Ichʼo ta mukʼ li yantike
¿KʼU YUʼUN TSOTS SKʼOPLAL TI XKICHʼTIK TA MUKʼ LI YANTIKE?
Mi chkichʼtik ta mukʼ li yantike, muʼyuk me tstsatsaj li jkʼoptike.
-
Xi chal jun lekil tojobtasel ta Vivliae: «Kʼalal xlamet noʼox chijtakʼave, chchʼak lokʼel li skʼakʼal oʼontonale, yan mi chyayijesvan ti kʼu yelan chijkʼopoje, tslikes skapemal jolil» (Proverbios 15:1). Mi muʼyuk chijtsakvan ta venta ti kʼu yelan chijkʼopoj xchiʼuk li kʼusi ta jpastike, xuʼ stsatsaj-o yuʼun li jkʼoptike. Kʼalal jech chkʼot ta pasele, xuʼ me xkil tsots jvokoltik.
-
Xi laj yal li Jesuse: «Jaʼ chlokʼ ta aveik li kʼusitik oy ta avoʼontonike» (Mateo 12:34). Kʼalal muʼyuk lek ta jkʼopontik li yantike, xuʼ te xkakʼtik ta ilel li kʼusi oy ta koʼontontike, yuʼun xuʼ van chopol chkiltik ta skoj ti bu likemik tale o ti kʼu yelan li xkuxlejalike. Mi jech chkaʼi jbatike, skʼan jel li jtalelaltike.
Kʼalal laj yichʼik jakʼbel sloʼilik mas ta 32 mil krixchanoetik ta 28 mukʼtik lumetike, mas ta j-oʼlol laj yalik ti muʼyuk xa mas ichʼbail ta mukʼ li avie.
LI KʼUSI XUʼ XAPASE
Buchʼuuk noʼox ti chachiʼin ta loʼile ichʼvanan ta mukʼ akʼo mi jelel kʼusi chanopik. Jaʼ loʼiltaik li kʼusi lek chavaʼiike, vaʼun muʼyuk me chopol kʼusi chlik anop ta stojolal.
Jechuk me xapasbe yantik jech kʼuchaʼal chakʼan pasbel eke. Mi chavakʼbe ta ilel slekil avoʼonton li yantike, jaʼ me jech chakʼboxuk ta ilel ek.
Ta sjunuluk avoʼonton akʼo perton. Mi oy kʼusi laj yalboxuk o la spasboxuk ti mu toj lekuk laj avaʼie, jaʼ mas lek ti xanop ti mu yaleluk jech la spase.
¿KʼUSI TA JPASKUTIK LI STESTIGOUNKUTIK JEOVAE?
Buyuk noʼox nakalunkutik o chi-abtejkutik chkichʼkutik ta mukʼ skotol krixchanoetik xchiʼuk ta jtijbekutik yoʼonton yantik ti jechuk spasik eke.
Ta moton chkakʼbekutik chanubtasel ta Vivlia li krixchanoetike, pe muʼyuk ta jsujkutik ti xchʼunik li kʼusi jchʼunojkutike. Yuʼun jaʼ ta jpaskutik li kʼusi chal Vivlia ti skʼan ta slekiluk koʼontonkutik xkalkutik li kʼusi jchʼunojkutike xchiʼuk ti xi-ichʼvankutik ta mukʼe (1 Pedro 3:15; 2 Timoteo 2:24).
Muʼyuk chipʼajvankutik. Li ta jtsobajelkutike ta jchʼamkutik buchʼuuk noʼox ti oy ta yoʼonton chchan Vivliae, mu ventauk ti bu likemik tale o ti kʼu yelan li xkuxlejalike. Chkakʼkutik persa sventa xkichʼkutik ta mukʼ skotol li krixchanoetike akʼo mi mu koʼoluk li kʼusi ta jnopkutik o ta jpaskutike (1 Pedro 2:17).
Chkichʼkutik ta mukʼ li ajvaliletik ti bu nakalunkutike (Romanos 13:1). Ta jchʼunbekutik li smantalike xchiʼuk ta jtojkutik li jpatankutike. Muʼyuk ta jtikʼ jbakutik ta politika, akʼo mi jech, muʼyuk ta jsujkutik yantik sventa jechuk spasike, yuʼun jaʼ tsnop stukik.
