«Ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (ROMANOS 5:12).

Tukʼil krixchanoetik pasatik yuʼun Dios li Adan xchiʼuk Evae. Te akʼat nakiikuk ta jun alakʼ sba nichimaltik ti jaʼ sbi Edene. Albatik yuʼun Dios ti xuʼ slobeik sat skotol li teʼetike, jaʼ noʼox jpets teʼ ti mu stakʼ slobeik sate. Pe li Adan xchiʼuk Evae jaʼ la slobeik sat li jpets teʼ ti albatik ti mu stakʼe, vaʼun jaʼ jech la saʼ smulik (Jenesis 2:15-17; 3:1-19). Ta skoj ti muʼyuk xchʼunbeik smantal Dios li Adan xchiʼuk Evae, nutsatik lokʼel li ta nichimaltik Edene. Li vaʼ orae, te lik yil tal svokolik. Ta mas tsʼakale, laj yil yalab xnichʼnabik, jaʼ jech laj yil svokolik ek, vaʼun malubik xchiʼuk chamik (Jenesis 3:23; 5:5). Jaʼ yuʼun, li voʼotik eke chij-ipajutik, chijmalubutik xchiʼuk chijchamutik ta skoj ti jaʼ yalab xnichʼnabutik li Adan xchiʼuk Evae.

«Skotol li krixchanoetike oyik ta sjuʼel li buchʼu toj chopole» (1 JUAN 5:19, tsʼib ta yok vun).

Li «buchʼu toj chopole» jaʼ onoʼox li Satanase, jun anjel ti la stoy sba ta stojolal Diose (Juan 8:44; Apokalipsis 12:9). Ta mas tsʼakale, oy yan anjeletik la smojin sjolik xchiʼuk li Satanase, vaʼun kʼatajik ta pukujetik. Li vaʼ chopol pukujetike tstunes sjuʼelik sventa sloʼlaik li krixchanoetike xchiʼuk tsnamajesik ta stojolal li Diose. Jech xtok, tstijbeik yoʼonton epal krixchanoetik sventa spasik li kʼusitik  toj chopole (Salmo 106:35-38; 1 Timoteo 4:1). Li Satanas xchiʼuk spukujtake xmuyubajik tajek kʼalal chkil jvokoltike.

«Kʼusiuk noʼox ti yakal tstsʼun li jun krixchanoe jaʼ tstsobbe sat» (GALATAS 6:7).

Bakʼintike, chkil jvokoltik ta skoj ti jkuchinojtik li mulile xchiʼuk ti tstijbe yoʼonton krixchanoetik ta spasel kʼusi chopol li Satanase. Pe bakʼintike, voʼotik noʼox chkakʼbe jba jvokoltik. Jech kʼuchaʼal kʼalal ta jpastik li kʼusi leke, lekik kʼusi ta jtsobbetik sat, pe mi jaʼ la jpastik li kʼusitik chopole, ta me xkil jvokoltik. Kalbetik jun skʼelobil, li jun totil ti melel snaʼ xkʼopoj, ti lek snaʼ x-abtej xchiʼuk ti skʼanoj li yutsʼ yalale xkuxet noʼox yoʼontonik. Pe mi chtajin ta takʼin, echʼem xuchʼ pox o chʼaj ta abtele, li yutsʼ yalale tspas ta povre. Jaʼ yuʼun, toj tsots skʼoplal ti jchʼamtik li beiltaseletik chakʼbutik li Jpasvanej kuʼuntike, yuʼun li stuke tskʼan ti jaʼuk jtsobbetik sat li kʼusitik lekike, jaʼ xkaltik, ti jkʼupintik li jun oʼontonale (Salmo 119:165).

«Li ta slajebal xa kʼakʼale, [...] tskʼan sba stuk li krixchanoetike, batem ta yoʼontonik takʼin, [...] mu xchʼunbe smantal stot smeʼik, [...] mu snaʼ spajes sbaik, simaronik, muʼyuk skʼanojik li kʼusi leke» (2 TIMOTEO 3:1-5).

Avie, epal krixchanoetik jaʼ xa jech stalelalik kʼuchaʼal chal li tekstoe, jamal xvinaj ti kuxulutik xa ta slajebal kʼakʼale. Li ta Vivlia xtoke yaloj xa onoʼox ti chtal paskʼop, viʼnal, tsatsal nikeletik xchiʼuk chameletik (Mateo 24:3, 7, 8; Lukas 21:10, 11). Epal krixchanoetike chil svokolik xchiʼuk chchamik ta skoj taje.