaʼi sbaik o xuʼ van tsnop tsmil sbaik.

Taje mu jkotoltikuk jech yelan chkaʼi jbatik yuʼun, akʼo mi jech xuʼ te jtatik-o jeltos chameletik ti xuʼ buyuk noʼox x-ipaj yuʼun li jbekʼtaltike.