Kʼalal batik ta kux oʼonton li jchanunetike, oy jayvoʼ keremetik la stsatsal tsakik jun xchiʼilik ta chanun yoʼ xchiʼinik ta vayel. Te chchanunajik ta jun eskuela ta Canadá ti lek ojtikinbil xchiʼuk ti tojbile. Kʼalal echʼ xa ox kʼuk sjalil li k’usi kʼot ta pasele, li Leonard Stern xi laj yal li ta periodiko Ottawa Citizen: «Li pʼijilale, ti ep k’usi xchanojike o li kʼulejale maʼuk li kʼusi chkoltaatik-o li kerem tsebetik sventa mu spasik li kʼusi chopole».

Xi to laj yal li Sterne: «Li totil meʼiletike jaʼ skʼan xakʼbeik xchan jechuk li yalab xnichʼnabik li kʼusi lek xchiʼuk ti spʼajik li kʼusi chopole. Pe yileluke jaʼ mas tsots skʼoplal chilik ti lekuk slokʼes skalifikasionik xchiʼuk ti sta lek yabtelik li yalab xnichʼnabike».

Melel onoʼox ti toj tsots skʼoplal li chanune, pe akʼo mi toj lek li chanubtasel chakʼike, muʼyuk bu tskoltautik ta sjelel li kʼusi chopol oy ta koʼontontike o li kʼusi chopol ta jpastike. ¿Kʼusi van xuʼ skoltautik sventa xlekub li jtalelaltike?

Xkoʼolaj kʼuchaʼal jun nen li Vivliae. Kʼalal ta jkʼeltike, jaʼ te chkakʼtik venta li kʼusi mu spas kuʼuntik xchiʼuk li kʼusi vokol chkaʼitik yiktaele (Santiago 1:23-25). Jech noxtok, tskoltautik sventa xjel li jtalelaltike xchiʼuk ti jtsʼitestik li slekil oʼontonale, li yutsil oʼontonale, li manxoale, ti jnaʼ jpajtsan jbatike xchiʼuk li kʼanelale. Li talelaletik taje jaʼ tskoltautik sventa junuk noʼox koʼontontik xchiʼuk ti jmojuk noʼox oyutike. Li Vivliae chal ti «jaʼ batsʼi jpasvanej ta jun» li kʼanelale (Kolosenses 3:14). ¿Kʼu yuʼun mu kʼusi xkoʼolaj-o li kʼanelale? Jkʼeltik batel kʼusi chal li Vivliae.

• «Li kʼanelale xmalaj yuʼun xchiʼuk lek yoʼonton. Li kʼanelale mu snaʼ x-itʼixaj, muʼyuk chakʼ sba ta ichʼel ta mukʼ xchiʼuk muʼyuk xtoyet xa chaʼi sba, maʼuk ti mu xichʼ smelolal ti kʼu yelan tspas sbae, maʼuk tsaʼ li kʼusi lek chaʼi stuke xchiʼuk muʼyuk ch-ilin ta anil. Muʼyuk chchap batel li kʼusi chopol tspasbate. Maʼuk xkuxet-o yoʼonton li kʼusi muʼyuk tukʼe [o li kʼusi chopole], jaʼ xkuxet-o yoʼonton li kʼusi melele. Stsʼik yuʼun skotol li kʼusitike, [...] xkuch yuʼun skotol. Li kʼanelale mu xlaj-o skʼoplal» (1 Korintios 13:4-8).

• «Muʼyuk kʼusi chopol tspasbe xchiʼil li buchʼu kʼanvaneme» (Romanos 13:10).

• «Li kʼusi mas tsots skʼoplale jaʼ ti xakʼan abaik tajek ta jujuntale, yuʼun chpix epal muliletik li kʼanelale» (1 Pedro 4:8).

¿Mi mu jechuk ti jun noʼox koʼontontik kʼalal te jchiʼuktik li kutsʼ kalaltike? Jech, yuʼun jnaʼojtik ti tskʼanik ti lekuk noʼox oyutike xchiʼuk muʼyuk kʼusi chopol tspasbutik.

 Ta skoj ti chijkʼanvane, oy ta koʼontontik sjelel li jkuxlejaltike xchiʼuk oy kʼusitik chkiktatik spasel. Kalbetik skʼoplal jun vinik ti Yorch chkakʼbetik sbie, oy tajek ta yoʼonton tskʼel li yuni mom ti jaʼ to vokʼe. Pe li Yorche nopem tajek xaʼi tsikʼolaj, jaʼ yuʼun li sniʼe laj yal ti mu teuk nopol sikʼolaj ti bu oy li uni olole. ¿Kʼusi la spas li Yorche? Akʼo mi oy xa ox ta 50 jabil ti tsikʼolaje, laj yikta ta skoj ti tskʼan tskʼel li yuni mome. ¿Mi mu jechuk ti toj ep kʼusi spas yuʼun li kʼanelale?

Ta kʼunkʼun ta jchantik batel kʼuxi xuʼ xijkʼanvan. Li totil meʼiletike jaʼik li buchʼu lek xuʼ xchanubtas yalab xnichʼnabik yoʼ xkʼanvanike. Yuʼun jaʼ tsmakʼlintas li yalab xnichʼnabike, jaʼ chchabiik xchiʼuk tskoltaik mi oy kʼusi la snuptanik o mi ipajike. Li jun lekil totil meʼile chchiʼin ta loʼil li yalab xnichʼnabike xchiʼuk chchanubtasik. Jech noxtok, ta stukʼibtasik xchiʼuk chakʼbeik xchan li kʼusi lek xchiʼuk li kʼusi mu stakʼ spasike. Pe maʼuk noʼox, yuʼun lek kʼusi chakʼbeik xchan ta skoj ti kʼu yelan stalelalike.

Kʼux ta alel ti oy jlom totil meʼiletik muʼyuk tspasik li kʼusi sbainojike. Pe ¿mi jaʼ skʼan xal ti chopol chbat stalelal li alab nichʼnabiletike? Moʼoj. Yuʼun oy krixchanoetik ti sjeloj talel xkuxlejalik xchiʼuk lek yoʼontonik akʼo mi xchʼakoj sba li stot smeʼike. Jech xtok, li buchʼutik mu xa xtukʼibik ch-ilat yuʼun li krixchanoetike sjeloj xa li stalelalike. Jaʼ ta jkʼeltik batel li ta yan mantale.