Chnel yuʼunik li chanob vun sventa vivlia ta Galaad 125

Chichʼ albel li misioneroetik ti jechikuk kʼuchaʼal Jeremiase

«LI CHANOB vun ta Galaad liʼe ta xichʼ naʼel-o.» Jaʼ jech laj yal Geoffrey Jackson, ti jaʼ li ta Jtsop Jbeiltasvanej kʼalal ikʼopoj ta stojolal li 6,156 buchʼutik te ti kʼalal nel li Chanob vun sventa Vivlia ta Galaad yuʼun Watchtower ti kʼot ta pasel ta 13 yuʼun septiembre ta 2008. Li chanob vun ta Galaade mas xa ta vaxakmil misioneroetik stakoj batel «ta sbejel banamil», taje te smakojbe skʼoplal li 56 jchanunetik ti jaʼ to nel yuʼunike (Hech. 1:8).

Li ermano Jackson ti jaʼ li buchʼu laj yichʼ ta venta li tsobajele, xi la sjakʼe: «¿Mi cha skoltaoxuk sventa lek xkʼot ta pasel avuʼunik chol mantal li kʼusi chʼunbaj chavalike?». Vaʼun lik yal chantos kʼusitik sventa masuk chʼunbaj li kʼusi chal jun yajtsʼaklom Cristoe: lekuk stalelal, lekuk kʼusi tspas, ti akʼo stekeluk ora slokʼes ta Vivlia li kʼusi chakʼ ta chanele xchiʼuk ti akʼo yakʼ ta yoʼonton ta yakʼel ta ojtikinel li sbi Diose.

David Schafer ti jaʼ jun jkoltavanej ta abtel ta Komite sventa Stsʼibael vunetike, xi sbi li mantal laj yale: «¿Mi xuʼ avuʼunik ta yaʼibel smelolal skotol?». Li ermano Schafer laj yal ti xuʼ la chaʼibeik smelolal li jchanunetik skotol li kʼusi chtun yuʼunik ta misioneroal mi muʼyuk chikta sbaik ta saʼel li Jeovae xchiʼuk ti jech-o chichʼbeik ta mukʼ yabtel li «jʼabtel ti jun [«tukʼ», NM] yoʼnton [...], ti lec bije» (Pro. 28:5; Mat. 24:45).

Vaʼun li John E. Barr, ti jaʼ li ta Jtsop Jbeiltasvaneje, xi sbi li mantal laj yale: «Mu me kʼusi xavakʼ xchʼakoxuk li ta kʼanelal yuʼun Diose». Li tojobtaseletik laj yakʼ kʼuchaʼal jun totile jaʼ patbat-o yoʼontonik li buchʼutik nel yuʼunik chanun ta skoj ti laj van yat yoʼontonik xchiʼuk stot smeʼik ta sventa ti bu chtakatik batel ta chol mantale xchiʼuk li vokol tsnuptanik ta skoje. Xi laj yale: «Li kʼanelal yuʼun Diose jaʼ me jlekil nakʼobbailtik xchiʼuk toj jun yutsil ti muʼyuk bu jech jtatik-oe». Mu kʼusi xuʼ chchʼakatik ta kʼanelal yuʼun Dios li misioneroetik mi muʼyuk bu chchʼak sbaik lokʼel stukike.

Sam Roberson ti ch-abtej ta Departamento sventa Chanob vunetik sventa Diose laj yalbe li buchʼutik te ti akʼo slapik li jlik «labal sba yutsil kʼuʼil ti muʼyuk jech ta taele». Xuʼ me «[xvinaj] stalel Cajvaltic Jesucristo» ta stojolal li jchanunetike, jaʼ xkaltik, ti slapbeik li stalelal kʼalal tskʼelbeik skʼoplal li xkuxlejale xchiʼuk ti jech tspasik echʼel kʼuchaʼal chanubtasvane (Rom. 13:14). Laje, li William Samuelson ti jaʼ tskʼel li abtelal li ta departamento taje, laj yakʼ ta ilel ti maʼuk chichʼ tsakbel ta mukʼ yaʼyej krixchanoetik sventa stsake ta mukʼ li jun krixchanoe, moʼoj, jaʼ la li kʼusi chal Diose.

