Ti kʼu yelan chkil jbatik xchiʼuk li Diose
Jech kʼuchaʼal laj kiltik li ta sba mantale, oy epal krixchanoetik ti xchʼunojik ti chʼul li Vivliae. Kʼalal chchanik xchiʼuk chkuxlebinik li kʼusi chale, mas nopol chaʼi sbaik ta stojolal Dios xchiʼuk chilik ti oy sbalil li xkuxlejalike.
Kʼalal chal Vivlia ti ‹yichʼojbe xchʼul espiritu Dios› li jun krixchanoe, chakʼ ta aʼiel ti lek stalelale o ti lek kʼusi tsnop ta sventa li kuxlejale. Maʼuk tspas li kʼusi oy ta yoʼontone, yuʼun jaʼ tsots skʼoplal chaʼi spasel li kʼusi chal Diose (Judas 18, 19; Efesios 5:1).
OYUK SPATOBIL AVOʼONTON
BEILTASEL TA VIVLIA: «Me chchibaj avoʼnton cʼalal yorail oy avocole, yuʼun muʼyuc stsatsal avoʼnton» (Proverbios 24:10).
¿K’USI SK’AN XAL? Kʼalal chijchibaje, muʼyuk xa kipaltik sventa jtsaltik li vokoliletik ta jnuptantik jujun kʼakʼale. Pe kʼalal oy spatobil koʼontontike jaʼ chakʼ kipaltik sventa stsal kuʼuntik, yuʼun tsvules ta joltik ti mu sbateluk osil oy li vokoliletike xchiʼuk tsvules ta joltik ti xuʼ lek kʼusi chkʼot ta pasele.
LI KʼUSI XUʼ XAPASE: Nopbo skʼoplal li kʼusitik lek chtal ta jelavele. Mu xavul avoʼonton ta sventa li kʼusi xuʼ xkʼot ta pasel ta jelavele o ti jaʼ noʼox xamala ti xlekub li akuxlejale. Jaʼ mas lek ti xavakʼ ta avoʼonton stael li kʼusi anopoje xchiʼuk teuk ta ajol ti oy onoʼox kʼusi xuʼ xkʼot ta pasel ti muʼyuk amalaoje (Eclesiastés 9:11). Jutuk mu skotoluk velta lek kʼusi chkʼot ta pasel akʼo mi maʼuk toʼox jech jnopojtik. Li Vivliae tskoʼoltas ta yabtelanel osil, xi chale: «Ovolajan noʼox ta sob xchiʼuc ta mal cʼacʼal, yuʼun mu xanaʼ bu junucal lec chbat, me jaʼ ti baʼyuc laj atsʼune o me jaʼ ti bu tsʼacal laj atsʼune, o me xchibal lec chbat» (Eclesiastés 11:6).
SABO STAKʼOBIL LI KʼUSITIK TSOTSIK SKʼOPLALE
BEILTASEL TA VIVLIA: «Acʼbun lec jbijil [...]. Li acʼope jaʼ melel scotol; staoj yav tucʼ o» (Salmo 119:144, 160).
¿K’USI SK’AN XAL? Li Vivliae tstakʼ li kʼusi tsjakʼbe sba jutuk mu skotoluk li krixchanoetike. Jech kʼuchaʼal liʼe:
-
¿Mi oy sbalil li kuxlejale?
-
¿Kʼu yuʼun oy tajek vokolil?
-
¿Kʼusi chkʼot ta jtojolaltik mi lijchame?
-
¿Kʼusi chkʼot ta pasel ta tsʼakal?
Ta smiyonal noʼox krixchanoetik ta spʼejel balumil staojbeik stakʼobil ta Vivlia li sjakʼobiltak taje xchiʼuk yantik sjakʼobiltak. Koliyal taje, avie mas xa xmuyubajik.
LI KʼUSI XUʼ XAPASE: Ta jtijkutik avoʼonton sventa xakʼel atuk li kʼusi chchanubtasvan li Vivliae. Xuʼ xakʼanbe junuk stestigo Jeova ti akʼo skoltaot ta yaʼibel smelolale. Xuʼ xa och noxtok li ta jpajinakutik ta Internet ta jw.org o xuʼ xabat ta junuk tsobajel. Muʼyuk me tojbil xchiʼuk muʼyuk chichʼ tsobel takʼin.
YAN BEILTASELETIK TA VIVLIA
Ochan ta jpajinakutik ta Internet ta jw.org xchiʼuk kʼelo li video ¿Kʼu yuʼun skʼan jchantik li Vivliae? Ti oy mas ta 880 jeltos kʼopetike.
TEUK TA JOLTIK TI JTUNEL KUʼUNTIK TI TSBEILTASUTIK LI DIOSE
«Xmuyubajik noʼox li buchʼutik oy ta sjol yoʼontonik ti chtun yuʼunik mantale» (MATEO 5:3).
KOJTIKINTIK LEK LI BUCHʼU LAJ YAKʼ LI VIVLIAE
«Nopajanik ta stojolal Dios, vaʼun chnopaj tal ta atojolalik ek» (SANTIAGO 4:8).
CHANO LI VIVLIAE XCHIʼUK NOPBO SKʼOPLAL
«Jaʼ noʼox oy ta yoʼnton o li smantaltac [Jeova nwt], * ti jaʼ tsnopilan o ta yoʼnton ta cʼacʼal ta acʼubale. [...] Scotol li cʼusi tspase lec chbat yuʼun scotol» (SALMO 1:1-3).
^ par. 23 Li Vivliae chal ti jaʼ Jeova sbi li Diose.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Kʼusi skʼan xal ti oy ta koʼontontik Skʼop Diose? ¿Mi persa skʼan oyuk jrelijion sventa xkakʼ ta ilel ti oy ta koʼonton li Skʼop Diose?
Kʼelo oxtos kʼusitik ti xuʼ skoltaot sventa xavakʼ ta avoʼonton li mantale. Jech xtok, kʼelo chantos kʼusitik xchʼunojik yantik ta sventa li mantal ti mu jechuk ta melele.
LI JKʼEL˗OSIL TA TOYOLE
¿Mi xuʼ skoltaun li Vivliae?
Li voʼneal livroe yichʼoj tal tojobtaseletik ti toj jtunelike.
