Li kʼusitik tsjakʼ jkʼelvunetike

¿‹Buchʼutik li maʼuk jchʼunolajeletik› laj yal Pablo ta 2 Korintios 6:14?

Li ta 2 Korintios 6:14 xi chale: «Mu me xapasik ta jun xchiʼuk li buchʼutik maʼuk jchʼunolajeletike». Li stsʼak loʼile jamal chakʼ ta ilel ti jaʼ chalbe skʼoplal li buchʼutik muʼyuk te li ta stsobobbail yajtsʼaklomtak Kristoe. Li ta yantik tekstoetik ta Vivliae li jtakbol Pabloe la stunes li jpʼelantik kʼop liʼe: «Li buchʼu maʼuk jchʼunolajele» o li «buchʼutik maʼuk jchʼunolajeletike» ti jaʼ tskoltautik sventa xkaʼibetik smelolale.

Jech kʼuchaʼal liʼe, li Pabloe tsots laj yalbe jchʼunolajeletik ti mu xikʼik batel yermanoik ta snail chapanobbaile, jaʼ xkaltik ta stojolal li buchʼutik maʼuk jchʼunolajeletike (1 Korintios 6:6). Li buchʼutik maʼuk jchʼunolajeletike jaʼ skʼoplalik li jchapanvanejetik ti te chtunik ta snail chapanobbail ta Korintoe. Li ta xchibal skarta Pabloe xi laj yale: «Li buchʼutik maʼuk jchʼunolajeletik ti makbil snopbenik» yuʼun li Satanase, yuʼun mu xjelav xojobal li lekil aʼyej ta stojolalike. Li krixchanoetik taje muʼyuk oy ta yoʼontonik chtunik ta stojolal Jeova, yuʼun xi onoʼox laj yal li jtakbol Pablo li ta yantik versikuloetik echʼe: «Chlokʼ xpix kʼalal tsutik ta stojolal li Jeovae» (2 Korintios 3:16; 4:4).

Junantik li buchʼutik maʼuk jchʼunolajeletike tspasik kʼusi chopol o chichʼik ta mukʼ diosetik (2 Korintios 6:15, 16). Pe mu skotolikuk tskontrainik li yajtuneltak Jeovae, yuʼun oy junantike chlik ayanuk ta yoʼontonik li melele, oy buchʼutik ti jchʼunolajeletik li snup xchiʼilike xchiʼuk muʼyuk yiktaoj sbaik ta skoj taje (1 Korintios 7:12-14; 10:27; 14:22-25; 1 Pedro 3:1, 2). Jaʼ yuʼun, li jtakbol Pabloe ep ta velta la stunes li jpʼel kʼop liʼe: «Li buchʼutik maʼuk jchʼunolajeletike», jech kʼuchaʼal la jkʼelbetik tal skʼoplal ta akʼole ti jaʼik li buchʼutik muʼyuk te oyik li ta tsobobbail yajtsʼaklomtak Kristoe, jaʼ xkaltik, «li jchʼunolajeletik yuʼun Kajvaltike» (Echos 2:41; 5:14; 8:12, 13).

Li beiltasel ti te ta jtatik ta 2 Korintios 6:14 jtunel tajek yuʼunik kʼalal oy kʼusi snuptan li jchʼunolajeletike. Li tekstoe mas chichʼ tunesel kʼalal chichʼ tojobtasel li buchʼu oy ta yoʼontonik chnupunike (Mateo 19:4-6). Li melel yajtsʼaklomtak Kristo ti yakʼoj xa sba ta stojolal Jeova xchiʼuk yichʼoj xa voʼe ta stʼuj lek xchiʼuk ta stunes lek spʼijil kʼalal muʼyuk chnupun xchiʼuk li buchʼu maʼuk jchʼunolajele, yuʼun jelel tajek ti kʼu yelan chanubtasbilike, li kʼusi oy ta yoʼonton tstaike xchiʼuk li kʼusi xchʼunojike.

¿Pe kʼusi xuʼ xkaltik ta stojolal li buchʼutik jaʼ to yakal chichʼik chanubtasel ta Vivlia xchiʼuk ti xojtikinik junantik ermanoetike? ¿Kʼusi xuʼ xkaltik xtok ta stojolal li jchol mantaletik ti muʼyuk to yichʼojik voʼe? ¿Mi te van kapal skʼoplalik ta buchʼutik maʼuk jchʼunolajeletike? Moʼoj, yuʼun li buchʼu laj xa xchʼamik li kʼusi melel xchiʼuk ti chchʼiik echʼel ta mantal sventa xichʼik voʼe, muʼyuk te kapal skʼoplalik li ta buchʼu maʼuk jchʼunolajeletike (Romanos 10:10; 2 Korintios 4:13). Kʼalal muʼyuk toʼox yichʼoj voʼ li Kornelioe, laj yichʼ ojtikinel kʼuchaʼal «jun vinik ti lek chichʼ ta mukʼ xchiʼuk ti xiʼtaoj Dios» (Echos 10:2).

¿Mi lek van ti jun yajtsʼaklom Kristo xnupun xchiʼuk li buchʼu muʼyuk to bu yichʼoj voʼ ta skoj ti maʼuk chalbe skʼoplal Pablo li ta 2 Korintios 6:14? Moʼoj, yuʼun li jtakbol Pabloe jamal laj yalbe tojobtaseletik li yajtsʼaklomtak Kristo ti chamem xchiʼilike. Xi laj yale: «Kolem xa sventa xnupun xchiʼuk ti buchʼu tskʼane, pe jaʼ noʼox ta sventa Kajvaltik» (1 Korintios 7:39). Jech kʼuchaʼal chal li tojobtasel taje, ch˗albatik li yajtsʼaklomtak Kristo ti jaʼ noʼox xuʼ saʼ snup xchiʼilik ta «sventa Kajvaltik ».

