Sventa lekuk noʼox oyutike
Li Vivliae maʼuk jlik livro sventa poxiletik, pe tskoltautik sventa lekuk noʼox oyutik. Jkʼeltik junantik beiltaseletik ta Vivlia ti tskoltautik sventa mu masuk xij-ipaje.
LEKUK KʼUSI NOPEM XKAʼITIK SPASEL
BEILTASEL TA VIVLIA: «Yuʼun muʼyuk buchʼu spʼajoj li sbekʼtal stuke, ti kʼusie tsmakʼlin xchiʼuk chkʼuxubin» (Efesios 5:29).
¿K’USI SK’AN XAL? Li beiltasel ta Vivlia taje tskoltautik sventa jchabi jbatik. Li buchʼutik chchanbeik skʼoplale yilojik ti jaʼ mas chij-ipaj ta skoj li kʼusi muʼyuk lek nopem xkaʼitik spasele. Jaʼ yuʼun, jaʼ jutuk chij-ipaj mi lek kʼusi nopem xkaʼitik spasele.
LI KʼUSI XUʼ XAPASE
-
Tʼujo lek li kʼusi chalajese. Kʼelo ti lekuk li kʼusi chalajese xchiʼuk epuk xavuchʼ voʼ.
-
Oyuk kʼusitik xapas. Kʼalal oy noʼox kʼusi chapase xuʼ xatabe sbalil, mu ventauk li ajabilale, li kʼusi mu spas avuʼune o mi oy achamel ti muʼyuk xa xpoxile. Akʼo mi xuʼ skoltaot avutsʼ avalal sventa xapas ejersisio o mi jaʼ tskoltaot li buchʼu xchanojbe skʼoplale, voʼot oy ta aba sventa lekuk oyot.
-
Lekuk jal xijvay. Kʼalal muʼyuk lek ta jkuxtike xuʼ tsots chij-ipaj yuʼun. Epal krixchanoetike jutuk tajek chvayik ta skoj ti oy to kʼusitik yan tskʼan spasike. Pe li buchʼutik lek jal chvayike mas lek chaʼi sbaik.
IKTAO SPASEL LI KʼUSI CHOPOL TOʼOX NOPEM XAVAʼIE
BEILTASEL TA VIVLIA: «Jsakubtas jbatik ta sventa li kʼusi tsokes jbekʼtaltike xchiʼuk li kʼusi oy ta jnopbentike» (2 Korintios 7:1).
¿K’USI SK’AN XAL? Muʼyuk cha-ipaj mi muʼyuk chapas li kʼusitik tsokes abekʼtal jech kʼuchaʼal li sikʼolajele, yuʼun nabil ti ep buchʼutik ch-ipajik xchiʼuk chchamik ta skoj li sikʼolajele.
LI KʼUSI XUʼ XAPASE. Akʼbo lek yorail sventa xavikta li sikʼolajele, tsʼibao ta kalendario xchiʼuk albo li buchʼu anaʼoj ti xuʼ skoltaote. Mi kʼot yorail ti anopoj chavikta li sikʼolajele, skʼan ti achʼayojuk xa ox batel li sikʼolaletike, li yavil stanile, li stsanobiltak o yan kʼusitik ti te skʼoplal xchiʼuk li sikʼolajele. Mu xabat ti bu anaʼoj tsikʼolajike.
YAN BEILTASELETIK TA VIVLIA
Mi chakʼan jlikuk Avivliae, jakʼbo li stestigotak Jeova ti bu nakalote.
ICHʼO APʼIJIL
«Me oy bochʼo tspas ach’ snae, ac’o yac’be smac ta joyob li sjol snae, yu’un jech mu boch’o xbalch’uj yalel, jech mu sta smulic xchi’uc yajnil xnich’nab te ta sna» (DEUTERONOMIO 22:8).
OYUK SMALAEL AVUʼUN
«Li bochʼo mu xlic scʼacʼal yoʼnton ta orae jaʼ svinajeb ti lec snaʼbe smelole; yan li bochʼo mu stsʼic yuʼune jaʼ svinajeb ti toj bole, ti mu snaʼbe smelole» (PROVERBIOS 14:29).
MU TOJ ECHʼEMUK XAVEʼ
«Mu me xachiʼin [...] li bochʼo mu xpaj yoʼntonic ta veʼele» (PROVERBIOS 23:20).
