Ta kutsʼ kalaltik xchiʼuk kamigotik
Epal krixchanoetike mu kʼunuk chaʼiik ti lekuk xil sbaik xchiʼuk li yantike. Jkʼeltik batel junantik beiltaseletik ta Vivlia ti tskoltautik yoʼ lekuk xkil jbatik xchiʼuk yantike.
MU XANOP AKʼOPLAL ATUK
BEILTASEL TA VIVLIA: «Oyuk-o me ta avoʼontonik li yantike, maʼuk noʼox me xanop akʼoplal atukik» (Filipenses 2:4).
¿K’USI SK’AN XAL? Sventa lekuk xkil jbatik xchiʼuk yantike, skʼan ta sjunul koʼontontik xkakʼtik li kʼusi oy kuʼuntike, maʼuk noʼox jmalatik ti xkichʼtik akʼbele. Mi jaʼ noʼox ta jpastik li kʼusi oy ta koʼonton jtuktike, xuʼ tsokes ti kʼu yelan xkil jbatik xchiʼuk yantike. Jnopbetik skʼoplal jun nupultsʼakal, mi jaʼ noʼox tspas kʼusi lek chaʼi stuk li malalil o ajnilale, xuʼ me xlik sloʼla li snup xchiʼile. Jech xtok, li buchʼu tstoy sba ta skoj li kʼusi oy yuʼune o li kʼusi xtojob spasele, chjipat komel yuʼun li yamigotake. Li livro El camino del carácter chal ti muʼyuk kʼusi lek tsta li buchʼu jaʼ noʼox oy ta yoʼonton li kʼusi tskʼan stuke.
LI KʼUSI XUʼ XAPASE
-
Skoltael yantik. Xuʼ jpat koʼontontik ta stojolal li jun lekil amigoile xchiʼuk ta skotol ora oy ta yoʼonton chkoltavan. Li buchʼutik xchanojbeik skʼoplale chalik ti mas la jutuk ch-ipajik ta at-oʼonton xchiʼuk mas la xmuyubajik li buchʼutik oy kʼusi tspasik ta slekil yoʼontonike.
-
Yaʼibel xkʼuxul svokol yantik. Taje jaʼo kʼalal chkaʼitik ti kʼu yelan chaʼi sbaike xchiʼuk ti xkaʼibetik li xkʼuxul svokolike. Mi chkakʼ kipaltik ta yaʼibel svokol li yantike, muʼyuk chkaltik li kʼusi kʼuxik ta aʼiele, ti muʼyuk chijtsakvan ta ventae o ti yolbaj xa kʼusi chkaltik sventa chopol chaʼi sba li yantike.
Kʼalal chkaʼibetik xkʼuxul svokol li yantike, tskoltautik sventa oyuk stsʼikemal kuʼuntik. Jaʼ yuʼun, li talelal taje tskoltautik sventa mu chopoluk kʼusi jnoptik ta stojolal yantik xchiʼuk sventa jta kamigotik ti jelel stalel xkuxlejalik o ti kʼusi echʼem ta xkuxlejalike.
-
Xchʼakbel yorail sventa xchiʼinel yantik. Sventa lek xkojtikintik li yantike, skʼan jchiʼinantik ta loʼil. Jaʼ yuʼun, xuʼ jta jlekil amigotik mi lek jnaʼ xijloʼilajutike. Skʼan xachikinta li kʼusi chal avamigotak xchiʼuk ti oyuk ta avoʼonton li kʼusi tsnuptanike. Achʼ to laj xchanbeik skʼoplal ti kʼalal oy «buchʼu jaʼ tsloʼilta li kʼusitik mas tsotsik skʼoplale, mas to xmuyubaj».
STʼUJEL LEKIL AMIGOILETIK
BEILTASEL TA VIVLIA: «Tsokes jlekil talelaltik li xchiʼinel chopol krixchanoetike» (1 Korintios 15:33).
¿K’USI SK’AN XAL? Li buchʼutik chkamigointike xuʼ sjel jtalelaltik, xuʼ xlekub yuʼun o xuʼ tsokes. Li buchʼutik chchanbeik skʼoplal ti kʼu yelan chaʼi sbaik li krixchanoetike (sociólogos) chalik ti buchʼutik chamigoinik li buchʼutik tsikʼolajik o mi chtuchʼ snupunel ta registro civile xuʼ van jech chlik spasik ek.
LI KʼUSI XUʼ XAPASE. Saʼo avamigotak ti lek stalelaltak chavilbee xchiʼuk ti chakʼan chachanbee. Jech kʼuchaʼal li buchʼutik oy lek spʼijile, ti snaʼ stsakvan ta mukʼe, ti snaʼ yakʼel li kʼusi oy yuʼune xchiʼuk ti snaʼ lek xchʼamvane.
YAN BEILTASELETIK TA VIVLIA
Kʼelo li videoetik ti lokʼemik ta Vivlia ti jaʼ sventa chkoltaatik li nupultsʼakaletik, li chex kerem tsebetik xchiʼuk li ololetik sventa junuk yoʼontonik li ta yutsʼ yalalike.
MU XKALTIK LI KʼUSI KʼUXIK TA AʼIELE
«Oy bochʼo tojtoj tuchʼel xa chcʼot yuʼun yaʼyel li cʼusi chalique» (PROVERBIOS 12:18).
JNAʼTIKUK YAKʼEL LI KʼUSI OY KUʼUNTIKE
«Li bochʼo toj lec yoʼntone lec chbat yuʼun scotol» (PROVERBIOS 11:25).
JECHUK JPASBETIK YANTIK LI KʼUSI TA JKʼANTIK PASBELE
«Skotol li kʼusitik chakʼan akʼo spasboxuk li krixchanoetike skʼan me jech xapasbeik ek» (MATEO 7:12).
