Akʼo venta ti oy kʼusi lek spas yuʼun li yantike
Li kʼusi chakʼ vokolile
Kʼalal ta jtoy jbatike, xuʼ me chopol kʼusi jnoptik ta stojolal li yantike. Li jun krixchano ti jtoybae tsnop ti stuk xa noʼox toj leke. Mas mukʼ skʼoplal chaʼi sba kʼuchaʼal li yantike. Taje xuʼ me jech xkʼot ta jtojolaltik. Li Encyclopædia Britannica xi chale: «Jutuk mu skotoluk krixchanoetik xchʼunojik ti mas lek ti kʼu yelan xkuxlejalike, li kʼusitik tslajesike, ti kʼu yelan tslap skʼuʼ spokʼike, ti kʼusi nopem xaʼiik spasele, li kʼusi xchʼunojike xchiʼuk li stalelalike o yan kʼusitik». ¿Kʼusi xuʼ jpastik sventa mu jechuk xkʼot ta jtojolaltik taje?
Beiltasel ta Vivlia
«Jaʼ lek bikʼit xavakʼ abaik, jaʼ masuk tsots skʼoplal xavilik li yantike» (FILIPENSES 2:3).
¿Kʼusi skʼan xal? Sventa stsal kuʼuntik li toybaile, skʼan me bikʼit xkakʼ jbatik. Mi bikʼit chkakʼ jbatike, ta me xkakʼtik venta ti mas to ep kʼusitik snaʼik li yantike. Ta melel mu xuʼ xkaltik ti oy junuk stsʼunbal krixchano ti mas xa leke.
Jkʼeltik kʼusi kʼot ta stojolal li Stefane. Te chʼi ta jun lum ti naka jkomunistaetike xchiʼuk tsal yuʼun ti chopol toʼox kʼusi tsnop ta stojolal li lumetik ti maʼuk jkomunistaetike. Xi chale: «Sventa stsal kuʼuntik ti chopol kʼusi ta jnoptik ta stojolal li yantike,
tsots skʼoplal ti jnoptik ti jaʼ mas tsots skʼoplal li yantike. Mu jnaʼ skotol xchiʼuk oy onoʼox kʼusi ta jchan ta stojolal li yantike».Li kʼusi xuʼ xapase
Jaʼ jechuk xanop ti kʼu avelan ta melele xchiʼuk teuk ta ajol ti oy achopolil eke. Akʼo venta ti oy kʼusitik mas lek spas yuʼun li yantike. Mu xanop ti jech xa skotolik li ta jtsop krixchanoetik taje.
Sventa mu kʼusi chopol xanop ta stojolal li jun krixchanoe, xi xajakʼbe abae:
Akʼo venta ti oy kʼusitik spas yuʼun yantik ti mu spas avuʼun li voʼote
-
¿Mi ta melel chopol li kʼusi muʼyuk lek chkil ta stojolale o mi jaʼ noʼox ta skoj ti jelel li kʼusi nopem xkaʼi spasele?
-
¿Mi oy van kʼusi chopol chil ta jtojolal?
-
¿Kʼusi ti mas lek xtojob spasel li stuke?
Mi lek chatakʼ li sjakʼobiltak taje, xuʼ me stsal avuʼun ti chopol kʼusi chanop ta stojolal li yantike xchiʼuk chavakʼ venta li kʼusitik lekik xtojob spasele.