¿Kʼusi skʼan xal ti ta «stojolal li Kajvaltike» xchiʼuk ta «stojolal Kristoe» xie? Li ta Romanos 16:8-10 xchiʼuk Kolosenses 4:7 li Pabloe chalbe skʼoplal krixchanoetik ti te oyik ta ‹stojolal Kristo› o ta «stojolal li Kajvaltike». Li tekstoetike xi chalbe skʼoplal li krixchanoetik taje: «‹Jchiʼiltaktik ta abtel›, ‹ti tukʼ oyik ta stojolal Kristoe›, ‹kʼanbil ermanoetik ti tukʼ chtunike› xchiʼuk ‹jchiʼiltaktik ta mosoil›».

¿Bakʼin chkʼot ta ‹jchiʼiltik ta mosoil ta sventa Kajvaltik› li jun krixchanoe? Jaʼo kʼalal tspas li kʼusi oy ta sba spasel li jun mosoile xchiʼuk ti muʼyuk tspas li kʼusi tskʼan yoʼonton stuke. Xi chal li Jesuse: «Mi oy buchʼu tskʼan chtal ta jtojolale, akʼo sjip ta yoʼonton xkuxlejal, akʼo xkuch li jtel teʼ sventa vokolile xchiʼuk akʼo stsʼakliun˗o batel» (Mateo 16:24). Kʼalal chakʼ xkuxlejal jun krixchanoe, jaʼo chkʼot ta yajtsʼaklom Kristo. Mi laje, chichʼ voʼ, chkʼot ta yajtunel Jeova xchiʼuk lek xa chil sbaik. * Kʼalal chal jaʼ noʼox xanupun «ta sventa Kajvaltik» xie, jaʼ skʼan xal ti jaʼ noʼox xnupun xchiʼuk li ‹smoso Dios xchiʼuk smoso Kajvaltik Jesukristo› (Santiago 1:1).

Xijmuyubaj yuʼun kʼalal chkiltik chchʼi ta mantal li buchʼu chichʼ chanubtasel ta Vivliae. Akʼo mi jech, muʼyuk to yakʼoj xkuxlejal ta stojolal Jeova xchiʼuk muʼyuk to lokʼem ta yoʼonton chtun ta stojolal. Ta skoj ti yakal to tsjel xkuxlejale xchiʼuk ti oy to kʼusitik skʼan spas ti tsots skʼoplal sventa xkʼot ta yajtsʼaklom Kristoe, maʼuk to yorail sventa oy kʼusi snop tspas ta xkuxlejal, jech kʼuchaʼal ti chnupune.

Li jun yajtsʼaklom Kristoe, ¿mi lek ti slekomin sbaik xchiʼuk li buchʼu yakal chichʼ chanubtasel ta Vivlia ti chchʼi xa ta mantal yilel xchiʼuk ti jaʼ to tsmala xichʼ voʼ sventa chnupunike? Muʼyuk lek, yuʼun muʼyuk chlokʼ ta yoʼonton chichʼ voʼ li buchʼu chichʼ chanubtasel ta Vivliae. Jaʼ noʼox chichʼ˗o voʼ ta skoj ti tskʼan chnupune, yuʼun mu stakʼ xnupun xchiʼuk jun yajtsʼaklom Kristo mi muʼyuk yichʼoj voʼe.

Mu jaluk ch˗echʼ sventa xuʼ xichʼ voʼ li buchʼu chichʼ chanubtasel ta Vivliae, mi chchʼi xa ox ta mantale xuʼ xa xichʼ voʼ. Jaʼ yuʼun, mu vokoluk ta chʼunel li beiltasel ti jaʼ noʼox skʼan xijnupun ta sventa Kajvaltike. Pe mi staoj xa sjabilal li buchʼu tskʼan chnupune, mi tey chʼi tal ta steklumal Jeova, mi chkʼotilan˗o ta tsobajeletike, ¿pe mi muʼyuk yichʼoj˗o voʼe? Mi jeche, ¿kʼu yuʼun ti muʼyuk yakʼoj˗o xkuxlejal ta stojolal Jeovae? ¿Kʼu yuʼun ti te xnopete? ¿Mi oy van kʼusi xnaʼet˗o? Akʼo mi muʼyuk te kapal skʼoplal li ta buchʼutik maʼuk jchʼunolajeletike, mu xuʼ xkaltik ti te skʼoplal xtok ta ‹sventa Kajvaltike›.

Li tojobtasel laj yal Pablo ta sventa li nupunele jaʼ sventa jlekilaltik (Isaias 48:17). Kʼalal yakʼoj sbaik ta stojolal Jeova xchaʼvoʼalik li buchʼu snopoj chnupunike, chkʼot me ta pasel yuʼunik li kʼusi yalojbe sbaike, yuʼun tsots skʼoplal chilik xchiʼuk tsotsik ta mantal. Koʼol li chanubtasel chichʼike xchiʼuk li kʼusi oy ta yoʼonton tstaike, taje jaʼ me chkoltaatik sventa xmuyubajik noʼox. Jech xtok, kʼalal jaʼ noʼox chnupunik ta sventa Kajvaltike, chakʼik ta ilel ti tukʼ chakʼ sbaik ta stojolal Jeovae, vaʼun ch˗akʼbatik bendision sbatel osile. Li Vivliae xi chal ta stojolal li Jeovae: «Tukʼ chavakʼ aba ta stojolal li buchʼu tukʼ chakʼ sbae» (Salmo 18:25).

[Tsʼib ti mukʼtik sletraile]

[Lokʼol]

«Tukʼ chavakʼ aba ta stojolal li buchʼu tukʼ chakʼ sbae»