Li kʼusi chal Vivliae xuʼ sjelbe xkuxlejal li krixchanoetike. Jkʼeltik kʼu yelan koltaatik yuʼun Vivlia li Ricardo xchiʼuk Andrése.

RICARDO. Li-och ta jun pandiya kʼalal 15 toʼox jabilale. Ta skoj ti chex keremun toʼoxe, lik jchanbe stalelal li kamigotake. Ti melel xkaltike, li kʼusi oy ox ta koʼontone jaʼ ti xi-och lajunebuk jabil ta chukele. Toj bol yaʼel li kʼusi la jkʼane, pe li ta barrio bu nakalune lek toʼox ichʼbilik ta mukʼ li buchʼutik yichʼojik toʼox chukele. Jech ox ta jkʼan xichʼikun ta mukʼ ek.

Chimulivaj toʼox, ta jlajes droga xchiʼuk toj simaronun. Oy jun akʼobale la jtukʼa jbakutik xchiʼuk yan krixchanoetik. La jnop ti te chichame, pe likol to lokʼel. Vaʼun, jaʼ te lik jnopbe lek skʼoplal li jkuxlejale xchiʼuk li kʼusi oy ta koʼonton staele. Kʼot ta nopel kuʼun ti skʼan jel jtalelale, pe ¿kʼusi xuʼ jpas? ¿Buchʼu xuʼ skoltaun?

Jutuk mu skotoluk li kutsʼ kalale toj ep svokolik xchiʼuk muʼyuk xmuyubajik, pe oy jun juntot ti jelel tajek li yutsʼ yalale. Jnaʼoj ti lek yoʼontonike xchiʼuk ti chakʼ ta xkuxlejalik li kʼusi chal Vivliae. Yalojbeikun ti Jeova sbi li Diose. Jaʼ yuʼun, kʼalal oy xa ox kʼuk sjalil yechʼel ti la jtukʼa jbakutike, la jkʼopon li Jeovae xchiʼuk laj kalbe ti akʼo skoltaune. Ta yokʼomale, kʼot jun stestigo Jeova ta jna, mu jchʼun laj kaʼi. Vaʼun, la xchanubtasun ta Vivlia.

Pe ta anil noʼox oy kʼusi la jnuptan. Li kamigotak toʼoxe la skʼoponikun talel sventa xbat jchiʼinik, pe laj kalbeik ti muʼyuk chibate akʼo mi mu kʼunuk laj kaʼi. Jpʼel ta koʼonton ti ta jchan-o batel li Vivliae. Lek tajek ti jech la jpase, yuʼun jel ta jyalel li jkuxlejale xchiʼuk ximuyubaj xa li avie.

Oy toʼox ta koʼonton ti xi-och ta chukel lajunebuk jabil sventa xichʼikun ta mukʼ jtsop pandiyae. Jaʼ yuʼun, la jkʼanbe Dios ti akʼo xakʼ jchanubtas ta Vivlia lajunebuk jabil li krixchanoetik jech kʼuchaʼal laj kichʼ koltaele. La stakʼ j-orasion li Diose, yuʼun oy xa ta 17 jabil yakal jkolta li yantike. Muʼyuk onoʼox li-och ta chukel.

Li kamigotak toʼoxe jal xa tikʼajtik ta chukel xchiʼuk li yantike chamemik xa. Ta jtoj tajek ta vokol ti jelel laj yakʼ ta ilel stalelalik li kutsʼ kalale xchiʼuk ti laj yakʼ ta xkuxlejalik li kʼusi chal Vivliae. Mas to kichʼojan ta mukʼ, jaʼ xkom to ti kʼu toʼox yelan kichʼoj ta mukʼ junuk pandiyeroe. Pe mas to ta jtojbe ta vokol Dios ti laj yakʼ jchan kʼu yelan xuʼ lek xikuxie.

 ANDRÉS. Te livokʼ xchiʼuk te lichʼi ta jun barrio ti abol noʼox sbae, ti bu ep ta tael drogae, oy jmilvanejetik, tstsatsal kʼanik takʼin xchiʼuk chchon sbekʼtalik. Jyakubel toʼox tajek li jtote xchiʼuk meʼinem tajek xaʼi slajesel kokaina. Jech xtok, toj echʼem toʼox xut sbaik xchiʼuk tsmaj sbaik xchiʼuk li jmeʼe.

Ta jkeremal noʼox lik kuchʼ pox xchiʼuk lik jlajes droga. Jaʼ toʼox jnainoj li kayee xchiʼuk chi-elkʼaj, vaʼun ta jchon li kʼusi chkelkʼane. Kʼalal jelav jayibuk jabile, li jtote muʼyuk lek kʼusi la xchanubtasun spasel, yuʼun laj yakʼbun kil kʼuxi xuʼ jelubtas batel drogaetik xchiʼuk yan kʼusitik sventa xichʼ chonel, ti maʼuk jech chal li smantal ajvalile. Ta anil noʼox la jpas kanal epal takʼin. Pe jun veltae ay polisiaetik ta jna sventa xchukikun batel ta skoj ti oy xa ox buchʼu ta jmile. La stikʼikun ta chukel voʼob jabil.

Jun veltae, laj yichʼik takel ta ikʼel li jchukeletik sventa xbat yaʼiik jun loʼil ti chakʼ li stestigotak Jeovae, vaʼun la jnop chibat ek. Oy lek smelolal li kʼusi chalike, jaʼ yuʼun la jchʼam jun chanubtasel ta Vivlia. Li stestigotak Jeovae muʼyuk la smukik li kʼusi chal Vivliae, yuʼun jamal laj yalbeikun li tukʼil mantaletik sventa talelal yakʼoj Diose.

Ta anil noʼox laj kakʼ venta ti skʼan xkichʼ koltael sventa xjel li jtalelale, mas to kʼalal laj yalik li yan jchukeletik ti oy kʼusi tspasbeikun ta skoj ti muʼyuk lek chilik ti yakal ta jchan Vivliae. Laj kalbe Jeova ti akʼo xakʼbun kipal xchiʼuk jpʼijile. Koliyal taje, albej kuʼun li yan jchukeletik li kʼusi yakal ta jchane.

Kʼalal lilokʼ ta chukele, lixiʼ tajek xchiʼuk ta jkʼan ox ti teuk to xikom kʼuk sjalile. Kʼalal yakal xa ox chilokʼ batele, junantike tspasik senyail ta skʼobik xchiʼuk li jlome xi laj yalbeikun ta slekil yoʼontonike: «Kʼelo me aba echʼel, uni pastor».

Mu jkʼan jnop kʼu van yelan jkuxlejal ti muʼyukuk bu xkakʼ jba ta chanubtasel yuʼun li Diose. Jaʼ yuʼun, ta jtojbe ta vokol Dios ti skʼanojun tajeke xchiʼuk ti oy to jbalil laj yile. *