Tspat koʼontontik li chanubtasel chakʼ Diose
Li Diose yaloj ti chtal lekilal li ta jelavele, chchʼayesbe skʼoplal li vokolile xchiʼuk chakʼ ti akʼo skʼupin xkuxlejal li krixchanoetike (Salmo 37:11). ¿Kʼu yuʼun xuʼ jchʼuntik ti jech chkʼot ta pasele? Yuʼun «li Diose mu xkoʼolaj kʼuchaʼal krixchano ti tsjut kʼope» (Numeros 23:19). Jkʼeltik junantik kʼusi tspas li Jpasvanej kuʼuntike.
Li Diose chakʼbe slajeb li chopol krixchanoetike
«Kʼalal chvokʼik tal kʼuchaʼal chopol tsʼiʼlel li buchʼutik toj chopolike xchiʼuk kʼalal xnichinik noʼox skotol li jpaschoplejaletike, jaʼ sventa chichʼik lajesel ta sbatel osil» (SALMO 92:7).
Jech kʼuchaʼal laj xa jchantik li ta xchanobil echʼe, li balumile yantik xa tsok batel tajek. Pe taje mu labaluk sba chkaʼitik, yuʼun yaloj xa noʼox Vivlia ta 2 Timoteo 3:1-5 ti tsok tajek stalelal li krixchanoetik li ta «slajebal xa kʼakʼale». Pe ¿kʼusi ti chlaj skʼoplale? Jaʼ li krixchanoetik ti muʼyuk chchʼunbeik smantal Diose. Poʼot xa tajek xichʼik lajesel yuʼun Dios li krixchanoetik ti mu skʼan sjel stalelalike. Vaʼun, jaʼ xa noʼox kuxul chkomik li buchʼutik chchʼunbeik smantal Diose. Jech kʼuchaʼal chal ta Salmo 37:29: «Chuʼuninik balumil li buchʼutik tukʼike xchiʼuk te chkuxiik-o sbatel osil».
Li Diose chakʼbe slajeb li Satanase
«Li Dios ti chakʼ jun oʼontonale poʼot xa [xpechʼ ta tekʼel] li Satanase» (ROMANOS 16:20).
Kʼalal mi laj xa ox yichʼ lajesel li Satanas, spukujtak xchiʼuk li chopol krixchanoetike, ch-ayan me jun oʼontonal li ta balumile. Xi jamal yaloj li Jpasvanej kuʼuntike: «Muʼyuk buchʼu [tsibtasvan]» (Mikeas 4:4).
Li Diose tslajesbe-o skʼoplal li chameletik xchiʼuk li lajelale
«Te oy ta stojolal krixchanoetik li skarpana Diose [...]. Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (APOKALIPSIS 21:3, 4).
Li Diose poʼot xa smeltsan li kʼusi sokesojik tal Satanas, Adan, Evae, xchiʼuk li vokolil yakʼoj li mulil jkuchojtike. Vaʼun, li ta mas tsʼakale muʼyuk xa vokolil, muʼyuk xa chamel xchiʼuk «muʼyuk xa lajelal». Li krixchanoetik ti skʼanojik xchiʼuk ti chchʼunbeik smantal li Jpasvanej kuʼuntike chkuxiik sbatel osil. Pe ¿bu chkuxiik?
Li Jpasvanej kuʼuntike tskʼatajes ta paraiso li balumile
«Li takixokol balumile xchiʼuk li takin balumile ta xmuyubajik, li stenlejaltik ti takin tajeke xkuxet noʼox yoʼonton likel xchiʼuk chnichin kʼuchaʼal li asafran nichime» (ISAIAS 35:1).
Kʼalal mi laj yakʼbe slajeb choplejal li Diose, li balumile chkʼataj ta jun paraiso. Chlik nichimajuk sjunul li balumile xchiʼuk ch-epaj li veʼlile (Salmo 72:16). Sak xa lek skotol li nabetike, li tsʼantsʼan voʼetike, li ukʼumetike xchiʼuk li kʼusitik kuxajtik tee, jun xa yoʼontonik. Jech xtok, yikʼaluk van muʼyuk xa chkalbetik skʼoplal ti ikʼ o sokem li osil balumile. Li krixchanoetike ta xlik svaʼan snaik sventa te xnakiik. Muʼyuk xa buchʼu povre, muʼyuk xa buchʼu chcham ta viʼnal xchiʼuk muʼyuk xa buchʼu chkuxiik ta kayeetik (Isaias 65:21, 22).
Li Diose chchaʼkuxes li animaetike
«Chchaʼkuxiik» (ECHOS 24:15).
¿Mi chakʼan to chakʼel yan velta li avutsʼ avalal xchiʼuk avamigotak ti chamemike? Li Dios ti jaʼ li Buchʼu skotol xuʼ yuʼune ta xchaʼkuxesan kʼalal kʼatajem xa ox ta paraiso li balumile. ¿Mi xnop xa noʼox avuʼun kʼu to yelan chamuyubajik mi laj avil abaik yan veltae? Li ta Vivliae chal ti laj onoʼox xchaʼkuxes ololetik xchiʼuk yijil krixchanoetik li Diose, vaʼun jmoj la stsob sbaik yan velta xchiʼuk li yutsʼ yalalike. Li Jesus xtoke la xchaʼkuxes junantik krixchanoetik ta yeloval epal krixchanoetik (Lukas 8:49-56; Juan 11:11-14, 38-44).
Xuʼ van chakʼupin skʼelel xtok liʼe
¡VIK'ILUK ME JSATIK!
Li balumile noj ta vokolil: Oyuk-o spatobil avoʼonton
Li Vivliae tskoltautik yoʼ xkuch kuʼuntik vokoliletik xchiʼuk tspat koʼontontik.
KʼUSITIK TSJAKʼIK TA SVENTA VIVLIA
¿Kʼusi jaʼ li chaʼkuxesele?
Labal van chavaʼi li buchʼutik chchaʼkuxiik tale.
LI KʼUSI BAʼYEL SKʼAN JCHANTIK TA VIVLIAE
¿Kʼu yelan oy li animaetike?
Li Vivliae chal ti chkʼot yorail chchaʼkuxi li krixchanoetike, jech kʼuchaʼal chaʼkuxi voʼne li Lasaroe.
KʼUSITIK TSJAKʼIK TA SVENTA VIVLIA
¿Kʼuxi ta jtatik jun oʼontonal li’ ta balumile?
Chano kʼusi tspas li Ajvalilal yuʼun Dios sventa oyuk jun oʼontonal ta spʼejel balumil.
KʼUSITIK TSJAKʼIK TA SVENTA VIVLIA
¿Bu xuʼ jtatik spatobil koʼontontik?
Li Vivliae xuʼ xakʼbot spatobil avoʼonton avi xchiʼuk li ta jelavele.
