Jechuk xavaʼi kʼuchaʼal chaʼi sba li yantike
Li kʼusi chakʼ vokolile
Mi jaʼ ta jkʼeltik li kʼusi jelelik-o li yantike, xuʼ me chopol xa tajek chkiltik-o ta skoj ti kʼusi jelelik-oe. Ta skoj ti oy kʼusi jelelik-oe, xuʼ me jnoptik ti muʼyuk xa tsots skʼoplalike. Mi jech la jnoptike, xuʼ me vokol xa chkaʼitik ti jechuk xkaʼi jbatik jech kʼuchaʼal chaʼi sbaik li yantike. Taje jaʼ me slikeb ti chopol li kʼusi ta jnoptik ta stojolal li yantike.
Beiltasel ta Vivlia
«Kuxetuk me avoʼonton achiʼukik li buchʼutik xkuxet yoʼontonike; okʼan me achiʼukik li buchʼutik ch-okʼike» (ROMANOS 12:15).
¿Kʼusi skʼan xal? Li beiltasel liʼe xuʼ xi noʼox xkaltike: ti jechuk xkaʼi jbatik kʼuchaʼal li yantike. Sventa spas kuʼuntike, skʼan xkaʼibetik xkʼuxul svokol li yantike.
Chkoltavan ti xkaʼibetik xkʼuxul svokol li yantike
Kʼalal chkaʼibetik xkʼuxul svokol li yantike, chkakʼtik venta ti koʼolutike. Jech xtok, chkakʼtik venta ti jech chaʼi sbaik xchiʼuk jech tsnopik kʼuchaʼal li voʼotike. Kʼalal jech chkaʼitike, tskoltautik ta yaʼibel smelolal ti jaʼutik jun utsʼ alalil jkotoltike. Ti chkakʼtik venta ti koʼolutike, jaʼ tskoltautik sventa mu chopoluk kʼusi jnoptik ta stojolal li yantike.
Ti xkaʼitik kʼu yelan chaʼi sbaik li yantike jaʼ me tskoltautik sventa jtsaktik ta venta. Li Anne-Marie ti likem ta Senegale nopem xaʼi muʼyuk tstsak ta venta li buchʼutik muʼyuk tsots skʼoplal ilbile. Xi chalbutik smelolal kʼusi koltaat sventa xakʼ ta ilel ti kʼuxuk ta yoʼonton li yantike: «Kʼalal laj kil kʼu yelan chil svokolik li krixchanoetik taje, la jnopbe skʼoplal kʼu van yelan chkaʼi jba ti voʼonuke. Vaʼun, laj kakʼ venta ti maʼuk xa tsots jkʼoplal li voʼone xchiʼuk ti muʼyuk kʼusi jpasoj ti masuk xa tsots jkʼoplal chkaʼi jbae». Jaʼ yuʼun chaʼa, kʼalal chkakʼtik persa yaʼibel smelolal kʼu yelan chil svokol li yantike, jaʼ me tskoltautik sventa mu jchopol jloʼiltatik.
Li kʼusi xuʼ xapase
Kʼelo ti kʼusi xakoʼolajik-o xchiʼuk ti kʼusi koʼol x-ayan avuʼunik xchiʼuk li jtsop krixchanoetik ti mu masuk lek chavile. ¿Kʼu van yelan chaʼi sbaik ti xiuk chkʼot ta stojolalike?
Ti xkaʼibetik xkʼuxul svokol li yantike jaʼ tskoltautik ta yaʼibel smelolal ti jaʼutik jun utsʼ alalile
Kʼalal koʼol chveʼik xchiʼuk li yutsʼ yalalike.
Kʼalal tsots abtejik sjunul kʼakʼale.
Kʼalal chchʼay yoʼonton xchiʼuk li yamigotakike.
Kʼalal chchikinta skʼupil sonike.
Akʼo persa ti voʼotuk xae. Vaʼun xi xajakʼbe abae:
¿Kʼusi van ta jpas ti oyuk buchʼu chakʼ ta aʼiel ti muʼyuk jbalile?
¿Kʼu van yelan chkaʼi jba mi chopol kʼusi tsnopik ta jtojolal ti mu xojtikinikune?
Ti teuk jkʼoplal li ta jtsop krixchanoetik taje, ¿kʼu van yelan ta jkʼan ti xilikune?
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
¿Mi xaʼibe xkʼuxul jvokoltik li Diose?
Li Vivliae chalbutik ti Diose snaʼoj li kʼusi ta jnuptantike, li kʼusi ta jnoptike xchiʼuk chaʼi ti kʼu yelan chkaʼi jbatike.
¡VIK'ILUK ME JSATIK!
Xuʼ lek xakuxi: Ta kutsʼ kalaltik xchiʼuk kamigotik
Sventa lekuk xkil jbatik xchiʼuk li yantike, tsots skʼoplal ti xkakʼbetik li kʼusi oy kuʼuntike.