Michael Burnett ti jaʼ jun jchanubtasvaneje la sjakʼbe jchanunetik kʼusitik la snuptanik kʼalal la xcholik mantale. Kʼalal jaʼo te oyik li ta Chanob vun ta Galaad ta Patterson (Nueva York), jutuk mu skotolikuk te la xcholik mantal ti bu toj ep xa ta velta cholbil mantale, akʼo mi jech, la to staik jlom krixchanoetik ti oy ta yoʼontonik mantale. Gerald Grizzle ti chtun ta Ofisina sventa Mukʼta Tsobajeltik ta oxib kʼakʼale oy kʼusi la sjakʼbe oxvoʼ ermanoetik ti yakal chchanunajik li ta Chanob vun sventa li Buchʼutik Sbainojik Betele. Li kʼusi laj yal li ermanoetik taje jaʼ me koltavan sventa snaʼik li buchʼutik nel yuʼunik chanun ta Galaad kʼusitik tsnuptanik ti bu chtakatik batel ta chol mantale.

 David Splane ti nelem yuʼun li Chanob vun ta Galaad 42 xchiʼuk ti jaʼ li ta Jtsop Jbeiltasvaneje laj yal jun mantal ti xi sbie: «Jechukanik me kʼuchaʼal li Jeremiase». Akʼo mi chiʼ kʼalal laj yichʼ yabtel li Jeremiase akʼbat stsatsal yuʼun Jeova ti kʼuyepal chtun yuʼune (Jer. 1:7, 8). Jaʼ jech tspas Dios ta stojolalik ek li achʼ misioneroetike. Li ermano Splane xi la stojobtas li buchʼutik achʼ to nel yuʼunik chanune: «Mi oy akʼopik xchiʼuk junuk ermanoe, chotlanik vaʼun tsʼibaik ta vun lajuntosuk stalelal ti toj lek chavilbeike. Mi muʼyuk xa tabeik lajunebuke, jaʼ skʼan xal ti mu to xavojtikinik leke».

Li Jeremiase jaʼ jun vinik ti oy ta yoʼonton laj yil svokole. Kʼalal chikta xaʼox yaʼi li yabtele, la skʼopon Jeova, vaʼun koltaat (Jer. 20:11). Li ermano Splane xi tojobtasvane: «Kʼalal chavat avoʼontonike, albeik Dios. Labal to chavilik ti cha skoltaike».

Sventa tstsutses tsobajel li buchʼu laj yichʼ ta venta tsobajele la svulesbe ta sjol li buchʼutik te ti ep kʼusitik la xchanik li buchʼutik nel yuʼunik chanun sventa masuk chʼunbaj li kʼusi chalike. Kʼalal mi te xaʼox oyik ti bu chcholik mantale, ta skoj ti chʼunbaj li kʼusi chalike mas me oy stsatsal li mantal chalike (Isa. 43:8-12).

[Rekuadro ta pajina 22]

LI KʼUSITIK SVENTA CHANUNE

Ta jayib lum likem li jchanunetike: 6 • Ta jayib lum chbatik ta abtel: 21

Jayib jchanunetik: 56 • Spromedioal sjabilalik: 32.9 • Spromedioal jabiletik oyik ta mantal: 17.4

Spromedioal jabiletik ta tsʼakal ora chol mantal: 13

[Lokʼol ta pajina 23]

Chanob vun sventa Vivlia ta Galaad yuʼun Watchtower 125

Chlik ta chapel ta sba fila ta yeloval kʼalal ta slajeb fila ta patil, xchiʼuk li biiletike chlik ta tsʼetkʼob kʼalal ta batsʼikʼob tstuts.

1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Pérez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Pérez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.