Li takʼine
Koliyal ti chchʼunik li beiltaseletik ta Vivliae epal krixchanoetik mas xa jutuk chil svokolik ta sventa li takʼine.
SKʼAN BAʼYUK XICHʼ NOPEL
BEILTASEL TA VIVLIA: «Li kʼusitik snopoj tspas li buchʼutik baxbolike jpʼel skʼoplal lek chkʼot ta pasel, pe jaʼuk li buchʼutik anil noʼox kʼusitik tsnop tspasike jpʼel skʼoplal ch-ikʼatik batel ta povreal» (Proverbios 21:5, TNM).
¿KʼUSI SKʼAN XAL? Skʼan baʼyuk lek xanop li kʼusi chapase xchiʼuk xatsak ta venta yoʼ spas avuʼune. Teuk me ta ajol ti xuʼ van mu stakʼ xaman skotol li kʼusi chakʼane. Jaʼ yuʼun, pʼijan ti kʼu yelan chatunes atakʼine.
LI KʼUSI XUʼ XAPASE
-
Jaʼ noʼox xalajes ti kʼu yepal anopoje. Tsako ta vun skotol ti kʼu yepal chakʼan chalajes atakʼin xchiʼuk kʼelo li kʼusitik mas tsotsik skʼoplale. Mi laje chʼako kʼu yepal takʼin chalajes ta jujutos ti kʼusi chamane. Pe mi skʼan to stsʼak ti kʼu yepal anopoj chalajes ta sventa jtosuk li kʼusi anopoj chamane, tuneso li takʼin ti yan-o bu chatunes xa oxe. Jnoptik noʼox ti ep la alajes atakʼin ta skoj li gasolinae, jaʼ tuneso li takʼin ti achʼakoj toʼox sventa li kʼusitik ti muʼyuk mas tsotsik skʼoplale jech kʼuchaʼal ti chbat veʼan ta junuk restaurantee.
-
Mu yaleluk xasaʼ avil. Mi xuʼ chavile, jaʼ mas lek ti mu xasaʼ avile. Mi oy kʼusi chakʼan chamane, jaʼ mas lek ti baʼyuk xatsobbe stojole. Mi chatunes tarjeta de creditoe tojo noʼox me jujun u li avile sventa mu xatojbe sjol. Mi oy xa avile, nopo kʼusi skʼan xapas sventa xatoj noʼox xchiʼuk jech me xapas.
Yichʼoj chanbel skʼoplal ti kʼalal chichʼ tunesel li tarjeta de creditoe mas la ep chichʼ lajesel takʼin. Jaʼ yuʼun, lekuk me xatunes.
LEKUK ME ATALELAL
BEILTASEL TA VIVLIA: «Li bochʼo chʼaje muʼyuc ta yoʼnton yabtel ti cʼalal yorail abtele, pero cʼalal yorail cʼaoje, xlaj xa yuʼun xcʼaoj ec, pero muʼyuc cʼusi scʼaj» (Proverbios 20:4).
¿KʼUSI SKʼAN XAL? Li buchʼu chʼaje xuʼ me spas ta povre. Jaʼ yuʼun, baxbolukot me ta abtel xchiʼuk tojoban ta stunesel atakʼin, mi jech chapase, chapalot mi oy kʼusi tun avuʼun ta tsʼakale.
LI KʼUSI XUʼ XAPASE
-
Baxbolukot me ta abtel. Mi baxbolot ta abtel xchiʼuk mi xuʼ spat yoʼontonik ta atojolale, oy-o me avabtel. Li yajval abteletike lek chilik li buchʼutik chakʼ ta yoʼonton yabtelike.
-
Tukʼuk kʼusi jpastik. Mi muʼyuk tukʼ kʼusi ta jpastik ta kabteltike, xuʼ me mu xa lekuk xkom jkʼoplaltik xchiʼuk xuʼ van mas xa vokol jta yan kabteltik.
-
Oyuk spajeb li kʼusitik ta jkʼantike. Mi muʼyuk spʼisol kʼu yelan chkiltik li takʼine, xuʼ me xij-ipaj yuʼun xchiʼuk xuʼ van muʼyuk xa lek chkil-o jbatik xchiʼuk li yantike. Vuleso me ta ajol ti maʼuk mas tsots skʼoplal li takʼine.
YAN BEILTASELETIK TA VIVLIA
Kʼelo Vivlia ta jpajinakutik jw.org, ti oy ta sienal jeltos kʼopetike.
MU JECHEʼ XACHʼAY AKʼAKʼAL XCHIʼUK ATAKʼIN TA SKOJ LI KʼUSI MEʼINEM XAVAʼI SPASELE
«Yuʼun li jyacubeletic xchiʼuc li bochʼo cʼusiuc noʼox tstun slajesique tspasic ta meʼon; li bochʼotic chʼajique solel pacʼ noch scʼuʼ spocʼ tslapic» (PROVERBIOS 23:21).
MU XAVUL TAJEK AVOʼONTON
«Mu xa xavul avoʼontonik kʼuxi chakuxiik ta sventa ti kʼusi chalajesik o ti kʼusi chavuchʼike; o ta sventa li abekʼtalik ti kʼusi chalapike» (MATEO 6:25).
MU ME XA-ITʼIXAJ
«Li xpichʼetel co’ntontique chisujutic ta sa’el li jc’ulejaltique; mu jna’tic me nopol xtal stsacutic li me’onale» (PROVERBIOS 28:22).
Xuʼ van chakʼupin skʼelel xtok liʼe
NUPULTSʼAKAL XCHIʼUK UTSʼ ALALIL
¿Kʼuxi xuʼ xijkuxi akʼo mi jutuk jtakʼintik?
Xuʼ xakʼ tajek vul oʼonton kʼalal jutuk xa ta jpastik kanale, pe xuʼ skoltautik li pʼijil tojobtaseletik chal Vivlia sventa jnaʼtik kʼuxi xuʼ xijkuxi akʼo mi jutuk jtakʼintik.
